Pankakasakey​—Pakabidbiran na Dugan Panagdayew

“Tiponen ta kayon singa saray karneron ompawil ed koral da.” ​—MIK. 2:12, MAUNG A BALITA.

1. Panon a papaneknekan na impamalsa so karunongan na Dios?

ONIAY maliket ya inkuan na salmista: “O Jehova, agayla so kinaraklan na saray gawam! Dia ed karunongan so nanggawaan mo ed saraya ya amin. Say dalin napno na kaykayamanan mo.” (Sal. 104:24) Mapatpatnag so karunongan na Dios ed pantutulongan na minilyon a nanduruman klase na tanaman, insekto, ayep, tan bakterya diad komplikadon bilay ed dalin. Ontan met, diad amin a parte na laman mo, baleg man ya organ odino angkelag a selula, et mantutunosan tan maniiban mankikimey pian magmaliw kan kompleto tan mabunigas.

2. Diad litrato ed pahina 13, akin et singa milagro so impankasakey na saray Kristiano?

² Pinalsa nen Jehova so katooan a walay pankaukolan da ed balang sakey. Saray totoo et nandurumay itsura, personalidad, tan abilidad da. Niarum ni, inikdan to so duaran sankaunaan a too na maridios iran kualidad pian makapantulongan tan mandepende ed balang sakey. (Gen. 1:27; 2:18) Balet natan, kaslakan ed saray totoo et agla manpapasakop ed Dios, kanian anggapoy pankakasakey da. (1 Juan 5:19) Sirin, singa milagro so impankakasakey na inmunan siglo a Kristianon kongregasyon ta nandurumay nanlapuan na saray membro da. Walaray aripen a taga-Efeso, prominentin Griego a bibii, edukadon Judio, tan datin mandadayew ed idolo.​—Gawa 13:1; 17:4; 1 Tes. 1:9; 1 Tim. 6:1.

3. Panon a deneskribe na Biblia so pankakasakey na saray Kristiano, tan anto so aralen tayo ed sayan artikulo?

³ Lapud dugan panagdayew ed Dios, saray totoo et nankakasakey a mankikimey a singa saray kabiangan na laman tayo. (Basaen so 1 Corinto 12:12, 13.) Diad sayan artikulo, aralen tayo no: Panon ya apankasakey na dugan panagdayew ed Dios so totoo? Akin a si Jehova labat so makapankasakey ed minilyon a totoo manlapud amin a nasyon? Tutulongan itayo nen Jehova a nadaeg so antoran makaderal ed pankakasakey? Tan no nipaakar ed pankakasakey, antoy pandumaan na saray tuan Kristiano tan say Kakristianoan?

Panon ya Apankasakey na Dugan Panagdayew so Totoo?

4. Panon ya apankasakey na dugan panagdayew ed Dios so totoo?

⁴ Bibidbiren na saray mandadayew ed si Jehova a lapud pinalsa to so amin a bengatla, sikato so makanepegan a manuley ed uniberso. (Apo. 4:11) Kanian anggaman nandurumay kawalaan tan sirkumstansya na saray tuan Kristiano, amin da et uunoren da ray parehon ganggan na Dios tan manbibilay unong ed saray parehon prinsipyo na Biblia. Manepeg labat a say panawag na amin a tuan mandadayew ed si Jehova et “Ama.” (Isa. 64:8; Mat. 6:9) Amin da sirin et sanaagi ed espiritual tan walay marakdakep a pankakasakey da. Oniay inkuan na salmista: “Agaylay abig tan makapaliket ed saray totooy Dios a manbilay iran mankakasakey!”​—Sal. 133:1, MB.

5. Anton kualidad so mamebedber ed saray mandadayew ed tuan Dios?

⁵ Anggaman aliwan perpekto iray tuan Kristiano, nankakasakey iran mandadayew lapud naaralan day manaaroan. Anggapo lay mas maong nin makapangibangat ed sikara a mangaro  noag si Jehova. (Basaen so 1 Juan 4:7, 8.) Oniay inkuan na Salita to: “Isulong yo so panangabagey, kaabigan, kapaabebaan na nonot, inkaulimek, tan andukey a panag-anos. Mantultuloy kayon manaanosan tan mabulos a manpeperdonaan no wala man so sengegan na panreklamo na sakey ed sananey. No panon a mabulos si Jehova ya amerdona ed sikayo, ontan met so gawaen yo. Balet, niarum ni ed sarayan amin a bengatla, isulong yo so aro, ta saya so ayadyarin bedber na pankakasakey.” (Col. 3:12-14) Sayan ayadyarin bedber na pankakasakey, say aro, so kualidad a manunan pakabidbiran na saray tuan Kristiano. Sikayo ey, apaneknekan yo ta la a sayan pankakasakey so pakapangibiigan na dugan panagdayew?​—Juan 13:35.

