On, Panaralan ya Edisyon Iya!

Pian mas marakep tan mas makatulong ed panaral yod mablin Salita na katuaan nen Jehova, inuman so itsura na panaralan ya edisyon.​—Sal. 1:2; 119:97.

Apat taon lan ipapalapag so duaran edisyon na Say Panag-bantayan, sakey parad publiko tan sakey parad sikatayon amin a Tasi nen Jehova tan saray progresibon iyaaralan na Biblia.

Oniay insulat na abayag lan lingkor nen Jehova nipaakar ed panaralan ya edisyon: “Alay abig tan makatenyeg na liknaan​—satan so nibagak ed inmunan panaralan ya edisyon na Say Panag-bantayan. Say paraan na inkipresenta na aralem iran katuaan ed Biblia et asabi toy pusok. Misalsalamat ak ed sayan alay abig a balon probisyon.” Onia so insulat na sakey nin brother: “Pitalaran ko lay pangusar na dakel ya oras a panaral ed sayan edisyon ya usarey Bibliak.” Komon ta ontan met so liknaan yo.

Manlapu lad 1879 ya anggad natan et nipapalapag so Say Panag-bantayan. Anggaman aliwan mainomay, agawaan iya lapud espiritu tan panamendisyon nen Jehova. (Zac. 4:6) Legan na sarayan 133 a taon, aminpiga lan nauman so apis na sayan magasin. Parad 2012, diad apis na kada panaralan ya edisyon et walay makolor a drawing na eksena ed panagpulong, ipanonot na saya ed sikatayo so inter nen Jehova a kimey tayon sigpot a mantasi nipaakar ed Panarian to. (Gawa 28:23) Diad pahina 2, nanengneng tayoy litraton angibasiyan na drawing tan walay antikey ya deskripsion nipaakar ed satan tan no iner itan. Legan na sayan taon, nipanonot ed sikatayon amin ya saray totoo nen Jehova et mangipupulong na maong a balita diad “interon dalin.”​—Mat. 24:14.

Anto ni ray inuman ed sayan magasin? Say kahon parad repaso et inyalis lad gapo na kada panaralan ya artikulo. Ipabitar na saya iray manunan punto ya talaranan yo legan yon babasaen tan aaralen so artikulo. Siempre, usaren ni na saray manangikondukta na Panagaral na Panag-bantayan irayan tepet pian rebyuen so artikulo kayari na panagaral. Naimano yon saray pahina tan numero na parapo et mas angkabaleg.

Singa nipaliwawa ed sayan isyu, say “Inalad Daan Iran Koleksion Mi” et balon artikulo a niarum pian nipanengneng iray importantin agawa ed awaran na saray Tasi nen Jehova diad modernon panaon. Tunggal paminsan et walaray nabasan tuan-agawan eksperiensya diad artikulon “Mabulbulos Dan Inyapay so Inkasikara.” Dia et mabilabilay a nisalaysay so liket tan inkapnek na saray agagi diad impanlingkor dad saray lugar a walay baleg a pankaukolan parad saray manangiyabawag na Panarian.

Komon ta talagan panliketan yoy panaral yod Salita na Dios diad tulong na sayan magasin.

Saray Manangipalapag

[Litrato ed pahina 3]

1879

[Litrato ed pahina 3]

1895

[Litrato ed pahina 3]

1931

[Litrato ed pahina 3]

1950

[Litrato ed pahina 3]

1974

[Litrato ed pahina 3]

2008