Abautismoan ed Ngaran na Siopa tan Anto?

“Onla kayo sirin tan ibangat yo iray totoo . . . pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu.”​—MAT. 28:19.

1, 2. (a) Anto so agawa ed Jerusalem nen Pentecostes 33 C.E.? (b) Akin ya apakiwas a manpabautismo so dakel a totoo nensaman?

NEN Pentecostes 33 C.E., say Jerusalem so napnapno na dakerakel a totoon nanlalapud nanduruman bansa. Nagagawa ed saman so importantin piesta tan wadman so dakel a bisita. Balet walay nikadkaduman agawa ed saman ya agew, a kayari na satan et nampaliwawa si apostol Pedro a walaan na makapakelkelaw ya epekto. Lapud satan a makapasagyat a paliwawa to, ngalngali 3,000 a Judio tan proselita so apakiwas, nagbabawi, tan nampabautismo ed danum. Kanian, niarum ira ed balobalo nin Kristianon kongregasyon. (Gawa 2:41) Maungol ed saman iray totoo ta amayamay so nampabautismo ed danum diad interon Jerusalem!

² Antoy makasengeg no akin a dakdakel so nampabautismo ed saman? Diad bandad kabuasan na saman ya agew, “sinmabi so sakey ya ungol manlapud tawen a singa maksil a siplog na dagem.” Diad kuarto ed tagey na sakey ya abung, walay 120 a disipulo nen Jesus ya apano na masanton espiritu. Kayari na satan, saray dederlengen a totoo et nantitipon tan labay dan dengelen irayan disipulo a ‘mansasalita na nanduruman lenguahe.’ Sanen dedengelen day paliwawa nen Pedro, pati saray diretsaan ya ibabaga to nipaakar ed impatey nen Jesus, “agonigon so puso ra.” Antoy nepeg dan gawaen? Oniay inyebat nen Pedro: “Magbabawi kayo, tan manpabautismo so kada sakey ed sikayo diad ngaran nen Jesu-Kristo . . . , tan makaawat kayo na masanton espiritu bilang regalo.”​—Gawa 2:1-4, 36-38.

3. Diad samay agew na Pentecostes, anto so nakaukolan a gawaen na saray magbabawin Judio tan proselita?

³ Isipen pa so relihyoson kipapasen na saramay  Judio tan proselita a dinmengel ed si Pedro. Inawat da lay Jehova bilang Dios da. Tan amta da la unong ed Hebreon Kasulatan a say masanton espiritu et aktibon puersa na Dios ya inusar to ed panamalsa tan ed arum ni ran paraan diad saginonor. (Gen. 1:2; Uko. 14:5, 6; 1 Sam. 10:6; Sal. 33:6) Balet wala ni so kaukolan dan gawaen. Nakaukolan dan talosan tan awaten so paraan na Dios parad kilalaban​—say Mesias a si Jesus. Kanian, impabitar nen Pedro a kaukolan day ‘manpabautismo diad ngaran nen Jesu-Kristo.’ Pigaran agew ni antis na satan, si Pedro tan say arum ni ra et ingganggan nen apaolin Jesus pian bautismoan da so totoo dia “ed ngaran na Ama tan ed ngaran na Anak tan ed ngaran na masanton espiritu.” (Mat. 28:19, 20) Sayan ganggan so makabkabaliksan nen inmunan siglo anggad natan. Anto itan?

Diad Ngaran na Ama

4. Nipaakar ed saramay walaan lay relasyon ed si Jehova nensaman, anton pananguman so agawa?

⁴ Unong a nipaimano la, saramay kinmiwas ed paliwawa nen Pedro et dati lan mandadayew ed si Jehova tan walaan la ra na relasyon ed Sikato. Tutuloken da met so Ganggan to, kanian saramay Judio a walad arum a bansa et oonla ed Jerusalem. (Gawa 2:5-11) Balet ta inuman lay Dios so pidedeneng to ed sikara. Impulisay to la iray Judio bilang nikabkabiig a nasyon to, tan say itutulok da ed Ganggan et aliwa lan saya so paraan pian nagamoran so panangabobon to. (Mat. 21:43; Col. 2:14) No labay na saramay ondedengel nensaman a mansiansia so relasyon da ed si Jehova, wala ni so kaukolan dan gawaen.

