Sikayoran Kristianon Pamilya​—‘Mansiansian Akaparaan’

“Mansiansia kayon akaparaan, ta diad oras ya agyo iisipen et onsabi so Anak na too.”​—LUC. 12:40.

1, 2. Akin et nepeg tayon ipapusoy simbawa nen Jesus ya ‘mansiansian akaparaan’?

“SANO say Anak na too et onsabi ed gloria to” tan “pambibiiganen to iray totoo,” iner so pangipasenan tod sikayo tan say pamilya yo? (Mat. 25:31, 32) Lapud nagawa itan diad oras ya agtayo iilaloan, importante ya ipapuso tayoy simbawa nen Jesus a ‘mansiansian akaparaan’!​—Luc. 12:40.

² Naaralan ed inmunan artikulo ya natulongan a mansiansian aliing so interon pamilya no kada membro et magunaet a manggawa na betang to. Natan et aralen tayo ni arum a paraan ya makatulong itayod espiritualidad na pamilya tayo.

Pansiansiaen a “Simpli” so Mata Yo

3, 4. (a) Antoy nepeg a panalwaran na saray Kristianon pamilya? (b) Antoy kabaliksan na ‘simplin’ mata?

³ Pian lawas akaparaan iray pamilya ed isabi nen Kristo, kaukolan dan iyapasakey so imano rad tuan panagdayew. Nepeg iran manalwar pian ag-ira nisuawi. Dakel lay pamilyan apatitan na materyalismo, kanian kaukolan tayon imanoen imay imbaga nen Jesus nipaakar ed ‘simplin’ mata. (Basaen so Mateo  6:22, 23.) No panon a naliwawaan na lamparaan so basbas tayo pian ag-itayo napatir, say nenengnengen na piguratibon “mata na puso” tayo et onkana met a liwawa pian agtayo natiror ed espiritual.​—Efe. 1:18.

⁴ Pian malinew so pakanengneng na literal a mata, nepeg a dugay kondisyon to tan sarag toy manpokus ed samay nenengnengen to. Ontan met ed mata na puso tayo. No simpli so piguratibon mata tayo, saksakey a gagala so akapokusan tayo. Imbes ya say manunaan ed bilay tayo et materyal iran bengatla tan say pisikal labat a pankaukolan na pamilya, pansiasiansiaen tayon akapokus so mata tayo ed espiritual iran bengatla. (Mat. 6:33) Kabaliksan na saya a mankontento itayod saray materyal a probisyon nen Jehova tan iyuna tayod bilay tayo so panlingkor ed sikato.​—Heb. 13:5.

5. Panon ya impanengneng na kalangweran a bii ya say “mata” to et akapokus ed panlingkor ed Dios?

⁵ Talagan maong so resulta no nibangat iray ugugaw a pansiansiaen a simpli so mata ra! Imanoen pay alimbawa na tinedyer ya bii a tagad Etiopia. Ataragey so grado to kanian sanen nan-graduate ed haiskul et naopresiay scholarship parad kolehyo. Balet, lapud akapokus so mata tod panlingkor ed si Jehova, agto inawat so scholarship. Kayari na satan, sikatoy inopresian na trabahon say sueldoen to ed binulan et $4,200​—baleg itan no ikomparad kaslakan ya sueldo ed bansa ra. Balet say akapokusan na “mata” na sayan kalangweran et say pampayunir. Agto inawat itan a trabaho tan agto la kaukolan ya ipanon nid atateng to so pandesisyon to. Antoy reaksion na atateng to sanen naamtaan da itan? Imbaga rad sikato ya talagan malikeliket irad desisyon to!

6, 7. Anton peligro so nepeg a ‘panalwaran’ tayo?

⁶ Mapatnag a saramay imbaga nen Jesus ya nabasad Mateo 6:22, 23 et mamapasakbay sumpad inkaagum. Say inusar nen Jesus ya kabaliktaran na “simpli” et aliwan say salitan “komplikado,” noagta say terminon “mauges.” Samay Griegon salita ya nipatalos a “mauges” et nayarin mankabaliksan met na “maagum” odino “masamel.” Antoy panmoria nen Jehova ed inkaagum? Oniay inkuan na Biblia: “Say pilalawanan tan amin a klase na karutakan odino inkaagum et agkomon anggan nabitla ed limog yo.”​—Efe. 5:3.

