Kasin Nanonotan Yo?

Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Panon ya si Solomon et onkanan pasakbay ed sikatayo?

Benendisyonan tan inusar na Dios si Arin Solomon. Balet legay panuuley to, agto intultuloy ya inunor iray simbawa na Dios. Inasawa toy paganon anak nen Faraon, angasaway dakdakel, tan inabuloyan to ray paganon asawa to ya sikatoy kalkalna dan impluensyaan ed palson panagdayew. Agtayo aabuloyan ya kalkalna itayon nawalaay makapuy a panagnonot tan awawey. (Deu. 7:1-4; 17:17; 1 Ara. 11:4-8)​—12/15, pahina 10-12.

Akin a nibaga tayon si Sara et matulok ed Dios tan pinabpablin asawa?

Nen ingganggan na Dios a taynan nen Abraham so Ur, labay ton ibaga et taynan da met iray kakanayon, kakaaro, tan panagbilay diman, ya agda amta no iner so laen da. Balet ta akikoopera si Sara tan nanmatalek ya sikatoy bendisyonan na Dios. Nirespeto toy Abraham, balibali ran ugali so impanengneng to.​—1/1, pahina 8.

Akin ya kinerew na Dios ed si Abraham ya ibagat toy anak to?

Importantin tandaan ya diad tua et ag-inyabuloy na Dios ya ibagat nen Abraham si Isaac. Diad satan et impanengneng to labat no panon kabaleg a sakripisyo parad sikato so pangibagat ed Anak to, si Jesus.​—1/1, pahina 23.

Antoy mangipanengneng ya manlapud unonan siglo a manpatuloy et walan wala ray tuan alanaan a Kristiano diad dalin?

Diad parabolo nen Jesus nipaakar ed “trigo” tan “sisanyas,” say tutukoyen na “maong a bini” et “ananak na panarian.” (Mat. 13:24-30, 38) Bansag ya ontubo iray trigo tan sisanyas anggad panag-ani. Kanian, anggaman agtayo nibaga no siopa ray talagan kabiangan ed saray trigo, seguradon walan wala ra anggad sayan panaon tayo.​—1/15, pahina 7.

Anto ray nagawa ya panggapoay Armagedon?

Ideklara na saray nasyon so “Kareenan tan kaligenan!” (1 Tes. 5:3) Lusoben na saray gobierno so palson relihyon. (Apo. 17:15-18) Atakien iray tuan managdayew. Insan onsabi anggaan.​—2/1-E, pahina 9.

Anto ray nagawaan tayo pian nalabanan so tendensian onibeg?

Nia ray nayarin makatulong ed sikatayo: Pansagpotan ya aralen ya aroen tan pablien iray agagi, milimog ed saray lingkor na Dios, panggunaetan so panggaway maong, ‘miliket ed saray manliliket.’ (Roma 12:15)​—2/15, pahina 16-17.

Siopa ray mansasalita na lenguahen Nahuatl tan antoy gagawaen parad sikara?

Satan so lenguahe na saray Aztec nensaman, tan siansia nin uusaren na saray 1.5 milyon ya totoo ed Mexico. Saray Tasi et manpupulong ed lenguahen Nahuatl, tan arum ed saray literatura tayo et nabasa ed satan a lenguahe.​—3/1-E, pahina 13-14.

Sano mangiiter na simbawa, anto ran prinsipyo so nepeg tayon nonoten?

Amtaen no anton talagay situasyon. Agbastabasta manisimbawa. Mapaabeban iyaplikay Salita na Dios. No posible, usaren so theocratic library. Ag-idedesisyonay arum.​—3/15, pahina 7-9.

Pinaseseg nen Jesus iray ondedengel ed sikato ya mila ed duaran milya. (Mat. 5:41) Antoy labay ton ibaga?

Diad saman, saray Romanon nansakop ed Israel et nayarin pasooten day sakey a toon mankimey. Nen imbaga nen Jesus ed saray ondedengel ed sikato ya mila ed duaran milya, labay ton ibaga et gawaen dan anggapoy sakit na linawa iray kimey ya makatunongan ya ipapagawad sikara na saray manuuley.​—4/1, pahina 9.