‘Makmakpel ya Iyabawag so Salita na Dios’
‘Makmakpel ya Iyabawag so Salita na Dios’
“Napno ra . . . na masanton espiritu tan makmakpel dan inyabawag so salita na Dios.”—GAWA 4:31, NW.
1, 2. Akin a panggunaetan tayoy magmaliw ya epektibo ed ministeryo tayo?
TALORAN agew antis na impatey nen Jesus, oniay imbaga to’d saray disipulo to: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” Antis a sinmegep ed tawen, ingganggan nen apaolin Jesus iray papatumbok to a ‘manggawa na saray babangatan ed amin a nasyones, ya ibangat da iran mangunor na amin a bengabengatla ya ingganggan to ed sikara.’ Insipan to a sikatoy ‘wala ed sikara angga ed kasampotan na mundo.’—Mat. 24:14; 26:1, 2; 28:19, 20.
2 Bilang Tasi nen Jehova, sigpot itayon mibibiang ed kimey a ginmapo nen inmunan siglo. Anggapo lay makapipara ed kaimportantian na manangisalbay bilay a kimey a panagpulong tan panaggaway babangatan. Importante sirin so pagmaliw tayon epektibo ed ministeryo! Pantongtongan tayo ed sayan artikulo no panon a makatulong so panangiwanwan na masanton espiritu pian makpel itayon makapansalita sano mibiang ed ministeryo. Naamtaan tayo ed duaran ontumbok ya artikulo no panon itayon niwawanwan na espiritu nen Jehova pian marundunong a makapanbangat tan maparanay a makapanpulong.
Kaukolan Tayoy Inkakpel
3. Akin a kaukolan so pakpel sano manpupulong?
3 Say inter na Dios a kimey tayo a panangiyabawag na Panarian et agaylan baleg a pribilehyo. Balet no maminsan et aliwan mainomay itan ta anggaman walaray totoon maliket a mangawat ed maong a balita na Panarian na Dios, dakel so mipara ed saramay totoo nen panaon nen Noe. “Ag-ira nanimano ya anggad sinmabi so delap tan niyanor iran amin,” kuan nen Jesus. (Mat. 24:38, 39, NW) Tan walaray mamabalaw tan onsusumpa ed sikatayo. (2 Ped. 3:3) Satan ya isusumpa et nayarin manlapud saray walaan na pakauley, kaeskuela, katrabaho, odino kapamilyaan tayo. Nayarin makaarum niray kakapuyan tayo, a singa say inkamabaing, tan takot ya ompan napabaingan. Dakel so rason no akin a nairapan itayon mangiyabawag ed salita na Dios. Kanian, kaukolan tayoy ‘pakpel’ pian tuloy-tuloy a makapanpulong. (Efe. 6:19, 20) Anto sirin so makatulong pian makapanpakpel itayo?
4. (a) Anto so pakpel? (b) Panon ya akapampakpel a nampulong si apostol Pablo ed saray taga Tesalonica?
4 Say Griegon salitan impatalos a “pakpel” et mankabaliksay “prangka, agnababaingan a mangibagay tua.” Ipapasabi na satan a salita so ideya na pagmaliw a “maksil so linawa, matalek, . . . andi-takot.” Balet ag-itan mankabaliksan na pagmaliw ya anggapoy sarasaray sangi odino ansakit a manalita. (Col. 4:6) Anggaman makpel itayo, labay tayo met so mikareenan ed amin. (Roma 12:18) Niarum ni, legan tayon ipupulong so maong a balita na Panarian na Dios, kaukolan a tekepay inkataktika so pakpel tayo pian agtayo nasakitan iray pupulongan tayo. On, pian makapanpakpel, kaukolan a pansagpotan a bayuboan so arum a kualidad. Sayan inkakpel et agnisipor ed sikatayo tan no diad dilin biskeg tayo lambengat et agtayo iya nabayuboan. Sanen si Pablo tan saray kakaiba to et ‘makapabaing a pinairap diad Filipos,’ panon iran “apabayani” odino akapampakpel a nampulong ed saray taga Tesalonica? ‘Diad panamegley na Dios tayo,’ kuan nen Pablo. (Basaen so 1 Tesalonica 2:2.) On, sarag nen Jehova ya ekalen so takot tayo tan ikdan to itayo na ontan a klase na pakpel.
