Nabawbawi Yoy Sagpot Yo!

IMPORTANTE so panagdayew na pamilya tan panagaral ed Biblia pian napabaleg iray anak “diad panagdisiplina tan panamilin nen Jehova.” (Efe. 6:4) Balet no sakey kan ateng, antam ya mainomay ya onsawa iray ugugaw. Panon mon naalay atension da? Nia ay so ginawa na arum ya atateng.

“Sanen melag ni ray ananak mi,” so kuan nen George ya taga’d California, U.S.A., “nanggunaetan min sanasawa ya gawaen a makapainteres so panagaral na pamilya mi. No maminsan et manko-costume kami ya singa saray karakter ed Biblia, insan diad pambabasa mi’d My Book of Bible Stories et iyaakto mi so istorya. Manggagawa kami ni ingen na saray props, a singa saray espada, setro, baskit, tan arum ni. Manpapabitlaan kami met nipaakar ed saray karakter na Biblia tan nanggawa kami na Bible board game ya walaray tepet ton say arum et mainomay, say arum balet et medyo mairap. Tan walaray proyekto mi, singa say panggaway melag a biong, odino panggaway time line na saray ebento ed Biblia. No maminsan et ido-drowing mi ray karakter odino istorya ed Biblia. Natan say plaplanoen min i-drowing et say espiritual ya armas ya adeskribe ed Efeso 6:11-17, ya ipaliwawa na balang sakey ed sikami no antoy irerepresenta na kada parte. Akatulong irayan gagawaen mi pian makapaliket so panagaral na pamilya mi.”

Onia met so inkuan nen Debi, a sakey ya ina a taga’d Michigan, U.S.A.: “Naiirapan kami nen masiken ko ya sagyaten so interes na anak min bii sanen manga taloy taon to ni labat. Balet aminsan, legan kon ibabasa’d sikato so istorya di Isaac tan Rebeca diad My Book of Bible Stories, angala ak na duaran monyika tan kunwari et sikara imay karakter ed Biblia ya mantotongtong. Madengedengel so ugaw! Diad sinmusublay iran bulan, saraman ya monyika et inusar mi parad nanduruman karakter na Biblia. Kayari min basaen so sakey ya istorya, mananap so anak mi na saray gakgalaw odino arum ni ya nausar mi ed pangiyakto. Panlikliketan toy panaanap to! Say kahon na sapatos tan ambalangan ribbon et nausar mi pian aligen so abung nen Rahab ya walay akasabit ya ambalangan lubir. Say gakgalaw ton uleg ya 1.5 metros so karukey to et imputipot mi’d panis ya singa samay uleg ya gansa ya adeskribe’d Numeros 21:4-9. Inkarga mi irayan props diad baleg ya bag. Mabetbet ya onla’d salas so anak mi tan ditan to bukaiten so ‘Bible story bag’ to. Makapalikliket ta sarasarag ton iyakto iray istorya diad sarili ton paraan!”

Aliwan mainomay so mamabaleg na ananak. Kaukolan ya ipurek na atateng ed sikara so pilalek ya panlingkoray Jehova. Nepeg ya gawaen da itan diad inagew-agew tan diad nanduruman paraan. Balet, baleg so nitulong na sinimban panagdayew na pamilya tan panagaral ed Biblia pian nagawaan yo itan. Seguradon nabawbawi yoy sagpot yo!