Antoy Iyebat na Anak Yo?

ATATENG: Diad isyu na Enero 15, 2010, pahina 16-20, asalambit min ipraktis yo iray anak yo. Nabasa yo diad sayan artikulo no antoray makatulong pian niparaan yo ray ugugaw nin anak yo ya ebatan iray posiblin itepet ed sikara diad eskuelaan. Ompan labay yon gawaen iyan panagpraktis legay Panagdayew na Pamilya yo.

SARAY ugugaw nin anak na Tasi nen Jehova et nipapaarap ed dakel iran angat. Mabetbet iran tepetan na saray kaeskuela ra no akin ya ag-ira mibibiang ed nanduruman school activities, singa say panagsaludo’d bandira, panag-celebrate na birthday, tan saray project ya mikonektaan ed saray holiday. Panoy iyebat na anak yo no walay mantepet ed sikara?

Say ibabaga na arum ya anak na Tasi et: “Tasi kami. Agnayari’d sikami ’tan.” Nepeg ya komendaan irayan ugugaw lapud makpel iran mangibaga’d papanisiaan da. Balet, ompan lapud satan ya ebat da et agla mantepet lamet iray kaeskuela ra. Tandaan, ipapaseseg na Biblia a nepeg itayon “akaparaan ya onebat ed amin a mantetepet” nipaakar ed saray sisiaen tayo. (1 Ped. 3:15) Pian nagawaan itan, agmagenap so pangibagay, “Agnayari’d sikami ’tan.” Anggano agmipakna so arum ed desisyon tayo, ompan labay dan naamtaan no antoray rason tayo.

Dakel so ananak na Tasi ya mangiistorya’d saray kaeskuela ra na istorya’d Biblia, ya uusaren da ray publikasyon a singa say Manaral Manlapud Sankamaongan a Managbangat. Makatulong iraya pian natalosan na kaeskuela ra no akin ya walaray pibibiangan dan school activities tan walaray agda met pibibiangan. Say onia ran istorya’d Biblia et labalabay ya dengelen na arum, tan dakel so nigapon panangiyaral ed Biblia diad onian paraan. Balet, walaray estudyanten anggapoy anos dan ondengel ed istorya’d Biblia. No ag-iratan nipaliwawan maong ed sikara, ompan agda ingen natalosan. Alimbawa, nen si Minhee ya 11 años et inimbitaan na kaaro to ed birthday party, oniay ebat nen Minhee: “Ag-ibabaga na Biblia ya man-celebrate tayoy birthday. Walay karakter ed Biblia a say ngaran to et Juan ya Managbautismo ya pinatey ed birthday party.” Balet, unong ed si Minhee, singa ag-atalosan na kaaro to so ebat to.

No maminsan, makatulong no ipanengneng na anak yo ed kaeskuela to so litrato o ipabasa so istorya a walad saray libro tayo. Balet, panon to no ag-iyabuloy na saray opisyal ed eskuelaan ya ipanengneng na anak yo irayan publikasyon ed arum ya estudyante? Sarag kasin idepensa na anak yo so sisisiaen to anggano agmangusar na publikasyon? Panon yon natulongan iray anak yo pian nagawaan da itan?

Ipraktis Iray Anak Yo

Makatulong so pampraktis ed abung, a kunwari et saray atateng so kaeskuela na anak. Legan yon manpapraktis, komendaan yon atateng so pansasagpot na anak yon idepensay pananisia to. Ipanengneng ed sikato no panon to nin napaaligwas so panagrason to, tan no akin ya mas marakep no ontan so gawaen  to. Alimbawa, ipanonot ya say nepeg ton usaren et saray salitan natalosan na kaedaran to. Unong ed nuebe años a si Joshua, agnatalosan na saray kaeskuela to iray salitan singa say “konsiensia” tan “katooran.” Kanian kaukolan toy mangusar na mas atapew iran salita diad pikatunongan to’d sikara.​—1 Cor. 14:9.

Walaray ugugaw ya mantepet ira balet ta naandin tampol so interes da no andukey so iyebat. Balet no singa labat miistoryaan so anak yo, nayarin mansiansiay interes da. Oniay imbaga na 10 años a biin si Haneul: “Say labalabay na saray kaklasek et ’amay manistoryaan labat, agda labay so eksplinasyon.” Pian tuloytuloy so tongtongan, kaukolan so pantepet, insan dengelen a maong so opinyon na katongtong.

Ipanengneng na saray pantotongtong ya nabasa yo dia no antoray nayarin iyebat na ananak yo ed saray kaeskuela ra. Ag-iraya kaukolan ya ipatlep, ta aliwan pare-parehoy ugugaw tan nanduruma so situasyon. Kanian, kaukolan ya say tandaan labat na ananak yo et saray manunan punto. Nepeg a sarag da itan ya ibaga ed  dili ran salita, ya itukoy-tukoy da ed situasyon tan ed kaeskuela da. No walaray ugugaw nin anak yo, sali yon iyakto irayan pantotongtong.

