Sikayoran Kalangweran​—Anto so Gawaen Yo ed Bilay Yo?

“Say pamoponitik et aliwan singa pamoponiti ed dagem.”​—1 COR. 9:26.

1, 2. Legan na ibabaleg mo, antoy kaukolan a walad sika pian ontalona ka?

NO BILANG ta onla ka’d kapalandeyan ya agmo nin balot nakar, anganko et mangawit kay mapa tan kompas. Ontulong ed sika so mapa pian antam so kawalaan tan dalanen mo. Ontulong met so kompas pian nasegurom a dugay direksion mo. Balet, anggapoy masyadon nitulong na saraya no agmo amtay laen mo. Pian agka nabalang, kaukolan ya antam so eksakton destinasyon mo.

² Ontan met so situasyon legan mon ombabaleg. Walay napanmatalkan mon mapa tan kompas. Say Biblia so pinagka-mapam pian antam no dinan a “basbas” ed bilay so pilien mo. (Uli. 3:5, 6) Tan no sustoy inkipasal na konsiensiam, baleg so nitulong na satan pian makapansiansia ka’d dugan dalan. (Roma 2:15) Satan so pinagka-kompas mo. Balet, pian matalonay bilay mo, kaukolan ya antam no iner so laen mo. Kaukolan a malinew ed sika no antoray kalat mo.

3. Diad 1 Corinto 9:26, antoy imbaga nen Pablo a gunggona no walaray kalat mo?

³ Oniay insulat nen apostol Pablo a gunggona na pamplano tan panseet a panggawa ed saratan: “Ombabatik ak ya amtak so aarapen ko; say pamoponitik et aliwan singa pamoponiti ed dagem.” (1 Cor. 9:26) No walaray kalat mo, ombabatik kan antam so aarapen mo. Nasabi panaon, kaukolan mo lay manggawa na importante iran desisyon, singa bilang, nipaakar ed panagdayew, trabaho, panangasawa, panagpamilya, tan arum ni ra. No maminsan, diad karakel na napanpilian, agmo laingen amta no antoy gawaen mo. Balet, no manplano ka lan masakbay, ya ibasem so desisyon mo ed katuaan tan prinsipyon walad Salitay Dios, agka natukson onla’d lingon direksion.​—2 Tim. 4:4, 5.

4, 5. (a) Antoy nagawa no anggapoy kalat mo? (b) Akin a no mandedesisyon ka et ikonsideram so pamaliket ed Dios?

⁴ No anggapoy kalat mo, nayarin impluensyaan ka na saray nakakaulop tan mamaestram a gawaen so iisipen dan maabig parad sika. Tan anggano wala lay espisipikon kalat mo, nayarin mangisuheri nin siansia so arum. Sano ikokonsideram so suhestion da, tepetay sarilim, ‘Kasin makatulong so imbaga ra pian nonoten koy Manamalsak diad agew na inkaugaw ko, odino nibalang da ak laingen?’​—Basaen so Eclesiastes 12:1.

⁵ Akin a no mandedesisyon ka et ikonsideram so pamaliket ed Dios? Say sakey a rason et lapud inter nen Jehova so amin a maabig a bengatlan walad sikatayo. (Sant. 1:17) On, akautang itayon amin ed si Jehova. (Apo. 4:11) Anggapo lay mas maabig a paraan a nipanengneng moy apresasyon noag say pannonot ed si Jehova no manpaplano ka! Pantongtongan tayo pa no antoran kalat so makabaliksan tan no antoray gawaen mo pian nadampot iratan.

 Antoray Kalat Mo?

6. Anton importantin kalat so sarag mon gawaen, tan akin?

⁶ Unong a naaralan ed imbeneg ya artikulo, say sakey ya importantin kalat et say pamaneknek ed inkasika no kasin tua so ibabaga na Biblia. (Roma 12:2; 2 Cor. 13:5) Nayarin saray nakakaulop mo et manisia ed ebolusyon odino nanduruman doktrina na relihyon ta walay angibaga’d sikara a satan so nepeg dan panisiaan. Balet, aliwa ka komon ya ontan. Tandaan, labay nen Jehova a manlingkor ka’d sikato ed interon nonot. (Basaen so Mateo 22:36, 37.) Labay na Ama tayon walad tawen ya napabiskeg moy pananisiam base’d makakombinsin ebidensya.​—Heb. 11:1.