⁷ Say inkaagum et nayarin mainomay tayon naimanod arum a too, balet ta mairap tayon naimano ed sarili tayo. Kanian maabig no tumboken tayo imay simbawa nen Jesus: “Manbantay kayo tan manalwar kayo ed amin a klase na panag-agum.” (Luc. 12:15) Pian nagawaan tayo itan, kaukolan ya usisaey sarili tayo pian nanengneng no antoray pilpilalek tayo. Nepeg ya nonoten a maong na saray Kristianon pamilya so nipaakar ed panaon tan kuartan uusaren da parad panagligliwaan, panagpasyar, tan panagsaliw na materyal iran bengatla.

8. Antoy nepeg a ‘panalwaran’ tayo no nipaakar ed panagsaliw?

⁸ Antis kan mangaliw na sakey a bengatla, say nonoten mo et aliwa labat a no kasin walay pakasarag mon saliwen itan odino anggapo. Ikonsideram met irayan bengatla: ‘Wala tay panaon kon usaren tan mintinaen itan? Kaunongan karakel so panaon a nakaukolan pian naaralan kon usaren itan?’ Sikayoran kalangweran, agyo papanisiaan so amin ya advertisement nipaakar ed saray sasaliwen, ya mangi-ingganyo ed sikayon mangaliw na ankabli ran kawes odino arum nin bengatla a kabkabat so tatak da. Kontrol yoy sarili yo. Tan nonot yo met no kasin say pangaliw yo ed sakey a bengatla et ontulong pian mansiansian akaparaan so pamilya yo. Panmatalkan yo iyan sipan nen Jehova: “Agta kan balot taynanan tan agta kan balot paulyanan.”​—Heb. 13:5.

Dampoten Iray Espiritual a Kalat

9. Antoy resulta no dadampoten na pamilya iray espiritual a kalat da?

⁹ Say sananey nin paraan pian saray membro na pamilya et napabiskeg day pananisia ra  tan makatulong irad espiritualidad na pamilya et no walaan iray espiritual a kalat tan panggunaetan dan dampoten iratan. Satan so ontulong ed sikaran nanengneng no anto la ray nagagawaan da ed panaglingkor dad si Jehova tan nausisa da no antoray aktibidad ya nepeg dan iyuna.​—Basaen so Filipos 1:10.

10, 11. Bilang pamilya, antoran kalat ed espiritual so panggugunaetan yon dampoten, tan anto ni ran kalat so labay yo nin nadampot diad arapen?

¹⁰ Anggan saray angkekelag a kalat ya realistikon nadampot na kada membro et talagan makagunggona. Usaren tayo pan alimbawa so pantotongtong na pamilya nipaakar ed inagew-agew a teksto. Say komento na kada membro et ontulong ed ulo na pamilya pian natebek toy kabiskeg na espiritualidad da. Ontan met, no regular a basaen na pamilya so Biblia a sankakaiba, ontulong itan pian napaaligwas na ananak so panagbasa ra tan mas natalosan da so mensahe na Biblia. (Sal. 1:1, 2) Agta nepeg met ya gawaen tayon kalat so pamaaligwas ed kalidad na pikakasi tayo? Marakep met ya kalat so pamayubo nin nagkalalo ed saray aspekto na bunga na espiritu. (Gal. 5:22, 23) Tan agta maabig no manggawa tayoy paraan pian nipanengneng so pililikna ed totoon napupulongan tayo? No pansagpotan yon gawaen itan bilang pamilya, natulongan iray ugugaw ya magmaliw a maabagey, tan lapud satan et mas pilaleken day manlingkor bilang regular payunir odino misionero.

¹¹ Nonot yo ray pigaran kalat a sarag ya dampoten na pamilya yo. Anto kasi no bilang pamilya et gawaen yon kalat so pangusar na mas dakel a panaon diad ministeryo? Sarag yo kasin pankimeyan so makpel ya pampulong panamegley na telepono, street witnessing,  odino diad saray lugar na negosyo? Nayarian yo kasi ontulong diad saray lugar ya mas dakel so pankaukolan parad manangipalapag na Panarian? Wala kasi anggan sakey a membro na pamilya yo a makapanaral na sananey a lenguahe pian nipulong so maong a balita ed saramay dumay nasyonalidad da?