Kaukolan so panaon tan sagpot diad panangipasal ed ananak. Seguradon labay na Kristianon atateng ya ipurek ed ananak da iray prinsipyoy Biblia, diad ontan et natangguyor iran manbilay unong ed saratan ya prinsipyo.​—Deu. 6:7; 2 Tim. 3:14.

Diad onsublay ya Panagdayew na Pamilya yo, sali yon ipraktis irayan pantotongtong kaiba ray anak yo, pian nanengneng yon epektibo iraya. Tandaan, agkaukolan ya ipatlep so kada ebat odino salita. Sarag yo ni ingen a maminpigan iyakto so sakey a situasyon, balet ta nandurumay ibaga yo, tan nengneng yo no panon so iyebat na ananak yo. Legan dan aaralen no panoy pangipaliwawa ra’d sisisiaen da, tulongan yo ran gawaen da itan diad makaaro tan mataktikan paraan. Onsabi panaon et sarag la na ananak yon idepensa so sisisiaen da ed saray kaklase, kaabay, tan ed saray maestro tan maestra ra.

[Kahon/Saray litrato ed pahina 4, 5]

PANAG-CELEBRATE NA BIRTHDAY

Mary: John, laka’d birthdeyk a.

John: Salamat ta inimbitaan mo ak. Pero, wala pay itepet ko’d sika. Akin et man-birthday party ka?

Mary: Pian i-celebrate so birthdeyk. Akin, agka sirin manbibirthday?

John: Andi.

Mary: Akin ey? Siak, maliket so pamilyak nen nianak ak.

John: Maliket met so pamilyak nen nianak ak. Balet parad siak, aliwa itan a rason pian i-celebrate so birthday. Diad birthday party, say isipen na samay akan-birthday et sikato so sankaimportantian ya too. Balet, agta say Dios so mas importante?

Mary: Labay mon ibaga agak la man birthday party?

John: Walad sika ’tan. Pero nonot mo pa. Labalabay na totoo so makaawat na regalo no birthday da, pero ibabaga na Biblia ya mas maliket so mangiter nen say mangawat. Imbes ya say isipen tayo et sarili tayo, di ba mas maabig no manggawa itayoy maong ed arum?

Mary: Agko naisip ’tan a. Agka sirin reregaloan na atateng mo?

John: Siempre reregaloan da ak, pero anggan anton agew. Agda la aalagarey birthdeyk. Mary, labay kon istoryaen ed sika no panon ya ginmapoy panag-celebrate na birthday.

Mary: Sige.

John: Nabuas sirin, istoryaen ko’d sika so sakey ya birthday party nensaman.

NATIONAL ANTHEM

Gail: Claire, akin et agka mangakansion no flag ceremony?

Claire: Maong ta atepet mo. Pero tepetan ta ka met, akin et mangakansion ka?

Gail: Ta sikatoy ibabangat na teacher di ba? Tan amin pa et mangakansion, kanian mangakansion ak met.

Claire: Tua, amin lawari et mangakansion. Pero, nanonotan mo no anto ’may sampot na national anthem?

Gail: E, say kuanto et “Ang mamatay nang dahil sa ’yo.”

Claire: Duga. Labay ton ibaga sirin, no mangakansion kay national anthem no flag ceremony, singa ibabagam ya sarag moy ompatey parad bansam.

Gail: E, antoy aliwa’d satan ey?

Claire: Dakel ya tua so pisalamatan tayo’d bansa tayo, pero say Dios so mangiiter na amin a kaukolan tayo, pati bilay tayo. Kanian nandesisyon ak ya usarey bilay ko parad sikato. Kanian, sarag koy ompatey parad Dios, aliwan parad bansak. ’Atan so rason no akin et agak mangakansion no flag ceremony.

Gail: A, kanian manaya.

Claire: Maong labat ta apantongtongan ta ya Gail. No labay mon naamtaan so rason ed saray gagawaen ko tan agko gagawaen, tepetan mo ak labat. Kien manaya, nabasa’d Biblia ya walay ari nensaman ed Babilonia ya ingganggan to ray totoon onyuko ed imahen. Balet ta walaray agda labay so onyuko, anggano pateyen da ni ra.

Gail: Talaga? Antoy agawa’d sikara ey?

Claire: Istoryaen ko’d sika naani no recess.

POLITIKA ED ESKUELAAN

Mike: Tim, siopay ibotom ya class president tayo?

Tim: Anggapoy pipilaan ko.

Mike: Akin ey?

Tim: Parad siak, say sankamaongan lan lider et si Jesus. Bilang Kristiano, sikato so labay kon unoren ya lider. Kanian, anggapo lay arum ya pilien ko. Antam no akin ya parad siak et sikato so sankamaongan ya Lider?

Mike: Agko amta, tan anggapo met so pibabalik.

Tim: Ay e. Pero no labay mon naamtaan, labalabay kon ibaga’d sika.

[Litrato]

“John, laka’d birthdeyk a”

[Litrato ed pahina 3]

“Akin et agka mangakansion no flag ceremony?”