Akin a Tumboken “so Kristo”?

“No siopaman a too, maliket ya ontumbok ed siak, iburi to so inkasikato tan . . . inagew-agew [a] tumboken to ak.”​—LUC. 9:23.

1, 2. Akin ya importante a molimolien tayo no akin a nepeg tayon tumboken “so Kristo”?

SIKAYORAN balo ni tan kalangweran, seguradon malikeliket si Jehova a nanengneng kayo ed limog na saray managdayew to diad dalin! Legan yon itutultuloy ya aaralen so Biblia, regular a mimiaral, tan onaaligwas ed pikakabat ed manangiliktar-bilay a katuaan a walad Salita na Dios, nepeg yon ipapuso iyan imbitasyon nen Jesus: “No siopaman a too, maliket ya ontumbok ed siak, iburi to so inkasikato, tan sakbaten to so [“panamairapan a kiew,” NW] to ya inagew-agew, tan tumboken to ak.” (Luc. 9:23) Ibabaga nen Jesus a say pangiburi ed dili tan pagmaliw a patumbok to et sakey a bengatlan nepeg a labayen tayon gawaen. Importante sirin a pantongtongan tayo no akin a nepeg tayon tumboken “so Kristo.”​—Mat. 16:13-16.

² Komusta balet iramay ontutumbok la ed Jesu-Kristo? Sikaray napapaseseg a ‘mantultuloy a gawaen itan a nagkalalo.’ (1 Tes. 4:1, 2, NW) Balanglan agano itayo ni odino abayag la ed katuaan, no molimolien tayo iray rason no akin a tumboken tayo so Kristo, natulongan itayon mangiyaplika ed simbawa nen Pablo tan nagkalalon manumbok ed Kristo ed inagew-agew. Pantongtongan tayo pa natan so limaran rason no akin a nepeg tayon labayen a tumboken so Kristo.

Pian Lalon Onapit ed si Jehova

3. Anto so duaran paraan pian nakabat tayoy Jehova?

³ Sanen kakatongtongen nen apostol Pablo iray taga Atenas legan ton akaalagey “ed pegley na Areopago,” inkuan to: “Tinandaan [na Dios] so pansasaginonor na panaon, tan saray panganggaan na panag-ayaman da, pian anapen  da so Dios, ompan dia ed pankarkarapas da, sikato so naromog da, anggan wala ed ag-arawi ed sinansakey ed sikatayo.” (Gawa 17:22, 26, 27) Naanap tayo so Dios tan sarag tayon nakabat. Alimbawa, no maapresya tayon dalepdepen iray palsa to, dakel so naaralan tayo nipaakar ed kualidad tan abilidad to. (Roma 1:20) Impakabat met nen Jehova so inkasikato panamegley na nisulat a Salita to, say Biblia. (2 Tim. 3:16, 17) No kapigan tayo ‘uumamengen iray kimey to’ tan ‘dadalepdepen iray gawa to,’ diman tayo mas nakakabat si Jehova.​—Sal. 77:12.

4. Panon ya ontulong so panumbok ed Kristo pian mas onelet so relasyon tayo ed si Jehova?

⁴ Say sakey a sankaabigan a paraan pian mas lalo nin onapit ed si Jehova et say panumbok ed Kristo. Isipen pa labat so glorian walad si Jesus diad abay nen Ama to “nen andi ni mundo”! (Juan 17:5) Sikato so “sengeg na pinalsa na Dios.” (Apo. 3:14) Lapud “panguloan na amin a pinalsa,” sikatoy abaybayag lan manbibilay ed tawen a kaibay Ama to, si Jehova. Antis ton nagmaliw a too, agto labat basta kabkaibay Ama to, noagta sikato so sankaapitan a kaulop na Dios, a malikeliket a mikikimey ed Makapanyarin-amin. Kanian anggapo lay relasyon a mas maapit ni nen say relasyon na Dios tan si Jesus. Aglabat inobserbaan nen Jesus no panon ya aasikasoen na Ama to iray bengatla, nisay inaral to labat so liknaan tan saray manunan kualidad nen Ama to. Noagta, nagmaliw iratan a kabiangan na personalidad to tan inyaplika toy amin a naaralan to manlapud Ama to. Bilang resulta, sayan matulok ya Anak et talagan nagmaliw a singa si Ama to, kanian atukoy ed Biblia bilang “ereng na agnanengneng a Dios.” (Col. 1:15, NW) No tumboken tayon maong so Kristo, mas onelet so relasyon tayo ed si Jehova.

