Akin et Onsabi’d Suston Oras?

NO MAMINSAN, aliwan mainomay so onsabi’d suston oras. Nayarin say sengegan et lapud arawin biahe, trapik, odino okupadon eskedyul. Ingen ta importante so isabi’d dugan oras. Alimbawa, say empleyadon agnaaatrasado et ipapasen na maslak a napanmatalkan tan makuli. Balet, no say sakey et mabetbet a nali-late, naapektoay trabaho na arum tan say kualidad na produkto tan serbisyo. Say estudyanten naaatrasado et nayarin agla makaatendi’d pigaran klase to tan abebay grado to. No say sakey a pasyente et atrasado’d appoinment to, naapektoay panambal ed sikato.

Diad arum a pasen balet, momoriaen dan ag-importante so kasasabi’d dugan oras. No ontan ed lugar yo, nayarin mainomay yon naalig itan. Kaukolan sirin a pansagpotan tayoy agnaatrasado. Seguradon natulongan tayon mansakbay no natalosan tayo so kaimportantian na saya. Antoray pigaran rason no akin a mansakbay itayo? Antoy gawaen tayo pian agnaatrasado? Antoray nagunggona tayo no onsabi tayo’d dugan oras?

Jehova​—Dios ya Agnaaatrasado

Say manunan rason no akin a labay tayoy agnaatrasado et lapud labay tayon aligen so Dios a dadayewen tayo. (Efe. 5:1) Si Jehova so sankaabigan ya ehemplo tayo. Sikatoy agbalot naaatrasado. Istrikto ton tutumbokey eskedyul to pian nasumpal so gagala to.  Alimbawa, sanen sikatoy nandesisyon a deralen so mauges a mundo panamegley na delap, inkuan to’d si Noe: “Manggawa ka na sakey a biong a [gawa’d] kiew a cipres.” Sanen manasingger lay paneral nen Jehova, ingganggan toy Noe ya onloob la ra’d biong. Tan inkuan to: “Pitoy agew ni, insan ko pauranen ed dalin ya apataploy agew tan apataploy labi; et say amin a mabilay a ginawak paandipaten ko ra dia ed tapew na dalin.” Insan, diad eksakton panaon, “nen kalabas na pitoy agew, a saray danudanum na delap wala ed dalin.” (Gen. 6:14; 7:4, 10) Nonot yo pa labat no antoy agawa’d si Noe tan say pamilya to no naatrasado ran linmoob ed biong. Singa say Dios a dadayewen da, kaukolan ya ag-ira naatrasado.

Manga 450 taon kayari na Delap, imbaga nen Jehova ed si patriarkan Abraham a sikatoy manilalak ya panlapuan na insipan a Bini. (Gen. 17:15-17) Inkuan na Dios ya iyanak si Isaac diad “panaon a nigetar, sano arapen a taon.” Agawa kasi itan? Oniay nabasa ed Kasulatan: “Si Sara nanlukon, tan  angiyanak ed kinen Abraham na sakey a laki ya anak ed saman ya inkatatken to ed taon, ed saman so agew a nigetar a sinalita na Dios ed sikato.”​—Gen. 17:21; 21:2.

Dakel so naromog tayon alimbawa ed Biblia a mangipapanengneng a say Dios et agnaaatrasado. (Jer. 25:11-13; Dan. 4:20-25; 9:25) Bibilinen itayo na Biblia a mantultuloy ya manalagar ed onsabin agew na panangukom nen Jehova. Anggano diad panmoria na too et singa “manabala” odino naaatrasado itan, makaseguro itayon “petepeteg ya onsabi, ya agmanbayag.”​—Hab. 2:3.

Importante so Susto’d Oras a Panagdayew

Nensaman, amin ya Israelitan lalaki et nepeg a presente tan agnaatrasado diad “saray nigetar a piesta nen Jehova.” (Lev. 23:2, 4) Inyuksoy met na Dios no kapigan iyapay iray bagat. (Exo. 29:38, 39; Lev. 23:37, 38) Agta ipapabitar na saya a labay nen Jehova a saray lingkor to et onsabi’d suston oras diad panagdayew da?

Nen inmunan siglo, sanen imbangat nen apostol Pablo iray taga Corinto no panon ya ikondukta iray pantitipon, oniay imbilin to: “Amin a bengatla so nagawa komon a masimpit tan diad mauksoy a paraan.” (1 Cor. 14:40) Manepeg labat sirin a saray pantitipon parad panagdayew et onggapo’d suston oras. Ag-anguman so panmoria nen Jehova nipaakar ed satan. (Mal. 3:6) Anto siri’ gawaen tayo pian masakbay tayon makasabi diad saray Kristianon pantitipon?

