No Panon Kan Magmaliw a Maliket Bilang Andiay Asawa

SARAY palabas tan nobela nipaakar ed paniinaroan et kaslakan lan isusumpal ed kasalan pian ompaway a maliket so sampot na istorya. Diad saratan et mabetbet a papapawayen a nalikna labat na sakey so peteg a liket no miasawa. Sakey ni, diad maslak a kultura, no manedad ka lay 18-25, kaukolan a miasawa ka la. “Ipapaliknay totoo ed sika a say angigagalaan labat ed bii et pian naasawa,” so kuan nen Debby sanen masulok a 20 años to. “Singa da ibabagan onggapo labat so bilay no akapiasawa ka la.”

Aliwa balet ya ontan so panmoria na maespiritual a too. Diad saray Israelita, anggaman dalan na kabibilay da so piasawa, walaray asalambit ed Biblia a maliket a lalaki tan bibii ya andiay asawa. Natan, walaray Kristianon pinili ray agmiasawa. Balet lapud saray sirkumstansya, dakel so nansiansian walad kasuloan. Antokaman ni rason da ed agda impiasawa, siansia nin say tepet et: Antoy sankaabigan a nagawaan na sakey a Kristiano ed kipapasen to bilang andiay asawa?

Si Jesus a mismo et ag-angasawa, tan natalosan met itan lapud samay asainmin lanti a niiter ed sikato. Imbaga to’d saray disipulo to a walaray patumbok ton “mangawat” met ed pagmaliw ya andiay asawa. (Mat. 19:10-12) Sirin, impabitar nen Jesus a pian ontalona bilang andiay asawa, kaukolan tayon awaten odino ilugaran itan ed puso tan nonot tayo.

Kasin say simbawa nen Jesus et para labat ed saramay ginagala ray agla miasawa pian sigpot a niteen so imano ra ed panaglingkor? (1 Cor. 7:34, 35) Andi met. Imanoen pay kipapasen na sakey ya agin nayarin labay to met so miasawa balet ta anggapo ni naromog ton matukoy a kapareha. “Nen kien labat et abigla ak ta walay katrabahok ya aliwan Tasi, ya imbaga to’d siak a labay to ak a pakasalan,” so kuan nen Ana, agin marikit a masulok a 30 años to. “Anggan panon et kinmibbual so pagew ko, balet ta pinatey kon tampol itan a liknaan, ta say labay ko labat a piasawaan et samay mas iyapit to ak ed Aman Jehova.”

Singa si Ana, dakel so agagin bibii a napapaliisan day miasawa ed agkapananisiaan lapud pilalek dan miasawa “dia ed linawa na Katawan.” * (1 Cor. 7:39; 2 Cor. 6:14) Rerespetoen day simbawa na Dios, kanian pinili ray agni miasawa. Panon ira kasin ontalona?

Araley Onnengneng ed Positibo

Say ontulong ed sikatayon naawat so sakey a situasyon anggano aliwan satan so nilabay tayo, et say awawey tayo. “No antoy walad siak, sikatoy panliliketan ko, agko la aanapen ta’y anggapo’d siak,” kuan nen Carmen, agin marikit a masulok a 40 años to. Siempre, walaray panaon a makalikna itayoy ermen odino dismaya. Balet lapud amta tayon naeeksperiensya met iya na dakel ya agagi ed interon mundo, ombibiskeg so liknaan tayon mantultuloy. Dakel lay walad kasuloan a tinulongan  nen Jehova ya ontalona tan mangarap ed arum niran problema.​—1 Ped. 5:9, 10.

Dakel so agagin lalaki tan bibii ya adiskobre da ray bentaha na walad kasuloan. “Parad siak, say sekreto na liket et no antam a panliketan iray bengatlan positibo, antokaman ni situasyon mo,” so kuan nen Ester, agin masulok a 30 años to. “Miasawa ak man o andi, kombinsido ak a basta unaen koy Panarian, anggapo ta’y maong a bengatlan isiblet nen Jehova ed siak,” so kuan ni nen Carmen. (Sal. 84:11) “Tua, aliwan onian talagay implanok ed bilay ko, balet maliket ak, tan mantultuloy ak a manliket.”

Saray Alimbawa na Andiay Asawa Diad Biblia

Agpinirawat na marikit nen Jefte so mansiansian marikit. Balet, sikatoy naobligan manlingkor ed templo manlapud inkatobonbalo to lapud sipan nen ama to. Andi-duaruwan lapud sayan ag-iilaloan ya asainmin et nauman iray plano to ed bilay tan aliwan satan so ginusto to. Duay bulan ton inakisan so agto la pakapiasawa tan pakapampamilya. Anggaman kuan, inawat to itan, tan mabulbulos a nanlingkor legay bilay to. Walaray Israelitan bibii a tinaon ya ompapasyar ed sikato pian komendaay inkamasakripisyo to.​—Uko. 11:36-40.