6. Panon ya ontutulong so ilalo tayo’d Panarian pian makapankakasakey?

⁶ Nankakasakey met iray mandadayew ed tuan Dios lapud manmamatalek ira a say Panarian to labat so nailaloan da. Amta ran magano lan salatan na Panarian na Dios iray gobierno na totoo tan nagamoran na matulok a katooan so tua tan magnayon a kareenan. (Isa. 11:4-9; Dan. 2:44) Kanian, dinengel na saray Kristiano so imbaga nen Jesus nipaakar ed saray papatumbok to: “Ag-ira kabiangan na mundo, a singa siak ya agkabiangan na mundo.” (Juan 17:16) Agmibabali iray tuan Kristiano ed saray panlalaban na sayan mundo. Lapud satan et walay pankakasakey da anggan man-geguerra iray walad kaliberliber da.

Say Saksakey a Lapuan na Espiritual ya Instruksion

7, 8. Panon a makakatulong ed pankakasakey so bilin na Biblia?

⁷ Walay pankakasakey na saray inmunan siglon Kristiano lapud saksakey so mamapaseseg ed sikaran amin. Bibidbiren dan si Jesus so manbabangat tan mangigigiya ed kongregasyon panamegley na mananguley ya ulop, salanti, saray apostol tan mamasiken ed Jerusalem. Sarayan matoor ya lalaki et ibabase day desisyon da ed Salita na Dios. Tan panamegley na saray ombiabiahen manangasikaso et ipapasabi da iray instruksion da ed saray kongregasyon diad dakel a bansa. No nipaakar ed sarayan manangasikaso, onia so kuan na Biblia: “Legan iran manbiabiahe diad saray syudad, ipapasabi ra ed saramay wadman a nepeg ya unoren iray totontonen a denisisyonan na saray apostol tan saray mamasiken a walad Jerusalem.”​—Gawa 15:6, 19-22; 16:4.

⁸ Ontan met natan, say Mananguley ya Ulop a membro na alanaan a Kristiano so mamapabiskeg pian mankakasakey iray kongregasyon ed sankamundoan. Ipapalapag na Mananguley ya Ulop so makapaseseg ed espiritual iran literatura diad dakel a lenguahe. Sarayan espiritual a tagano et base ed Salita na Dios. Kanian, agnanlapu ed too so ibabangat da, noagta nanlapud si Jehova.​—Isa. 54:13.

9. Panon itayon napankakasakey na kimey ya inter na Dios?

⁹ Napapaelet met na saray Kristianon manangasikaso so pankakasakey diad pangidadaulo  ra ed panagpulong. Tan lapud maniiban mankikimey iray lingkor na Dios, mas maapit nin aminpigapiga so ulopan da nen say ataptapew a pantutuyaw na totoo ed mundo. Inletneg so Kristianon kongregasyon, aliwan pian mantutuyaw labat, noagta pian igalang si Jehova tan sumpalen so kimey a panangipulong ed maong a balita, panggaway babangatan, tan pamaseseg ed kongregasyon. (Roma 1:11, 12; 1 Tes. 5:11; Heb. 10:24, 25) Kanian, nibaga nen apostol Pablo so onia nipaakar ed saray Kristiano: “Ontatalindeg kayo ed sakey ya espiritu tan nankakasakey kayon mansasagpot parad pananisia ed maong a balita.”​—Fil. 1:27.

10. Akin et makapankakasakey itayo bilang totoo na Dios?

¹⁰ No ontan sirin, bilang totoo nen Jehova, walay pankakasakey tayo lapud bibidbiren tayoy inkasoberano to, aaroen tayo ray agagi, maniilalo itayo ed Panarian to, tan rerespetoen tayo iray uusaren to a mangidaulo ed sikatayo. Tutulongan itayo nen Jehova a naekal iray makapuy ya ug-ugali a nayarin mamuyak ed pankakasakey tayo.​—Roma 12:2.

