Maabig so Resulta na Espisyal a Kampanya ed Bulgaria

“Dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” ​—MAT. 9:37, 38.

SAYAN imbaga nen Jesus et dugarugan deskripsion ed situasyon na Bulgaria, a marakdakep a bansa diad Balkan Peninsula. Talagan kaukolan so dakel nin mankimey pian nipasabi maong a balita ed masulok a pitoran milyon a manaayam ditan. Walay manga 1,700 manangipalapag ed Bulgaria, balet ta agda sarag a kobrian so amin a teritorya da. Kanian inaprobaan na Mananguley ya Ulop so pangimbita na saray Tasi ed arum a bansa ed Europa a makapansalitay Bulgarian pian mibiang ed espisyal a kampanya diad 2009. Pitoran simba iyan kampanya, ya aka-eskedyul legay panaoy tiagew, tan manampot ed ‘Mantultuloy a Manbantay!’ a Distriton Kombension a nagawa’d Agosto 14-16, 2009 diad syudad na Sofia.

Dakel so Angawat ed Imbitasyon

Iisipen na saray agagi ed sangan opisina diad Sofia no pigara kasi manboluntaryo a manlapud Pransya, Germany, Gresya, Italya, Poland, tan España. Sarilin gastos na saray manboluntaryo so iyakar da ed Bulgaria, tan kaukolan dan usarey bakasyon da parad panagpulong. Makapalikliket ta dinmakel lan dinmakel iray agagin malabay a manboluntaryo, ya anggad asabi toy 292! Lapud satan a karakel, sarayan boluntaryo et niasain ed taloran syudad diad Bulgaria: Kazanlak, Sandanski, tan Silistra. Inimbitaan met na saray manangasikaso na sirkito iray payunir tan manangipalapag ed sarayan syudad pian onsuporta ed kampanya, ya anggad 382 la so maseseg a boluntaryo ed teritoryan matalag a napupulongan.

Pigaran agagin lalaki diad asingger iran kongregasyon so imbaki pian seguroen a walay napanpundoan na saramay boluntaryo. Angabang ira na saray apartment tan nampareserba na kuarto ed saray mamuran hotel. Nansagpot irayan agagi pian walay napanayaman na saray onsabin boluntaryo tan inasikaso day pankaukolan da. Diad saramay taloran syudad et angabang iray lugar ya usaren parad pantitipon. Wala met so ginawan eskedyul parad pantitipon na kongregasyon ya idaulo na saray onsabin boluntaryon agagin lalaki. Makapalikliket ta anggan diad saramay lugar ya anggapoy Tasi et 50 manangipalapag so mantitipon pian idayew si Jehova.

Makapadinayew so seseg na agagin nanlapud arum a bansa parad sayan kampanya. No panaoy tiagew diad Bulgaria, say temperatura et nasabi toy anggad 40 degrees Celcius. Balet ta anggapoy makapampatunda ed sarayan agagin lalaki tan bibii. Say syudad na Silistra, ya asingger ed Ilog na Danube tan walaay 50,000 a manaayam, et sigpot ya apulongan dia labat ed inmunan taloran simba. Kanian apulongan da met iramay asingger a baryo, angga ni ingen ed Tutrakan, a 55 kilometro so kaarawi to ed Silistra. Mabetbet ya onggagapo ran manpulong ed 9:30 na kabuasan. Kayari ran mangugto et itultuloy da lamet itan ya anggad 7:00 ed labi odino mas lablabi ni. Ontan met ed syudad na Kazanlak tan Sandanski, lapud masetseseg iramay boluntaryo  et apulongan da met iray asingger nin baryo tan syudad.

Antoray Maabig a Resulta?

Malaklaknab a panagpulong so agawaan legan na sayan pitoran simba. Singa ed samay imbaga na totoo diad panaon na saray apostol, onia met so nayarin nibaga na saray manaayam ed sarayan syudad: ‘Pinano yo na bangat yo so syudad mi.’ (Gawa 5:28) Saramay agagin akibiang ed sayan kampanya et akapangipalima na manga 50,000 a magasin tan akapangigapoy 482 a panangiyaral ed Biblia. Makapalikliket ta nen Setyembre 1, 2009 et aporma so kongregasyon ed Silistra, tan wala la ray grupo ed Kazanlak tan Sandanski. Makapaseseg ta anggan saramay indibidual a natan da labat naamtaan so maong a balita et onaaligwas la’d espiritual.

Diad unonan simba na kampanya, pinulongan na espisyal payunir a makapansalitay Bulgarian a nanlapud España so biin manngaran na Karina a taga Silistra, a manlalakoy dyaryo ed karsada. Angipatnag na interes si Karina tan inmatendi ed aral. Inawat ton tampol so panangiyaral na Biblia. Ateista so asawa to kanian kinerew ton diad parke da iyaralan. Kaiba’d panaaral da so duaran anak to a bibii. Samay mas panguloan a si Daniela et talagan apresyaen toy katuaan ed Biblia. Sakey simba to labat a binasa so libron Ibabangat na Biblia tan inyaplika ton tampol so ibabaga na Biblia nipaakar ed agpangusar na saray imahen diad panagdayew. Tan inanabang to la’d saray kakaaro to iray nanaaralan to. Taloy simba labat manlapud samay unonan impiaral to et oniay imbaga to’d samay agin mangiyaaral ed sikato: “Labay ko met lay magmaliw a singa sikayo. Antoy kaukolan kon gawaen pian makapanpulong ak la?” Mantutultuloy ya onaaligwas si Daniela, kaibay nanay to tan agi to.

