Labay nen Jehova a Nipaliis Ka ed Kapeligroan

SANO biglan nagawa so sankapeligroan ya ebento ed awaran, seguroen na Makapanyarin-amin a Dios a “nilaban” so amin ya aabobonan to. (Joel 2:32) Balet nensaman ni et labay nen Jehova a nipaliis ed kapeligroan iray totoo to. Lapud sikato so “subol na bilay,” amin a totoo et ipapasen ton mabmabli tan nepeg a protektaan.​—Sal. 36:9.

Saray matoor a lingkor na Dios nensaman et ontan met so impangipasen da ed bilay. Unong ed Genesis 33:18, si Jacob tan say pamilya to so akasabin maligen anggaman mapeligroy dinalan da. Nanilalo si Jacob ed proteksion nen Jehova, balet sikatoy nanggawa met na praktikal iran paraan pian naprotektaan so amin a kaiba ton nambaroy. (Gen. 32:7, 8; 33:14, 15) Ontan met, diad pangiyaplikam ed saray prinsipyo na Biblia et baleg so nagawaan mo pian makapaliis ka tan say arum manlapud kapeligroan. Aralen tayo no panon ya onaplika iyan katuaan diad saramay manpapaalagey na Kingdom Hall tan arum nin proyekto, tan ontutulong ed saray naapektoan na kalamidad.

Ipaliis ed Pakarisgoan Unong ed Mosaikon Ganggan

Diad Mosaikon Ganggan, walaray totontonen nipaakar ed ipaliis ed pakarisgoan. Singa bilang, no mangipapaalagey na abung so sakey ya Israelita, nepeg a manggawa na barandilyas odino abeban dingding ya akapaliber ed plastadon atep na abung to. Lapud naynay a walad atep iray totoo, sarayan barandilyas et proteksion ed sikara pian ag-ira napelag. (1 Sam. 9:26; Mat. 24:17) No walay naplag lapud ag-atumbok iyan ganggan, say akan-abung et walay eebatan to ed si Jehova.​—Deu. 22:8.

Onaplika met iyan ganggan no walay sinakitan na ayep. No inatey so sakey a too lapud binuno na baka, nepeg itan a pateyen na akanggawa pian agla manrisgo na arum. Agto la nayarin kanen odino ilako so karne kanian baleg a pakaperdian to itan. Balet antoy nagawa sano agto ipukok so ayep anggano akarisgo la ed arum? No akapatey la lamet itan, nepeg a pateyen so baka tan say akanggawa. Sayan ganggan so mangipanonot ed siopaman a walaay tendensian mamaulyan ed ayep to.​—Exo. 21:28, 29.

Nidanet met ed Ganggan so suston panangusar ed saray kagawaan. Wasay so uusaren na dakel ya Israelita diad pambelang na kiew. No nauyos so tarem na wasay tan akapatey itan na too, samay manbebelang et nepeg ya ombatik ed syudad na salimbengan. Lapud aksidentin akapatey, sikatoy manayam ditan anggad ipatey na atagey a saserdote kanian pigapigay taon ya agto nakaibay pamilya to. Sayan uksoyan so mangipanonot ed Israel a say bilay et sagrado ed si Jehova. No say  sakey a too et ipapasen ton sagrado so bilay, seguroen ton agmakarisgo iray kagawaan to antis ton usaren iratan.​—Num. 35:25; Deu. 19:4-6.

Diad panamegley na saratan a ganggan, impabitar nen Jehova a labay ton napaliisan na totoo to so pakarisgoan ed loob tan paway na abung da. Saramay akapatey tan akarisgo ed arum, anggano aksidente ni itan, et walaay eebatan ed sikato. Tan siansia nin ag-anguman so panmoria to ed saya. (Mal. 3:6) Labay ton manalwar iray totoo pian ag-ira narisgo pati say arum, nagkalalo la sano manpapaalagey tan mangaapiger na saray bilding ya indedika parad tuan panagdayew.

