Manbilay ya Andiay Pakabalawan!
Manbilay ya Andiay Pakabalawan!
“Balet siak, manbilay ak ya andiay pakabalawan.”—SAL. 26:11, NW.
1, 2. Anto so imbaga nen Job nipaakar ed integridad to, tan antoy ipapanengneng na Job kapitulo 31 nipaakar ed sikato?
NENSAMAN, say uusaren dan simbangan et walay akasabit ed biek tan biek ya pananginan. Iyan da ed samay sakey a pananginan so labay dan simbangen tan diad biek et samay pabelat a panimbang. Saray totoo na Dios et nepeg a mangusar na aliwan masaol a simbangan tan pabelat a panimbang.—Uli. 11:1.
2 Sanen say maong a toon si Job et pinairap nen Satanas, inkuan to: “Nasimbang ak komon ed sakey a simbangan, pian say Dios naamtaan to so inkaskey [odino, integridad] ko.” (Job 31:6) Nipaakar ed saya et sinalambit nen Job so pigaran situasyon a pakasubokay integridad na sakey. Balet unong ya ipapanengneng na imbaga to ya akasulat ed Job kapitulo 31, atalonaan to iray subok ed sikato. Napakiwas tayon aligen so maabig ya ehemplo to tan matalek ti’ met a nibaga so inkuan nen salmistan David: “Balet siak, manbilay ak ya andiay pakabalawan.”—Sal. 26:11, NW.
3. Akin et importante so panmatoor ed Dios diad melag tan baleg iran pamaakaran?
3 Anggaman pinasyan asubok si Job, sikatoy nansiansian matoor ed Dios. Ompan pandinayewan ni ingen na arum so graben impakasubok tan ag-anguman ya integridad nen Job. Agtayo asali imay mismon asagmak to. Balet, pian napansiansia tayoy integridad tayo tan nasuportaay soberanya nen Jehova, nepeg a matoor tayo ed melag man o baleg iran pamaakaran.—Basaen so Lucas 16:10.
Importantin Anggapoy Pakabalawan Tayo ed Moral
4, 5. Lapud determinadon manmatoor si Job, anto so pinaliisan to?
4 Pian napansiansia tayo so integridad tayo, singa si Job et kaukolan tayon unoren so estandarte nen Jehova ed no antoy duga tan aliwa. Inkuan nen Job: “Akisipanan ak ed saray matak, panon sirin so inengneng ko ed sakey a birhen? No say pusok apalingo ed sakey a bii, tan no nansanib ak ed pinto na kaabay ko, sirin say asawak manggiling komon ed sananey, tan saray arum ondakmomo ra ed sikato.”—Job 31:1, 9, 10.
5 Lapud determinadoy Job a manmatoor ed Dios, agto nilinggis so sakey ya bii tekep na marutak a getma. Bilang walay asawa, agto akikarinyoan ed marikit odino akirelasyon ed asawa na arum. Diad Sermon ed Palandey, mapuersan imbalikas nen Jesus so nipaakar ed seksual ya moralidad, tan kaukolan a tandaan iyan punto na saray mansasagpot a manmatoor.—Basaen so Mateo 5:27, 28.
Agbalot Manasaol
6, 7. (a) Singa ed si Job, anto so uusaren na Dios pian nasukat so integridad tayo? (b) Akin et agtayo manasaol odino mamapalikdo?
6 No labay tayoy nibilang a matoor, kaukolan ya agtayo manasaol. (Basaen so Salmo 5:6.) Inkuan nen Job: “Agak nanggawa na antokaman a kaugsan, tan anggapoy pinalikdok a siopaman. Simbangen ak komon na Dios ed anggapoy saol a simbangan, pian nanengneng ton anggapoy kasalanan ko.” (Job 31:5, 6, Maung a Balita) Sisimbangen nen Jehova so amin a totoo ed “anggapoy saol a simbangan.” Singa ed si Job, uusaren na Dios so perpekton estandarte to ed inkahustisya pian nasukat so integridad tayo bilang dedikadon lingkor to.
7 No masaol odino mapalikdo tayo, agtayo manmamatoor ed Dios. Saray mansasagpot a manmatoor et ‘impulisay da la iray iyaamot a gawa a nepeg ya ibaing tan agla ra manbibilay ed kasiliban.’ (2 Cor. 4:1, 2) Balet panon to no mapalikdo tayo ed salita odino gawa, a lapud satan et mikasi’d Dios so sakey a kaagian? No ontan et delikado tayo! “Dia ed peles na segsegang ko tinmawag ak ed Jehova, et inebatan to ak. Iliktar mo so kamarerwak, O Jehova, a yarawi ed saray matitila a bibil, tan yarawi ed manamalingo a dila,” so inkanta na salmista. (Sal. 120:1, 2) Tandaan a sarag na Dios ya amtaen so akindalem ya inkatoo tayo, a “manuusisa ed puso tan saray bato” pian nanengneng no talagan manmamatoor tayo.—Sal. 7:8, 9, NW.
