Agagin Lalaki​—Mantanem Unong ed Espiritu tan Dampoten Yoy Pribilehyo!

“Samay mantatanem nipaakar ed espiritu et manani na bilay ya andi-anggaan.”​—GAL. 6:8.

1, 2. Panon a nasusumpal so Mateo 9:37, 38, tan antoy linmesan pankaukolan diad saray kongregasyon?

NAIIMATONAN yo la natan iray ebento ya agbalot nalingwanan ed andi-anggaan! On, talagan nasusumpal la imay kimey ya imbaga nen Jesus. “Dakel so aanien, balet daiset so mankikimey,” so inkuan to. “Mikasi kayo sirin ed Katawan na panag-ani a mangibaki na saray mankimey ed aanien to.” (Mat. 9:37, 38) Eebatan nen Jehova itan a pikakasi diad nikadkaduman paraan. Legan na 2009 a serbisyon taon, say bilang na kongregasyon na saray Tasi nen Jehova diad interon mundo et naaruman na 2,031, kanian asabi to lay 105,298. Diad aberids et 757 ya indibidual so nababautismoan ed kada agew!

² Lapud sayan iyaaligwas, nakaukolan iray kualipikadon agagin lalaki a mangidaulo ed panagbangat tan panagpastol ed saray kongregasyon. (Efe. 4:11) Diad inlabas na saray dekada, anuro si Jehova na saray kualipikadon lalaki pian mangasikaso ed pankaukolan na saray karnero to, tan matalek itayo ya itultuloy ton gawaen itan. Ipapaseguro na propesiya a walad Miqueas 5:5 a legan na kaunoran iran agew, saray totoo nen Jehova et nawalaay ‘pitoran pastol’ tan ‘waloran manunaan a lalaki,’ a mangirerepresenta ed dakel a kualipikadon lalaki a mangidaulo ed sikara.

3. Ipaliwawa no antoy kabaliksan na ‘pantanem nipaakar ed espiritu.’

³ No sakey kan bautismadon agin laki, antoy makatulong pian nawalaan kay pilalek a mandampot na pribilehyo? Say manunan gawaen mo et ‘mantanem ka nipaakar ed espiritu.’ (Gal. 6:8) Nalalanor ed satan so pangiyabuloy mo ed masanton espiritu na Dios a mangimpluensya ed kabibilay mo. Nepeg ya agka ‘mantatanem nipaakar ed laman.’ Agmo aabuloyan a naandi so pilalek mon mamalaknab ed panagserbim ed Dios lapud panagrelaks odino panagligliwaan. Amin a Kristiano et nepeg a ‘mantanem nipaakar ed espiritu,’ tan diad saginonor, saray lalaki ya ontan so gagawaen da et onkualipika ed saray pribilehyo ed kongregasyon. Lapud baleg so pankaukolan natan parad saray ministeryal a lingkor tan mamatatken, intarya iyan artikulo parad saray Kristianon lalaki. Kanian agagin lalaki, papasesegen mi kayo a pannonotan yo iya tekep na pikakasi.

Dampoten so Maabig a Kimey

4, 5. (a) Antoran pribilehyo ed kongregasyon so ipapaseseg a dampoten na saray bautismadon lalaki? (b) Antoy gawaen na sakey pian nadampot toy pribilehyo?

⁴ Say sakey ya agin laki et ag-automatikon magmaliw a manangasikaso. Nepeg a dampoten to iyan “maabig a kimey.” (1 Tim. 3:1) Kabiangan ed saya so panlingkor to’d saray agagi diad maaron pangasikaso ed pankaukolan da. (Basaen so Isaias 32:1, 2.) Say sakey a lakin manadampot na pribilehyo et agmet nibagan maambisyon no dugay motibo to. Imbes, talagan pilalek to so mansakripisyo parad arum.

 ⁵ Say agin manggugunaet ya onkualipika bilang ministeryal a lingkor tan manadampot ed pribilehyo bilang manangasikaso et pansasagpotan ton nakapet iray kualipikasyon a walad Biblia. (1 Tim. 3:1-10, 12, 13; Tito 1:5-9) No sakey kan dedikadon agin laki, tepetan moy inkasika: ‘Kasin sigpot ak a mibibiang ed panagpulong, tan tutulongan koy arum a gawaen itan? Kasin papabiskegen ko iray agagi diad pangipapatnag koy peteg ya interes ed pankaabigan da? Kabkabat ak kasi a maseet ed panagaral na Salitay Dios? Kasin makuli ak a manusumpal ed kimey ya impabtang na mamatatken ed siak?’ (2 Tim. 4:5) Nepeg ya ikonsideran maong irayan tepet.