5, 6. Anto so ginawa na saray Judio tan proselita nen inmunan siglo ta pian nawalaan ira na maabig a relasyon ed Dios?

⁵ Say gawaen da et ag-ira nepeg ya onarawi ed si Jehova ya angiter na bilay da. (Gawa 4:24) Mas atalosan la na saramay kinmiwas ed paliwawa nen Pedro a si Jehova et sakey a maomaong ya Ama. Imbaki toy Mesias pian mangiliktar ed sikara tan mabulos ni ingen a mamerdona ed saramay pangibabagaan nen Pedro na: “Nepeg ya amtaen na interon sankaabungan na Israel a sikatoy ginawa na Dios bilang Katawan tan Kristo, sayan Jesus ya impasak yo.” Diad tua, saramay angiyaplika ed saray imbaga nen Pedro et walaan na baleg a rason pian misalamat ed ginawa na Ama parad amin a malabay a nawalaan na relasyon ed Dios!​—Basaen so Gawa 2:30-36.

⁶ On, atalosan na saraman a Judio tan proselita a say pakawalaan na relasyon ed si Jehova et lalanoren toy pamidbir ed sikato bilang Manangitarya na kilalaban diad panamegley nen Jesus. Natalosan sirin no akin a nagbabawi ra ed saray kasalanan da, kalaktip lay inkilanor da ed impamatey ed si Jesus, amta da man itan odino andi. Tan natalosan met sirin a diad tinmumbok iran agew et “intultuloy dan inaral iray ibabangat na saray apostol.” (Gawa 2:42) Kanian nayarian da lay ‘onasingger ed trono na agnaparaan a kaabigan na Dios.’​—Heb. 4:16.

7. Panon ya anguman so panmoria na dakel a totoo nipaakar ed Dios a sengegay impanpabautismo ra ed ngaran na Ama?

⁷ Natan, minilyon a totoo a nanlapud nanduruman kipapasen so nanaral na Biblia tan naamtaan day katuaan nipaakar ed si Jehova. (Isa. 2:2, 3) Arum et ateista odino deist, * balet akombinse ira a walan talaga so Manamalsa tan nayarian day nawalaan na relasyon ed sikato. Walara met so mandadayew nensaman ed trinidad odino nanduruman dirios. Balet naaralan da a si Jehova labat so makapanyarin-amin a Dios, tan natan et uusaren da lay ngaran to sano ontatawag ira ed sikato. Mitunosan itan ed samay imbaga nen Jesus ed saray disipulo to a nepeg iran nabautismoan ed ngaran na Ama.

8. Diad saramay andian na suston pakatalos ed kasalanan ya atawir ed si Adan, anto so nepeg a namoria ra nipaakar ed Ama?

⁸ Naaralan da met ya akatawir ira na kasalanan ed si Adan. (Rom. 5:12) Saya so balon bengatla a nepeg dan awaten. Sikaray niyaliling ed sakey a toon mansasakit ya agto amta no antoy sakit to. Walaray sintomas a nalilikna to, ya  onsasakit no maminsan. Balet lapud agni asuri no anton talaga so sakit to, nayarin iisipen to a maabig so bunigas to. Ingen ta diad tua et walan talagay sakit to. (Ikompara so 1 Cor. 4:4.) Balet antoy gawaen to sano naamtaan ton walan talagay sakit to? Agta nepeg labat a sikatoy mananap na epektibon pakatambalan to tan awaten to itan? Mipadpara, sanen naaralan na dakel a totoo so katuaan nipaakar ed atawir a kasalanan, inawat da so malinew ya ibabaga na Biblia tan atalosan da ya itatarya na Dios so ‘pakatambalan.’ On, amin a nisian ed Ama et kaukolan ya onasingger ed samay Sakey a ‘makatambal’ ed sikara.​—Efe. 4:17-19.