5. Panon a tinulongan nen Jehova si Pedro, Juan, tan arum nin disipulo pian makapanpakpel?
5 Sanen si apostol Pedro tan Juan et papatundaen a manpulong na ‘saray manuley, mamasiken, tan eskriba,’ oniay inyebat da: “No katunongan kasi ed arap na Dios so pangunor a manuna ed sikayo nen say Dios, ukom yo pa; ta agmi nayarin agsalitaen so anengneng tan nadngel mi.” Imbes a kerewen da ed si Jehova a patundaen toy panamasegsegang, sikara tan saray kapananisiaan da et nampikasi na onia: “Katawan, nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” (Gawa 4:5, 19, 20, 29) Antoy ebat nen Jehova ed pikakasi ra? (Basaen so Gawa 4:31.) Tinulongan ira nen Jehova a makapanpakpel panamegley na espiritu to. Ontan met natan, natulongan itayo na espiritu na Dios. Panon tayon naawat so espiritu na Dios tan niwanwan na satan diad ministeryo tayo?
No Panon a Nawalaay Pakpel
6, 7. Antoy sankadirektaan a paraan pian naawat so masanton espiritu na Dios? Mangiter na alimbawa.
6 Say sankadirektaan a paraan pian naawat so masanton espiritu na Dios et say pangerew ed satan. Oniay imbaga nen Jesus ed saray ondedengel ed sikato: ‘No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na masanton espiritu ed saray onkerew ed sikato?’ (Luc. 11:13) Kanian kaukolan a lawas tayon kerewen so masanton espiritu. No medyo talawan itayo ed arum a kabiangan na ministeryo a singa say panagpulong ya impormal, odino diad karsada, odino diad pannenegosyoan, nayari tayon kerewen ed si Jehova so espiritu to tan tulongan to itayon makapanpakpel.—1 Tes. 5:17.
7 Ontan so ginawa na sakey ya agin manngaran na Rosa. * Aminsan, diad eskuelaan a pantatrabahoan to, babasaen na sakey a maestra so report na impanmaltrato ed ugugaw diad sananey ya eskuelaan. Ontan lay impakabigla na maestra ed abasa to kanian oniay nibaga to, “Agayla, grabe laray nagagawa natan!” Agnitepel nen Rosa a palampasen iyan pankanawnawan makapanpulong. Antoy ginawa to pian makapanpakpel a mitongtong? Oniay inkuan to: “Nampikasi ak ed si Jehova tan kinerew kon tulongan ak na espiritu to.” Kanian sikatoy matalonan akapanpulong tan nampakna ran ituloy da lamet so tongtongan da. Nia ni so sakey ya eksperiensya. Si Milane, a mantaon na limara a taga New York City, so angikuan: “Antis ak ya onla’d eskuelaan, lanang kamin manpipikasi nen mommy ed si Jehova.” Antoy ipipikasi ra ey? A nawalaan komoy kasil na linawa si Milane pian nibaga toy nipaakar ed Dios to. Oniay kuan nen nanay to: “Akatulong iya ed si Milane pian nipaliwawa toy talindeg to nipaakar ed saray birthday tan holiday, tan agmibiang sano seselebraan iratan.” Agta ipapanengneng na sarayan eksperiensya ya epektibo so pikakasi pian nawalaay pakpel?
8. Antoy naaralan tayo ed si propeta Jeremias nipaakar ed pagmaliw a makpel?
8 Imanoen pa met no antoy akatulong ed si propeta Jeremias a manpakpel. Sanen sikatoy tinuro nen Jehova a magmaliw a propeta ed saray nasyon, oniay inyebat to: “Nia, agko amta so mansalita; ta ugaw ak.” (Jer. 1:4-6) Balet, asabi panaon et agaylay seet tan talek nen Jeremias a nampulong, kanian sikatoy impasen na dakel a totoo a manangipakabat na desyang. (Jer. 38:4) Diad masulok a 65 a taon et makpel ton inyabawag iray panangukom nen Jehova. Sikatoy akabkabat ed Israel bilang agnatatakot tan makpel a managpulong. Kanian, kalabas na manga 600 taon, sanen makpel met a nansalita si Jesus, abaloan laingen na arum a sikato so apaolin Jeremias. (Mat. 16:13, 14) Panon a tinalonaan nen propeta Jeremias so inkamabaing to? Oniay inkuan to: ‘Wala dia ed pusok so salita na Dios a singa mandarlang ya apuy ya akapotan ed saray pukel ko et naksawan ak lan mantetepel.’ (Jer. 20:9) On, say salita nen Jehova so amabiskeg tan amakiwas ed si Jeremias a mansalita.
