No Panoy Pansiansian Matua ed Agmatuan Mundo

SINGA say dagem a susungapen tayo, say ag-inkamatua et walad amin a pasen. Saray totoo et mantitila, sobsobray panagsingil da, agmanbabayar na utang, tan ipapasirayew day inka-eksperto ran mansaol ed negosyo. Lapud oniay kipapasen, lanang a nasusubok so inkamatua tayo. Panon tayon nalabanay tendensian magmaliw ya agmatua? Pantongtongan tayo so taloran aspekton makatulong ed sikatayo: Say takot ed si Jehova, malinis a konsiensia, tan inkakontento.

Dugan Takot ed si Jehova

Insulat nen propeta Isaias: “Si Jehova so Ukom tayo, si Jehova so Manangiter na ganggan ed sikatayo, si Jehova so Ari tayo.” (Isa. 33:22, NW) No bidbiren tayo so posisyon nen Jehova, nawalaan tayoy takot ed sikato tan satan so mamakiwas ed sikatayon labanay ag-inkamatua. Oniay inkuan na Uliran 16:6: “Lapu ed takot ed Jehova saray totoo onarawi ra ed mauges.” Satan a takot et aliwan pankebbiew ed anggapoy panangasin Dios, noagta dugan panagpaga ya ompan napaermen so Ama tayon walad tawen ya interesadon maong ed pankaabigan tayo.​—1 Ped. 3:12.

Nia so sakey ya eksperiensya a mangipapanengneng ed maabig ya epekto na dugan takot. Si Ricardo tan say asawa ton si Fernanda et nan-withdraw na manga $700 (U.S.). * Tan basta labat itan inkarga nen Fernanda ed pitaka to ya agto la binilang. Balet kasabi’d abung, mankelaw ira ta singa ag-abawasan imay in-withdraw ra, anta binayaran da lay arum a babayaran da. Inisip dan “sobra amoy niiter na kaheray banko.” Nen unaan, natutukso ran agla ipawil so kuarta ta dakel ni ray babayaran da. Inkuan nen Ricardo: “Impikasi mi’d si Jehova ya napakiwas kami komon ya ipawil so kuarta. Pilalek min sikatoy napaliket ta saman so bilin to ed Uliran 27:11, kanian labay min ipawil itan.”

Konsiensian Impasal ed Biblia

Nipasal tayoy konsiensia tayo no aralen tayoy Biblia tan panggunaetan ya iyaplika itan. Diad ontan, ‘say salita na Dios a mabilay tan mabisbiskeg,’ so ontanek aliwan diad kanonotan tayo labat noagta diad kapusoan tayo met. Saya so mamakiwas ed sikatayon “manbilay a matua ed amin a bengatla.”​—Heb. 4:12; 13:18.

Imanoen pay agawa’d si João, ya akautang na manga $5,000 (U.S.). Imbatikan toy utang to tan inmalis ed sananey a baley. Balet kayari waloy taon, naaralan nen João so katuaan, tan sikatoy apakiwas na nipasal ed Biblian konsiensia to ya anapen so akautangan to pian manbayar! Melag labat so anap nen João tan kaukolan ton legpeten so asawa tan apatiran anak to, kanian inmabuloy so akautangan to ya pelagan to itan a binulan.

Pankontento

Insulat nen apostol Pablo: “Baleg a pakagunggonaan so maridios a debosyon daput no pasaragen tayo no antoy walad sikatayo. . . . No walay naakan tan ikawes tayo, mankontento tayo la ed saratan.” (1 Tim. 6:6-8) No ipapuso tayo iyan makabat a simbawa,  ag-itayo napatitan na maagum, kuestionable iran negosyo, odino agmakatunongan a biglan-yaman iran pakana. (Uli. 28:20) Ontulong met iyan simbawa pian niyuna tayoy Panarian na Dios, a matalek tayon iter to ray manunan pankaukolan tayo.​—Mat. 6:25-34.

Balet lapud ‘mapalikdo so pakayari na kaykayamanan,’ nepeg ya agtayon balot memelmelagey impluensya na agum. (Mat. 13:22) Nonoten pay agawa’d si Acan. Sikatoy sakey ed saray Israelitan mamilagro a binmaliw ed Ilog Jordan, ingen ta siansia nin adaeg na agum. Agto nilabanan so pilalek ya mantakew na pilak, balitok, tan mabmablin kawes manlapud saray samsam ed syudad na Jerico. Lapud satan et abalang toy bilay to. (Jos. 7:1, 20-26) Kampegan kalabas na pigaran siglo et impasakbay nen Jesus: “Manbantay kayo tan manalwar kayo ed amin a klase na panag-agum”!​—Luc. 12:15.

Magmaliw a Matua ed Trabaho

Imanoen tayo pa so pigaran situasyon a pakasubokay determinasyon tayon mansiansian matua ed amin a bengatla. Kaiba’d pagmaliw tayon matua so ‘agpantakew,’ anggano ontan so kagagawa na karaklan. (Tito 2:9, 10) Si Jurandir, ya mantratrabaho ed sakey ya ahensiay gobierno so mangirereport ed tuan agastos to’d impanbiahe to. Saray katrabaho to balet et sobsobray irereport da. Nagagawaan da ’tan ta kokonsintien ira na mismon boss da. Diad tua, nampasnokan ni ingen na satan a boss si Jurandir lapud inkamatua to tan agto la ibabaki’d saray business trip. Asabi panaon balet et kinuenta iray gastos na satan ya ahensia, tan akomendaay Jurandir lapud inkamatua to, tan a-promote ni ingen.