9. Anto so ginawa nen Jehova pian magmaliw a posible so pakawalaan na relasyon ed sikato?

⁹ No indedika yo lay bilay yo ed si Jehova a Dios tan bautismado kayo lan Kristiano, nalikna yo so alay abig a pakawalaan na relasyon ed sikato. Naapresya yo la natan so inkamaaro na Ama tayon si Jehova. (Basaen so Roma 5:8.) Anggaman nankasalanan ed Dios si Adan tan Eva, sikato so kinmiwas ta pian saray kapolian da​—pati sikatayo​—et nawalaan na maabig a relasyon ed sikato. Sanen ginawa to itan, kinaukolan ya itepel to so pakanengneng ed impanirap tan impatey na inad-aro ton Anak. Agta say pakaamta ed satan et makatulong ed sikatayo a mangawat ed autoridad na Dios tan mangunor ed saray ganggan to lapud aro? No agyo ni itan ginawa, walaan kayoy rason pian idedika yoy bilay yo ed Dios tan manpabautismo.

Diad Ngaran na Anak

10, 11. (a) Kaunongan so pisasalamat mo ed si Jesus? (b) Antoy liknaan mo nipaakar ed impatey nen Jesus bilang dondon?

¹⁰ Nonoten lamet imay imbaga nen Pedro ed saray totoo. Indanet toy pangawat ed si Jesus, a satan so misiglaotan ed pampabautismo “ed ngaran na . . . Anak.” Akin ya importante itan nensaman, tan ontan met natan? Say pangawat ed si Jesus tan pampabautismo ed ngaran to et mankabaliksay pamidbir ed betang to diad relasyon tayo ed Manamalsa tayo. Ta pian naekal ed saray Judio so ayew na Ganggan, kinaukolan ya ipasak si Jesus ed panamairapan a kiew; balet say impatey to et walaan ni na babaleg a gunggona. (Gal. 3:13) Intarya to so dondon bagat a nakaukolan na amin a katooan. (Efe. 2:15, 16; Col. 1:20; 1 Juan 2:1, 2) Ta pian nagawa iya, kaukolan a sungdoan nen Jesus so ag-inkahustisya, panagmudmora, panamairap, tan ipapatey. Kaunongan so panamablim ed bagat to? Isipen pa a sika imay 12-años ya ugaw a laki ya akalugan ed Titanic, say barko a dinmumbo ed iceberg tan linmereg nen 1912. Sasalien moy onlugan ed sakey a melag a baloto, balet napno la itan. Insan diad satan a baloto et walay sakey a laki a nampatanir ed asawa to, tan pinmawil ed barko pian sika so paluganen to ed saman a baloto. Anto so naliknam? Seguradon misalsalamat ka ed sikato. Natalosan mo sirin no antoy alikna na saman ya ugaw. * Ingen, mas baleg ni so ginawa nen Jesus parad sika. Sikatoy inatey ta pian nagamoran moy bilay ya andi-anggaan.

¹¹ Antoy alikna yo sanen naaralan yo so ginawa na Anak na Dios parad sikayo? (Basaen so 2 Corinto 5:14, 15.) Seguradon agaylay pisasalamat yo. Satan so amakiwas ed sikayo a mangidedika ed bilay yo ed Dios tan ‘agkayo la manbibilay parad inkasikayon dili, noagta parad samay sakey ya inatey parad sikayo.’ Say kabaliksan na pakabautismoan ed ngaran na Anak et say pamidbir ed ginawa nen Jesus parad sikayo tan pangawat ed autoridad to bilang “Manunan Manangitonton ed bilay.” (Gawa 3:15; 5:31) Nensaman et anggapoy maabig a relasyon yo ed Manamalsa, tan anggapo so peteg ya ilalo yo. Balet diad impakawalaan yoy pananisia ed nipaagus a dala nen Jesu-Kristo tan impanpabautismo yo, walaan kayo la natan na relasyon ed Ama tayo. (Efe. 2:12, 13) “Sikayoy nisian tan kakabusol nensaman lapud say nononoten yo et mauges iran gawa,” so insulat nen apostol Pablo, “kanian [say Dios et] impikareenan to kayo natan ed inkasikato diad panamegley na laman na samay sakey ya inatey [si Jesus], ta pian niyarap to kayo ed sikato bilang masanto tan andiay pakabalawan.”​—Col. 1:21, 22.

