Paeleten so Panangaro Yo ed Agagi

“Mankurang kayo ed aro, a singa met impangaro nen Kristo ed sikayo.”​—EFE. 5:2.

1. Anto so inkuan nen Jesus a pakabidbiran na saray papatumbok to?

KABKABAT iray Tasi nen Jehova diad pangipupulong day maong a balita na Panarian na Dios diad kabkaabungan. Anggaman ontan, sananey ya aspekto na Inkakristiano so imbaga nen Kristo Jesus a pakabidbiran na saray tuan disipulo to. Oniay inkuan to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”​—Juan 13:34, 35.

2, 3. Anto so epekto na aroan tayo bilang sanaagi ed saramay onaatendi ed saray Kristianon pantitipon?

² Anggapoy makapipara ed panangaro a walad saray tuan Kristiano. No panon a say magnet et guyoren toy metal, say panangaro so manangguyor ed saray masimoon a totoo ed tuan panagdayew tan saya met so rason no akin a mankakasakey iray lingkor nen Jehova. Alaen tayo pan alimbawa so eksperiensya nen Marcelino a taga Cameroon. Sikatoy abulag lapud impaka-aksidente to’d trabaho. Kinmayat so balbalitan si Marcelino kuno et manananem kanian abulag. Imbes a ligliwaen na pastor tan saray karelihyonan to, sikatoy inekal da la laingen a membro na simbaan da. Kanian sanen inimbitaan na saray Tasi nen Jehova a miaral, ngalngali agto labay so onla. Inisip ton ompan sikatoy agda met lanlamang awaten.

³ Asurprisa balet si Marcelino kasabi to’d Kingdom Hall. Sikatoy maad-aron inabrasa na saray agagi, tan aligliwa ed saray nadngel ton banga-bangat manlapud Biblia. Nanlapu la’d saman, inatendian to lan amin so pantitipon na kongregasyon, inmaligwas ed panaaral toy Biblia, tan abautismoan nen 2006. Ipupulong to la natan so katuaan ed pamilya tan kakaabay to, tan wala la ray iyaaralan to na Biblia. Labay nen Marcelino a nalikna met na sarayan iyaaralan to so panangaron alikna to ed limog na totoo na Dios.

4. Akin a nepeg tayon unoren so bilin nen Pablo a “mankurang kayo ed aro”?

⁴ Talagan makapasagyat so aroan tayo bilang sanaagi, tan nepeg a gawaen tayoy betang tayo pian napansiansia itan. Sayan aroan tayo et niyaliling ed marngat ya apoy diad labin ambetel. Nasagyat tayon onasingger ed satan pian napetangan itayo. Balet no ag-itan sungloran, kalkalnan onkuyep tan diad saginonor et naerep. Mipadpara, onkapuy so bedber na aroan ed kongregasyon no aggawaen na balang Kristiano so betang to pian pabiskegen itan. Panon tayon nagawaan iya? Oniay ebat nen apostol Pablo: “Mankurang kayo ed aro, a singa met impangaro nen Kristo ed sikayo, tan inter to so laman to lapu ed sikatayo, singa sakey a saklang tan bagat ed Dios a maabig so balingit to.” (Efe. 5:2) Say tepet sirin et, Diad antoran paraan a makapantultuloy ak a mankurang ed aro?

‘Inatnat so Panangaro Yo’

5, 6. Akin et pinaseseg nen Pablo iray Kristiano ed Corinto ya ‘inatnat day panangaro ra’?

⁵ Oniay insulat nen apostol Pablo ed saray Kristianon taga Corinto: “Bulobulos kamin nansalita ed sikayoran taga Corinto, ninmatnat ed sikayo so panangaron walad puso mi. Agmi isisiblet ed sikayo so panamabli mi, balet sikayo et mair-irap yon ipanengneng so panamabli yo. Kanian, bilang bales​—mansasalita ak a singa ed saray ananak​—inatnat yo met so panangaron walad puso yo.” (2 Cor. 6:11-13, NW) Akin et pinaseseg  nen Pablo iray taga Corinto ya inatnat so panangaro ra?