7, 8. (a) Antoran maganon nagawaan a kalat so ontulong ed sika pian napabiskeg moy pananisiam? (b) Antoy naliknam no agawaan mo lay arum ed saraya?

⁷ Pian napabiskeg so pananisiam, agta maabig no manggawa ka ray kalat a maganon nadampot? Sakey ed saraya et say pampikasin inagew-agew. Pian espisipiko tan aliwan apasakey so ipipikasim, isip mo la odino isulat mo no antoy agawa ed sanagew a nayarin ipilam. Seguroen ya aglabat bibitlaen iray problemam, noagta pati saray nanliketan mo. (Fil. 4:6) Say sakey nin kalat et say inagew-agew a pambasa na Biblia. Antam ta a no manbasa kay manga apatiran pahina kada agew et nasumpal mon basaen so interon Biblia ed sakey taon? * Oniay inkuan na Salmo: “Maliket so toon . . . say panliliketan to et say ganggan nen Jehova, ya agew-labi ton babasaen tan dadalepdepen.”​—Sal. 1:1, 2, NW.

⁸ Say komatlon kalat a maganon nagawaan et say pangiparaan na ebat ed kada aral. Diad unona et nayarim nin basaen so ebat a walad parapo odino sakey a teksto. Agmanbayag, nayarin iplanom lay onebat ed dilim a salita. Diad tua, kada iyebat mo et mangiyaapay kay bagat ed si Jehova. (Heb. 13:15)  No agawaan mo lay arum ed saraya, mas mankompiyansa ka’d sarilim, mas apresyaen moy Jehova, tan akaparaan ka la’d satan a manggawa na mas mabayag a nadampot a kalat.

9. No aliwa ka nin manangipalapag na Panarian, antoran mas mabayag a nadampot a kalat so nayarim a dampoten?

⁹ Antoray mas mabayag a nadampot a kalat ya nayarin iplanom? No agka ni mangiyaabawag na maong a balita, nayarin dampoten moy magmaliw a manangipalapag na Panarian. No agawaan mo la iyan alay abig a kalat, seguradon panseetan moy magmaliw a regular tan epektibo, ya agmon balot palalampasey anggan sakey bulan ya agka akapampulong. Seguradon panseetan mo met ya aralen ya usaren so Biblia diad ministeryo. Diad ontan et naliknam ya mas makapalikliket manayay panagpulong a kimey. Nadakelan mo la’d satan so panaon mo’d panagpulong tan pansagpotan mo ni ingen so mangiyaral na Biblia. Bilang agbautismadon manangipalapag, agta anggapo lay mas maabig a kalat nen say pagmaliw a kualipikado parad bautismo tan magmaliw a dedikado, bautismadon Tasi nen Jehova a Dios?

10, 11. Bilang bautismadon kalangweran, antoran kalat a nasumpal ed andukey a panaon so nayarim ya iplano?

¹⁰ No sakey ka lan bautismadon lingkor nen Jehova, nia ray pigaran kalat a nayarim a nasumpal ed andukey a panaon. Nayarin labay moy mitulongan no maminsan ed saray teritoryan matalag a nakimeyan. Nayari met ya usaren moy kaksilan mo diad pan-auxiliary odino pan-regular payunir. Nilibon payunir so maliket a mangibagan say panlingkor a sigpot-panaon et makapnek a paraan pian nanonotan moy Manamalsam ed agew na inkaugaw mo. Saraya so kalat a nayarim a dampoten legan a wala ka ni’d pudir na atateng mo. Anggan say kongregasyon mo et nagunggonaan no nagagawaan mo iratan.

¹¹ Likud ed kawalaan mon kongregasyon, nagunggonaan met iray arum. Singa bilang, nayarin iplanom so panlingkor ed arum a lugar o bansa ya baleg so pankaukolan. Ompan labay moy ontulong ed pangipaalagey na saray Kingdom Hall o pasilidad na sanga ed arum ya bansa. Nayari met ya makapanlingkor ka’d Bethel odino magmaliw a misionaryo. Siempre, antis mon nadampot iraya, say unonan importantin kalat et say pampabautismo. No agka ni nampabautismo, imanoen no antoy kaukolan mon gawaen pian nadampot mo iya.