12, 13. (a) No abautismoan ka la ed ngaran na Anak, panon iyan mangapekta ed ikiwas mo sano walay akaopendi ed sika? (b) Lapud abautismoan kayo ed ngaran nen Jesus, anto so obligasyon yo bilang Kristiano?

 ¹² Anggaman abautismoan kayo la ed ngaran na Anak, amta yo iray makasalanan a tendensia yo. Say pakaamta ed satan so makatulong diad inagew-agew a pidedeneng tayo ed arum. Singa bilang, no walay akaopendi ed sika, kasin nononoten mo a pareho kayo labat a makasalanan? Sikayon dua et mankaukolan na panamerdona na Dios, tan nepeg met a mamerdona kayo. (Mar. 11:25) Pian nidanet iya, angiter si Jesus na ilustrasyon: Agla impabayaran na katawan ed samay sakey ya aripen so utang ton samplon libo a talento (60 milyon a denario). Balet, sayan aripen et sisingilen to imay kapara ton aripen ya akautang labat na 100 a denario. Onia sirin so punton impabitar nen Jesus: Agperdonaen nen Jehova imay agmamerdona ed agi to. (Mat. 18:23-35) On, say kabaliksan na pakabautismoan ed ngaran na Anak et say pamidbir ed autoridad nen Jesus, pangalig ed ehemplo to, tan pangunor ed saray bangat to, kalaktip lay mabulos a pamerdona ed arum.​—1 Ped. 2:21; 1 Juan 2:6.

¹³ Lapud ag-inkayadyari, agtayo sigpot a naalig si Jesus. Balet, labay tayon aligen si Jesus ed anggaay nayarian tayo unong ed interon-puson dedikasyon tayo ed Dios. Lalanoren na saya so pantultuloy a pangekal ed daan a personalidad tan pangisulong ed balon personalidad. (Basaen so Efeso 4:20-24.) Sano rerespetoen mo so kaarom, seguradon labay mo nin amtaen so ehemplo to tan saray maabig a kualidad to. Ontan met, labay mo nin aralen so nipaakar ed si Kristo pian sikatoy naalig tayo.

14. Panon yon nipanengneng a bibidbiren yo so autoridad nen Jesus bilang mangatatawen ya Ari?

¹⁴ Wala ni sakey a paraan pian nipanengneng yon natatalosan yo so nalalanor ed pakabautismoan ed ngaran na Anak. “Impasakop [na Dios] so amin a bengatla diad salian nen Kristo, tan sikatoy ginawa ton ulo na amin a bengatla parad kongregasyon.” (Efe. 1:22) Kanian, nepeg yon respetoen so panangidirehi nen Jesus ed saramay dedikado la ed si Jehova. Uusaren nen Jesus iray ag-ayadyarin totoo ed kongregasyon, nagkalautla ed saray lalakin matatken ed espiritual, salanti, saray aturon mamatatken. Sarayan lalaki et aturo “pian nipetek da iray masanto, . . . pian pabiskegen day laman na Kristo.” (Efe. 4:11, 12) Anggaman nalilingo so sakey ya ag-ayadyarin too, sayan pamaakaran so asikasoen nen Jesus diad dugan panaon tan paraan to bilang say Ari ed mangatatawen a Panarian. Kasin kombinsido kayo ed saya?