⁶ Imanoen pa no panon a niletneg so kongregasyon ed Corinto nensaman. Linma si Pablo ed Corinto diad pansamposampot na 50 C.E. Anggaman walaray onsusumpa ed sikato sanen inggapo toy manpulong diman, sikatoy agsinmuko. Diad inlabas na antikey labat a panaon, dakel so anisia ed maong a balita ed satan a syudad. Diad loob na “sakey taon tan anem bulan” et inyupot nen Pablo so biskeg to pian bangatan tan pasesegen so kapkapangiletneg a kongregasyon. Mapatnag ya inad-aro ton maong iray Kristianon taga Corinto. (Gawa 18:5, 6, 9-11) Kanian sikatoy manepeg labat komon ya aroen met tan respetoen na saray agagi diman. Balet ta say arum ed kongregasyon et inmarawi so liknaan da ed sikato. Nayarin ag-agustoan na pigara ed sikara so diretsaan ya impanimbawa to. (1 Cor. 5:1–5; 6:1-10) Ompan walaray nampaimpluensya ed panagpauges na saray “manunaan [odino, mandunong-dunongan] ya apostoles.” (2 Cor. 11:5, 6) Labay nen Pablo a sikatoy aroen komon na amin ya agagi to. Kanian kinerew to ed sikara ya ‘inatnat day panangaro ra’ diad iyapit da ed sikato tan ed saray kaagian da.

7. Panon tayon ‘ninatnat so panangaro’ tayo ed saray agagi?

⁷ Diad panaon tayo, panon tayo met a ‘ninatnat so panangaro’ ed saray agagi? Natural labat a mainomay a magmaliw a sankaaro iray mankaedaran odino saramay pareho so binalegan dan lugar. Ontan met, say mabetbet a sankaulop et saramay pareho so labay dan panagligliwaan. Balet no saratan so rason ya agtayo la napipiulopan so arum ya agagi, kaukolan tayon ‘inatnat so panangaro tayo.’ Maabig no tepetan tayoy inkasikatayo: ‘Mataltalag ak kasin mimiulop ed saramay agko maapit a kaaro diad panagpulong tan diad saray panliliket? Diad Kingdom Hall, kasin agak tanto mimiulop ed saramay balobalo ni ed kongregasyon lapud iisipen kon kaukolan a sikaray unonan mikaaro ed siak? Kasin ibabanok iray maedad la tan saray kalangweran diad kongregasyon?’

8, 9. Panon itayon natulongan na samay simbawa nen Pablo ed Roma 15:7 ya abrasaen so balang sakey pian onelet so aroan tayon sanaagi?

⁸ No nipaakar ed panangibano, makatulong imay imbaga nen Pablo ed saray taga Roma pian nawalaan itayo na dugan panmoria ed saray agagi tayo. (Basaen so Roma 15:7.) Diad sayan teksto, say Griegon salitan impatalos a “manaakoan” et mankabaliksan na “mabulos tan maaron pangawat ed sakey tan sakey pian magmaliw a sankaaro.” Nen inmuuna ran panaon, sano parawesen na sakey a too iray kakaaro to, ipalikna ton sikatoy maliket a napilimogan ira. Ontan so impangawat nen Kristo ed sikatayo diad Kristianon kongregasyon, tan papasesegen itayon aligen so alimbawa to diad pangabrasa tayo ed saray kaagian.

⁹ Sano aabrasaen tayo iray agagi diad Kingdom Hall tan diad arum nin pasen, say ikdan tayoy imano et saramay agtayo ni apitongtongan diad apalabas iran pankanawnawa. Agta maabig no mikumustaan tayo ed sikara anggan pigaran minuto labat? Diad onsublay ya aral, nayarin arum met ya agagi so pitongtongan tayo. No oniay gawaen tayo, amin lawarin agagi et  napitongtongan tayo la diad ilabas na pigaran aral. Agkayo mapaga no agyo napitongtongan so amin ya agagi ed maminsan labat a pankanawnawa. Tan agmet komon ombabarong so sakey ya agi no agtayo naibano kada aral.