6. Anto so sakey ya importantin paraan pian onkualipika ed saray pribilehyo ed kongregasyon?

⁶ Say sakey nin paraan pian onkualipika ed pribilehyo et kaukolan a ‘napabiskeg so pusom diad panamegley na pakayari na espiritu na Dios.’ (Efe. 3:16) Say pakaturo bilang ministeryal a lingkor odino matatken ed kongregasyon et ag-ipaparalan ed panagboto. Sayan pribilehyo et nagamoran labat no say sakey et onaligwas ed espiritual. Panon so iyaligwas mo’d espiritual? Say sakey a paraan et diad ‘panakar unong ed espiritu’ tan pamayubo ed bunga na espiritu. (Gal. 5:16, 22, 23) Legan mon ipapatnag iray maespiritual a kualidad a nakaukolan pian nasumpal mo iray kaaruman a pribilehyo, tan legan ya iyaaplikam so simbawa no panon kan onaligwas, “nanengneng na amin a totoo so iyaaligwas mo.”​—1 Tim. 4:15.

Nakaukolan so Panagsakripisyo

7. Anto so nakaukolan pian makapanserbi ed arum?

⁷ Nakaukolan so pansagpot tan panagsakripisyo pian makapanserbi ed arum. Saray manangasikaso et espiritual a pastol kanian pampapagaan dan maong iray problema na pulok. Imanoen no panon ya akaapekto ed si apostol Pablo iray responsabilidad to bilang managpastol. Imbaga to ed saray kapananisiaan to ed Corinto: “Diad dakel a kairapan tan gonigon ed puso et sinulatan ta kayo tekep na dakel a lua, aliwan pian naermenan kayo, noagta pian naamtaan yo ya inar-aro ta kayo.” (2 Cor. 2:4) Mapatnag sirin ya impapuso to so kimey to.

8, 9. Mangiter na saray alimbawa ed Biblia nipaakar ed saray lalakin nansagpot parad arum.

 ⁸ Say panagsakripisyo et napatnagan ed saray lalakin nansagpot parad saray lingkor nen Jehova. Singa bilang, seguradon ag-imbaga nen Noe ed saray kapamilyaan to: ‘Ibaga yo labat ed siak no asumpal lay biong insan mila ak ed sikayo.’ Agmet imbaga nen Moises ed saray Israelita diad Ehipto: ‘Mannenengnengan tayo la’d Ambalangan Dayat. Gawa yoy anggaay nayarian yon makasabi diman.’ Agbalot imbaga nen Josue: ‘Ibaga yo’d siak no nagba la ray padir na Jerico.’ Tan ag-inturo nen Isaias so arum tan agto imbagan: ‘Ni! Sikato lay ibakim.’​—Isa. 6:8.

⁹ Say manunan napanuliranan a laki ya inabuloyan toy espiritu na Dios a mamakiwas ed sikato et si Jesu-Kristo. Mabulos ton inawat so asainmin to bilang Mananondon na katooan. (Juan 3:16) Agta say masakripisyon aro nen Jesus et mamakiwas ed sikatayon mansakripisyo met? Sanen deneskribe na sakey ya abayag lan matatken so nalilikna to parad pulok, oniay inkuan to: “Talagan apakiwas ak ed samay imbaga nen Jesus ed si Pedro a ‘pastolan mo iray angkekelag a karnerok.’ Diad inlabas na saray taon, naapresyak no panon a napaseseg so sakey a too lapud maaron salita odino simplin gawa na kaabigan. Say panagpastol a kimey et panliliketan ko.”​—Juan 21:16.

10. Anto so mamakiwas ed agagin lalaki ya aligen so ehemplo nen Jesus ed panagserbi ed arum?

¹⁰ Nipaakar ed panagpastol ed pulok na Dios, maseguron labay na dedikadon agagin lalaki ya ipatnag so awawey nen Jesus, ya oniay inkuan to: “Pampainawaen ta kayo.” (Mat. 11:28) Say pananisia ed Dios tan aro ed kongregasyon so mamakiwas ed agagin lalaki pian mandampot ed sayan maabig a kimey, ya agda iisipen a balbaleg so isakripisyo ra odino mair-irap itan. Balet, panon to no say sakey et ag-interesadon mandampot na pribilehyo? Sarag to kasin bayuboan so pilalek a manserbi ed kongregasyon?