Pian Lalon Naalig si Jehova

5. Anto so ontulong ed sikatayo a lalon naalig si Jehova, tan akin?

⁵ Sikatayoy ‘ginawa a kaulibay na Dios,’ kanian sarag tayon ipatnag iray manunan kualidad to. (Gen. 1:26) Pinaseseg nen apostol Pablo iray Kristiano ya “aligen [da] so Dios, bilang inad-aro ton ananak.” (Efe. 5:1, NW) No tumboken tayoy Kristo, natulongan itayon naalig so mangatatawen ya Ama tayo. On ta anggapo lay makapipara ed impangalig nen Jesus ed panagnonot tan kiwas nen Jehova, tan anggapo lay mas malinew a makapangibangat nipaakar ed si Jehova. Sanen wadiad dalin, aglabat impakabat nen Jesus so ngaran nen Jehova. Noagta, diad salita tan gawa, diad saray bangat tan ehemplo to et imparungtal to met imay Personan irerepresenta na satan a ngaran.​—Basaen so Mateo 11:27.

6. Saray bangat nen Jesus et mangipaparungtal na anto nipaakar ed si Jehova?

⁶ Imbangat nen Jesus no antoray kakaukolanen na Dios tan no antoy nalilikna to ed saray managdayew to. (Mat. 22:36-40; Luc. 12:6, 7; 15:4-7) Alimbawa, kayari ton inaon so sakey ed saray Samploran Ganggan ya, “agka mikalugoran,” impaliwawa nen Jesus no antoy  panmoria na Dios ed no antoy walad puso na samay too antis to nin gawaen itan. Inkuan to: “Balang sakey ya onlimgis ed sakey a bii ed pangagum to, akilawanan la ed sikato diad puso to.” (Exo. 20:14; Mat. 5:27, 28) Kayari ton imbagay lingon interpretasyon na saray Fariseo ed Ganggan na Dios, a kuan dan, “aroen moy kaparam a too, tan gulaen moy kabusol mo,” impaamta nen Jesus so kanonotan nen Jehova, salanti, ‘aro yo ray kabusol yo, tan ipikasi yo ray mamapasegsegang ed sikayo.’ (Mat. 5:43, 44; Exo. 23:4; Lev. 19:18) No naamtaan tayoy panagnonot tan liknaan na Dios tan no antoray kakaukolanen to ed sikatayo, natulongan itayon lalon mangalig ed sikato.

7, 8. Antoy naaralan tayo ed si Jehova manlapud ehemplo nen Jesus?

⁷ Impakabat met nen Jesus no antoy personalidad na Ama to panamegley na alimbawa. Sano nababasa tayo ed Ebanghelyo ya alikna nen Jesus so panangabagey ed saray mankaukolan, empatya ed saray nanairapan, impakasanokan ed saray babangatan to sanen binano da ray ugugaw, agta singa tayo nanenengneng so Ama ya ontan met so nalilikna to? (Mar. 1:40-42; 10:13, 14; Juan 11:32-35) Isipen pa no panon a nipabitar ed saray kiwas nen Jesus so manuna iran kualidad na Dios. Agta ipapatnag na saray milagro na Kristo a balbaleg so pakapanyari to? Ingen, agton balot inusar itan diad makasarilin paraan odino pian sakitan so arum. (Luc. 4:1-4) Agta malinlinew met ed samay impamaekal to’d saray maagum a negosyante diad templo a sikatoy maaro ed hustisya? (Mar. 11:15-17; Juan 2:13-16) Diad saray bangat tan inusar ton makapasagyat a balikas pian sabiey kapusoan na totoo et mapatpatnag a sikatoy “babaleg nen si Solomon” diad karunongan. (Mat. 12:42) Tan anto met so nibaga tayo ed samay aron impatnag nen Jesus diad impangiter to’d bilay to? On, talagan ‘anggapo lay babaleg ya aro nen satan’!​—Juan 15:13.

⁸ Say Anak na Dios et nasnaspot ton inrepresenta si Jehova diad amin ya imbaga tan ginawa to, kanian nibaga ton: “Say akanengneng ed siak anengneng to so Ama.” (Basaen so Juan 14:9-11.) Kanian no tutumboken tayo so Kristo, singa tayo met la tutumboken si Jehova.