10. Anton pankanawnawa so walad kada membro na kongregasyon, tan panon tayon sigpot a naanamot iyan pankanawnawa?

¹⁰ Say pangibano so unonan kundang diad pangabrasa ed agagi tayo. Nayarin manresulta iya ed maliket a pantotongtong tan malet a pankakaaro. Singa bilang, saramay akapankakabat tan akapantutuyaw diad saray kombension tan asemblea et il-iliwen day makapannenengneng lamet diad arapen. Saramay manboboluntaryo ed panagpaalagey na Kingdom Hall, ontan met ed panagbunog na relief et mabetbet a magmamaliw a malet a sankakaaro lapud naamtaan day maabig ya ugali na balang sakey legan na impanuulop da. Talagan dakerakel so pankanawnawan nawalaan na maong a kakaaro diad organisasyon nen Jehova. No ‘inatnat tayoy panangaro,’ ondakel so kakaaro tayo tan lalon napaelet so panangaron mamebedber ed sikatayo diad tuan panagdayew.

Lawas Akaparaan a Mangiganay Panaon

11. Anton ehemplo so impanengneng nen Jesus, unong a nabasa ed Marcos 10:13-16?

¹¹ Nepeg a pankimeyan na amin a Kristiano so pagmaliw a mainomay ya asinggeran, a singa si Jesus. Imanoen pa no antoy reaksion nen Jesus sanen sinalin amperen na saray disipulo to iray atateng a mangiyasingger na saray anak da ed sikato. “Paulyan yo so saray angkekelag ya ugugaw ya ondago ed siak,” so inkuan to. “Agyo ra sebelan, ta sikara so makankien na panariay Dios.” Insan “inala to ra ed saray taklay to, tan benendisyonan to ra, ya intapew to so saray lima to ed sikara.” (Mar. 10:13-16) Nonot yo pa labat so panlikliket na sarayan ugugaw ta say Sankamaongan a Managbangat et angiganay panaon parad sikara tan impalikna ton inad-aro to ra!

12. Antoray mangamper ed pakapitongtong tayo ed arum?

¹² Nepeg a tepetan na balang Kristiano so inkasikato na onia: ‘Lawas ak kasin akaparaan a mangiganay panaon parad arum, odino ipapaliknak a singa ak okupadon naynay?’ No maminsan, walaray gagawaen tayon agmet makapuy balet ta saraya so rason na agtayo la pakapitongtong ed arum. Alimbawa, no mabetbet ya aka-earphone itayo sano kalimog tayo ray agagi lapud ondedengel tayo’d musika, nayarin isipen da la laingen ya agtayo ra labay a kaiba. No naynay da itayon nanenengneng a text lan text, ompan liknaen dan agtayo ra labay a nakatongtong. Tua, walay “panaon ya agyesel,” balet no kalimog tayoy arum, mabetbet a satan et “panaon a pansalita.” (Ecl. 3:7) Nayarin ibaga na arum a, “Mas maong lay agmansalita” odino “Agko labay a siak so mangigapoy tongtongan.” Balet, tandaan tayo a no mitongtong itayo ed arum anggaman agtayo labay komon a gawaen itan, ipapanengneng tayo so aron “agmanaanap na pankaabigan ton dili.”​—1 Cor. 13:5, NW.