Magmaliw ya Ehemplo Diad Pidedeneng Yo
8. Panoy impantrato nen Job ed arum?
8 Pian napansiansia tayoy integridad tayo, kaukolan tayon aligen si Job, ya patas, mapaabeba, tan makonsidera. Inkuan to: “Nen nanreklamo ed siak so sakey ya aripen ko, dinengel ko tan ginawak so kanepegan ko. No agko dinengel, panoy piarap ko’d Dios? Antoy nibagak no sinmabi manintinsia’d siak? Agta say Dios ya amalsa’d siak et sikato met so amalsa ed saray aripen ko?”—Job 31:13-15, MB.
9. Antoray kualidad ya impanengneng nen Job sano midedeneng ed saray lingkor to, tan antoy kaukolan tayon gawaen?
9 Mapatnag, nen panaon nen Job et aliwan komplikado iray totontonen diad saray legal a kaso. Mauksoy so pangeegna ed saratan tan anggan saray ariripen et mainomay dan niyasingger iray reklamo ra. Makatunongan tan mapangasi si Job ed saray lingkor to. Pian makapanmatoor tayo, kaukolan ya wala’d sikatayo iratan a kualidad, lalo la no sakey itayon elder.
Magmaliw a Mabunlok, Aliwan Maagum
10, 11. (a) Panon tayon amta ya mabunlok tan matulong si Job? (b) Antoran simbawa ed Biblia so nipapanonot na Job 31:16-25?
10 Si Job et mabunlok, matulong, aliwan masiblet o maagum. Inkuan to: “No . . . saray mata na saray balo a bibii pinakapuy ko, odino kinan ko so tinapay ko a bukor, tan saray ulila ag-ira angan ed sikato . . . No anengneng ko so anggan siopa a natawtaw nipaakar ed kaandi kawes . . . No intagey ko so limak sumpa ed saray ulila, lapud no anengneng ko so tulong ko ed wangalan, sirin paulyan yo a say abalak napelag manlapu ed [takeb], tan say taklay ko nabuyak a manlapu ed pukel.” Tan agnansiansian matoor si Job no inkuan to’d kayamanan: “Sika so panmatalkan ko.”—Job 31:16-25.
11 Satan ya marakdakep a balikas nen Job et mangipapanonot ed imbaga nen disipulo Santiago: “Say paraan na panagdayew a malinis tan ag-arutakan ed pakanengneng na Dios tan Ama tayo et saya: say pangasikaso ed saray maniirap ya ulila tan babalo, tan say pansiansia na sakey ya andian na mantsa ed mundo.” (Sant. 1:27) Tan nanonotan tayo met so impasakbay nen Jesus: “Manbantay kayo tan manalwar kayo ed amin a klase na panag-agum, ta anggano dakdakel so kayarian na sakey a too, ag-iratan makapangiter ed sikato na bilay.” Insan, angisalaysay si Jesus na ilustrasyon nipaakar ed maagum a too ya inatey ya “aliwan mayaman ed pakanengneng na Dios.” (Luc. 12:15-21) Pian mansiansian matoor, nepeg ya agtayo manpapadaeg ed inkaagum. Say inkaagum et idolatriya lapud aliwa lan si Jehova so kawalaay imano na sakey, noag say maagum a pilpilalek to tan satan lay nagmaliw ya idolo to. (Col. 3:5) Agnibagan matoor tayo no maagum tayo!
Mansiansia ed Dugan Panagdayew
12, 13. Anto so napanuliranan a ginawa nen Job pian napaliisan toy idolatriya?
12 Saray mansasagpot a mansiansian matoor et ag-onsisian ed malinis a panagdayew. Ontan si Job, lapud oniay imbaga to: ‘No ninengneng ko so banwa sanen sikato so sinminag, odino say bulan a manakakar ed kasnagan, tan say pusok maamo-amot ya apalingo tan say sangik inangoban to so limak, saya met sikato so sakey ya inkauges a dusaen na saray ukom, ta singak la pinaandi so Dios ya wala ed tagey.’—Job 31:26-28.
