Anapen Iray Kayamanan ya ‘Akaamot ed Sikato’

“Walara ed sikato ya amin ya akaamot so saray kayamanan na karunongan tan pakatalos.”​—COL. 2:3.

1, 2. (a) Antoray adiskobre nen 1922, tan antoy nansumpalan na saratan? (b) Antoy iyiimbita na Salita na Dios ed amin?

NO WALARAY nadidiskobrin akaamot a kayamanan, kaslakan lan baleg a balita itan. Singa bilang, nen 1922, kayari pigamplon taon na pinasyan impansagpot diad mair-irap iran kipapasen, walay makatantandan adiskobre na Britanon arkeologo a si Howard Carter. Aromog to so agni agalaw a ponponan nen Faraon Tutankhamen, a mankargay ngalngali 5,000 a kagawaan.

² Anggaman makapadinayew iray adiskobre nen Carter, maslak ed saratan et nagmaliw labat lan displey ed saray museo odino koleksion na totoo. Nayarin makana met iratan ed art odino pian naamtaay agawa’d apalabas, balet daiset odino anggapo ni ingen so epekto na saratan ed inagew-agew a bilay. Anggaman ontan, iimbitaan itayo na Salitay Dios ya anapen iray kayamanan a talagan makagunggona ed sikatayo. Parad amin iyan imbitasyon, tan say tumang et aminpigapiga nin mas mabli nen say antokaman a materyal a kayamanan.​—Basaen so Uliran 2:1-6.

3. Panon a makagunggona iray kayamanan ya ipapaseseg nen Jehova ya anapen na saray managdayew to?

³ Nonoten pay kablian na saray kayamanan ya ipapaseseg nen Jehova ya anapen na saray managdayew to. Sakey ed saratan et “say takot ed Jehova,” a pakasalimbengan tayo ed sarayan mapeligron panaon. (Sal. 19:9) Say pakaromog ed “pikakabat ed Dios” et manresulta ed sankabalgan lan pribilehyo a nayarin gamoran na too​—say maapit a personal a relasyon ed Sankatagyan. Tan no walaan itayo na kayamanan a singa say inter na Dios a karunongan, pikakabat, tan pakatebek, nasarag tayon arapen iray problema tan kapagaan ed inagew-agew a bilay. (Uli. 9:10, 11) Panon tayon naromog irayan mabmablin kayamanan?

Anapen Iray Espiritual a Kayamanan

4. Panon tayon naromog iray kayamanan ya insipan na Dios?

⁴ Aliwan singa saray arkeologo tan managdiskobre a kaslakan et nambabangil ni pananapan day kayamanan, amta tayo la no iner a mismo so pakaromogan na espiritual iran kayamanan. Say Salitay Dios et singa sakey a mapa na kayamanan, ya ituturo to lay eksakton kawalaan na kayamanan ya insipan na Dios. Oniay insulat nen apostol Pablo nipaakar ed Kristo: “Walara ed sikato ya amin ya akaamot so saray kayamanan na karunongan tan pakatalos.” (Col. 2:3) Legan tayon babasaen iratan a salita, oniay nayarin itepet tayo: ‘Akin et nepeg tayon anapen iratan a kayamanan? Akin et nibagan “akaamot” iratan ed Kristo? Tan panon tayo iratan a naromog?’ Pian naebatan iraya, aralen tayo imay imbaga nen Pablo.

5. Akin et nansulat si Pablo nipaakar ed espiritual iran kayamanan?

⁵ Saratan a salita et insulat nen Pablo ed saray agagi ed Colosas. Inkuan ton sikatoy mansasagpot a maong parad sikara pian “saray kapusoan da komon so naligliwa, bangta sikara so mikasakey ed aro.” (Basaen so Colosas 2:1, 2.) Akin et ontan lay impampaga nen Pablo? Mapatnag ya amta ton saray agagi ditan et nayarin naimpluensyaan la na arum a walad limog da, a mangipapaseseg na saray Griegon pilosopiya odino mangisasagyat ya ompawil ira ed pananumbok ed Mosaikon Ganggan.  Oniay mapuersan pasakbay to ed saray agagi: “Manasikaso kayo ta ompan wala so manggawa na deral ed sikayo lapu ed pilosopiya to tan andi kakanaan a panamalingo, unong na daan ya ugali na totoo, unong ed saray dinaralin a bangat na mundo, tan aliwan unong ed Kristo.”​—Col. 2:8.