Bayuboan so Pilalek a Manserbi

11. Panon a nabayuboan na sakey so pilalek ton manserbi ed arum?

¹¹ No iisipen mo ya agmo nasarag tan agka kualipikado ed sayan pribilehyo, nepeg kan onkerew ed Dios na masanton espiritu to. (Luc. 11:13) Say espiritu nen Jehova so ontulong pian nadaeg moy antokaman a kapagaan a naliliknam nipaakar ed saya. Say pilalek a manserbi et manlalapud si Jehova, ta say espiritu to so mamapakiwas ed sakey ya agin laki pian mandampot na pribilehyo tan mamabiskeg ed sikato pian makapanlingkor. (Fil. 2:13; 4:13) Maabig sirin no onkerew kay tulong ed si Jehova pian ombiskeg so pilalek mon mangawat na saray pribilehyo.​—Basaen so Salmo 25:4, 5.

12. Panon a nagamoran na sakey ya agi so karunongan pian nagawaan to iray responsabilidad a nipabtang ed sikato?

¹² Nayarin aglabay na sakey ya agin laki so mandampot lapud iisipen to a singa makapakesaw tan mair-irap so mangasikaso ed pankaukolan na pulok. Odino nayarin nononoten to a kulang so karunongan ton manakbat na saray responsabilidad. No ontan so iisipen to, nagamoran toy karunongan diad maseet a panaral to’d Salitay Dios tan saray publikasyon a nibase’d-Biblia. Maabig no tepetan toy inkasikato, ‘Kasin ipapanaon koy panagaral na Biblia, tan onkekerew ak na karunongan ed Dios?’ Oniay insulat nen disipulon Santiago: “No walad sikayo so kulang na karunongan, mantultuloy komon ya onkerew ed Dios, ta sikatoy mabunlok a mangiiter ed amin tan agmamabalaw; tan iter to itan ed sikato.” (Sant. 1:5) Kombinsido ka kasi ed sarayan impuyan a salita? Sanen inebatan na Dios so pikakasi nen Solomon, sikatoy naikdan na “makabat tan makatalos a puso” ya akatulong pian natebek toy duga tan aliwa sano manguukom. (1 Ara. 3:7-14) Tua, nikadumay kipapasen nen Solomon. Ingen, makapanmatalek itayo a say Dios et mangiter na karunongan ed lalakin apabtangan na saray responsabilidad ed kongregasyon ta pian naasikaso dan maong iray karnero to.​—Uli. 2:6.

13, 14. (a) Ipaliwawa no antoy epekto na “aro na Kristo” ed si Pablo. (b) Anto met so nepeg ya epekto ed sikatayo na “aro na Kristo”?

¹³ Say sakey nin makatulong pian nabayuboan tayoy pilalek a manlingkor ed arum et say pannonot a maong ed amin a ginawa nen Jehova tan  say Anak to parad sikatayo. Alimbawa, ikonsidera tayoy 2 Corinto 5:14, 15. (Basaen.) Panon a “say aro na Kristo so mamapakiwas” ed sikatayo? Balbaleg so aro ya impatnag nen Kristo diad impangiter toy bilay to parad sikatayo unong ed linawa na Dios, kanian legan ya ombabaleg so apresasyon tayo et natetenyeg met a maong so puso tayo. Si Pablo so apakiwas lapud aro na Kristo. Akatulong itan pian sikatoy mansakripisyo tan iyapasakey toy imano to diad panagserbi ed Dios tan ed kapara ton too diad loob tan paway na kongregasyon.

¹⁴ No dalepdepen tayoy aro nen Kristo ed totoo, napakiwas itayon misalamat. Bilang resulta, nanengneng tayo ya agmanepeg so ‘mantanem nipaakar ed laman,’ salanti, say pangiyuna ed saray ambisyon tayo tan pambilay unong ed dilin pilalek tayo. Imbes, walaray pananguman a gawaen tayo pian niyuna iray pagagawa na Dios. Napakiwas itayon “manpaaripen” ed saray agagi lapud aro. (Basaen so Galacia 5:13.) No ipasen tayoy inkasikatayo bilang aripen a mapaabeban mankikimey parad saray dedikadon lingkor nen Jehova, tratoen tayo ra tekep na dignidad tan respeto. On, agtayo aaligen so makritiko tan mahusgan ugali ya isasagyat nen Satanas.​—Apo. 12:10.

Say Betang na Pamilya

15, 16. Pian onkualipika so agin laki bilang ministeryal a lingkor odino matatken, anto so betang na interon pamilya to?

¹⁵ No say sakey ya agin laki et walaay pamilya, nakaukolan ya ikonsidera so kipapasen na pamilya to pian naamtaan no sikatoy kualipikadon magmaliw a ministeryal a lingkor odino matatken. Sirin, baleg so epekto na espiritualidad tan reputasyon na pamilya to diad pakaturo to. Idadanet na saya so kaimportantian na suportay asawa to tan ananak to pian sikatoy makapanlingkor ed kongregasyon bilang ministeryal a lingkor odino matatken.​—Basaen so 1 Timoteo 3:4, 5, 12.