13 Agdinayew nen Job iray andian na bilay a bengatla. No maamot ya asagyat so puso ton onnengneng ed saray palsan walad tagey, a singa say bulan, tan no ‘inangoban toy lima to,’ ya inyatagey to pian mangidayew, sikato lay nandayew ed idolo tan impulisay to lay Dios. (Deu. 4:15, 19) Pian napansiansia tayoy integridad tayo ed Dios, nepeg tayon paliisan so amin a klase na idolatriya.—Basaen so 1 Juan 5:21.
Ag-ombabawi tan Agmansimpisimpitan
14. Akin et nibaga tayon aliwan maruksa si Job?
14 Si Job et aliwan managpauges nisay maruksa. Amta to a no ontan so kagagawa to et sikatoy agmanmamatoor, ta oniay inkuan to: “Nen naniirap iray kalaban ko agak balot nanliket, odino nanggayaga nen walay dinmalan a deral ed sikara. Agak nankasalanan, ta agko impikasi ya ompatey ira komon.”—Job 31:29, 30, MB.
15. Akin et makapuy a panliketan so paniirap na mamubusol ed sikatayo?
15 Agbalot panliketan nen maptek a Job no walay nagawan mauges ed sakey a mamubusol ed sikato. Oniay impasakbay na uliran: “Agka manliket sano say kabusol mo nipasag, tan say pusom agkomon manggayaga sano sikato so nabaktar; ompan sikato so nanengneng nen Jehova, tan sikato so agmakapaliket ed sikato, tan yarawi to so sanok to a manlapu ed sikato.” (Uli. 24:17, 18) Lapud nabasa nen Jehova so puso, amta to no maamot tayon panliliketan so paniirap na arum tan seguradon agto itan abobonan. (Uli. 17:5) Kanian ipetek itayo na Dios, ta inkuan to: “Kien ko so ibabales tan say panangupa.”—Deu. 32:35.
16. Anggano aliwa tayon mayaman, panon tayon magmaliw a maparawes?
16 Si Job et maparawes. (Job 31:31, 32) Anggano aliwa tayon mayaman, sarag tayon ‘iyugali pamarawes.’ (Roma 12:13) Sarag tayoy mangitarya na simplin panangan, a tandaan tayon “magmaong so pangugtoan ya agagayep [odino pising], a kawalaan na aro, nen say pinataba a baka tan kawalaan na gula.” (Uli. 15:17) Say pangan kaiba ray agagin manaaroan et makapaliket tan makagunggona ed espiritual anggano simpli so intarya.
17. Akin et agtayo sasalien ya iyamot so graben kasalanan tayo?
17 Seguradon apabiskeg ed espiritual iramay pinarawes nen Job, ta sikatoy agnansimpisimpitan. Agto kapara iray agmaridios a totoo ya akaloob ed inmunan siglon kongregasyon tan ‘angidayew ed arum a totoo parad dilin pakagunggonaan da.’ (Jud. 3, 4, 16) Agmet sinakbongan nen Job so kalilingoan to nisay ‘inyamot so inkauges to ed akwalan to’ lapud takot ya nabalaw no naamtaan na arum. Sikatoy mabulos a nampausisa ed Dios, a pangipatuaan to no walay kalilingoan to. (Job 31:33-37) No akagawa tayoy graben kasalanan, agtayo itan sasalien ya iyamot pian labat nipaliis ed kababaingan. Panon tayon nipanengneng a panggugunaetan tayon pansiansiaey katooran tayo? Panamegley na pamidbir ed kasalanan tayo, pagbabawi, ikerew na espiritual a tulong, tan panggawa’d anggaay nayarian tayon ipetek iratan.—Uli. 28:13; Sant. 5:13-15.
Nampausisa Pian Napaneknekan a Matoor
18, 19. (a) Akin et nibagan agbalot inanamot nen Job so anggan siopa? (b) Antoy mabulos ya gawaen nen Job no napaneknekan a nankasalanan?
18 Si Job et matua tan patas. Kanian, oniay nibaga to: “No say dalin ko onakis sumpa ed siak, tan saray gulis ko mannangis ira a bansag; no kinan ko so saray bunga to ya andi kuarta, odino ginawak a saray makankien ed sikato nabalang da so bilay da, saray sabitan ontubo ra komon ed pasen na trigo, tan say sisanyas ed pasen na sebada.” (Job 31:38-40) Agbalot sinamsam nen Job so dalin na arum, tan agto inanamot iray lingkor to. Singa si Job, kaukolan a mansiansia itayon matoor ed si Jehova diad melag man o baleg iran pamaakaran.