9. Singa si Jeremias, akin a say salita na Dios et nayarin mamakiwas met ed sikatayo?
9 Diad sulat nen apostol Pablo ed saray Hebreo, inkuan to: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Heb. 4:12) Singa ed samay agawa’d si Jeremias, say mensahe odino salita na Dios et mamakiwas met ed sikatayo. Tandaan ya anggaman totoo so inusar a nansulat ed Biblia, aliwa itan a libron nanlapud karunongan na too, noagta pinuyanan itan na Dios. Diad 2 Pedro 1:21 et oniay nabasa tayo: ‘Anggapo so propesiya a nanlapu ed linawa na too, noag saray totoo nansalita ra a nanlapu ed Dios, diad impanenyeg ed sikara na masanton espiritu.’ No ipanaon tan seryoso tayon aralen so Biblia, napanoy kanonotan tayo na mensahen pinuyanan na masanton espiritu. (Basaen so 1 Corinto 2:10.) Satan a mensahe et magmaliw a “singa mandarlang ya apuy” ed dalem tayo, kanian agtayo napokpokan ya ag-itan ibaga.
10, 11. (a) Panon so nepeg a panagaral tayoy Biblia pian nawalaay pakpel a mansalita? (b) Antoy iisipen mon paraan pian napaaligwas ni kualidad na personal a panagaral mo?
10 Pian baleg so epekto ed sikatayo na personal a panagaral na Biblia, nepeg a say panagaral tayo et diad paraan ya ontanetanek so mensahe na satan ed sikatayo, a naimpluensyaan toy inkatoo tayo. Alimbawa, diad sakey a pasingawey ed si propetan Ezequiel et kinerew ed sikaton kanen toy sakey a lukot a mankargay ambelat a mensahen ipasabi ed saray totoon agmaawat. Sirin et kaukolan ton talosan a maong tan ipapuso so mensahe. No gawaen to itan, say pangipasabi to ed mensahe et maliket odino masamit a singa a dilo.—Basaen so Ezequiel 2:8–3:4, 7-9.
11 Mipadpara’d si Ezequiel so situasyon tayo natan, ta karaklan ed saray totoo et agda labay a dengelen so ibabagay Biblia. Pian maseet tayon niyabawag so salita na Dios, kaukolan a say panagaral tayo et diad paraan a natalotalosan tayoy mensahe na satan. Nepeg a regular so panagaral tayo, aliwan tubat-tubat. Aligen tayoy pilalek na salmista, ya oniay inkanta to: “Abuloyan mo so saray salitak, tan say dalepdep na pusok naako ra ed pakanengneng mo, O Jehova, dampay ko, tan mananondon ko.” (Sal. 19:14) Talagan importantin ipanaon tayon dalepdepen so babasaen tayo, pian ontalos itan ed puso tayo! Seguradon labay tayon panggunaetan a paaligwasey kualidad na personal a panagaral tayo. *
12. Akin a makatulong ed sikatayo iray aral pian niwanwan itayo na masanton espiritu?
12 Say sakey nin paraan a nagunggonaan itayo ed masanton espiritu nen Jehova et diad ‘pampapagalangan tayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan iray panmumuyong tayo.’ (Heb. 10:24, 25) Say pampeleng a miaral a regular, idengel a maong, tan pangiyaplika ed saray nanaaralan tayo et maabig iran paraan pian niwanwan itayo na espiritu. Diad tua, ipapagamor na espiritu nen Jehova iray instruksion panamegley na “iglesia” odino kongregasyon.—Basaen so Apocalipsis 3:6.
Saray Gunggona na Pagmaliw a Makpel
13. Antoy naaralan tayo ed agawaan na saray inmunan siglon Kristiano ed impanpulong da?
13 Say masanton espiritu so sankabiskegan a puersa ed uniberso, tan sarag na satan a pabiskegen iray totoo pian nagawaan day linawa nen Jehova. Diad panamegley na satan et agawaan na saray inmunan siglon Kristiano so malaklaknab a panagpulong. Impulong da so maong a balita diad “amin a pinalsa ed leksab na tawen.” (Col. 1:23) Mapatpatnag a pinakiwas ira na satan a mabiskeg a puersa ta maslak ed sikara et ‘abebay aral da tan ordinaryo’ labat.—Gawa 4:13, NW.