12. Antoy gawaen na saray ulo na pamilya pian natulongan day pamilya ran onaligwas ed espiritual?

¹² Bilang ulo na pamilya, ikonsidera yo ray paraan ya onaligwas so pamilya yo diad espiritual. Posible itan no walaray espisipikon kalat yo. Nepeg a saratan a kalat et realistiko tan sarag yon dampoten unong ed kipapasen tan abilidad yo. (Uli. 13:12) Siempre, say pandampot ed makanan kalat et mankaukolan na panaon. Kanian, “saliwen [yoy] panaon” ya uusaren yo ed panagbantay na TV tan usaren itan parad espiritual iran bengatla. (Efe. 5:15, 16, ftn.) Pampelengan yon dampoten iray kalat na pamilya yo. (Gal. 6:9) Say pamilyan manggugunaet a mandampot ed espiritual iran kalat da et ‘nipanengneng day iyaaligwas da ed amin a totoo.’​—1 Tim. 4:15.

Seguroen a Regular so Panagdayew na Pamilya Yo

13. Antoy inuman ed sinimban eskedyul na aral, tan antoran tepet so nepeg tayon isipen?

¹³ Say sakey ya alay abig a tulong pian ‘makapansiansian akaparaan’ iray pamilya parad isabi na Anak na too et say baleg ya pananguman ed sinimban eskedyul na aral nanlapu la nen Enero 1, 2009. Anggapo lay biig ya eskedyul parad CBS ta intekep la itan ed Teokratikon Eskuelaan Parad Ministeryo tan Pantitipon Parad Panagserbi. Ginawa iyan pananguman pian niyeskedyul na saray Kristianon pamilya so sakey a labi kada simba parad panagdayew na pamilya ra, a mamabiskeg ed espiritualidad da. Natan ta linmabas lay pigaran taon nanlapu lad inggapo na satan a pananguman, tepetan pay inkasikatayo: ‘Kasin aanamoten ko itan a panaon parad Panagdayew na Pamilya odino parad personal a panagaral? Talaga kasin nagugunggonaan ak ed gagala na satan ya uksoyan?’

14. (a) Antoy manunan gagala na regular a Panagdayew na Pamilya odino personal a panagaral? (b) Akin et importante so pangiganay sakey a labi parad panagaral?

¹⁴ Say manunan gagala na regular ya Panagdayew na Pamilya odino personal a panagaral et say lalon iyapit ed Dios. (Sant. 4:8) No regular itayon mangigagana na panaon diad panaral na Biblia tan onaaligwas so pikakabat tayo ed Amalsa, onelet so relasyon tayo ed sikato. Legan a mas onaapit tayod si Jehova, ditan met lalon ombiskeg so pilalek tayon sikatoy aroen diad ‘interon puso, interon kamarerwa, interon nonot, tan interon biskeg tayo.’ (Mar. 12:30) Lapud satan et mas magunaet tayon tuloken tan aligen so Dios. (Efe. 5:1) No ontan sirin, say regular a Panagdayew na Pamilya et importante pian natulongan so amin a membro a ‘mansiansian akaparaan’ legan tayon aalagaren so “baleg a kairapan.” (Mat. 24:21) Kaukolan itan pian nilaban itayo.

15. Antoy epekto na Panagdayew na Pamilya diad ulopan na kada membroy pamilya?

¹⁵ Wala ni sananey a gagala na Panagdayew na Pamilya​—ontulong iya pian saray membro na pamilya et onapit ed sakey tan sakey. Sano say interon pamilya et mangigana na panaon kada simba pian pantongtongan iray espiritual a bengatla, baleg so epekto na satan ed ulopan da. Onapit so liknaan na sanasawa ed sakey tan sakey sano ibabalikas day liket da ed saray nanaaralan da! (Basaen so Eclesiastes 4:12.) No saray atateng tan ananak et saniban mandadayew ed si Jehova, mankakasakey ira lapud aro, ta satan so “ayadyarin bedber na pankakasakey.”​—Col. 3:14.

16. Isalaysay no panon ya agunggonaan so taloran agagin bibii lapud impangigana ray sakey a labi parad panagaral na Biblia.