13. Antoy impaseseg nen Pablo ed si Timoteo nipaakar ed panagtrato ed saray kapananisiaan?

¹³ Pinaseseg nen Pablo so kalangweran nin Timoteo a respetoen so amin a membro na kongregasyon. (Basaen so 1 Timoteo 5:1, 2.) Nepeg tayo met ya ipasen iray maedad lan Kristiano a singa ama tan ina tayo tan saray ugugaw ni et ipasen tayon peteg ya agagi tayo. No ontan so panagtrato tayo’d saray kaagian, agda isipen a mairap itayon asinggeran, noagta onapit ni ingen so liknaan da ed sikatayo.

14. Antoray gunggona na makapaseseg a pitotongtong ed arum?

¹⁴ Sano makapaseseg so pitongtong tayo ed arum, natulongan tayo iran ombiskeg ed espiritual tan magmaliw a maliket tan kontento. Agnalinglingwanan na sakey a Bethelite so mabetbet ya impitongtong na pigaran maedad lan Bethelite ed sikato sanen balobalo ni ed Bethel. Lapud panamaseseg da, alikna ton sikatoy talagan kabiangan na pamilyan Bethel. Natan et panggugunaetan to iran aligen diad pitotongtong to met ed saray kapara ton Bethelite.

 Natulongan Itayo na Inkamapaabeba Pian Makapikareenan

15. Antoy mangipapanengneng a no maminsan et walaray onlesan agpantatalosan ed baetan na saray Kristiano?

¹⁵ Nairapan si Euodias tan Sintique, duaran Kristianon bibii ed Filipos nensaman, a manguksoy ed agda impakapantalosan. (Fil. 4:2, 3) Wala met so agawan sangsangan ed baetan di Pablo tan Bernabe ya abalitaan na arum tan nanresulta itan ed impansian dan agano. (Gawa 15:37-39) Ipapanengneng na sarayan agawa a no maminsan et walaray onlelesan agpantatalosan ed baetan na saray tuan managdayew. Anggaman ontan, tutulongan itayo nen Jehova pian naresolbe iratan tan nipawil so pankakaaro. Balet, walay kakaukolanen to ed sikatayo.

16, 17. (a) Akin et importante so inkamapaabeba ed panresolbe ed agpantatalosan? (b) Panon a nidanet so kaimportantian na inkamapaabeba diad samay inyasingger nen Jacob ed si Esau?

¹⁶ Isipen pan sika tan say kaarom et mankotsi diad pambiahe yo. Diad ibuat yo, kaukolan yo so tumbok pian napaandar so kotsi. Mipadpara, pian naresolbe iray agpantatalosan, kaukolan tayo met so pinagkatumbok, tan satan et say inkamapaabeba. (Basaen so Santiago 4:10.) Say inkamapaabeba so ontulong ed saramay walaan na agpantatalosan ya iyaplika iray prinsipyo na Biblia, a singa ipapanengneng na ontumbok ya alimbawa.

¹⁷ Duamplon taon lay apalabas sanen binusol nen Esau si Jacob lapud inala to so kanepegan to bilang panguloan, tan labay ton pateyen. Sanen asingger la ran mannengneng lamet, ‘si Jacob et natatakot tan napapagaan.’ Inisip to ya ompan sikatoy pateyen nen Esau. Balet ta diad samay impannengneng da, walay ginawa nen Jacob ya ag-inilaloan nen Esau. Sanen si Jacob et asingger la ed si Esau, sikatoy ‘dinmakmomo ed dalin.’ Antoy sinmublay ya agawa? “Si Esau binmatik ya inmabet ed sikato, et sikato so nilakap to tan dinmasay ed tenger to, tan inaangoban to, tan nannangis ira.” Apaliisan so posiblin panlaban. Say inkamapaabeba nen Jacob so amakepa ed pambusol a nayarin eem-eman ni nen Esau.​—Gen. 27:41; 32:3-8; 33:3, 4.

18, 19. (a) Sano walaray agpantatalosan, akin et importante a sikatayo lay unonan mangiyaplika ed simbawa na Kasulatan? (b) Akin et agtayo nepeg ya onsuko no samay agtayo akapitalosan et agto ni labay so mikareenan?

