“Natan la so Makapalikliket a Panaon”

“Nia! Natan la so makapalikliket a panaon. Nia! Natan la so agew na kilalaban.”​—2 COR. 6:2.

1. Akin et lawas tayon tebeken no antoy kaukolan a gawaen?

“NIPAAKAR ed amin a bengatla wala so sakey a panaon, tan sakey a panaon nipaakar ed balang pegdat ed leksab na tawen,” kuan nen Solomon. (Ecl. 3:1) Tutukoyen to’d saya a nepeg tayon tebeken no kapigan so sankaabigan a panaon a panggawa ed saray kimkimey, a singa say pandalus, pambiahe, pannegosyo, odino pitongtong ed arum. Bangbalet, kaukolan met a lawas tayon tebeken no anto so sankaimportantian a gawaen. Labay ton ibaga, kaukolan ya amta tayo ray prayuridad tayo.

2. Sanen wadiad dalin si Jesus, panon tayon amta a sikatoy sinononot ed panaon a pambibilayan to?

² Sanen wadiad dalin si Jesus, sikatoy sinononot ed panaon a pambibilayan to tan ed no antoy kaukolan ton gawaen. Lapud malinlinew ed sikato ray prayuridad to, amta to a magano lan nasumpal iray abayag lan tatalaranan a dakel a propesiya nipaakar ed Mesias. (1 Ped. 1:11; Apo. 19:10) Kaukolan ton paneknekan a sikato imay insipan a Mesias. Nepeg a sigpot  ton ipulong so katuaan nipaakar ed Panarian tan mamili na nakaiba ton tomatawir ed Panarian. Tan kaukolan ton iletneg so pundasyon na Kristianon kongregasyon ya manumpal ed panagpulong tan panaggaway babangatan a kimey anggad kasampotan na dalin.​—Mar. 1:15.

3. Lapud sinononot si Jesus ed panaon, antoy epekto na satan ed sikato?

³ Lapud amta iratan nen Jesus, sikatoy apakiwas a magmaliw ya maseseg a manumpal ed linawa na Ama to. Inkuan to’d saray disipulo to: “On, dakel so aanien, balet daiset so mankikimey. Mikasi kayo sirin ed Katawan na panag-ani a mangibaki na saray mankimey ed aanien to.” (Luc. 10:2; Mal. 4:5, 6) Amili nin unona si Jesus na 12 insan 70 ed saray disipulo to, espisipiko to ran binilin, tan imbaki to ran mangipulong ed makapaseseg a mensahen: “Say panarian na katawenan so asingsingger la.” Tan no nipaakar ed si Jesus, oniay nabasa tayo: “Sanen asumpal [ton] binilin iray labinduan disipulo to, sikatoy tinmaynan diman pian manbangat tan manpulong ed saray syudad da.”​—Mat. 10:5-7; 11:1; Luc. 10:1.

4. Panon ya inalig nen Pablo si Jesu-Kristo?

⁴ Si Jesus so ayadyarin ehemplo na inkaseseg tan katooran parad amin a papatumbok to. Impaimano iya nen apostol Pablo sanen pinaseseg to ray kaagian to: “Alig yo ak komon, a singa pangaalig ko ed si Kristo.” (1 Cor. 11:1) Panon ya inalig nen Pablo si Kristo? Manuna’d amin et diad makulikulin impanpulong to ed maong a balita. Diad saray sulat nen Pablo ed saray kongregasyon, nabasa tayo ray balikas a singa “agkayo manngingiras ed saray kimey yo,” “manpaaripen kayo ed si Jehova,” “naynay a dakel komon so gagawaen yo ed kimey na Katawan,” tan “antokaman so gagawaen yo, gawa yo itan ed interon kamarerwa a singa parad si Jehova.” (Roma 12:11; 1 Cor. 15:58; Col. 3:23) Agbalot alingwanan nen Pablo so agawa ed dalan ya paarap ed Damasco tan say imbaga nen Jesus ya impasabi nen disipulon Ananias ed sikato: “Sayan too et sakey a pinilik a pananginan pian mangawit na ngaran ko ed saray nasyon ontan met ed saray arari tan ed saray anak na Israel.”​—Gawa 9:15; Roma 1:1, 5; Gal. 1:16.