Panalona ed Kinon tan Imon

11. Akin a say kinon et pansengegay inkaapag-apag, tan panon itayon tutulongan nen Jehova a nadaeg itan?

¹¹ Say inkakinon et pansisianen toy totoo. Say mapaatagey a too et ipapasen toy inkasikato a superyor tan labalabay toy manlastog. Balet, mabetbet iyan manederal ed pankakasakey. Saray totoon panlalastogan to et nayarin mangimon. Oniay prangkan imbaga nen disipulo a Santiago: “Amin itan a panagpasirayew et mauges.” (Sant. 4:16) Agtayo nipapanengneng so panangaro no tratoen tayoy arum ya abebbeba. Si Jehova so manunan ehemplo na inkamapaabeba. Sikatoy midedeneng ed agperpekton totoo a singa sikatayo. Insulat nen David: “Say kauyamoan mo [na Dios] ginawa to ak a baleg.” (2 Sam. 22:36) Say Salita na Dios et ontutulong ed sikatayo pian nadaeg so kinon lapud ibabangat itayo na satan a magmaliw a makatunongan. Pinuyanan si Pablo a mantepet: “Siopay nanggawa ed sika a magmaong nen say arum? Diad tua, antoy walad sika ya agmo inawat? Natan, no peteg ya inawat mo itan, akin et manpapasirayew ka a singano agmo inawat itan?”​—1 Cor. 4:7.

12, 13. (a) Akin a walay tendensia tayon mangimon? (b) Antoray resulta no aligen tayoy panmoria nen Jehova ed saray agagi?

¹² Say imon et sakey nin makaderal ed pankakasakey. Lapud atawir tayo so ag-inkaperpekto, amin tayo et walay “tendensia ya onibeg,” tan anggan saray abayag lan Kristiano et nayarin mangimon ed kipapasen, kaykayarian, pribilehyo, odino saray abilidad na arum. (Sant. 4:5) Singa bilang, nayarin pangimonan na agin pamilyado iray pribilehyo na balolakin payunir, anta manaya et pangiimonan met na sayan payunir so agin nampamilya. Antoy gawaen tayo pian agnaderal na imon so pankakasakey tayo?

¹³ Pian ag-itayo mangimon, tandaan ya inyaliling na Biblia so alanaan a membro na Kristianon kongregasyon ed saray kabiangan na laman na too. (Basaen so 1 Corinto 12:14-18.) Alimbawa, anggaman sankaimano so mata nen say puso, agta pareho ran importante ed sika? Mipadpara, papablien nen Jehova so amin a membro na kongregasyon anggaman walaray mas prominente. Kanian aligen tayoy panmoria nen Jehova ed saray agagi. Imbes a pangimonan ira, ipanengneng tayon interesado itayo ed sikara tan iyaansakit tayo ra. Diad  ontan et nipanengneng tayoy pandumaan na tuan Kristiano tan Kakristianoan.

Mapatpatnag so Inkaapag-Apag na Kakristianoan

14, 15. Panon a naapag-apag so apostatan Inkakristiano?

¹⁴ Lapud pankakasakey na saray tuan Kristiano, mas naiimano so pambubusolan na Kakristianoan. Nen komapat a siglo, kasmak lan tuloy so apostatan Inkakristiano tan sinakop itan na paganon emperador na Roma. Kanian linmaknab so Kakristianoan. Insan, nantutumbokan lan sinmian ed Roma iray nanduruman panarian tan nanggawa ray dili ran relihyon.

¹⁵ Diad inlalabas na saray siglo, nanlalaban so dakel ed sarayan panarian. Legan na koma-17 tan 18 a siglo, impaseseg ed saray taga-Britanya, Pransya, tan Estados Unidos so panmatoor ed bansa ra. Kanian, nagmaliw lan singa relihyon so nasyonalismo. Diad koma-19 tan 20 a siglo, naimpluensyaan na nasyonalismo so panagnonot na maslak a totoo. Ag-abayag, say Kakristianoan et nansisian ed dakerakel a sekta, tan kaslakan ed saraya et aabobonan day nasyonalismo. Saray mimimisa ingen et migeguerra ed karelihyon da a walad arum a bansa. Natan, naapag-apag lay Kakristianoan lapud nasyonalismo tan nanduruman sisisiaen na saray sekta ra.