Pakadampot ed Kalat ya Pampabautismo

12. Antoray rason a manpapabautismo iray arum, tan akin et agmagenap iraya?

¹² Parad sika, antoy gagala na pampabautismo? Nayarin isipen na arum a kalangweran ya proteksion iya pian ag-ira makapankasalanan. Ompan saray arum et liknaen dan kaukolan da lay manpabautismo ta saray kaaro ra et abautismoan la. Saray arum et nayarin labay dan napaliket iray atateng da. Balet, say bautismo et aliwan kontratan mamabawal ed sika ed saramay isesekretom a labay mon gawaen; nisay manpabautismo ka lapud apilitan ka. Noagta, manpabautismo ka no natatalosan moy lalanoren na pagmaliw a Tasi nen Jehova, tan no seguradon akaparaan tan mabulos mo lan gawaen iyan responsabilidad.​—Ecl. 5:4, 5.

13. Akin et manpabautismo ka?

¹³ Say sakey a rason no akin ya manpabautismo ka et lapud ingganggan nen Jesus iray papatumbok to ya ‘ibangat iray totoo tan bautismoan ira.’ Sikatoy angipanengneng met na alimbawa sanen nampabautismo. (Basaen so Mateo 28:19, 20; Marcos 1:9.) Niarum ni, say bautismo et importante parad saramay labay day niliktar. Oniay inkuan nen apostol Pedro kayari ton insalaysay so impanggawa nen Noe na biong ya angiliktar  ed sikato tan say pamilya to legan na Delap: “Say ililitrato na satan ya agawa et mangisasalba met natan ed sikayo, salanti, say bautismo, . . . diad panamegley na inkioli nen Jesu-Kristo.” (1 Ped. 3:20, 21) Balet, say bautismo et aliwan insurance a nausar mo no walay trahedya. Noagta, manpabautismo ka ta inarom si Jehova tan labay mon panlingkoran ed interon puso, kamarerwa, nonot, tan biskeg.​—Mar. 12:29, 30.

14. Akin et alanganin so arum a manpabautismo, balet antoy ipapaseguro ed sika?

¹⁴ Nayarin alanganin so arum ya manpabautismo ta natatakot ira ompan nadispelosip ira lanlamang. Ontan ka met kasi? Satan a naliliknam et aliwa met a mauges. Kabaliksan na satan ya natatalosan mo so seryoson responsabilidad na pagmaliw a Tasi nen Jehova. Wala ta ni arum a rason? Nayarin agka ni kombinsido ya say pambilay unong ed estandarte na Dios so sankaabigan a paraan na bilay. Nonot mo pa no antoy pansusumpalan na saramay mangibabaliwala’d estandarte na Biblia, makatulong itan pian makapandesisyon ka. Odino, ompan papablien mo met iray estandarte na Dios balet ta natatakot ka ompan agmo nagawaan itan. Diad tua, tanda itan ya mapaabeba ka. Ibabaga na Biblia ya say puso na amin ya agperpekton totoo et mapalikdo. (Jer. 17:9) Balet, ontalona ka no lanang mon ‘iimanoen so salita na Dios.’ (Basaen so Salmo 119:9.) Antokaman so rason no akin ya alanganin kan manpabautismo, kaukolan mon arapen tan resolbien itan. *

15, 16. Panon mon nibaga no akaparaan ka lan manpabautismo?

¹⁵ Panon mon nibaga balet no akaparaan ka lan manpabautismo? Say sakey a paraan et tepetay inkasika: ‘Sarag ko kasin ipaliwawa iray manunan bangat na Biblia? Manpulong ak kasi anggano ag-ompaway iray atateng ko? Panseseetan ko kasin atendian so amin a pantitipon? Wala ta’y nanonotan kon inkagawa ya adaeg koy pananesdes na kalimog? Manlingkor ak ni kasin siansia ed si Jehova anggano ontunda ray atateng ko tan kakaarok? Impikasik la kasi so relasyon ko ed Dios? Tan sigpot ko la kasin indedikay sarilik ed si Jehova panamegley na pikakasi?’

