Awaten so Espirituy Dios, Aliwan say Espirituy Mundo

“Inawat tayo so espiritu a nanlapud Dios, aliwan say espiritu na mundo, ta pian naamtaan tayoiray bengatla a mapangasin inter ed sikatayo na Dios.”​—1 COR. 2:12.

1, 2. (a) Akin et nibagan migeguerra iray tuan Kristiano? (b) Antoran tepet so konsideraen tayo?

SIKATAYO ran tuan Kristiano et migeguerra! Say kalaban tayo et mabisbiskeg, masilib, tan eksperto. Lapud talagan epektibo iray uusaren ton pakana, atalo to so dakdakel a totoo. Balet, agtayo komon ipapasen ya anggapoy kalaban-laban tayo. (Isa. 41:10) Walay proteksion tayo ya agnatanek tan agnasarag na kalaban.

² Aliwa ‘yan pisikal a pigeguerra, noagta espiritual. Say kalaban tayo et si Satanas a Diablo, tan say manunan armas to et “say espiritu na mundo.” (1 Cor. 2:12) Say manunan depensa tayo balet ed panangataki to et say espiritu na Dios. Pian manalo tayo ed sayan guerra tan mansiansian mabiskeg ed espiritual, kaukolan tayon kerewen so masanton espiritu na Dios tan ipatnag iray aspekto na bunga na satan ed bilay tayo. (Gal. 5:22, 23) Balet, anto ta so espiritu na mundo, tan panon itan a nagmaliw a maimpluensyan tuloy? Panon tayon amta no kasin naiimpluensyaan ti’ la na espirituy mundo? Tan antoy naaralan tayo ed impangawat nen Jesus na espirituy Dios tan impangipulisay to ed espirituy mundo?

Say Espiritu na Mundo​—Akin et Kasmak?

3. Anto so espiritu na mundo?

³ Say nanlapuan na espiritu na sayan mundo et si Satanas, say “manuley na mundo,” tan susumpaen na satan so masanton espiritu na Dios. (Juan 12:31; 14:30; 1 Juan 5:19) Saya so kasmak ya inklinasyon na mundo tan mabiskeg a mangiimpluensya ed totoo. Sayan puersa so mangokontrol ed totoo pian sumlangen so linawa tan gagala na Dios.

4, 5. Panon a kinmayat so espiritu ya isusugsog nen Satanas?

⁴ Panon a kinmayat iyan espiritu ya isusugsog nen Satanas? Unona, pinalikdo nen Satanas si Eva diad hardin na Eden. Kinombinse toy Eva ya magmaliw kunon mas maliket so bilay to no agmanpasakop ed Dios. (Gen. 3:13) Matilatila! (Juan 8:44) Insan inusar toy Eva pian tuksoey Adan ya agmanmatoor ed si Jehova. Lapud desisyon nen Adan, impatawir toy kasalanan ed katooan, kanian magmainomay tayoy naimpluensyaan na espiritu nen Satanas pian ag-ontulok.​—Basaen so Efeso 2:1-3.

⁵ Dakel met so inimpluensyaan nen Satanas ya anghel, a nagmaliw ya demonyo. (Apo. 12: 3, 4) Agawa itan ya impanrebelde ed Dios antis na Delap nen panaon nen Noe. Anisia iraman ya anghel a magmaliw ya mas maong ni kipapasen da no taynan day niasain ya betang da ed tawen pian penekey agsipor a pilalek da diad dalin. (Jud. 6) Natan, sarayan demonyo a nilukpos da lay toon laman da pian magmaliw lamet ya espiritu, et kaiba nen Satanas a “mamapalikdo ed interon mundo.” (Apo. 12:9) Makapaermen, maslak ed saray totoo et agda amtan iimpluensyaan ira na demonyo.​—2 Cor. 4:4.

Kasin Naiimpluensyaan Ka na Espirituy Mundo?

6. Panon itayo labat a naimpluensyaan na espirituy mundo?

⁶ Anggaman ag-amta na dakel no panon so pangiimpluensya nen Satanas, saray tuan Kristiano balet et aliwan ignorante ed saray pakana to. (2 Cor. 2:11) Diad tua, ag-itayo naimpluensyaan na espiritu na mundo likud no abuloyan tayo itan. Usisaen tayoy apatiran tepet a mangipanengneng no kasin say mangiimpluensya ed sikatayo et say espiritu na Dios odino na mundo.