16. Antoray isyu a mangaapag-apag ed Kakristianoan?

¹⁶ Diad koma-20 siglo, sinali ran pankakasakeyen (panamegley na ecumenical movement) so arum ed saray nilasus a sekta na Kakristianoan. Balet, kalabas na dakel a dekada, pigpigaran sekta so nantipon, tan siansia nin pansusuppiatan na saray mimimisa so ebolusyon, aborsion, homoseksualidad, tan panagmadre. Diad saray arum a kabiangan na Kakristianoan, imbaliwala na papari iray makaderal a doktrina pian napan-uulop da iray nanduruman sekta. Balet, lapud satan et kinmapuy laingen so pananisia na membro ra tan ag-apankasakey iray naapag-apag a relihyon na Kakristianoan.

Atalonaan Day Nasyonalismo

17. Unong ed propesiya, panon ya pankasakeyen na dugan panagdayew so totoo “dia ed saray kaunoran ya agew”?

¹⁷ Anggaman mas teribli natan so inkaapag-apag na totoo nen say nensaman, lalon ombibitar so pankakasakey na saray mandadayew ed tuan Dios. Oniay impasakbay na propeta na Dios a si Miqueas: “Tiponen ta kayon singa saray karneron ompawil ed koral da.” (Mik. 2:12, MB) Impasakbay nen Miqueas a say dugan panagdayew et niyatagey nen say arum ni ran panagdayew, balang lan panagdayew ed palson dirios odino diad bansa ra. Insulat to: “Dia ed saray kaunoran ya agew nagawa naani, a say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato. Ta saray amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo.”​—Miq. 4:1, 5.

18. Antoray angumanan tayo lapud dugan panagdayew?

¹⁸ Impaamta met nen Miqueas no panon a napankasakey na dugan panagdayew iray datin  mankalaban. “[Saray totoo ed] dakel a nasyon onla ra naani a kuan da, Dago kayo, tan onsegep itayo ed palandey nen Jehova, tan ed abung na Dios nen Jacob; et ibangat to itayo ed saray dalan to, tan manakar itayo ed basbas to. . . . Et pitpiten da naani so saray kampilan da a tarem na lukoy, tan saray gayang da a kalawit; say nasyon agto naani yayag so kampilan a sumpa ed sananey a nasyon, tan ag-ira met la naani manaral na bakal.” (Miq. 4:2, 3) Saramay agla mandadayew ed bansa odino ed gaway too a dirios pian mandayew ed si Jehova et panggagayagaan da lay sankamundoan a pankakasakey. Sikaray ibabangat na Dios a manaaroan.

19. Antoy malinew a papaneknekan na impankasakey na minilyon a totoo diad dugan panagdayew?

¹⁹ Agnaparaan so sankamundoan a pankakasakey na saray tuan Kristiano natan, tan malinew a papaneknekan na satan a lawas igigiya nen Jehova so totoo to panamegley na espiritu to. Saray totoo to ed amin a nasyon et nankakasakey tan agnin balot iya agawa nensaman. Saya et mitunosan ed makapadinayew a pakasusumpal na Apocalipsis 7:9, 14, tan ipapaimano na saya a magano lan bulosan na saray anghel na Dios so “dagem” a maneral ed kaplesan a mauges a sistema na bengabengatla. (Basaen so Apocalipsis 7:1-4, 9, 10, 14.) Agta baleg a kagalangan so makapikasakey ed sankamundoan ya impanaagi? Antoy nagawaan na balang sakey ed sikatayo pian napansiansia itan a pankakasakey? Saya so aralen tayo ed onsublay ya artikulo.

Antoy Ebat Mo?

• Panon ya apankasakey na dugan panagdayew ed Dios so totoo?

• Antoy gawaen tayo pian agnaderal na imon so pankakasakey tayo?

• Akin et ag-ayarian na nasyonalismo a naapag-apag iray mandadayew ed tuan Dios?

[Tepetepet Parad Panagaral]

[Litrato ed pahina 13]

Nandurumay nanlapuan na saray inmunan-siglon Kristiano

[Saray litrato ed pahina 15]

Panon ya ontulong ed pankakasakey so pibiang mo ed saray proyekto ed Kingdom Hall?