Unong ed Salaysay nen Leonard Smith

Nen tinedyer ak ni, walay duaran tekstod Biblia ya agusgustoan ko. Natan et 70 taon lay linmabas, balet nanonotan ko ni nen atalosan kon maong no antoy labay ya ibaga na Zacarias 8:23. Abitla diman so “samploran lalaki” ya ompepeket ed ‘kawes na Judio.’ Ibabaga da ed samay Judio: “Mila kami naani ed sikayo, ta sikami nadngelan mi a say Dios wala ed sikayo.”

ISISIMBOLO na samay Judio iray alanaan a Kristiano, tan say “samploran lalaki” et saray ‘arum a karnero,’ odino “saray Jonadab,” a tawag ed sikara nensaman. * (Juan 10:16) Nen atalosan ko itan a katuaan, amoriak ya say pambilay kon andi-angga diad dalin et akadepende ed matoor ya pansuportak ed alanaan a klase.

Ontan met, samay ilustrasyon nen Jesus nipaakar ed “saray karnero” tan “saray kanding” a nabasad Mateo 25:31-46 et tinmanetanek ed pusok. Isisimbolo na “saray karnero” iramay naabobonan diad panaon na anggaan lapud manggagawa ray maong ed saray alanaan ya agagi nen Kristo ya wala nid dalin. Bilang ugaw nin Jonadab, kuankod sarilik, ‘Len, no labay mon ipasen ka nen Kristo a karnero, suportaan mo ray alanaan ya agagi to, bidbir moy panangidaulo da ta say Dios wala ed sikara.’ Satan so angigiyad siak diad loob na masulok lan pitoran dekada.

‘ANTOY BETANG KO EY?’

Abautismoan si nanay ko nen 1925 diad meeting hall ed Bethel. Tinawag da itan ya London Tabernacle, tan satan so uusaren na agagi ed saman a pasen. Niyanak ak nen Oktubre 15, 1926. Nen Marso 1940, nampabautismo ak ed asemblea diad Dover, asingger ed dayat na England. Naaralan ko ya pablien so katuaan a walad Biblia. Lapud si Nanay et alanaan a Kristiano, say sankaunaan a ‘kawes na Judio’ ya simbolikon pineketan ko et diad sikato. Diad saman, say tatay ko tan atsik et agmandadayew ed si Jehova. Kabiangan kami nen nanay ko ed Gillingham Congregation diad southeast England, ya maslak diman et alanaan. Maong ya alimbawa si Nanay lapud seseg tod panagpulong.

Nen Setyembre 1941, diad kombension ed syudad na Leicester, nipaliwawa diad teman “Katooran” so isyu na inkasoberano ed interon uniberso. Tinmulong itan ya paliwawa pian natalosan ko ya nalalanor itayod isyu ed baetan nen Jehova tan Satanas. Kanian kaukolan tayoy ondapag ed si Jehova tan pansiansiaen tayoy katooran ed sikato bilang say Soberano ed Uniberso.

Diad saman a kombension, nidanedanet so panagpayunir, tan pinaseseg iray kalangweran ya gawaen dan kalat itan. Lapud samay paliwawan “Say  Betang na Saray Payunir ed Organisasyon,” naisip kon, ‘Antoy betang ko ey?’ Akombinse ak ed satan a kombension ya responsabilidad ko bilang sakey ya Jonadab so ontulong ed alanaan a klase diad panagpulong a kimey ed anggaay nayarian ko. Kanian diman mismo ed Leicester, nan-apply ak ya payunir.

IMPANPAYUNIR LEGAY GUERRA

Nen Disyembre 1, 1941, sanen 15 años ko, niasain ak bilang espisyal payunir. Si Nanay so inmunan partner ko, balet kayari sakey taon, kaukolan ton itunday pampapayunir to lapud ikakapuy na laman. Kanian impartner ed siak na sangan opisina na London si Ron Parkin, ya manlilingkor natan bilang membro na Branch Committee ed Puerto Rico.

Niasain kami ed baley na Broadstairs tan Ramsgate ya asingger ed dayat, diad probinsya na Kent, a diman et nanrenta kami na sakey a kuarto. Say binulan ya allowance na espisyal payunir ed saman et 40 shillings (diad saman et manga $8, U.S.). Kanian no manbayar kami lay renta, daiset lay nakeran panggastos mi. No maminsan et agmi amta no iner so pangalaan mi onsublay ya kanen mi. Balet walan walay paraan nen Jehova pian nitarya ray pankaukolan mi.