 Ipaliis ed Pakarisgoan Sano Walaray Proyekton Panagpaalagey

Baleg a pribilehyo so pangipaalagey tan panmantini na saray Kingdom Hall, Assembly Hall, tan saray pasilidad na sanga. Ontan met so nibaga sano mankikimey itayo diad pasen a naapektoan na kalamidad. Diad amin a panaon, nepeg a marunong itayo ed trabaho tayo, anggano simpli labat iratan, pian anggapoy narisgo. (Ecl. 10:9) On, no maalwar itayon mankikimey, napaliisan tayo iray pakarisgoan.

Inkuan na Biblia: “Say gayaga na saray tobonbalon lalaki sikato so biskeg da, say kalimgasan na saray mamasiken sikato so ubanan ya ulo.” (Uli. 20:29) Pian nagawaan iray ambelat a kimey, nakaukolan so biskeg na saray kalangweran. Balet, saray kagawaan tan desinyo ed loob na bilding et gagawaen na saray maedad la ya eksperiensyado ed konstruksion. Nensaman, inusar met na sarayan maedad la so biskeg da ed ambelat iran kimey. No balo ka ni labat a boluntaryo, imanom so panagtrabaho na saray eksperiensyado, tan tumbok mo iray instruksion da. Dakel so naaralan mo ed saray agagin eksperiensyado ed konstruksion. Kaiba’d saya so panalwar no walaray delikadon materyales tan no panon so pangalsa na ambelat. Diad ontan et dakel so nagawaan mo, nipaliis  ka ed pakarisgoan, tan naliketan ka.

Nepeg ya alerton naynay iray mantratrabaho diad konstruksion. Mapmaples a manguman iray kipapasen. Singa bilang, ompano samay datin dadalanan mo et akotkotan la manaya. Nayarin walay angidere na takayan, toonan, odino sakey timban pinta. No aliwa kan alerto, mainomay kan narisgo. Pian nipaliis ed pakarisgoan iray mantratrabaho, nakaukolan iran mangisulong na kagawaan parad proteksion da. Diad pasen na konstruksion, napaliisan moy dakel a pakarisgoan no mangusar kay salming parad proteksion na matam, hard hat, tan matukoy iran sapatos. Balet naprotektaan ka labat no limpio iratan tan akasulong ed sika.

Anggaman singa mainomay ya usaren so dakel a kagawaan, kaukolan ni so panaral tan panagpasal pian magmaliw kan marunong tan maalwar a mangusar ed saratan. No agmo ni asali ya usaren so sakey a kagawaan, ibagam ed agin mangaasikaso. Sikato so mangiyuksoy pian nipasal kan mangusar ed satan. Maabig no mapaabeba ka odino amtam iray limitasyon mo. Diad tua, nakaukolan itan pian anggapoy narisgo diad pasen na konstruksion.​—Uli. 11:2.

Say mabetbet a pakakarisgoan diad pasen na konstruksion et say pakapelag ed takayan odino toonan. Seguroen mon limpio tan aliwan delikado so sasapatan odino totoonan mo. No akatoon ka odino wala ka’d atep, nakaukolan a walaray taker (safety harness) ya akasulong ed sika odino walay peketan ya akapaliber ed totoonan mo. Tepetan moy agin mangaasikaso nipaakar ed pankimey ed atagey iran pasen. *

Lapud ondarakel so lingkor nen Jehova diad interon mundo, nakaukolan so pangipaalagey na saray Kingdom Hall tan arum ni ran pasilidad ya uusaren ed tuan panagdayew. Say responsabilidad na saramay mangaasikaso ed panagpaalagey na Kingdom Hall tan arum ni ran proyekto et say pamprotekta ed mablin karnero nen Jehova ya ontutumbok ed direksion da. (Isa. 32:1, 2) No apribilehyoan kan mangidaulo ed saray agagi diad sakey a proyekto, agmon balot lilingwanan ya importante so ipaliis ed pakarisgoan. Seguroen mon malinis tan ag-atakatak so pankikimeyan yo. Maaro balet ta mapekder mon ibaga ed saramay nepeg a panonotan no panon so ipaliis ed pakarisgoan. Agmo aabuloyan ya onloob iray ugugaw odino ag-eksperiensyadon agagi diad delikado iran pasen. Aral mo iray posiblin pakarisgoan tan panonotan mo iray kaibam a mantratrabaho pian ag-ira narisgo. Tandaan a say gagala tayo et sumpalen so proyekto ya anggapoy narisgo.