Say arum ya eunoko nen panaon nen Isaias et nayarin adismaya met ed kipapasen da. Ag-imbaga na Biblia no antoy sengegan na impagmaliw dan eunoko. Lapud kipapasen da et agda nagamoran so amin a pribilehyo na pagmaliw a membro na kongregasyon na Israel, tan agmet ira makapangasawa tan makapanilalak. (Deu. 23:1) Balet, natatalosan nen Jehova so liknaan da, tan kinomendaan toy mabulos dan intulok ed sipan to. Imbaga to ed sikaran nawalaan ira na “pakanodnonotan” tan “ngaran ya ando lan ando” diad abung to. Diad arum a salita, walay seguradon ilalo na sarayan matoor ya eunoko a manbilay na andi-anggaan diad Mesianikon Uley nen Jesus. Ag-iran balot lingwanan nen Jehova.​—Isa. 56:3-5.

Nidumaduma balet so kipapasen nen Jeremias. Kayari impanuro na Dios ed si Jeremias bilang propeta, say instruksion ed sikato et agmangaasawa lapud kritikal so panaon a pambibilayan to tan aliwan basta-bastay asainmin to. “Agka mangala na asawa,” so kuan nen Jehova, “anggapo met naani so anak mo a lalaki odino anak a bii dia ed saya a pasen.” (Jer. 16:1-4) Ag-ibabaga na Biblia no antoy alikna nen Jeremias ed sarayan instruksion, balet impabitar na satan a si Jeremias et sakey a toon panliliketan toy salita nen Jehova. (Jer. 15:16) Kalabas na pigaran taon, sanen sinungdoan nen Jeremias so makapasinagem a 18 bulan ya impangubkob ed Jerusalem, seguradon apaneknekan ton makabat so inyunor ed ganggan nen Jehova ya agmangasawa.​—Tag. 4:4, 10.

Pagmaliwen a Makabkabaliksan so Bilay

Saray asalambit a karakter ed Biblia et andiay asawa, balet sinuportaan ira nen Jehova tan ginawa ran okupadoy inkasikara diad panaglingkor ed sikato. Natan, magmaliw met a makabaliksan so bilay tayo no makabaliksan iray gagawaen tayo. Impasakbay na Biblia a saray bibiin mangipapaamta na maong a balita et magmaliw ya abalbaleg ya ulop. (Sal. 68:11) Kaiba’d saraya so nilibo ya agagin bibii ya andiay asawa. Dakel ed saraya so abendisyonan na espiritual ya ananak bilang bunga na ministeryo ra.​—Mar. 10:29, 30; 1 Tes. 2:7, 8.

 “Walay direksion na bilay ko lapud pampapayunir ko,” so inkuan nen Loli, kayari na 14 taon lan pampapayunir to. “Bilang sakey a marikit, say inka-okupadok so ontutulong ed siak pian napaliisay manermen. Kayari sanagew, sankaliknak so inkapnek ed pakakamorian talagan makakatulong ed totoo so panmiministeryok. Saya so mangiiter ed siak na baleg a liket.”

Dakel ya agagin bibii so akapanaral na balon lenguahe, tan pinalaknab day ministeryo ra diad pampupulong ed totoon dayo. “Diad syudad a panaayaman ko, niliboy dayo,” so kuan nen Ana ya asalambit niman. Panliliketan toy makapanpulong ed saray totoon mansasalitay Pranses. “Lapud impanaral koy lenguahen nausar ko pian napitongtongan so dakel ed sikara, awalaan ak na balon teritorya tan mas linmigsay ministeryok.”

Lapud mabetbet lan mas daiset so obligasyon na saray andiay asawa, inanamot na arum itan pian makapanlingkor ed pasen a babaleg so pankaukolan. “Manisia ak a no mamapasya ka’d panaglingkor ed Jehova, mas mainomay moy nawalaan na kakaaro tan mas naliknam a naaaro ka,” so kuan nen Lidiana, agin marikit a masulok a 30 años to, tan manlilingkor ed pasen a babaleg so pankaukolan. “Dakel so nagmaliw a maapit a kakaarok a nandurumay personalidad tan nasyonalidad da, tan nagmaliw a makabkabaliksan so bilay ko lapud sikara.”

Sinalambit na Biblia so ebanghelisador a si Felipe a walay apatiran mamarikit to a nampropesiya. (Gawa 21:8, 9) Maseguron maseseg iraya ed serbisyo a singa si ama ra. Nayarin inusar da met so langkap dan manpropesiya parad pankaabigan na saray kaparan Kristiano ed Cesarea. (1 Cor. 14:1, 3) Natan, dakel met so agagin mamarikit a napapaseseg day arum diad regular a pibibiang tan iyaatendi ra ed saray pantitipon.