No Panon Tayon Makapansakbay

Nalmoan na arum a say pamplanon masakbay et makatulong na baleg. (Uli. 21:5) Singa bilang, no arawi so biahien tayo, makabat kasi no eksakto labat ya oras so igana tayo? Agta mas marakep no sakbayan tayo lay isipot pian agnaatrasado anggano walay “ag-iilaloan a nagawa”? (Ecl. 9:11, NW) Oniay inkuan nen José, * sakey a tobonbalon lanang ya onsasabi’d suston oras: “Pian ag-itayo naatrasado, kaukolan ya amta tayo no pigay oras so biahe.”

Parad arum, nayarin kaukolan dan iyuksoy so masakbay ya iyalis ed trabaho pian makasabi ra’d aral diad suston oras. Ontan so ginawa na sakey a Tasi a taga Ethiopia sanen amoria ton sikatoy na-late na 45 minutos ed aral lapud anguman so eskedyul to ed trabaho. Sikatoy akitongtong ed katrabaho to ya mansakbay lan onloob pian onsandi sano walay aral. Insan to balet itrabahoan na kaaruman a pitoy oras so katrabaho to.

No angkekelag ni ray anak yo, say isabin masakbay ed aral et walay kairapan to. Maslak et responsabilidad na ina ya iparaan iray anak to, balet nayarin makatulong tan nepeg ya ontulong iray arum a kapamilyaan. Si Esperanza, sakey ya inan taga Mexico, et bukor ton angasikaso ed waloran anak to, a mantaon la natan na 5 anggad 23. Impaliwawa nen Esperanza no akin ya ag-ira naaatrasado: “Tutulongan na mamarikit ko iray angkelag nin agagi ra. Kanian nasusumpal ko ray kimey ko ed abung tan makapampaparaan ak, tan makakaalis kami ed nantongtongan min oras.” Angigana iyan pamilya na panaon ya iyalis ed abung, tan mikokoopera so amin pian nagawaan da itan.

Nagunggonaan Diad Kasasabi’d Dugan Oras ed Panagdayew

No nodnonoten tayo ray bentaha na isabin masakbay ed pantitipon, lalo tayon pansagpotan a gawaen so anggaay nayarian tayon mansakbay. Si Sandra, sakey a tobonbalo, et nipasal to lay onsabin masakbay ed aral. Inkuan to: “Labalabay koy onsabin masakbay ta nibanok iray agagi, makapiistoryaan ak ed sikara tan lalok iran nakabat.” No masakbay tayon onsabi ed Kingdom Hall, napaseseg tayo diad pakarengel ed  pansusungdo tan panmamatoor na kaagian. Maabig met so epekto na iyaatendi tan makapaseseg ya pitotongtong tayo ed saray agagi ta ‘nasagyat tayo ran mangaro tan manggawa na maabig.’​—Heb. 10:24, 25.

Say panlukas a kanta tan pikakasi diad saray pantitipon et importantin kabiangan na panagdayew tayo. (Sal. 149:1) Idadayew na saray kanta tayo si Jehova. Ipapanonot na saratan iray kualidad a kaukolan tayon bayuboan, tan papasesegen tayo na saratan a maliket a mibiang ed ministeryo. Kumusta balet so panlukas a pikakasi? Nensaman, tinawag nen Jehova so templo ya “abung ko a panagpikasian.” (Isa. 56:7) Diad sayan panaon, mantitipon itayo pian manpikasi ed Dios diad saray miting. Say panlukas a pikakasi et aliwa labat lan kerew parad panangiwanwan nen Jehova tan say masanton espiritu to, noagta ipaparaan met na satan so puso tan isip tayo a mangawat na impormasyon ya aralen. Pansagpotan tayo sirin so onsabi antis na panlukas a kanta tan pikakasi.

Si Helen, a mantaon na 23, et oniay inkuan to no akin ya masakbay ya oonla’d aral: “Parad siak, satan so paraan pian nipanengneng koy panangarok ed si Jehova, ta itatarya toy amin ya impormasyon ya iprepresenta kaiba la ray kanta tan panlukas a pikakasi.” Ontan met kasi panmoria tayo? On, nepeg ya ontan. Kanian, pansagpotan tayon ipasal so isabin masakbay ed amin a kimey tayo, lalo la ray nipaakar ed panagdayew tayo ed tuan Dios.

[Paimano ed leksab]

[Litrato ed pahina 26]

Masakbay lan manparaan

[Litrato ed pahina 26]

Mangigana na panaon parad “ag-iilaloan a nagawa”

[Saray litrato ed pahina 26]

Nagunggonaan itayo no masakbay tayon onsabi ed aral