19 Insalaysay nen Job ed taloran kakaaro to tan ed si kalangweran ya Elihu so nipaakar ed bilay to. Kinerew to’d siopaman a mangaakusa’d sikato ya ireklamo ray antokaman a nabalaw da’d “tatak” to odino impanbilay to. No napaneknekan dan nankasalanan, mabulos ton awatey dusa. Kanian, impalima to lay kaso to ed korte na Dios tan inalagar toy sentensia. Et ‘ditan angangga iray salita nen Job.’—Job 31:35, 40.
Sarag Mon Pansiansiaey Integridad Mo
20, 21. (a) Panon ya apansiansia nen Job so integridad to? (b) Panon tayon napaelet so panangaro tayo ed Dios?
20 Apansiansia nen Job so integridad to lapud inaro toy Dios, tan sikatoy inaro tan tinulongan nen Jehova. Inkuan nen Job: “Inikdan mo ak na bilay tan maong a linawa [odino, matoor a panangaro]; tan say [panangasikasom] impansiansia to so espirituk.” (Job 10:12) Niarum ni, inaro nen Job so arum, amta ton say agmangaaro ed kapara ton too et ikakaindan to so mapagalang a takot ed Makapanyarin-amin. (Job 6:14) Saray mansiasiansian matoor et mangaaro ed Dios tan ed kapara ran too.—Mat. 22:37-40.
21 Napaelet tayo so panangaro tayo ed Dios no inagew-agew tayon basaen so Salita to tan dalepdepen so naamtaan tayo nipaakar ed sikato. Panamegley na masimoon a pikakasi, nidayew tan napisalamatan tayo si Jehova lapud kaabigan to ed sikatayo. (Fil. 4:6, 7) Sarag tayon kantaan si Jehova tan nagunggonaan ed regular a pililimog ed saray totoo to. (Heb. 10:23-25) Ontan met, say panangaro tayo ed Dios et onelet sano mibiang itayo ed ministeryo tan iyabawag so “maong a balita nipaakar ed panangiliktar to.” (Sal. 96:1-3, NW) No gawaen tayo iraya, napansiansia tayoy integridad tayo, a singa say salmista ya angikanta: “Maong ed siak so ondere ed abay na Dios. Inyan ko so panagmatale’ko ed Jehova a Dios.”—Sal. 73:28.
22, 23. Bilang manangiyalangon ed inkasoberano nen Jehova, antoy piparaan na kimkimey tayo ed saray nanmatoor nensaman?
22 Diad inlabas na saray siglo, inikdan nen Jehova na dakel tan nanduruman asainmin iray totoon nansagpot a nanmatoor. Nanggawa na biong si Noe tan ‘nampulong na katunongan.’ (2 Ped. 2:5) Inwanwan nen Josue iray Israelita diad Insipan a Dalin, et tinmalona labat lapud binasa to so “libro na ganggan . . . ed agew tan labi” tan inyaplika to itan. (Jos. 1:7, 8) Saray inmunan siglon Kristiano et nanggaway babangatan tan regular ya nantitipon pian aralen so Kasulatan.—Mat. 28:19, 20.
23 Niyalangon tayoy inkasoberano nen Jehova tan makapansiansian matoor no ipulong tayo so inkatunong, manggaway babangatan, iyaplika so Makasulatan a simbawa, tan miulop ed saray kaagian diad aral, asemblea, tan kombension. Ontulong iraya ed sikatayo pian magmaliw a makpel, mabiskeg ed espiritual, tan matalona ed panggaway linawa na Dios. Aliwa iyan mair-irap a gawaen ta susuportaan itayo na Ama tayon walad tawen tan na Anak to. (Deu. 30:11-14; 1 Ara. 8:57) Sakey ni, susuportaan itayo na “amin ya agagi,” a manmamatoor met tan mangigagalang ed si Jehova bilang Soberanon Katawan.—1 Ped. 2:17.
Antoy Ebat Mo?
• Antoy panmoria tayo’d saray estandarte nen Jehova ed moral?
• Antoy agusgustoan mon kualidad nen Job?
• Singa ipapanengneng na Job 31:29-37, panoy inkiwas tan impideneng nen Job?
• Akin et sarag tayon napansiansiay integridad tayo’d Dios?
[Tepetepet Parad Panagaral]
[Litrato ed pahina 29]
Apansiansia nen Job so integridad to ed si Jehova. Sarag ti met!
[Litrato ed pahina 32]
Napansiansia tayoy integridad tayo!