“Makapalikliket a Panaon”

5. Antoy amakiwas ed si Pablo a magmaliw ya maseseg ed ministeryo to?

⁵ No basaen tayo so libro na Gawa, talagan nanengneng tayoy pakpel tan seseg nen Pablo legan na ministeryo to. (Gawa 13:9, 10; 17:16, 17; 18:5) Amta nen Pablo so kaimportantian na panaon a pambibilayan to. Inkuan to: “Nia! Natan la so makapalikliket a panaon. Nia! Natan la so agew na kilalaban.” (2 Cor. 6:2) Nen 537 B.C.E., makapalikliket a panaon parad saray Judion dinakep ed Babilonia imay impawil da’d dalin da. (Isa. 49:8, 9) Balet antoy tutukoyen nen Pablo ed imbaga to? Makatulong ed sikatayo so konteksto pian natalosan no antoy labay ton ibaga.

6, 7. Anto so baleg a pribilehyon inter ed saray alanaan a Kristiano natan, tan sioparay kaiba na alanaan a mankikimey?

⁶ Diad banda’d gapo na sulat nen Pablo, sinalambit to so baleg a pribilehyon niiter ed sikato tan ed saray kapara ton alanaan a Kristiano. (Basaen so 2 Corinto 5:18-20.) Impaliwawa to ya sikaray pinili na Dios parad sakey ya espisipikon kimey, salanti, pian sumpalen so “ministeryo nipaakar ed pikakareenan,” pian mikasi ed saray totoo ya ‘mikareenan ed Dios.’  Sirin et napapawil so pikakaaro odino pikakareenan da ed Dios.

⁷ Manlapu la’d samay agawan impanrebelde ed Eden, amin a katooan et nisian tan niyarawi ed si Jehova. (Roma 3:10, 23) Lapud satan, niiyan ed espiritual a kabilungetan so katooan, a nanresulta ed kairapan tan ipapatey. Insulat nen Pablo: “Amta tayo a say amin a pinalsa et saniiban oneey-ey tan nasasakitan anggad natan.” (Roma 8:22) Balet nanggaway paraan so Dios pian pasesegen iray totoo, diad tua et “mikakasi,” pian ompawil, odino mikareenan ira ed sikato. Satan imay ministeryo ya inmatalek ed si Pablo tan ed kapara ton alanaan iran Kristiano nensaman. Satan a “makapalikliket a panaon” so magmaliw ya “agew na kilalaban” parad saramay walaan na pananisia ed si Jesus. Amin ya alanaan a Kristiano, kaibay ‘arum a karnero,’ ya mitutulongan ed sikara, et siansia nin mangiimbita ed saray totoon minabang ed “makapalikliket a panaon.”​—Juan 10:16.

8. Akin et makapadinayew so pikakareenan na Dios ed totoo?

⁸ Say lalon makapadinayew et anggano say too so akankasalanan no akin ya aderal so relasyon da ed Dios lapud impanrebelde da ed Eden, say Dios ni so nanggaway paraan pian makapikareenan ira. (1 Juan 4:10, 19) Antoy ginawa to? Oniay ebat nen Pablo: “Diad panamegley nen Kristo et makapikareenan ed Dios so mundo, ya agto ra singilen ed saray impakalingo ra, tan inmatalek to ed sikami so salita na pikakareenan.”​—2 Cor. 5:19; Isa. 55:6.

9. Panon ya impanengneng nen Pablo so apresasyon to ed panangasi na Dios?

⁹ Lapud dondon bagat ya intarya nen Jehova, posible lan naperdona iray kasalanan na saray walaan na pananisia tan nipawil so pikakaaro odino pikakareenan da’d sikato. Niarum ni, walaray imbaki ton mamaseseg ed amin a totoo a mikareenan ed sikato anggad posible. (Basaen so 1 Timoteo 2:3-6.) Atalosan nen Pablo so gagala na Dios tan atebek to so panaon na pambibilayan to, kanian sikatoy nansagpot a maong ed “ministeryo nipaakar ed pikakareenan.” Ag-anguman so gagala nen Jehova. Iikdan to nin siansia na pankanawnawa iray totoo. Samay imbaga nen Pablo ya “natan la so makapalikliket a panaon” tan “natan la so agew na kilalaban” et onaplika nin siansia ed panaon tayo. Talagan mapangasi tan maabagey a Dios si Jehova!​—Exo. 34:6, 7.