Mabetbet kamin manbisikleta, susubaen mi maksil ya dagem ya manlalapud North Sea anggano ambelbelat so karga na saray bisikleta mi. Wala ni ray eroplanon manpepelag na bomba tan saray German V-1 missile ya ondadalan ed Kent pian bombaen so London. Aminsan ya manbibisikleta ak, tinmaboy ak ed sakey a banawang nen walay bomban dinmalan ed tagey na ulok tan sinmabog ed asingger ya alog. Anggaman ontan, malikeliket so impanpayunir mid Kent.

NAGMALIW AK YA BETHELITE

Agaylay panangidayew nen nanay ko ed Bethel. Ibabaga ton anggapo lay arum ya pirawat to noagta magmaliw ak ya Bethelite. Kanian isip yo pa labat so liket tan impakasurprisak nen Enero 1946 ta akaawat ak na imbitasyon ya onlad Bethel pian ontulong ed kimey diman ya taloy simba. Kayari na saman, kinerew nen Pryce Hughes, say branch servant, ya mansiansia ak ed Bethel. Baleg so epektod bilay ko na training ko diman.

Walay manga 30 membro na pamilyan Bethel diad London ed saman a panaon, ya maslak ed sikara et kalangweran ya balolaki balet wala ra met so alanaan, singa sikara di Pryce Hughes, Edgar Clay, tan si Jack Barr a nagmaliw ya membro na Mananguley ya Ulop. Bilang kalangweran, baleg a pribilehyo so pikimey ed agagi nen Kristo diad panangidaulo da rayan “lusek”!​—Gal. 2:9.

Sakey ya agew, walay angibagad siak ya walay sister diad puerta ed arap ya labay to ak kunon nanengneng. Asurprisa ak ta si nanay ko manaya ya walay awit ton akabalkot. Agla kuno onloob pian agak la naabala, balet inter tod siak ’may akabalkot tan inmalis la. Say karga to et makapal ya coat. Anonotan ko laingen si Hana ya mangaawit na kawes parad anak ton si Samuel ya manlilingkor ed tabernakulo.​—1 Sam. 2:18, 19.

GILEAD​—AGKO NALINGWANAN YA EKSPERIENSYA

Nen 1947, limara kamin manlilingkor ed Bethel ya naimbitaan a manaral ed Gilead School diad United States, tan diad tinmumbok a taon, kaiba kamid koma 11 a klase. Kasabi mi, agaylay betel ed New York a diman so panaralan mi. Maong labat ta wala ’may coat ya inter nen nanay ko!

 Agko nalingwanan so anem bulan kod Gilead. Lapud impiulop kod saray kaklasek ya nanlapud 16 a nanduruman bansa linmaknab so panmoriak. Likud ed apabiskeg ak ed espiritual, agunggonaan ak met ed impiulop kod saray maespiritual ya Kristiano. Say sakey ed saray kaklasek si Lloyd Barry; sakey ed saray instruktor, si Albert Schroeder; tan si John Booth, say overseer na Kingdom Farm (a kawalaan na Gilead School) et nagmaliw iran membro na Mananguley ya Ulop. Papablien ko so maaron simbawa ya naawat kod sarayan agagi tan say maabig ya ehemplo dad katooran ed si Jehova tan say organisasyon to.

IMPANLINGKOR ED SIRKITO TAN IMPAWIL ED BETHEL

Kayarid Gilead, niasain ak bilang manangasikaso na sirkito diad state na Ohio, U.S.A. Diad saman et 21 años ko ni labat, balet inap-apresya na agagi so seseg ko anggaman ugaw ak ni. Diad satan ya sirkito, akaaral ak a maong ed eksperiensya na saray mas matatken.

Kayari pigaran bulan, naimbitaan ak lamet ed Brooklyn Bethel parad kaaruman ya training. Diad saman et akabat ko ray “lusek” singa di Milton Henschel, Karl Klein, Nathan Knorr, T. J. (Bud) Sullivan, tan Lyman Swingle, ya amin da et nanlingkor bilang membro na Mananguley ya Ulop. Talagan makapaseseg ya eksperiensya ya nanengneng iran mankikimey tan naimatonan iray Kristianon kiwas da. Lalon binmaleg so talek kod organisasyon nen Jehova. Insan imbaki ak lamet ed Europe pian ituloy so ministeryok diman.