Niasain ed Kazanlak so agin laki a si Orlin, sakey a Bulgarian a nanlapud Italya. Aminsan, sanen papawil la’d pundoan to kayari impanpulong to, naimano to so duaran kalangweran a lalaki diad parke, tan pinulongan to ra. Inopresian to ra na libron Ibabangat na Biblia tan imbaga ton ompawil ed ontumbok ya agew. Diad impawil to et nigapo toy panangiyaral na Biblia diad si Svetomir, tan intuloy da lamet itan diad tinmumbok ya agew. Diad loob na siameran agew et aminwalo ran nanaral. Oniay komento nen Svetomir: “Duay agew antis ta’n akapantongtong et nampikasi ak ed Dios a tulongan to ak pian sikatoy nakabat ko. Tan insipan ko’d sikato a no tulongan to ak, idedikak so bilay ko ed sikato.” Nen pinmawil lay Orlin ed Italya, intuloy ya inyaralan na saray agagi ed Kazanlak si Svetomir, tan iyaaplika to la ray nanaaralan to.

 Nabendisyonan na Daakan Iray Masakripisyo

Antoy alikna na saramay mabulbulos ya angusar ed bakasyon da tan inggastosan day inyakar ed Bulgaria pian ipulong so maong a balita? Oniay insulat na elder ed España: “Lapud sayan kampanya et lalon inmapit so ulopan na saray agagi diad España a mansasalitay Bulgarian. Baleg so epekto na saman a kampanya ed saray namboluntaryo.” Insulat met na sanasawan taga Italya: “Saman la so sankaliketan a bulan ed bilay mi!” Onia ni imbaga ra: “Sayan kampanya so akapanguman ed bilay mi. Baleg so angumanan mi.” Nononoten a maong na sayan sanasawa no sarag day manayam la’d Bulgaria pian makapanserbi ed lugar a mas dakel so pankaukolan. Si Carina et marikit a regular payunir a taga España ya akapanboluntaryo ed Silistra. Kayari na kampanya et nan-resign ed trabaho to diad España tan pinmawil ed Bulgaria pian suportaan so balon kongregasyon diad satan a syudad. Magenap so atipon ton kuarta pian sakey taon a makapansiansia ditan. Oniay imbaga to nipaakar ed sayan desisyon to: “Malikeliket ak ta inyabuloy nen Jehova a makapanlingkor ak diad Bulgaria, tan komon et makapanbayag ak dia. Limara lay iyaaralan koy Biblia, tan talora’d sikara so miaaral la.”

Labay na sakey ya agin bii ed Italya so mibiang ed kampanya, balet ta balobalo ni’d trabaho to kanian agni makapanbakasyon. Lapud determinadon onla, kinerew ton manbakasyon na sakey bulan ya anggapoy sueldo tan no agda abuloyan et akaparaan lan man-resign. Asurprisa ta oniay imbaga na amo to: “OK, balet diad sakey a kondisyon. Kaukolan ipawitan mo ak na postcard na Bulgaria.” Talagan alikna na sayan agi ya inebatan nen Jehova iray pikakasi to.

Si Stanislava, sakey a kalangweran ya agin bii ed Varna, a syudad ed Bulgaria, so walaan na full-time a trabaho tan baleg so sueldo to. Sikatoy nambakasyon pian makapibiang ed kampanya diad Silistra. Akaakis sanen anengneng toy liket na saray payunir a nanlalapu ni’d arawin pasen pian nipulong so maong a balita ed bansa to. Diman to amoria a say akapokusan na bilay to et say trabaho to. Sanen pinmawil ed lugar to kayari duay simba, nan-resign ed trabaho to tan nan-regular payunir. Natan et talagan malikeliket ta nononoten toy Manamalsa to diad inkatobonbalo to.​—Ecl. 12:1.

Talagan bendisyon so maseseg a panaglingkor ed si Jehova. Anggapo lay mas maong nin gawaen mo nen say pangiganam na panaon tan biskeg mo ed importantin kimey a panagbangat tan panagpulong ed maong a balita. Wala tay paraan a nagawaan mon mismo pian napadaak moy pibibiang mo ed sayan ministeryo a makapangisalbay bilay? Ompan walaray lugar ed bansam a mas baleg so pankaukolan. Sarag mo tay onalis ditan? Odino ompan sarag moy manaral na arum a lenguahe pian natulongan mo ray totoo ed bansam a nanapgaan ed katuaan. Antokaman so sakripisyon gawaen mo pian napalaknab moy ministeryom, ipapaseguro nen Jehova a bendisyonan to ka na daakan.​—Uli. 10:22.

[Kahon/Litrato ed pahina 32]

Agnalinglingwanan ya Agew

Dakel ed saramay nanlapud arum a bansa ed Europa a sinmuporta ed espisyal a kampanya ed Bulgaria et namplanon onatendi ed ‘Mantultuloy a Manbantay!’ a Distriton Kombension ed Sofia. Apaseseg iray agagin taga ditan diad impakapikabat da ed dakel a bisita a nanlapud nanduruman bansa. Malikeliket so 2,039 ya inmatendi nen Biernes sanen impaway nen Brother Geoffrey Jackson na Mananguley ya Ulop so kompleton New World Translation of the Holy Scriptures ed lenguahen Bulgarian! Imbalikas na amin ya inmatendi so impapuson pisasalamat da diad maligligsa tan abayag a tipak. Dakel ingey akaakis lapud liket. Sayan patalos a susto tan mainomay a talosan et ontulong pian saray sinseron mansasalitay Bulgarian et nakabat day Jehova.

[Mapa ed pahina 30, 31]

(Parad aktual a format, nengnengen so publikasyon)

BULGARIA

SOFIA

Sandanski

Silistra

Kazanlak

[Saray litrato ed pahina 31]

Malaklaknab a panagpulong so agawaan legan na saman a pitoran simba