15. No nabautismoan ka, antoran bendisyon so nailaloan mo kayari na pampabautismom?

¹⁵ Balet, wala niray agni angidedika ed bilay da diad si Jehova tan agni ra abautismoan. No agmo ni itan agawaan, agka kasi napakiwas ed saray nipabitar lan punto a say pamidbir ed betang na Anak et makatunongan tan nepeg a pisalamatan? No manpabautismo ka ed ngaran na Anak, nagamoran mo iray daakan a bendisyon ed arapen.​—Basaen so Juan 10:9-11.

Diad Ngaran na Masanton Espiritu

16, 17. Anto so kabaliksan ed sika na pakabautismoan ed ngaran na masanton espiritu?

¹⁶ Anto so kabaliksan na pakabautismoan ed ngaran na masanton espiritu? Unong a nipaimano la, amta na saramay dinmengel ed si Pedro diad samay agew na Pentecostes no anto so masanton espiritu. Diad tua, anengneng dan mismo so ebidensya ya uusaren na Dios so  masanton espiritu. Si Pedro et sakey ed saramay ‘napno na masanton espiritu tan nansalita na nanduruman lenguahe.’ (Gawa 2:4, 8) Say balikas ya “ed ngaran na” et aglabat mankabaliksan na ngaran na sakey a too. Natan, dakel a bengatla so gagawaen “ed ngaran na gobierno,” a saya et agmanutukoy ed sakey a too. Gagawaen da itan unong ed autoridad na gobierno. Mipadpara, samay abautismoan ed ngaran na masanton espiritu et bibidbiren to a say masanton espiritu et aliwan persona, noagta aktibon puersa nen Jehova. Tan mankabaliksan met itan a bibidbiren to so betang na masanton espiritu diad gagala na Dios.

¹⁷ Agta naamtaan mo la so nipaakar ed masanton espiritu diad panaaral moy Biblia? Singa bilang, atalosan mo la a say Biblia et nisulat diad panangipuyan na masanton espiritu. (2 Tim. 3:16) Legan ya onaaligwas ka ed espiritual, mas lalon onaaralem so pakatalos mo ed katuaan a ‘say Ama ed tawen et mangiiter na masanton espiritu ed saramay onkekerew ed sikato,’ pati ed sika. (Luc. 11:13) Nayarin anengneng mo ed bilay mo so epekto na satan. Balet, no manpabautismo ka ni labat ed ngaran na masanton espiritu, napaseguroan ka ed inkuan nen Jesus ya iter na Ama so masanton espiritu to. Kabaliksan na saya a nagamoran mo iray peteg a bendisyon ed arapen sano awaten mo itan ya espiritu.

18. Antoran bendisyon so nagamoran na saramay manpabautismo ed ngaran na masanton espiritu?

¹⁸ Mapatpatnag met natan ya igigiya tan idadaulo nen Jehova so Kristianon kongregasyon diad panamegley na espiritu to. Tan bilang indibidual et tutulongan itayo met na satan ya espiritu diad inagew-agew iran kimey tayo. Say pakabautismoan tayo ed ngaran na masanton espiritu et mankabaliksan a bidbiren tayo so betang na satan diad bilay tayo tan maliket itayon paiwanwan ed satan. Balet nayarin iisipen na arum no panon so pambilay unong ed dedikasyon ed si Jehova tan no panon a nalalanor ed satan so masanton espiritu. Satan so aralen tayo ed ontumbok ya artikulo.

[Saray paimano ed leksab]

Kasin Natandaan Yo?

• Anto so lalanoren na pakabautismoan mo ed ngaran na Ama?

• Anto so kabaliksan ed sika na pakabautismoan ed ngaran na Anak?

• Panon mon nipatnag a natatalosan mo so kabaliksan na pampabautismo ed ngaran na Ama tan say Anak?

• Anto so kabaliksan na pakabautismoan ed ngaran na masanton espiritu?

[Tepetepet Parad Panagaral]

[Saray litrato ed pahina 10]

Kayari na Pentecostes 33 C.E., saray balon disipulo et awalaan na anton relasyon ed Ama?

[Credit Line]

Diad impangiyabuloy na Israel Museum diad Jerusalem