6. Akin et nepeg ya interesado tayo ed simbawa nen Pablo?

⁶ Nipapaarap tayo met natan ed ontan iran impluensya manlapud si Satanas tan say mauges a sistema to. Saray pilosopiya na mundo a mangibabaliwala’d Dios, a singa say bangat a mangitatandoro’d abilidad na too, tan say teoryan ebolusyon, so mangiimpluensya ed panagnonot, moral, plano, tan kabibilay na totoo. Say palson relihyon so walad benegan na dakel a bantog a selebrasyon. Amayamay a palabas, musika, tan arum nira, so inggagalan mamenek ed mabanday iran pilalek na laman, tan maslak a kargay Internet et talagan mapeligro ed ugaw man o matatken. No naynay itayon nipaparungtal ed saraya tan ed arum nin kagagaway mundo, mainomay a naapektoay liknaan tan awawey tayo ed saray panangiwanwan nen Jehova, a manresulta’d ikapuy na malet ya ibebemben tayo ed peteg a bilay. (Basaen so 1 Timoteo 6:17-19.) Kanian, kaukolan tayon talosan so kabaliksan na imbaga nen Pablo ed saray taga Colosas tan seryosoen itan pian agtayo napelag ed saray patit nen Satanas.

7. Anton duaran bengatla so imbaga nen Pablo a makatulong ed saray taga Colosas?

⁷ No pawilen tayo imay imbaga nen Pablo ed saray taga Colosas, naimano tayon kayari ton imbalikas so kapapagaan to, walay indanet ton duaran bengatla ya ontulong pian naligliwa ira tan mankakasakey ed aro. Unona, sinalambit toy ‘napnek a pakatalos,’ salanti, malinew tan seguradon pakatalos. Nepeg a sigpot iran kombinsido a sustoy pakatalos da ed Kasulatan, pian malet so pundasyon na pananisia ra. (Heb. 11:1) Insan to sinalambit so nipaakar ed ‘pikakabat ed misteryo [odino, sagradon sekreto] na Dios.’ Nepeg ya aglabat ira angangga’d saray manunan bangat tan nepeg a malinew so pakatalos da ed aralem iran bengatla na Dios. (Heb. 5:13, 14) Talagan sayan simbawa et maabig parad saray taga Colosas tan ed sikatayo natan! Panon tayo balet a nagamoran itan a segurado tan suston pikakabat? Inter nen Pablo so sekreto sanen oniay makabkabaliksan ya imbaga to nipaakar ed Jesu-Kristo: “Walara ed sikato ya amin ya akaamot so saray kayamanan na karunongan tan pakatalos.”

Kaykayamanan ya “Akaamot” ed Kristo

8. Ipaliwawa so kabaliksan na terminon “akaamot” ed Kristo.

⁸ Say pangibagan amin a kayamanan na karunongan tan pakatalos et “akaamot” ed Kristo et agmankabaliksan ya akandadoan iratan, ya imposiblin nagamoran. Say kabaliksan to labat et pian naromog irayan kayamanan, kaukolan so pansagpot a maong, tan say nepeg ya akateenay imano tayo et si Jesu-Kristo. Mitunosan iya ed samay imbaga nen Jesus nipaakar ed inkasikato: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6) On, pian naromogay pikakabat na Dios, kaukolan tayo iray tulong tan panangiwanwan ya itatarya nen Jesus.

9. Antoran betang so niiter ed si Jesus?

⁹ Sanen inkuan nen Jesus a sikato so “dalan,” inkuan ton sikato met so “katuaan, tan say bilay.” Ipapatnag na satan a say betang to et aliwa labat a say dalan pian makaasingger ed Ama. Wala met iray betang nen Jesus a makanakana pian natalosan iray katuaan ed Biblia tan nagamoray andi-anggaan a bilay. On, talagan diad si Jesus akaamot iray espiritual a kayamanan ya agnaparaay balor to, a manaalagar labat a diskobrien na saray maseet a manaaral ed Biblia. Pantongtongan tayo pa so pigara ed saray kayamanan a direktan mangaapekta ed arapen tayo tan ed relasyon tayo’d Dios.

10. Anto so naaralan tayo nipaakar ed si Jesus diad Colosas 1:19 tan 2:9?

¹⁰ “Say inkagnap na saray kalidad na Dios et manaayam ed sikato.” (Col. 1:19; 2:9, NW) Lapud  abaybayag ton kaibay mangatatawen ya Ama to, anggapo lay mas makapikabat ed personalidad tan linawa na Dios nen say si Jesus. Diad interon ministeryo nen Jesus, imbangat to’d arum iray imbangat na Ama to ed sikato tan impanengneng to’d gawa iray kualidad ya impaslep na Ama to ed sikato. Kanian nibaga nen Jesus: “Say akanengneng ed siak anengneng to so Ama.” (Juan 14:9) Amin a karunongan tan pikakabat na Dios et akaamot, odino manaayam ed Kristo, tan anggapo lay mas maabig nin paraan pian naaralan tayo so nipaakar ed si Jehova nen say panggawa’d anggaay nayarian tayon manaral nipaakar ed si Jesus.