Say Betang na Aro

Nayarin walaray kapeligroan sano manpapaalagey na Kingdom Hall tan arum ni ran bilding ya uusaren ed tuan panagdayew. Sirin, nepeg a manalwar iramay mankikimey ed saratan a proyekto. No unoren mo iray prinsipyo na Biblia, tuloken iray totontonen ed pankimey, tan usaren moy maong a pakatebek, napaliisan moy kapeligroan tan naprotektaan iray kaibam a mantratrabaho.

Anto so manunan rason tayo no akin a labay tayon napaliisan so pakarisgoan? Say aro. On, say aro ed si Jehova so mamapakiwas ed sikatayo pian pablien so bilay, a singa panamabli to. Tan say aro ed totoo so rason no akin a manaalwar tayo pian ag-ira narisgo. (Mat. 22:37-39) Sirin, gawaen tayoy anggaay nayarian tayo pian nipaliis ed kapeligroan iramay mankikimey ed proyekto tayo a panagpaalagey.

[Paimano ed leksab]

[Kahon/Litrato ed pahina 30]

No Panon so Pangusar na Takayan Pian Agnarisgo

Nen imbeneg a taon, masulok a 160,000 a trabahador ed Estados Unidos so arisgo lapud inkaplag ed takayan. Tan lapud satan et manga 150 so inatey. Inerman so panaayaman tan pantratrabahoan mo, nia ray nepeg a tumboken pian agka narisgo.

◇ Agka manguusar na takayan a lupok la odino aderal la. Agmo la itan aapigeren noagta bagbag mo la.

◇ Amin a klase na takayan et walay espisipikon belat a nasarag ton awiten. Seguroen a nasarag na takayan so belat mo pati saray bitbit mon kagawaan tan materyales.

◇ Ilira so takayan ed plastadon pasen. Agmo itan ipapatoon ed scaffolding odino diad tapew na saray timba odino kahon.

◇ Nepeg ya akaarap kan naynay ed takayan sano onsasapat odino oneepas ka.

◇ Agka onaalagey odino onyuyurong ed duaran balitang diad bandad toktok na takayan.

◇ Sano mangusar kay takayan pian onepas odino onsapat ed atep odino diad atagey a pasen, say takayan et nepeg ya onlampas ed manga taloran piye manlapud samay atep odino atagey a pasen ya angipasaralan mo. Isinger odino pasakan so bandad leksab na takayan pian ag-itan onkudyas. No agmo nagawaan iratan, manawag kay mamemben ed takayan legan kan walad tagey. Isinger so bandad toktok na takayan pian ag-itan natumba.

◇ Saray balitang na takayan et agnepeg a pantapewan na tabla a toonan.

◇ No igagawat mo ray limam odino salim legan a wala ka’d tagey, ompan natumba so takayan. Delikado itan kanian agmo gagawaen. No nakaukolan, naynay mon idere so takayan diad kikimeyan mo.

◇ No ontoon ka’d takayan a walad arap na akakapot a puerta, italak mo itan tan mangiyan kay karatula pian naamtaan dan walay mankikimey ditan. No agnayarin italak, nepeg a walay manbantay ed paway.

◇ Sakey labat a too so nepeg ya ontoon ed takayan nilikud no adesinyo itan a toonan na duaran too. *

[Paimano ed leksab]

[Litrato ed pahina 29]

Unong ed Mosaikon Ganggan, saray plastadon atep et nepeg a paliberan na abeban dingding