Si Jesus Imay Nilanaan nen Jehova

9. Kapigan si Jesus nagmaliw a samay Sakey a Nilanaan na Dios, tan panon?

⁹ Imanoen pa no antoy agawa nen loglog na 29 C.E., sanen say 30 años a si Jesus et linma ed si Juan a Managbautismo. “Et si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng to so espiritu na Dios ya onleleksab a singa sakey a malapati, tan oonla ed sikato.” Diad saman et sikatoy nagmaliw a Kristo, odino Mesias. Tan diad saman met impaamta nen Jehova a mismo a si Jesus imay Sakey a Nilanaan to, ya inkuan to: “Saya so Ana’ko ya inararok; napaliketak a maong ed sikato.” (Mat. 3:13-17) Alay abig iyan rason pian labayen tayon tumboken so Kristo!

10, 11. (a) Diad antoran paraan inusar ed si Jesus so titulon “Kristo”? (b) Akin a seguroen tayon natumbok tayoy Jesu-Kristo?

¹⁰ Diad Biblia, say titulon “Kristo” et inusar ed si Jesus diad nanduruman paraan a singa, Jesu-Kristo, Kristo Jesus, tan Kristo. Si Jesus a mismo so primeron angusar ed terminon “Jesu-Kristo,” say ngaran to a tinumbokan na titulo. Diad samay pikakasi to’d Ama to, oniay inkuan to: “Saya sikato so andi-anggaan a bilay, a  naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) No oniay impangusar, say ipapabitar et no siopa imay imbaki na Dios tan samay Nilanaan to. Balet, no walad unaan imay titulo, a singa ed “Kristo Jesus,” say idadanet et samay posisyon imbes a samay persona. (2 Cor. 4:5) Say sananey nin paraan na panangidanet ed posisyon nen Jesus bilang Mesias et say panangusar labat ed balikas a “Kristo.”​—Gawa 5:42.

¹¹ Balet, antokaman ni pangusar ed “Kristo” pian tukoyen si Jesus, nipapabitar iyan importantin katuaan: Anggaman say Anak na Dios et linma’d dalin bilang too pian ipaamtay linawa na Ama to, sikatoy aliwan ordinaryo labat a too odino propeta, noagta linma dia pian magmaliw a Sakey a Nilanaan nen Jehova. Kanian, seguroen tayon natumbok tayo iyan Nilanaan.

Si Jesus so Mogmon Dalan Pian Nilaban

12. Antoy inyebat nen Jesus ed si apostol Tomas a makana ed sikatayo?

¹² Say sananey nin importantin rason pian mantultuloy a tumboken so Mesias et walad samay inkuan nen Jesus ed saray matoor ya apostol to, pigaran oras antis na impatey to. Bilang ebat ed tepet nen Tomas nipaakar ed inkuan nen Jesus ya itaynan tan pangitarya toy pasen parad sikara, inkuan to: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:1-6) Katongtong ed saman nen Jesus so 11 a matoor ya apostol. Insipan ton walay pasen da ed tawen, balet sayan imbaga to et makana met ed saramay walaan na ilalon andi-anggaan a bilay ed dalin. (Apo. 7:9, 10; 21:1-4) Panon?

13. Diad antoran paraan a si Jesus so “dalan”?

¹³ Si Jesu-Kristo so “dalan,” salanti, say mogmon dalan pian makaasingger itayo ed Dios. Sano manpikasi itayo, makaseguro itayon iter na Ama so antokaman a kerew tayo unong ed linawa to no iparalan tayo itan ed ngaran nen Jesus. (Juan 15:16) Balet, wala ni arum a rason no akin a si Jesus so “dalan.” Lapud kasalanan et nisian so katooan ed Dios. (Isa. 59:2) Inter nen Jesus so “bilay to a panondon ed amayamay.” (Mat. 20:28) Bilang resulta, “say dala nen Jesus . . . linisan to itayo ed amin a kasalanan.” (1 Juan 1:7) Sirin, inlukas na Anak so dalan pian makapipulangan itayo ed Dios. (Roma 5:8-10) Nawalaan itayo na naabobonan a relasyon ed Dios no walaan itayoy pananisia ed si Jesus tan no tutuloken tayo.​—Juan 3:36.

14. Akin a nibagan si Jesus so “katuaan”?

¹⁴ Si Jesus so “katuaan” aliwa labat a lapud lawas ton sinalita tan nambilay unong ed katuaan, noagta lapud asumpal ed sikato so amin na saramay amayamay a nisulat a propesiya nipaakar ed Mesias. “Ta anggan dakel so saray sipan na Dios,” so insulat nen apostol Pablo, “dia ed sikato so kawalaan na on.” (2 Cor. 1:20) Anggan say “anino na saray penel na bengatla ya onsabi” a walad Mosaikon Ganggan et tinmua ed si Kristo Jesus. (Heb. 10:1; Col. 2:17) Si Jesus so akasentroan na amin a propesiya, tan ontutulong iratan pian natalosan tayoy betang to ed kasusumpal na gagala nen Jehova. (Apo. 19:10) Pian minabang itayo sano sumpalen la na Dios iray gagala to parad sikatayo, nepeg tayon tumboken so Mesias.