7. Antoy sakey a paraan ya iyaarawi itayo nen Satanas ed si Jehova?

⁷ Antoy ipapanengneng na pipilien kon panagligliwaan nipaakar ed siak? (Basaen so Santiago 3:14-18.) Panseseetan nen Satanas ya iyarawi itayo ed Dios diad pangiingganyo ed sikatayon aroen so karamsakan odino inkabayolente. Amta na Diablo a kagula nen Jehova so siopaman a mangaaro ed karamsakan. (Sal. 11:5) Kanian pian sagyatey pilpilalek tayo, uusaren nen Satanas iray literatura, pelikula, musika, tan electronic games a mangilalagyat ed saray manggagalaw a kunwari et manggaway mabanday ya imoralidad tan karuksaan. Baliwala ed si Satanas no walay kabiangan na puso tayo a mangaaro ed maong, say importante ed sikato et walay kabiangan na satan a mangaaro ed mauges ya isusugsog to.​—Sal. 97:10.

8, 9. Antoray nepeg tayon itepet ed sarili tayo nipaakar ed panagligliwaan?

⁸ Diad biek a dapag, papakiwasen na espirituy Dios iramay mangaawat ed satan a magmaliw ya malinis, mareen, tan napno na panangasi. Maabig no tepetan tayoy sarili tayo: ‘Kasin papasesegen ak na saray pipilien kon panagligliwaan a nawalaan na maong iran kualidad?’ Say karunongan a manlalapud tagey et “agmansimpisimpitan.” Saray papaimpluensyaan ed espirituy Dios et agmangipupulong ed kalinisan tan kareenan insan da balet panliliketay maruksa tan imoral iran babantayan diad abung da.

⁹ Kakaukolanen nen Jehova a sikato labat so dayewen tayo. Si Satanas balet et kontento la’d anggan maminsan labat a pandayew ed sikato, a singa ed samay kinerew to’d si Jesus. (Luc. 4:7, 8) Tepetan tayoy sarili tayo: ‘Kasin say pipilien kon panagligliwaan et mamapakiwas ed siak a say Dios labat so dayewen ko? Kasin say pipilien ko et mamapairap odino mamapainomay ed siak a mangipulisay ed espirituy mundo? Kasin kaukolan kon umanen iray pilien ko?’

10, 11. (a) Anton panmoria so ipapaseseg na espirituy mundo nipaakar ed materyal a kaykayarian? (b) Anton panmoria so ipapaseseg na pinuyanan na espiritu a Salitay Dios?

¹⁰ Antoy panmoriak ed kayamanan? (Basaen so Lucas 18:24-30.) Isasagyat na espirituy mundo so “pilalek na mata” diad pangipapaseseg to’d agum tan materyalismo. (1 Juan 2:16) Papanisiaen itayo na satan ya espiritu a magmaliw itayon maligen no mantipon tayoy dakel a kayamanan. (Uli. 18:11) Abayuboan na dakel so pampirawat ya onyaman. (1 Tim. 6:9, 10) Balet, no inaro tayoy kuarta imbes a say Dios, analo la’d satan si Satanas. Tepetan tayoy sarili tayo: ‘Kasin manunaan ed bilay ko so pananap ed materyal a pakainawaan tan likeliket?’

¹¹ Diad pidumaan, papasesegen itayo na pinuyanan na espiritu a Salitay Dios a nawalaan na balansin panmoria ed kuarta tan  mankulin taryaan so pankaukolan tayo tan na pamilya tayo. (1 Tim. 5:8) Tutulongan na espiritu nen Jehova iramay angawat ed satan pian aligen so inkabunlok to. Kabkabat iratan bilang maiter, aliwan awat labat lan awat. Mas papablien da iray totoo nen say materyal a bengatla tan maliket dan tutulongan so arum unong ed pakasarag da. (Uli. 3:27, 28) Tan agdan balot papaulyanay panaglingkor ed Dios para labat ed pananap na kuarta.

12, 13. Midumaan ed espiritu na mundo, panon itayon naimpluensyaan na espirituy Dios a parad pankaabigan tayo?

¹² Anton espiritu so napatnagan ed inkatook? (Basaen so Colosas 3:8-10, 13.) Ipapaseseg na espirituy mundo iray gawa na laman. (Gal. 5:19-21) Say pakapatnagan no anton talaga so espiritun mangiimpluensya ed sikatayo et aliwan sano maong so situasyon, noag sano nasusubok itayo, a singa bilang sano walay kaagian ya ag-angimano, akaopendi, odino nankasalanan ni ingen ed sikatayo. Niarum ni, no wala tayo ed abung, nayarin napatnagan no anton espiritu so mangiimpluensya’d sikatayo. Pian nausisay sarili tayo, oniay itepet tayo: ‘Diad apalabas ya anem bulan, lalo kasin nagmaliw a singa si Kristo so personalidad ko odino apawil ko ‘may makapuy a kagagawak tan pananalitak?’