‘Agyo Lilingwanan so Gagala na Satan’

10. Anto so kabaliksan na “agew na kilalaban” parad saray alanaan a Kristiano nensaman tan natan?

¹⁰ Saray unonan nagunggonaan ed sayan agnaparaan a kaabigan et saramay “akikasakey la ed si Kristo.” (2 Cor. 5:17, 18) Diad biang da, say “agew na kilalaban” et ginmapo nen Pentecostes 33 C.E. Manlapu la’d saman, nimatalek ed sikara so pangiyabawag ed “salita na pikakareenan.” Natan, saray nakekeraan ya alanaan a Kristiano et siansia nin manusumpal ed “ministeryo nipaakar ed pikakareenan.” Amta dan samay apatiran anghel ya anengneng nen apostol Juan ed pasingawey et ‘mamopokpok ed apatiran dagem na dalin, pian anggapoy dagem ya onsiplog ed dalin.’ Kanian, say “agew na kilalaban” tan say “makapalikliket a panaon” et angga ni’d natan. (Apo. 7:1-3) Lapud saya, manlapu la’d gapo na koma-20 siglo, saray nakekeraan ya alanaan et maseseg a manusumpal ed “ministeryo nipaakar ed pikakareenan” anggad arawin paspasen na dalin.

11, 12. Panon ya impanengneng na saray alanaan a Kristiano antis na koma-20 siglo ya atebek da so panaon? (Nengnengen so litrato ed pahina 15.)

¹¹ Alimbawa, unong ed libron Jehovah’s Witnesses​—Proclaimers of God’s Kingdom, antis na koma-20 siglo et “mapekder a pinanisiaan nen C. T. Russell tan saray kakaiba to a panaon la na panag-ani tan kaukolan a narengel na totoo so katuaan a mangibulos ed sikara.” Kanian antoy ginawa ra? Lapud amoria ran saman la so “makapalikliket a panaon” na panag-ani, ag-ira labat basta angimbita ed totoo a mitipon ed sikara. Ta ontan so abayag lan  gagawaen na saray klero na Kakristianoan. Imbes, saraman ya alanaan a Kristiano et nanggawa na arum niran praktikal a paraan pian nikayat so maong a balita. Singa bilang, makabat dan inusar iray sankabaloan a teknolohiya pian napapeles so kimey da.

¹² Pian nikayat so maong a balita na Panarian, saman a melag a grupo na maseseg iran ministro et angusar na saray tract, pamphlet, magasin, tan liblibro. Nansulat met ira na saray sermon tan artikulo a niimprinta’d nilibon kopya na dyaryo. Walaray base ed Biblian paliwawa ra ya in-broadcast diad radyo tan narengel anggad arum ni ran bansa. Nanggawa tan angipabantay ira na slides odino litrato a binansagay sound recording, anggan sanen agni akapangipalabas na ontan iray industriya na pelikula. Lapud masetseseg ira, antoy resulta? Natan et manga pitoran milyon a totoo so kinmiwas tan akibiang a mangiyabawag ed mensahen: “Mikareenan kayo ed Dios.” Peteg a saraman a lingkor nen Jehova et maabig ya ehemplo na inkaseseg anggaman pigpigara ira tan ag-ira eksperiensyado.

13. Anto so gagala na Dios a nepeg tayon ipapuso?

¹³ Onaplika nin siansia imay imbaga nen Pablo ya “natan la so makapalikliket a panaon.” Sikatayo ran aka-eksperiensya ed agnaparaan a kaabigan nen Jehova et misalsalamat ta naikdan itayoy pankanawnawan narengel tan naawat so mensahe nipaakar ed pikakareenan. Imbes ya mankampante, ipapapuso tayo iyan imbaga nen Pablo: “Mikakasi kami met ya agyo aawaten so agnaparaan a kaabigan na Dios insan lingwanan so gagala na satan.” (2 Cor. 6:1) Gagala na agnaparaan a kaabigan na Dios ya “makapikareenan ed [sikato] so mundo” diad panamegley nen Kristo.​—2 Cor. 5:19.

14. Antoray nilukas a pankanawnawa ed dakel a bansa?

¹⁴ Maslak ed saray totoo a binulag nen Satanas et siansia nin agda kabat so Dios tan say gagala na agnaparaan a kaabigan To. (2 Cor. 4:3, 4; 1 Juan 5:19) Balet, lapud oniirap so kipapasen ed mundo, dakel so kinmiwas sanen nipaamta’d sikara a say sengegan na kaugsan tan paniirap et say aderal a relasyon na totoo ed Dios. Anggan diad saray bansan ibabaliwala na maslak a totoo so ipupulong tayo, dakel natan so mangaawat la’d maong a balita tan mikakareenan ed Dios. Kanian, kasin natatalosan tayo a saya so panaon pian magmaliw itayon mas maseseg a mangiyabawag ed kerew ya: “Mikareenan kayo ed Dios”?