¹⁶ Ikonsidera tayo pa no panon ya agunggonaan so taloran maedad lan agagin bibii lapud impangigana ray sakey a labi parad panagaral na Biblia. Aliwan sankakanayon irayan  abalon agagi, ingen saksakey a syudad so kawalaan da tan abayag met la ran sankakaaro. Labay dan mas nakaiba so sakey tan sakey, balet ta aliwa labat ya pian makapantutuyaw ira noagta nagunggonaan met ira komon ed espiritual. Kanian angiyeskedyul iray sakey a labi pian sankakaiban manaral na Biblia. Inggapo dan inaral so libron “Bearing Thorough Witness” About God’s Kingdom. Oniay imbaga na sakey ed sikara: “Talagan panliliketan mi panaaral mi, kanian mabetbet ya onsusulok ed sakey oras. Iimadyinen mi iramay situasyon ya asagmak na saray Kristiano nen inmunan siglo tan pantotongtongan mi no antoy gawaen mi no sikamin mismo so makasagmak ed saratan. Insan mi iisipen no panon min iyaplika diad ministeryo iray nanaaralan mi. Lapud satan et mas maliket tan mabunga so panagpulong tan panangiyaral mi na Biblia.” Likud ed imbiskeg na espiritualidad na sarayan agagi, mas inmelet ni ingen so pankakaaro da. “Pabpablien mi iyan uksoyan,” so kuan da.

17. Antoray makatulong pian makagunggona so Panagdayew na Pamilya?

¹⁷ Sikayo ey? Kasin nagugunggonaan kayo ed inggana yon labi parad panagdayew na pamilya odino personal a panagaral? No aliwan regular so panagaral yo, agkayo sigpot a nagunggonaan ed gagala na sayan uksoyan. Nepeg ya diad inyeskedyul yon oras et akaparaan la so kada membro na pamilya. Agyo aabuloyan a say inggana yon labi et samsamen odino abalaen na agtanton importante iran bengatla. Ontan met, kaukolan ya say pilien yon aralen et amay praktikal ed pamilya yo. Antoy nagawaan yo pian maliket so panaral yo? Kaukolan ya epektibo so paraan na panagbangat yo, tan pansiansia yon mapagalang tan mareen so panagaral.​—Sant. 3:18. *

‘Mansiansian Aliing’ tan ‘Mansiansian Akaparaan’

18, 19. Antoy nepeg ya epekto ed sika tan ed pamilyam na pakaamtan asingsingger la so isabi na Anak na too?

¹⁸ Say onuuges lan onuuges ya kipapasen na mundo et pakapatnagan a nanlapu lad 1914 et wala lad kaunoran iran agew so marelmeng a mundo nen Satanas. Sankanengneng tayo la ray tanda ya asingsingger lay Armagedon. Agla manbayag et onsabi lay Anak na too pian ipasabi so panangukom nen Jehova ed saray mauges. (Sal. 37:10; Uli. 2:21, 22) Agta say pakaamta ed satan et nepeg a mamakiwas ed sika tan ed pamilyam?

¹⁹ Uunoren mo kasi simbawa nen Jesus a pansiansiaen a “simpli” so matam? Diad sayan mundo, say pilalek na totoo et magmaliw a mayaman, sikat, tan nawalaan na autoridad, balet kasin espiritual iran bengatla so panggugunaetan a dampoten na pamilyam? Kasin say uksoyan na Panagdayew na Pamilya odino personal a panagaral et walaan na epekto ed sika? Talaga kasin nagugunggonaan ka ed gagala na satan ya uksoyan? Singa naaralan ed inmunan artikulo, kasin susumpalen moy Makasulatan a responsabilidad mo bilang asawan laki, asawan bii, odino anak, diad ontan et ‘mansiansian aliing’ so interon pamilya? (1 Tes. 5:6) No on so ebat yo ed sarayan tepet, ‘makapansiansia kayon akaparaan’ parad isabi na Anak na too.

[Paimano ed leksab]

Antoy Naaralan Mo?

• Ipaliwawa no panon a ‘makapansiansian akaparaan’ iray Kristianon pamilya no walaan ira na. . .

‘simplin’ mata.

espiritual iran kalat tan dampoten da iratan.

regular a Panagdayew na Pamilya.

[Tepetepet Parad Panagaral]

[Litrato ed pahina 13]

Nipulisay tayo ray pakaabalaan ed mundo no “simpli” so mata tayo