Tepetepet na Saray Manbabasa

Kasin say alablabas tan niyugalin panagbantay na pornograpiya et pakadispelosipan na sakey a Kristiano?

▪ On, nayari. Kanian kakkaukolan a paliisan tayoy amin a klase na pornograpiya a walad saray libro, magasin, pelikula, video tan Internet.

Kasmak ed interon mundo so pornograpiya. Mas dinmakel so bilang na saray manbabantay ed saya lapud mainomay itan a naromog ed Internet. Wala ray agda ginagalan makanengneng na pornograpiko iran Web site. Balet, gagagalaen na arum so pananap ed saraya. Mainomay dan gawaen iya ta wala rad abung da odino diad opisina ya anggapoy makanengneng ed sikara. Akin ya seryoso iyan bengatla parad saray Kristiano?

Say manunan rason et naromog ed pasakbay nen Jesus: “Siopaman a naynay ya onlilinggis ed sakey a bii tekep na pampilpilalek ed sikato et akikalugoran la ed sikato dia ed puso to.” (Mat. 5:28) Tua, say normal a seksual a relasyon et manepeg labat tan lapuan na liket parad sanasawa. (Uli. 5:15-19; 1 Cor. 7:2-5) Balet aliwan satan so tutukoyen na pornograpiya. Lalanoren toy agmanepeg iran seksual ya relasyon a managyat ed imoral a pilalek, a lapud satan et pinasakbayan itayo nen Jesus. Mapatnag sirin a say pambasa o pambantay ed pornograpiya et sumlang ed ganggan na Dios  ya: “Patey yo iray kabiangan na laman yo a walad dalin nipaakar ed pilalawanan, karutakan, kagletan ed sekso, makapasakit a pilalek, tan inkaagum, a saya et idolatriya.”​—Col. 3:5.

Panon to no aminsan odino amidua labat a nambantay na pornograpiya so sakey a Kristiano? Niyaliling so delikadon kipapasen tod si salmistan Asap. Oniay inkuan to: “No nipaakar ed siak, saray salisalik ngalngali a sinmipa lawari; saray kundang ko asingsingger lawari a kinmaruskos.” Kasin makapikareenan ed Dios tan nawalaay malinis a konsiensia so sakey a Kristiano no manbabantay na mabanday iran litrato na bibii tan lalaki, odino na sankaparehan manggagaway pilalawanan? Anggan si Asap et agonigon, inkuanto: “Dia ed amin a dukey na agew asalotan ak, tan adusa ak a kinabuasan.”​—Sal. 73:2, 14.

Kaukolan a namoria na Kristianon manbabantay na pornograpiya ya apektoen na satan so relasyon tod si Jehova tan kaukolan toy onkerew na tulong. Nagamoran to iya diad kongregasyon: “No bilang ta ag-amta na sakey a too ya aliwa la manaya so aarapen to, sikayoran walaan na espiritual iran kualipikasyon so manggunaet a mangipetek ed sikato tekep na inkaulimek, legan a babantayan moy inkasikan dili.” (Gal. 6:1) Sikatoy tulongan na sakey odino duaran elder. Manpikasi ira parad sikato tan matalek iran ‘paabigen nen Jehova so mansasakit’ tan saray kasalanan to et “naperdona.” (Sant. 5:13-15) Saramay kinmerew na tulong pian naekal so hilig dan manbantay na pornograpiya et amoria dan say iyapit ed Dios et maong ed sikara, a singa apaneknekan met nen Asap.​—Sal. 73:28.

Balet unong ed si apostol Pablo, wala ray nankasalan ya agnagbabawi “ed gagawaen dan karutakan tan pilalawanan tan anggapoy-baing a kagagawa.” * (2 Cor. 12:21) Nipaakar ed Griegon salitan impatalos ya “karutakan,” insulat nen Professor Marvin R. Vincent a saya et nayarin mankabaliksay “makapadimlan klase na karutakan.” Makapaermen ta aliwa labat lan mabanday iran litrato odino sankaparehan manggaway pilalawanan so karga na arum a pornograpiya. Wala ni ray makapadimla tan marutak a klase na pornograpiya a singa say homoseksualidad (pansekso na parehon laki odino bii), group sex, bestiality (pisekso ed ayep), child pornography, gang rape, maabuson panangusar ed bibii, pangitaker legan a mansesekso, odino sadistan panagpairap. Wala ray totoo ed panaon nen Pablo ya “ambilbilunget so kanonotan da” tan “inlebleb day inkasikara ed anggapoy-baing a kagagawa pian gawaen so amin a klase na karutakan ya ag-iran balot napepenek.”​—Efe. 4:18, 19.

Sinalambit met nen Pablo so “karutakan” diad Galacia 5:19. Inkuan na sakey a Britanon iskolar a say “manunan [tutukoyen] na saya et amin a klase na agnatural a pilalek.” Siopad sikatayo so agmipakna ya saramay abitlan makapadimla tan mabanday ya klase na pornograpiya et “agnatural a pilalek”? Inkuan nen Pablo diad Galacia 5:19-21 ya “saramay manggagawa” na sarayan karutakan et “agda natawir so panarian na Dios.” Kanian no niyugali la na sakey so pambantay na makapadimla tan mabanday a pornograpiya, nayarin diad andukey lan panaon, tan agmagbabawi, sikatoy ekalen ed Kristianon kongregasyon. Nepeg a sikatoy nadispelosip pian naprotektaan tan mansiansian malinis so kongregasyon.​—1 Cor. 5:5, 11.

Makapaliket ta arum ed saray datin manbabantay na makapadimla iran klase na pornograpiya et inmasingger ed saray elder tan angawat na kaukolan iran espiritual a tulong pian makapanguman. Oniay impaseseg nen Jesus ed saray Kristiano diad Sardis nensaman: ‘Pabiskeg yo iray atilak ni a magano lan ompatey, nonot yon naynay no panon so impakaawat yo tan no panon so impakadngel yo, tan itultuloy yon sumpalen itan, tan magbabawi kayo. Segurado a no agkayo onliing, agyon balot naamtaan no anton oras so isabik.’ (Apo. 3:2, 3) Kanian sarag na sakey so magbabawi tan nasingkat manlapud apoy, a singa panangibaga.​—Jud. 22, 23.

Balet, talagan mas maabig no desidido tayon amin ya agla salien so iyasingger ed ontan a delikadon kipapasen. On, nepeg a determinado tayon paliisay amin a klase na pornograpiya!

[Paimano ed leksab]

[Blurb ed pahina 30]

Kaukolan a namoria na Kristianon manbabantay na pornograpiya ya apektoen na satan so relasyon tod si Jehova tan kaukolan toy onkerew na tulong