¹⁶ Maliket si Jehova no walay kooperasyon ed loob na Kristianon pamilya. (Efe. 3:14, 15) Kaukolan a balanse so ulo na pamilya pian naasikaso to ed “maabig” a paraan iray responsabilidad to ed kongregasyon tan ed pamilya to. Kanian importante parad sakey a matatken odino ministeryal a lingkor so panaral na Biblia a kaibay asawa to tan ananak to pian nagunggonaan iran amin ed sinimban Panagdayew na Pamilya. Kaukolan met a sikatoy regular a mibiang ed panagpulong a kaibay pamilya to. Sirin, kaukolan so kooperasyon na sankaabungan to diad saray sagpot to bilang ulo na pamilya.

Kasin Makapanlingkor Ka Lamet ed Sakey a Pribilehyo?

17, 18. (a) No say sakey ya agin laki et aliwa lan kualipikado ed sakey a pribilehyo, antoy nepeg ton gawaen? (b) Anto so maabig a nodnonoten na sakey ya agin datin matatken odino ministeryal a lingkor?

¹⁷ Nayarin dati kan matatken odino ministeryal a lingkor balet natan et andi la. Aaroen moy Jehova tan amtam ya iyaansakit to ka nin siansia. (1 Ped. 5:6, 7) Kasin nibaga’d sika a walaray kaukolan mon umanen? Mabulos mon awaten so lingom tan pankimeyan mon ipetek itan diad tulong na Dios. Agka maneem-em na sakit na linawa. Magmaliw a makabat tan positibo. Oniay inkuan na sakey ya agin laki ya abayag ya akapanlingkor bilang matatken, balet ta naandian lay pribilehyo: “Nanggunaetan kon pansiansiaen so regular a pipiaral ko, pati say panagpulong, tan panagbasak ed Biblia a singa gagawaen ko la nen elder ak ni. Naaralan koy mananos lapud abaloan ko et makapawil ak lan elder kayari sakey odino duaran taon, balet asabi toy ngalngali  pitoy taon. Diad saraman a panaon, say panamaseseg ya agnepeg ya onsuko tan mantultuloy a mandampot et akatulong na baleg ed siak.”

¹⁸ No sakey kan agin laki tan ontan so kipapasen mo, agka nadidismaya. Dalepdep mo no panon a bebendisyonan nen Jehova so ministeryom tan say pamilyam. Pabiskeg mo ed espiritual so pamilyam, bisitam iray mansasakit, tan paseseg mo iray makapuy. Manuna ed amin, pablim so pribilehyon mangidayew ed Dios tan mangiyabawag ed maong a balita na Panarian bilang sakey a Tasi nen Jehova. *​—Sal. 145:1, 2; Isa. 43:10-12.

Ikonsidera Yo Lamet

19, 20. (a) Anto so ipapaseseg a gawaen na amin a bautismadon lalaki? (b) Anto so aralen ed ontumbok ya artikulo?

¹⁹ Mas ombabaleg natan so pankaukolan parad saray manangasikaso tan ministeryal a lingkor. Papasesegen mi sirin so amin a bautismadon lalaki ya ikonsidera da lamet so kipapasen da tan tepetan day inkasikara, ‘No aliwa ak nin ministeryal a lingkor odino elder, agta kaukolan kon usisaen iray rason no akin ya agak ni nirekomenda?’ Abuloyan yoy espiritu na Dios pian nawalaan kayoy dugan awawey ed sayan importantin pamaakaran.

²⁰ Amin a membro na kongregasyon et nagunggonaan lapud maridios a panagsakripisyo na saray kapananisiaan da. No mibiang itayo ed masakripisyo tan maabig iran gawa, makalikna tayoy liket lapud panagserbi ed arum tan pantatanem nipaakar ed espiritu. Diad ontumbok ya artikulo balet, naaralan tayo ya agtayo nepeg a paermenen so masanton espiritu na Dios. Panon tayon napaliisan itan?

[Paimano ed leksab]

Panon Yon Ebatan?

• Anto so ipapaseguro ed sikatayo na propesiya a walad Miqueas 5:5?

• Ipaliwawa no anto so nalalanor ed panagsakripisyo.

• Panon tayon nabayuboan so pilalek a manserbi ed arum?

• Pian onkualipika so agin laki bilang ministeryal a lingkor odino matatken, panon kaimportante so kooperasyon na pamilya to?

[Tepetepet Parad Panagaral]

[Saray litrato ed pahina 25]

Anto so gawaen mo pian nadampot moy pribilehyo?