¹³ Natulongan itayo na espirituy Dios pian ‘lakseben so daan a personalidad pati saray kagagawa na satan’ tan isulong so “balon personalidad.” Ontulong itan ed sikatayo pian magmaliw a mas maaro tan mapangasi. Ontan met, mainomay tayoy mamerdona ed balang sakey, anggano walay makatunongan a sengegan na panreklamo. Tan no singa makapuy so ginawa na arum ed sikatayo, ag-itayo la ‘manem-em na sakit na linawa tan pasnok tan sanok tan paneeyagan tan makapasakit a salita.’ Imbes, pansagpotan tayoy magmaliw a “mapangasi.”​—Efe. 4:31, 32.

14. Antoy panmoria na dakel ed Salita na Dios?

¹⁴ Kasin rerespetoen tan papablien ko iray estandarte na Biblia nipaakar ed moral? (Basaen so Uliran 3:5, 6.) Kokontraen na espirituy mundo so Salita na Dios. Ibabaliwala na saray nampaimpluensya ed sayan espiritu iray kabiangan na Biblia ya ipapasen dan agpraktikal, a mas labay da ray tradisyon tan pilosopiya na too. (2 Tim. 4:3, 4) Saray arum ni ingen et sigpot dan imbaliwala so Salita na Dios. Tan kukuestionen na saratan so kaimportantian tan inkasusto na Biblia, ya ipapasen day inkasikara a makabat. Nileglemew day maptek ya estandarte na Biblia nipaakar ed pikakalugoran, homoseksualidad, tan diborsyo. Ibabangat da a say ‘mauges et maong, tan say maong et mauges.’ (Isa. 5:20) Kasin naimpluensyaan itayo la na sayan espiritu? Sano walaray problema tayo, kasin manmamatalek itayo ed kakabatan na too, pati ed saray dilin ideya tayo? Odino panseseetan tayon tumboken so simbawa na Biblia?

15. Imbes a mandepende ed dilin kakabatan, antoy nepeg tayon gawaen?

 ¹⁵ Papakiwasen itayo na espirituy Dios a respetoen so Biblia. Singa say salmista, ipapasen tayoy Salita na Dios ya silewan ed salisali tayo tan liwawa ed basbas tayo. (Sal. 119:105) Imbes a mandepende ed dilin kakabatan tayo, matalek itayon patutulongan ed Salita na Dios pian nibiig so duga tan aliwa. Agti’ labat rerespetoen so Biblia noagta papablien ti’ met so ganggan na Dios.​—Sal. 119:97.

Aligen so Ehemplo nen Jesus

16. Panon tayon naalig so “kanonotan nen Kristo”?

¹⁶ Pian naawat tayo so espiritu na Dios, kaukolan a panseetan tayon iparay kanonotan tayo ed “kanonotan nen Kristo.” (1 Cor. 2:16) ‘Naalig tayo so panagnonot nen Kristo Jesus’ no amtaen tayo itan pati say kakikiwas to. (Roma 15:5; 1 Ped. 2:21) Aralen tayo so pigaran paraan no panon tayon nagawaan itan.

17, 18. (a) Antoy naaralan tayo’d si Jesus nipaakar ed pikakasi? (b) Akin et nepeg a ‘mantultuloy tayon onkerew’?

¹⁷ Kerewen so espirituy Dios. Antis ya asubok si Jesus, impikasi ton sikatoy tulongan komon na espirituy Dios. (Luc. 22:40, 41) Kaukolan tayo met ya kerewen ed Dios so masanton espiritu to. Mabulos tan mabunlok ya iiter nen Jehova itan ed amin ya onkekerew ed sikato tekep na pananisia. (Luc. 11:13) Inkuan nen Jesus: “Mantultuloy kayon onkerew, tan naikdan kayo; mantultuloy kayon mananap, tan makaromog kayo; mantultuloy kayon ontoktok, tan nalukasan kayo. Ta balang sakey ya onkekerew et makaawat, tan balang sakey a manaanap et makaromog, tan balang sakey ya ontotoktok et nalukasan.”​—Mat. 7:7, 8.