14. Antoy makatulong pian magmaliw itayon ‘makulikulin manpulong’?
14 Say pambilay unong ed panangiwanwan na masanton espiritu so mamakiwas met ed sikatayon manpakpel ed ministeryo. Saray gunggona na pangerew na espiritu panamegley na pikakasi, makulin panagaral, masimoon a panagdalepdep ed nababasa, tan regular ya iyaatendi ed saray pantitipon so ontulong ed sikatayo pian magmaliw itayon “marlang ed espiritu.” (Roma 12:11) No nipaakar ed ‘sakey a Judion manngaray Apolos, a nianak ed Alejandria, toon maong a manalita,’ inkuan na Biblia a sikatoy “makulikulin nampupulong tan nambabangat na katuaan a nipaakar ed kinen Jesus.” (Gawa 18:24, 25, Maung a Balita) No sikatayoy “marlang ed espiritu,” mas makapanpakpel itayon mankabkaabungan tan manpulong ya impormal.
15. Panon a makagunggona ed sikatayo so makmakpel a panagpulong?
15 No makmakpel itayon manpulong, maabig so epekto na satan ed sikatayo. Mas positibo so panmoria tayo lapud mas natatalosan tayo so kaimportantian tan gunggona na kimey tayo. Lalo itayon onkuli lapud naliliketan itayo ed epektibon panagministeryo. Tan mas maseseg itayo lapud lalo tayon namomoria so inkaganatan na panagpulong.
16. Antoy gawaen tayo no ontatabang lay seseg tayo’d ministeryo?
16 Panon to balet no abawasan lay seseg tayo’d ministeryo? Kaukolan a matua tayon usisaen so inkasikatayo. Oniay insulat nen Pablo: “Dalepdep yo ed sikayon dili, no wala kayo ed pananisia, sali yo so sikayon dili.” (2 Cor. 13:5) Tepetan moy inkasika: ‘Makulikuli ak ni kasin manpulong? Kekerewen ko kasi ed si Jehova so espiritu to? Ipapanengneng kasi na pikakasik a manmamatalek ak ed sikato pian nagawaay linawa to? Itetekep ko kasi’d pikakasik so pisasalamat ed nimatalek ed sikatayo a ministeryo? Komustay eskedyul ko’d personal a panagaral? Kaunongay igaganak a panaon pian mandalepdep ed saray nababasak tan narerengel ko? Komusta ak no wala ak ed aral?’ No dalepdepen mo iratan a tepet, nanengneng mo no dinan iray papaaligwasen mo tan no dinan iray kaukolan ya ipetek.
Abuloyay Espiritu na Dios a Mamapakpel ed Sika
17, 18. (a) Kaunongan kalaknab so gagawaen a panagpulong natan? (b) Panon tayon nipanengneng so ‘inkakpel’ sano iyaabawag tayo so maong a balita na Panarian na Dios?
17 Oniay imbaga nen apaolin Jesus ed saray disipulo to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem tan ed interon Judea tan Samaria tan diad sankaarawian a pasen na dalin.” (Gawa 1:8, NW) Samay kimey ya inggapo nensaman et agaylay inlaknab to natan. Masulok lan pitoran milyon a Tasi nen Jehova so mangiyaabawag ed Panarian diad masulok a 230 a bansa, tan manga 1.5 bilyon ya oras kada taon so nauusar da’d ministeryo. Talagan makapalikliket so maseseg a pibiang ed sayan aglan balot naulit a kimey!
18 Singa nen inmunan siglo, say panagpulong natan ed interon mundo et iwawanwan na espiritu na Dios. No onkiwas itayo ed panangiwanwan na espiritu, nipanengneng tayoy ‘inkakpel’ diad ministeryo tayo. (Gawa 28:31, NW) Paiwanwan itayo sirin ed espiritu legan tayon iyaabawag so maong a balita na Panarian na Dios!
[Saray paimano ed leksab]
^ par. 7 Sinalatan iray kangaranan.
^ par. 11 Pian nagunggonaan kan maong ed pambabasam na Biblia tan personal a panagaral, nengnengen ed libron Minabang ed Edukasyon na Teokratikon Eskuelaan Parad Ministeryo so “Manseet Ka ed Panagbasa” tan “Makatumang so Panagaral,” diad pahina 21-32.
Antoy Naaralan Mo?
• Akin a kaukolan so manpakpel sano iyaabawag tayoy salita na Dios?
• Antoy akatulong ed saray disipulo nensaman pian makpel iran mansalita?
• Panon itayon nawalaay pakpel?
• Panon a makagunggona ed sikatayo so pagmaliw a makpel?
[Tepetepet Parad Panagaral]
[Litrato ed pahina 7]
Panon a natulongan na atateng iray anak da a makapanpakpel?
[Saray litrato ed pahina 8]
Makatulong so antikey a pikakasi pian makapanpakpel ed ministeryo