Si Lidia et sakey met a Kristiano nensaman a taga Filipos, a kinomendaan na Biblia lapud inkamaparawes to. (Gawa 16:14, 15, 40) Si Lidia, a nayarin marikit o balo, et maiter a too, kanian apanggayagaan toy makapaseseg a pililimog ed saray ombiabiahen manangasikaso a singa di Pablo, Silas, tan Lucas. Ontan met so napanggayagaan tayo no aligen tayoy Lidia.

Peneken so Pampirawat a Naliknan Naaaro

Nilikud ed pibibiang ed saray makabaliksan a kimey pian naliknay inkapnek, labay tayon amin a naliknan naaaro tan napapabli tayo. Diad saray andiay asawa, panon a napenek itan a liknaan? Unona, si Jehova et lawas wadtan a mangaaro, mamapabiskeg, tan ontatalineng ed sikatayo. Walaray panaon a si Arin David et maermen, balet amta ton sarag toy onkerew na tulong ed si Jehova ed anggan anton oras. (Sal. 25:16; 55:22) “Bangno paulyan ak na amak tan inak, si Jehova ed satan ampopoen to ak,” so insulat to. (Sal. 27:10) Iimbitaan na Dios so amin a lingkor to ya onapit ed sikato, pian magmaliw a maapit a kakaaro to.​—Sal. 25:14; Sant. 2:23; 4:8.

Niarum ni, diad sankamundoan ya impanaagi et makaromog itayo met na espiritual ya atateng, agagin lalaki tan bibii, a lapud aro ra et magmaliw a makabkabaliksan so bilay tayo. (Mat. 19:29; 1 Ped. 2:17) Dakel a Kristianon walad kasuloan so malikeliket diad pangaalig da’d alimbawa nen Dorcas a “napno na saray maong a gawa tan payabol.” (Gawa 9:36, 39) “Inerman so laen ko, manaanap ak na tuan kakaaro diad kongregasyon a mangaro tan  manuporta ed siak sano nadidismaya ak,” so kuan nen Loli. “Pian onelet itan a pikakaaro, panggugunaetan koy mangipanengneng na aro tan interes ed arum. Walora lan kongregasyon so apanlingkoran ko, et walan walay naroromog kon tuan kakaaro. Maslak et agko kaedaran, say arum ingen et bai la odino tinedyer ni.” Diad kada kongregasyon, wala iramay labay day nawalaan na kakaaro tan naliknan napapabli ira. No ipatnag tayoy peteg ya interes, baleg itan a tulong ed sikara tan napenek met so mismon pampirawat tayon mangaro tan makaliknay aro.​—Luc. 6:38.

Aglingwanan na Dios so Sagpot Tayo

Ipapabitar na Biblia ya amin a Kristiano et nepeg a mansakripisyo ed antokaman a paraan lapud mairap so panaon a pambibilayan tayo. (1 Cor. 7:29-31) Saramay mansiasiansian marikit o balolaki lapud determinasyon dan unoren so ganggan a mangasawa labat unong ed Katawan et peteg a makanepegay baleg a respeto tan konsiderasyon. (Mat. 19:12) Balet, anggaman ontan lay panagsakripisyo ra, agto kabaliksan ya agla ra peteg a makapanliket.

“Makabkabaliksan so bilay ko lapud relasyon ko’d si Jehova tan say panaglingkor ko’d sikato,” so kuan nen Lidiana. “Walaray kabat kon de-asawa a maliket, wala met iramay agmaliket. Saya so akakombinse’d siak ya ag-akadepende so liket ko ed piasawa odino andi.” Singa inkuan la nen Jesus, say manunan lapuan na liket et say pangiter tan panlingkor, a sarag a gawaen na amin a Kristiano.​—Juan 13:14-17; Gawa 20:35.

Sirin, say manunan sengegan na liket et say pakaamtan bendisyonan itayo nen Jehova ed antokaman a pansasakripisyo tayo pian nagawaay linawa to. Ipapaseguro na Biblia ed sikatayo: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—Heb. 6:10.

[Paimano ed leksab]

[Blurb ed pahina 25]

“No antoy walad siak, sikatoy panliliketan ko, agko la aanapen ta’y anggapo’d siak.”​—Carmen

[Litrato ed pahina 26]

Si Loli tan Lidiana et maliket a manlilingkor ed pasen a babaleg so pankaukolan

[Litrato ed pahina 27]

Iimbitaan na Dios so amin a lingkor to ya onapit ed sikato