Kasin Nanonotan Yo?

Nanggayagaan mo ta so impambasa ed agano ni ran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• No say lukon et inatey, nailaloan kasin paolien ni ed bilay?

Say bilay et onggapo diad bektan pertilisado lay iknol na bii. Sarag a paolien nen Jehova so anggan siopa, lukon man ni labat odino antokaman ni edad to, lapud ‘amin a bengabengatla et nayarian na Dios.’ (Mar. 10:27) Balet agdirektan ibabaga na Biblia no kasin paolien nen Jehova iray ugugaw ya inatey antis nin nianak.​—4/15, pahina 12, 13.

• Antoy naaralan tayo ed pangobserba ed saray gilata, rock badger, duron, tan tuko?

Ipapatnag na sarayan apatiran pinalsa so nisipor a karunongan. Kanian, nidadayew da so karunongan na Dios. (Uli. 30:24-28)​—4/15, pahina 16-19.

• Anton importantin ebento parad saray Tasi nen Jehova so agawa 100 a taon lay apalabas?

Nen 1909, say hedkuarter na Watch Tower Bible and Tract Society, say legal a korporasyon na saray Tasi nen Jehova parad panag-imprinta ra, et inyalis diad Brooklyn New York tan ditan ni kawalaan to anggad natan. Dati et diad Pittsburgh, Pennsylvania so kawalaan na satan.​—5/1-E, pahina 22-24.

• Akin et ibabaga na Biblia a walay panaon a maabig so ag-iyesel?

Say ag-iyesel et pakapatnagay respeto, ontulong ed panagdalepdep, tan pakanengnengay inkaalwar tan pakatebek. (Sal. 37:7; 63:6; Uli. 11:12)​—5/15, pahina 3-5.

• Anto so pampaparaan di John Wycliffe, William Tyndale, Robert Morrison, tan Adoniram Judson?

Inaro na sarayan totoo so Salita na Dios tan impatalos da itan ed lenguahen natalosan na dakel a totoo. Impatalos di Wycliffe tan Tyndale so Biblia ed English, si Morrison ed Chinese, tan si Judson ed Burmese (Myanmar).​—6/1-E, pahina 8-11.

• Pigaran ari ed Juda so angipanengneng na makapadinayew a seseg parad abung na Dios?

Labinsiam ya arari so nanuley ed abalaten a panarian na Juda, tan apatira ed sikara so angipanengneng na makapadinayew a seseg​—di Asa, Josafat, Hezekias, tan Josias.​—6/15, pahina 7-11.

• Amin kasin alanaan a Kristiano ed dalin et mibibiang ed pangitatarya na espiritual a tagano?

Andi. Amin ya alanaan na espiritu na Dios et kabiangan na matoor tan makabat ya aripen a klase, balet saraman labat so manutugyop ed Mananguley ya Ulop so mangidadaulo ed pangitatarya na espiritual a tagano.​—6/15, pahina 22-24.

• Akin et labalabay na saray Romanon sundalo a nakayarian so walad dalem ya aysing nen Jesus?

Agpinilat na saramay sundalo ya amatey ed si Jesus so walad dalem ya aysing to. Kaslakan lan say panggagawa ed ontan ya aysing et idait so duaran abel, balet ta samay aysing nen Jesus et anggapon balot so dait to, kanian mas mabli itan.​—7/1, pahina 22.

• Akin a nibagan say manunan pidumaan nen Jesus ed saray lider na relihyon et say aro?

Imbes ya aroen na saray relihyoson lider iray ordinaryon totoo, sikaray binusol da. Sakey ni, agda inaro so Dios. Balet si Jesus et inaro toy Ama to tan inabagey to iray totoo. (Mat. 9:36) Sikatoy maaro, mapangasi tan maomaong ed sikara.​—7/15, pahina 15.

• Akin et nayarin panlapuan na problema na sanasawa so panag-badyet, tan antoy makatulong ed sikara?

Maslak a nalalanor ed agpantatalosan ed kuarta so talek na sanasawa ed sakey tan sakey, tan say takot ed no antoy posiblin nagawa ed arapen. Sakey ni, aliwan pareho so impamabaleg ed balang sakey ed sikara. Nia so apatiran makatulong: Aralen so pagmaliw a kalmado no pantotongtongay kuarta, pampaknaan no panon a gastosen so kuarta, ilista iray gastos na pamilya, tan desidien no siopay akauley ed saray espisipikon babayaran.​—8/1-E, pahina 10-12.