¹⁶ Say bautismo et umanen toy bilay na sakey, tan ag-itan nepeg a leglemewen. Akaparaan ka ta lan manpabautismo? Say itatatken ed espiritual et aglabat nanengneng ed inkamaong a mankomento odino manpaliwawa ed arap. Nalalanor met ed satan so pakapandesisyon na sakey base ed saray natatalosan ton prinsipyo na Biblia. (Basaen so Hebreos 5:14.) No sarag mo la itan a gawaen, walad arapan mo so sankarakepan a pribilehyo, salanti  say interon puson panaglingkor ed si Jehova tan panagbilay a mangipapanengneng ya talagan dedikado ka ed sikato.

17. Antoy ontulong ed sika pian naarap mo iray subok a nayarin onlesa kayari’ bautismom?

¹⁷ Kayari bautismom, nayarin masetseseg kan manlingkor ed Dios. Agmanbayag balet et ompan wala ray nadalan mo a pakasubokay anos tan pananisiam. (2 Tim. 3:12) Agmo iisipen ya bukor mo labat so mangarap ed sarayan subok. Kerew kay simbawa’d atateng mo. Patulongan ka’d saray eksperiensyadon agagi ed kongregasyon. Itultuloy moy mikaaro’d saray onsusuporta’d sika. Agmon balot lilingwanan ya iyaansakit ka nen Jehova, tan ikdan to ka na biskeg a kaukolan mo pian naarap moy antokaman a subok a nayarin onlesa.​—1 Ped. 5:6, 7.

Panon Mon Nadampot Iray Kalat Mo?

18, 19. Antoy gunggona no usisaen mo ray prayuridad mo?

¹⁸ Kasin singa kulang so panaon mo pian nagawaan iray labay tan kaukolan mon gawaen anggano mansasagpot ka? No ontan, nepeg mon usisaen iray prayuridad mo. Bilang pangiyilustra: Mangala kay timba tan kargaan moy dakel a bato. Insan panom na buer. Wala la natay timbam a napnoy bato tan buer. Natan, iyibung moy karga to. Say onsublay a gawam balet et ikargam nin unona ed timba imay buer ya inyibung mo, insan mo iyan iramay bato. Agla onsusto? On, ta inyunam ya inkarga may buer.

¹⁹ Ontan met so nagagawa ed panaon mo. No iyunam so panagligliwaan, ngalngali anggapo lay panaon mo’d saray importantin bengatla, salanti, say espiritual a kimkimey. Balet no unoren moy bilin na Biblia ya ‘naynay mon seguroen iray mas importantin bengatla,’ wala lay panaon mon manlingkor ed Dios tan daiset a panaon parad panagligliwaan.​—Fil. 1:10.

20. No aburido tan manduaruwa ka legan mon pansasagpotan a dampoten iray kalat mo, antoy gawaen mo?

²⁰ Legan mon pansasagpotan a dampoten iray kalat mo, pati say pampabautismo, nayarin no maminsan et manaburido tan manduaruwa ka. No ontan, “paawit mo ed Jehova so awit mo, et sikato bembenan to ka.” (Sal. 55:22) Pankanawnawam natan so mibiang ed sankaliketan tan sankaimportantian a kimey ed amin, say sankamundoan a panagpulong tan panagbangat. (Gawa 1:8) Nayarin pilien moy agmibiang tan bantayan labat so arum, odino, nayarin mibiang ka. Agmo sasayangey abilidad mon manlingkor ed Dios tan suportaay Panarian to. Agmon balot pagbabawian so panlingkor ed “Manamalsam dia ed saray agew na inkaugaw mo.”​—Ecl. 12:1.

[Saray paimano ed leksab]

Antoy Ebat Mo?

• Akin et nepeg a walaray kalat mo?

• Antoran kalat so alay abig a dampoten?

• Antoy kaukolan pian nadampot so kalat a pampabautismo?

• Akin a makatulong so pangusisa ed saray prayuridad mo pian nadampot iray kalat mo?

[Tepetepet Parad Panagaral]

[Litrato ed pahina 13]

Kasin kalat mon basaen ya inagew-agew so Biblia?

[Litrato ed pahina 15]

Antoy ontulong pian nadampot moy kalat a pampabautismo?

[Litrato ed pahina 16]

Antoy naaralan mo ed sayan ilustrasyon?