11. Antoy pisiglaotan nen Jesus ed saray propesiya ed Biblia?

¹¹ “Sikato so patuaen na saray amin a propetas.” (Gawa 10:43) Ipapabitar na sarayan salita a si Jesus et walaay importantin betang ed pakasumpal na dakel a propesiya ed Biblia. Saray propesiya na Biblia manlapud samay walad Genesis 3:15, a sankaunaan a propesiya nen Jehova, ya anggad saray maglorian pasingawey ed Apocalipsis, et natalosan labat na duga no ikonsideray betang nen Jesus ed Mesianikon Panarian. Satan so makasengeg no akin a saramay agmangaawat ed si Jesus bilang insipan a Mesias et agda natatalosan so dakel a propesiya ed Hebreon Kasulatan. Satan met so rason no akin a si Jesus et sakey labat a matalonggaring a too parad saramay agmamapabli ed Hebreon Kasulatan, a mankargay dakel a Mesianikon propesiya. Say pikakabat ed si Jesus so ontulong ed totoo na Dios a natalosan iray propesiya ed Biblia a nasumpal ni labat.​—2 Cor. 1:20.

12, 13. (a) Akin a nibagan si Jesus “so silew na mundo”? (b) Lapud nibulos la ray patumbok nen Kristo manlapud relihyoson kabilungetan, anto so obligasyon da?

¹² “Siak so silew na mundo.” (Basaen so Juan 8:12; 9:5.) Abaybayag ni sakbay a nianak si Jesus diad dalin, oniay impasakbay nen propeta Isaias: “Saray kabalbaleyan a nanakar ed kabilungetan anengneng da so baleg a silew. Saray nanayam ed dalin na anino na patey, dia ed sikara sinminag so silew.” (Isa. 9:2) Impaliwawa nen apostol Mateo a sinumpal nen Jesus iyan propesiya sanen ginapoan Toy manpulong tan inkuan to: “Mansibkel kayo, ta asingger la so panariay tawen.” (Mat. 4:16, 17) Lapud  ministeryo nen Jesus, aliwawaan ed espiritual iray totoo tan nibulos ira’d panangaripen na palson bangat na relihyon. “Sinmabi ak a silew dia ed mundo,” so kuan nen Jesus, “pian say siopaman a manisia ed siak agmansiansia ed kabilungetan.”​—Juan 1:3-5; 12:46.

¹³ Kayari pigapigaran taon, inkuan nen apostol Pablo ed saray kapara ton Kristiano: “Aminsan a panaon sikayo so kabilungetan, balet natan sikayo so silew ed Katawan. Manakar kayon singa anak na liwawa.” (Efe. 5:8) Lapud nibulos la ray Kristiano manlapud relihyoson kabilungetan, obligasyon day manakar a singa anak na liwawa. Mitunosan iya ed samay inkuan nen Jesus ed saray patumbok to diad Sermon ed Palandey: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mat. 5:16) Kasin ontan lay panangapresyam ed saray espiritual a kayamanan ya aromog mo ed si Jesus ya ipapaseseg mo itan ed arum panamegley na salita tan maabig a konduktam bilang Kristiano?

14, 15. (a) Anto so betang na karnero tan arum nin ayayep ed tuan panagdayew nensaman? (b) Akin et nibagan si Jesus et agnaparaan a kayamanan diad betang to bilang “Korderoy Dios”?

¹⁴ Si Jesus so “Korderoy Dios.” (Juan 1:29, 36) Diad Biblia, baleg so betang na karnero ed kaperdonay kasalanan tan diad iyaasingger ed Dios. Singa bilang, nen apaneknekan la nen Abraham a mabulos ton ibagat so anak ton si Isaac, imbaga ed sikaton agto sasakitan si Isaac tan sikatoy naikdan na karnero a kalakian bilang kasalat. (Gen. 22:12, 13) Sanen nibulos iray Israelita manlapud Ehipto, importante met so betang na karnero, diad sayan pankanawnawa et bilang kabiangan na ‘paskua nen Jehova.’ (Exo. 12:1-13) Niarum ni, akalaktip ed Mosaikon Ganggan so pangibagat ed nanduruman ayayep a singa say karnero tan kanding.​—Exo. 29:38-42; Lev. 5:6, 7.