¹⁸ Nabasa ed Biblia iray maabig a simbawa diad panresolbe na agpantatalosan. (Mat. 5:23, 24; 18:15-17; Efe. 4:26, 27) * Balet mairap so mikareenan no agtayo mapaabeban iyaplika irayan simbawa. Pian nasolbar sirin so problema, sikatayo lay unonan manpaabeba tan mikareenan.

 ¹⁹ No bilang ta diad unona et anggapoy maabig a nansumpalan na impikareenan tayo, agtayo nanaandiay ilalo. Ompan samay agtayo akapitalosan et kaukolan to ni malaglaem a panaon pian makapannonot. Mauges so impantrato na saramay agagi nen Jose ed sikato. Linmabas so abayag a panaon tan sanen apinengnengan da lamet et sikatoy administrador la na Ehipto. Diad saman et anguman lay ugali ra tan akiperdonaan ira ed sikato. Pinerdona ira nen Jose, tan saray anak a lalaki nen Jacob et apribilehyoan a magmaliw a pinilin nasyon nen Jehova. (Gen. 50:15-21) Makatulong itayo ed pamasiansiay pankakasakey tan liket ed kongregasyon no lawas a mareen so pidedeneng tayo ed saray agagi tayo.​—Basaen so Colosas 3:12-14.

Mangaro Itayo ‘Diad Gawa tan Katuaan’

20, 21. Antoy naaralan tayo ed impanguras nen Jesus ed kasalian na apostoles to?

²⁰ Antis a tuloy na impatey nen Jesus, inkuan to’d saray apostol to: “Inikdan ta kayo na sakey ya pangaligan, pian sikayo gawaen yo met so singa ginawak ed sikayo.” (Juan 13:15) Diad saman et kakkayari ton inurasan so kasalian na saramay labindua. Satan a ginawa nen Jesus et aliwan ritual odino panangipanengneng labat na kaabigan. Antis iyan insalaysay nen Juan, onia ni insulat to: “Inaro [nen Jesus] so saray totoo to a wala ed mundo, inaro to ra angga ed kasampotan.” (Juan 13:1) Say amakiwas ed si Jesus a gawaen so kimey a kaslakan a gagawaen labat na aripen et say panangaro to ed saray disipulo to. Kaukolan da met sirin so manpaabeba tan maaron lingkoran so balang sakey. On, say tuan panangaro so mamakiwas ed sikatayon iyansakit tan serbian so amin ya agagi tayo.

²¹ Atalosan nen apostol Pedro so kabaliksan na impanguras na Anak na Dios ed kasalian da. Insulat to: “Dia ed impakalinis na kamarerwa yo lapud katutulok yo ed katuaan, dia ed panamegley na espiritu, ed agnaumas ya aroan na sanaagi, manaaroan kayo komon a malet ya angga ed utel na puso yo.” (1 Ped. 1:22) Si apostol Juan, ya inurasan met na Katawan so sali to, so angikuan: “Ana’ko ra ya angkekelag, aleg a mangaro itayo ed salita o dia ed dila, noag dia ed gawa tan dia ed katuaan.” (1 Juan 3:18) Komon ta pakiwasen itayo na puso tayo a paneknekan so panangaro tayo ed saray agagi panamegley na gawa.

[Paimano ed leksab]

Kasin Nanonotan Yo?

• Diad antoran paraan a ‘ninatnat tayoy panangaro’ ed agagi tayo?

• Antoy ontulong ed sikatayo pian lawas itayon akaparaan a mangiganay panaon parad arum?

• Panon ya ontulong ed sikatayo so inkamapaabeba diad pikakareenan?

• Antoy mamakiwas ed sikatayon mangiyansakit ed saray kapananisiaan tayo?

[Tepetepet Parad Panagaral]

[Litrato ed pahina 21]

Maliket ya abrasaen iray agagi tayo

[Litrato ed pahina 23]

Agpapalampasen iray pankanawnawan makapitongtong ed arum