15. Imbes a basta labat ipulong so mensahen pakainawaan, antoy labay tayon naamtaan na totoo?

¹⁵ Agti labat basta ipapasabi’d totoo a no ompawil ira ed Dios, tulongan to ra’d saray problema ra tan nainawaan ira. Ontan so aanapen na dakel a totoo sano mimimisa ira, tan ontan so iyoopresi na saray simbaan. (2 Tim. 4:3, 4) Aliwan satan so gagala na ministeryo tayo. Say maong a balitan ipupulong tayo et, lapud panangaro nen Jehova, mabulos ton peperdonaen iray kasalanan panamegley nen Kristo. Kanian, makakaasingger tan makakapikareenan so totoo ed Dios. (Roma 5:10; 8:32) Ingen ta maganggano lan manampot so “makapalikliket a panaon.”

“Magmaliw Kayon Marlang ed Espiritu”

16. Antoy akatulong ed si Pablo pian makapanpakpel tan makapan-anos?

¹⁶ Panon tayo sirin a napaaligwas tan napansiansia so seseg tayo parad dugan panagdayew? Nayarin mabaing odino ag-itayo masmasel  tan nairapan tayon mitongtong odino mikaaro. Balet, maong no tandaan tayo a say inkaseseg et aglabat napatnagan ed kakikiwas, tan agmet itan akadepende ed personalidad tayo. Impaimano nen Pablo so nakaukolan sanen inkuan to’d saray kaagian to: “Magmaliw kayon marlang ed espiritu.” (Roma 12:11) Baleg so nitulong na espiritu nen Jehova pian makapanpakpel tan makapan-anos so apostol diad panagpulong. Manlapud samay impamili nen Jesus ed si Pablo anggad samay sampot ya inkipriso to ed Roma​—a masulok a 30 taon​—ag-angumay inkaseseg to. Sikatoy lawas nanilalo ed Dios, ya angiter ed sikato na biskeg panamegley na espiritu. “Ta diad amin a bengatla et ombibiskeg ak diad panamegley na samay mangiiter ed siak na pakayari,” so inkuan nen Pablo. (Fil. 4:13) Talagan nagunggonaan itayo ed ehemplo to!

17. Panon itayon ‘magmaliw a marlang ed espiritu’?

¹⁷ Say salitan impatalos a “marlang” et literal a mankabaliksan na “manlelwag.” (Kingdom Interlinear) Pian tuloytuloy ya onluag so danum, kaukolan a tuloytuloy met so apuy. Mipadpara, pian ‘marlang tayo ed espiritu,’ kaukolan ya tuloytuloy a walad sikatayo so espiritu na Dios. Pian ag-itan naandi ed sikatayo, kaukolan ti’n usaren so amin a probisyon nen Jehova a mamabiskeg ed espiritualidad tayo. Kabaliksan na satan a seryosoen tayo so panagdayew na pamilya tayo tan kongregasyon, salanti, regular ya panagaral bilang indibidual tan pamilya, panagpikasi, tan pipiaral. Satan so ontulong pian aliling to et agnaerep so “apuy” a pansiansiaen to tayon “manlelwag” odino “marlang ed espiritu.”​—Basaen so Gawa 4:20; 18:25.

18. Bilang dedikadon Kristiano, iner tayo isentro so imano tayo?

¹⁸ No say sakey a too et dedikadon manggawa ed kimey to, isentro toy imano to ed satan tan agbastabasta onsuko. Bilang dedikadon Kristiano, say gagala tayo et say panggawa ed amin a labay nen Jehova a gawaen tayo, a singa ginawa nen Jesus. (Heb. 10:7) Diad panaon tayo, linawa nen Jehova a makapikareenan ed sikato so dakel a totoo anggad posible. Sirin, bilang pangalig ed si Jesus tan Pablo, komon ta magmaliw itayon maseseg ed sayan sankaimportantian, on, sankaganatan a kimey natan.

Nanonotan Mo Ni?

• Anton kimey so inmatalek ed si Pablo tan ed arum nin alanaan a Kristiano?

• Panon ya inanamot na saray alanaan so “makapalikliket a panaon”?

• Panon a ‘magmaliw a marlang ed espiritu’ iray Kristianon ministro?

[Tepetepet Parad Panagaral]

[Litrato ed pahina 12]

Agbalot alingwanan nen Pablo imay agawa’d dalan ya paarap ed Damasco