15. Diad antoran paraan a si Jesus so “bilay”?

 ¹⁵ Si Jesus so “bilay” lapud sinaliw toy katooan panamegley na dala to, tan say regalon andi-anggaan a bilay et iter na Dios “ed [panamegley nen] Kristo Jesus a Katawan tayo.” (Roma 6:23) Si Jesus met so “bilay” parad saramay inaatey la. (Juan 5:28, 29) Isipen pa met so gawaen to bilang Atagey a Saserdote legan na Milenyon Uley to. On, ibulos to iray sakop to manlapud panangaripen na kasalanan tan patey!​—Heb. 9:11, 12, 28.

16. Antoray rason tayo pian tumboken si Jesus?

¹⁶ Sirin, makabkabaliksan ed sikatayo imay ebat nen Jesus ed si Tomas. Si Jesus so dalan, say katuaan, tan say bilay. Sikato imay imbaki na Dios pian nisalba so mundo panamegley to. (Juan 3:17) Tan anggapoy makaasingger ed Ama no aliwan diad panamegley to. Oniay malinlinew ya imbagay Biblia: “Anggapo so arum a kilabanan: ta anggapo so arum a ngaran ed leksab na tawen, a niiter ed saray totoo, a nayarin kilabanan tayo.” (Gawa 4:12) Sirin, antokaman so imbangat ed sikatayo nensaman, makabat no panisiaan tayoy Jesus tan tumboken tayo, pian niwanwan itayo ed bilay.​—Juan 20:31.

Niganggan Itayon Denglen so Kristo

17. Akin et importante a denglen tayo so Anak na Dios?

¹⁷ Atasian di Pedro, Juan, tan Santiago so transpigurasyon. Diad saman et akadngel iray boses manlapud tawen a kuan to: “Saya sikato so Ana’ko, a pinilik. Sikato so denglen yo.” (Luc. 9:28, 29, 35) Importantin tuloy ya unoren tayo iyan ganggan a denglen so Mesias.​—Basaen so Gawa 3:22, 23.

18. Antoy nalalanor ed idengel ed si Jesu-Kristo?

¹⁸ Nalalanor ed idengel ed si Jesus so ‘inengneng tayo ed sikato, tan panmotektek ed alimbawa to.’ (Heb. 12:2, 3) Kanian, nepeg ya “imatleken tayo ed baleg a seseg” iray nababasa tayo nipaakar ed sikato diad Biblia tan diad saray publikasyon ya itatarya na “matoor tan makabat ya aripen,” ontan met ed saray narerengel tayo nipaakar ed sikato diad saray pantitipon. (Heb. 2:1; Mat. 24:45) Bilang saray karnero to, komon ta labalabay tayon denglen tan tumboken si Jesus.​—Juan 10:27.

19. Anto so ontulong ed sikatayon nitultuloy a tumboken so Kristo?

¹⁹ Sarag tayo kasin nitultuloy a tumboken so Kristo, antokamay nagawa? On, sarag tayo, daput no ‘tandaan tayon maong so uliran na saray maabig a salita’ diad pangiyaplika tayo ed saray naaralan tayo tekep na “pananisia tan panangaro a wala ed Kristo Jesus.”​—2 Tim. 1:13.

Anto so Naaralan Yo?

• Akin a mas napaapit itayo ed si Jehova no tumboken tayo so “Kristo”?

• Akin a no tutumboken tayo si Jesus et singa tutumboken tayo met lay Jehova?

• Diad anton paraan a si Jesus so “dalan, tan say katuaan, tan say bilay”?

• Akin a nepeg tayon denglen imay Sakey a Nilanaan nen Jehova?

[Tepetepet Parad Panagaral]

[Litrato ed pahina 29]

Napatnagan ed saray bangat nen Jesus so matalonggaring a kanonotan nen Jehova

[Litrato ed pahina 30]

Nepeg tayon matoor a tumboken so Nilanaan nen Jehova

[Litrato ed pahina 32]

Inkuan nen Jehova: “Saya sikato so Ana’ko . . . Sikato so denglen yo.”