¹⁸ Sano kekerewen tayo so espiritu tan tulong nen Jehova, agkomon maminpinsan labat ya ipikasi itan. Nayarin kaukolan ya gawaen tayo itan a mabetbet tan agmanaapura. No maminsan, antis ya ebatan nen Jehova iray pikakasi tayo, iikdan to itayo ni na pankanawnawan ipanengneng so inkasimoon na panagpaga tan kaaralem na pananisia tayo. *

19. Antoy lawas a ginawa nen Jesus, tan akin a sikatoy aligen tayo?

¹⁹ Sigpot a tuloken si Jehova. Lawas a ginawa nen Jesus so makapaliket ed Ama to. Aminsan, say ninonot ton paraan et duma ed no antoy linawa na Ama to. Balet, matalek ton inkuan ed Ama to: “Aliwan say linawak so nagawa, noag say linawam.” (Luc. 22:42) Tepetan mo pay sarilim: ‘Kasin uunoren koy Dios anggan sano mairap itan a gawaen?’ Importante so katutulok ed Dios. Kanepegan toy sigpot a katutulok tayo bilang Amalsa ed sikatayo, say Lapuan tan Mananustini ed bilay tayo. (Sal. 95:6, 7) Anggapoy kasandi na katutulok. No ag-itayo matulok, ag-itayo abobonan na Dios.

20. Anto so akasentroan na bilay nen Jesus, tan panon tayon naalig itan?

²⁰ Kabisadoen so Biblia. Sanen say pananisia nen Jesus et parungtalan ya inataki nen Satanas, impulisay to itan diad impangusar ed Kasulatan. (Luc. 4:1-13) Sanen inarap nen Jesus iray lider na relihyon ya onsusumpa ed sikato, inusar toy Salita na Dios bilang autoridad. (Mat. 15:3-6) Say interon bilay to et akasentro’d pangamta tan panumpal ed ganggan na Dios. (Mat. 5:17) Labay ti’ met a napano so kanonotan tayo na makapabiskeg-pananisian Salita na Dios. (Fil. 4:8, 9) Nayarin arum ed sikatayo et nairapan a mangipanaon na personal tan pampamilyan panagaral. Balet imbes ya isalet-salet labat itan ed eskedyul tayo, kaukolan ya iganaan tayo itan na panaon.​—Efe. 5:15-17.

21. Anton uksoyan so makatulong ed sikatayo pian lalon nakabisadoy Salita na Dios tan niyaplika itan?

 ²¹ Tinulongan itayo na “matoor tan makabat ya aripen” pian niganaan tayo na panaon so personal tan pampamilyan panagaral diad impangiyuksoy da na sinimban Panagdayew na Pamilya ed labi. (Mat. 24:45) Kasin aanamoten yo iyan uksoyan? Pian naalig yoy kanonotan nen Kristo, nayari kasin ilaktip yo ed panagaral so sistematikon pangonsidera ed saray apili yon imbangat nen Jesus? Nayari yon usaren so Indese na Tema Parad Say Panag-Bantayan pian naanap iray impormasyon a labay yon aralen. Alimbawa, nanengneng yo ditan so subject ya “Jesu-Kristo.” Ontan met, manlapud 2008 anggad 2010 ya publikon edisyon na sayan magasin, walaray serye na artikulon apauloan na “Ibangat Yo Iray Anak yo,” “Onapit ed Dios,” “Alig Yoy Pananisia Ra,” tan “Parad Saray Kalangweran.” Ompan labay yon usaren a sagpaminsan irayan artikulo diad Panagdayew na Pamilya yo.

Sarag Tayon Taloen so Mundo

22, 23. Antoy gawaen tayo pian natalo so mundo?

²² Pian nigiya na espirituy Dios, kaukolan tayon ipulisay so espiritu na mundo. Aliwa itan a mainomay. Nayarin kaukolan tayoy milaban na impasya. (Jud. 3) Balet sarag tayoy manalo! Inkuan nen Jesus ed saray disipulo to: “Diad mundo et walaan kayo na kairapan, balet manpakpel kayo! Tinalok so mundo.”​—Juan 16:33.

²³ Sarag tayo met a daegen so mundo no ipulisay tayoy espiritu na satan tan gawaen so anggaay nayarian tayo pian naawat so espirituy Dios. On, “no say Dios et walad dapag tayo, siopa so onsumpa ed sikatayo?” (Roma 8:31) No awaten tayoy espiritu na Dios tan tumboken so panangiwanwan na satan a walad Biblia, magmaliw itayon kontento, mareen, maliket, tan seguradon naawat tayoy bilay ya andi-anggaan diad balon mundo a magano lan onsabi.

[Paimano ed Leksab]

Nanonotan Mo Ni?

• Akin et kasmak so espiritu na mundo?

• Antoray apatiran tepet a nepeg tayon itepet ed sarili tayo?

• Antoray taloran bengatla a naaralan tayo’d si Jesus nipaakar ed pangawat ed espirituy Dios?

[Tepetepet Parad Panagaral]

[Litrato ed pahina 8]

Panon a nagmaliw a demonyo so arum ya anghel?

[Litrato ed pahina 10]

Uusaren nen Satanas so espirituy mundo pian kontroley totoo, balet makalukpos itayo ed impluensya na satan