¹⁵ Balet anggapo ed saratan a bagat​—diad tua, anggapoy bagat ya inyapay na too​—a permanentin makapangibulos ed katooan manlapud kasalanan tan patey. (Heb. 10:1-4) Diad biek a dapag, si Jesus so “Korderoy Dios, a mangekal na kasalanay mundo.” Anggan saya labat a katuaan et magenap la pian nibagan si Jesus et sakey a kayamanan ya agbalot naparaan na antokaman ya adiskobrin kayamanan. Kanian maabig no ipanaon tayon aralen a maong so nipaakar ed dondon tan ipatnag tayoy pananisia ed sayan alay abig a probisyon. Diad ontan et nawalaan tayoy ilalon makaawat na engranden bendisyon tan tumang​—say gloria tan kagalangan a nakaiba nen Kristo diad tawen parad “daiset a papastolan” tan andi-anggaan a bilay diad Paraison dalin parad ‘arum a karnero.’​—Luc. 12:32; Juan 6:40, 47; 10:16.

16, 17. Akin et importante a natatalosan tayo so betang nen Jesus bilang say “nanggawa tan manamayadyari na pananisia tayo”?

¹⁶ Si Jesus so “nanggawa tan manamayadyari na pananisia tayo.” (Basaen so Hebreos 12:1, 2.) Diad Hebreos kapitulo 11, nabasa tayoy mapuersan impaningbat nen Pablo ed pananisia, laktip lay kabaliksan na satan, tan say impanalambit ed lalaki tan bibiin uliran na pananisia a singa di Noe, Abraham, Sara, tan Rahab. Saraya so sankanonot nen Pablo sanen pinaseseg to ray kaparan Kristiano ya ‘onnengneng ed si Jesus a nanggawa tan manamayadyari na pananisia tayo.’ Akin?

¹⁷ Anggaman sarayan matoor a totoon asalambit ed Hebreos kapitulo 11 et mabiskeg so pananisia ra ed sipan na Dios, agda amta so amin a detalye no panon iyan sumpalen na Dios panamegley na Mesias tan say Panarian. Diad satan a pantalos, aliwan nagnap so pananisia  ra. Diad tua, anggan saramay inusar nen Jehova a mangisulat ed dakel a propesiya nipaakar ed Mesias et agda sigpot ya atalosan so kabaliksan na insulat da. (1 Ped. 1:10-12) Magmaliw labat ya ayadyari, o nagnap so pananisia panamegley nen Jesus. Talagan importante a natalosan tayon maong tan bidbiren tayoy betang nen Jesus bilang say “nanggawa tan manamayadyari na pananisia tayo”!

Itultuloy ya Anapen

18, 19. (a) Anto niray espiritual a kayamanan ya akaamot ed Kristo? (b) Akin et itultuloy tayon anapen iray espiritual a kayamanan ed si Jesus?

¹⁸ Pigara ni labat so apantongtongan tayon makanakanan betang nen Jesus ed gagala na Dios tan ed kilalaban na katooan. Dakel niray espiritual a kayamanan ya akaamot ed Kristo. Say pakaromog ed saratan et mangipagamor na liket tan saray gunggona. Alimbawa, tinawag nen apostol Pedro si Jesus bilang say “Manunan Manangitonton ed bilay” tan say ompepelnak a “bitewen ed kabuasan.” (Gawa 3:15, NW; Gawa 5:31; 2 Ped. 1:19) Tan imbaga met na Biblia a si Jesus so “Amen.” (Apo. 3:14) Antam ta no antoy kabaliksan tan kakanaan na sarayan betang? Singa inkuan la nen Jesus, mantultuloy kayon ‘mananap et makalmo kayo.’​—Mat. 7:7.

¹⁹ Nilikud ed si Jesus, anggapo lay arum a toon say bilay to et napnoy kabaliksan tan im-importante ed andi-anggaan a pankaabigan tayo. Akaamot ed sikato so espiritual iran kayamanan a mainomay a naromog na siopaman a masimoon a manaanap ed saratan. Komon ta nagamoran yo so liket tan bendisyon na pakaromog ed kaykayamanan ya ‘akaamot ed sikato.’

Kasin Natandaan Mo?

• Antoran kayamanan so ipapaseseg ya anapen na saray Kristiano?

• Akin et siansia nin matukotukoy ed sikatayo natan imay simbawa nen Pablo ed saray taga Colosas?

• Antoray pigara ed saray espiritual a kayamanan ya “akaamot” ed Kristo? Ipaliwawa iratan.

[Tepetepet Parad Panagaral]

[Saray litrato ed pahina 5]

Say Biblia et singa sakey a mapa ya itotonton to tayo ed kaykayamanan ya “akaamot” ed Kristo