Si André so ingganggan na boss to ya doblien toy singilen ton service charge ed saray kustomer. Nampikasi iyan agi ed si Jehova pian makpel ton natumbok iray prinsipyo na Biblia. (Sal. 145:18-20) Sinali nen André ya ipaliwawa’d boss to no akin et agto sarag a gawaen itan, balet ta anggapo lanlamang so agawa. Kanian inmekal la’d satan a trabaho ya baleg so sueldo. Kayari manga sakey taon balet, sikatoy papapawilen na boss to tan angipaseguron agla sisingilen na sobsobra iray kustomer. Tan si André et a-promote bilang manedyer.

Manbayar na Utang

Oniay insimbawa nen apostol Pablo ed saray Kristiano: “Agkayo komon makautang ed siopaman na anggan sakey a bengatla.”  (Roma 13:8) Ompan ikatunongan tayon agtayo la manbayar na utang ta walaan to met ’may akautangan tayo tan agto kaukolay kuarta. Balet, ipapasakbay na Biblia: “Miuutang so toon mauges et agto babayaran.”​—Sal. 37:21, Maung a Balita.

Panon to balet no walay “ag-iilaloan a nagawa” ya sengegay agtayo pakabayar ed utang? (Ecl. 9:11, NW) Si Francisco et inmutang na manga $7,000 (U.S.) ed si Alfredo pian bayaray loan to. Balet lapud problema’d negosyo, agto abayaran so utang to ed nantongtongan dan petsa. Kanian sikatoy akitongtong ed si Alfredo tan nampaknaan dan pelagpelagan to la itan.

Agmanpapasikat

Nonoten pay mauges ya agawa ed si Ananias tan Safira, sanasawan kabiangan na inmunan siglo a Kristianon kongregasyon. Sanen inlako day uma ra, agda indonasyon so interon nanlakoan da ed saray apostol, balet imbaga ran inter dan amin itan. Labay dan ipasikat ed arum so baleg a donasyon da. Ingen ta diad impangipuyan na masanton espiritu na Dios, impaamta nen apostol Pedro so impantila ra, tan pinatey ira nen Jehova.​—Gawa 5:1-11.

Midumaan ed si Ananias tan Safira, saray nansulat na Biblia et matua tan prangka. Matuan inrekord nen Moises so insanok to a sengegay agto impakaloob ed Insipan a Dalin. (Num. 20:7-13) Ontan met, ag-inyamot nen Jonas iray kakapuyan to, ya apatnagan antis tan kayari impanpulong to ed Ninive. Imbes, insulat to iratan.​—Jon. 1:1-3; 4:1-3.

On, kaukolay pakpel pian nibagay tua, anggano nayarin walay kaukolan mon isakripisyo, a singa say agawa’d 14 años a si Nathalia diad eskuelaan. Naimano to’d test paper to ya tsinek na maestro to imay aliwan ebat to. Anggano amta ton talagan naapektoay grade to, impaimano to itan ed maestro to. Oniay inkuan to: “Ibabangat na atateng ko’d siak ya pian napaliket koy Jehova, nepeg a matua ak. No agko ‘man imbaga’d maestrok, seguradon nakonsiensia ak.” Nandinayewan a tuloy na maestro nen Nathalia so inkamatua to.

Inkamatua​—Kualidad a Mamapagalang ed si Jehova

Si Giselle, a mantaon na 17, et akarokdok na wallet ya walay karga to ran dokumento tan manga $35 (U.S.). Sikatoy kinmerew na tulong ed eskuelaan pian nipawil so wallet. Kayari sakey bulan, imbasa na vice-principal ed interon klase so sulat ya mangirarayew ed inkamatua nen Giselle tan mangokomenda ed pamilya to lapud maabig ya impangipasal tan relihyoson impamabaleg ed sikato. On, say “maabig iran gawa” to et amagalang ed si Jehova.​—Mat. 5:14-16.

Kaukolay pansagpot pian magmaliw a matua legan a manbibilay ed limog na totoon ‘maaro ed inkasikaran dili, maaro ed kuarta, mapaspasirayew, mapaatagey, tan aliwan matoor.’ (2 Tim. 3:2) Balet, say dugan takot ed si Jehova, impasal ed Biblia a konsiensia, tan pankontento so ontulong ed sikatayon mansiansian matua ed agmatuan mundo. Tan mas napaapit itayo ed si Jehova, a ‘matunong tan mangaaro ed katunongan.’​—Sal. 11:7.

[Paimano ed leksab]

[Saray litrato ed pahina 7]

Say dugan takot ed si Jehova so mamabiskeg ed determinasyon tayon magmaliw a matua

[Litrato ed pahina 8]

Mamapagalang ed si Jehova so inkamatua tayo