Nen Pebrero 1950, naandid bilay si nanay ko. Kayari tulor, prangkan kinatongtong koy tatay ko tan si atsik Dora. Tinepet kod sikara no antoy plano dan gawaen ed katuaan natan ta anggapo lay Nanay tan anggapo ak lad abung. Walay kabat tan rerespetoen dan maedad lan alanaan, si Brother Harry Browning. Inmabuloy iran aralen so katuaan a kaiba to. Kayari sakey taon, abautismoan si Tatay tan atsik Dora. Sinmabi panaon, aturon servant ed Gillingham Congregation si tatay ko. Kayari impatey to, si atsi Dora et akiasawa ed sakey a matoor ya elder a si Roy Moreton, tan sikatoy matoor ya nanlingkor ed si Jehova anggad impatey to nen 2010.

INTULONG ED FRANCE

Diad eskuelaan et naaralan koy French, German, tan Latin, tan diad satan ya talo, say French so talagan nanirapan ko. Kanian agko natalosay liknaan ko nen imbaki da ak ya ontulong ed Bethel diad Paris, France. Diman et awalaan ak na pribilehyo ya mikimey ed branch servant a si Henri Geiger, a maedad lan alanaan. Aliwan lanang ya mainomay so kimey tan aminpigapiga ak ya alingo, balet ta dakel so naaralan ko nipaakar ed pidedeneng na totoo ed sakey tan sakey.

Likud ed satan, say sankaunaan ya internasyonal a kombension ed Paris kayari guerra et implano parad 1951, tan kaiba ak ya angorganisa ed satan. Sinmabid Bethel so ugaw nin ombiabiahen manangasikaso a si Léopold Jontès pian ontulong ed siak. Asabi panaon et sikatoy aturon branch overseer. Agawa so kombension ed Palais des sports, asingger ed Eiffel Tower. Saray inmatendi et nanlapud 28 iran bansa. Diad sampot ya agew na kombension, malikeliket iray 6,000 ya Tasin French ya nanengneng so 10,456 ya inmatendi!

Nen kakkasabik ed France, agak ni masyadon marunong na French. Sakey ni, say lingok et mansalita ak labat no segurado ak ya dugay ibagak ya French. Balet no agka manaya nalingo, agkan balot nipetek tan agka onaligwas.

 Kanian pian nasolusyonan so problemak, nan-enroll ak ed eskuelaan ya manbabangat na French ed saray foreigner. Onaatendi ak ed klase diad saray labi ya anggapoy aral. Anggad labalabay ko lay salitan French, tan lalon apablik itan diad inlabas na saray taon. Nagmaliw ya mausa-usar itan lapud akatulong ak ed panag-translate diad sangan opisina ed France. Sinmabi panaon, nagmaliw ak met ya translator, ya mangipapatalos na English ed French. Pribilehyo so ontulong ed pangipasabi na saray mablin espiritual ya naakan ya itatarya na saray alanaan diad saray agagin mansasalitay French ed interon mundo.​—Mat. 24:45-47.

IMPANGASAWA TAN ARUM NIN PRIBILEHYO

Nen 1956, nankasal kami nen Esther, sakey ya payunir a Swiss ya akabat ko pigay taon lay apalabas. Nankasal kami ed Kingdom Hall diad abay na Bethel ed London (say datin London Tabernacle no iner nampabautismo si nanay ko). Si Brother Hughes so nampaliwawad kasal mi. Wadman so nanay nen Esther, ya sakey met ya alanaan. Diad impangasawak, agak labat awalaan na magana tan matoor ya kaibad bilay, awalaan ak met na dakel ya pankanawnawan nakaiba so maong tan maespiritual ya katulangan ko, anggad anampot so bilay tod dalin nen taon 2000.

Kayari kasal mi, aliwan diad Bethel so nanayaman mi nen Esther. Mantratranslate ak ni balet parad Bethel, tan si Esther et espisyal payunir ed paway na syudad na Paris. Pigaran totoo so atulongan ton magmaliw ya lingkor nen Jehova. Nen 1964, naimbitaan kamin manayam ed Bethel. Insan nen 1976, sanen inmunan aporma iray Branch Committee, aturo ak ya membro na satan. Diad inlabas na saray taon, naynay ya maaron sinuportaan ak nen Esther.

‘AGYO AK NAKAIBAN NAYNAY’

Apribilehyoan ak ya onlan sagpaminsan ed headquarters diad New York. Diad saraman ya imbisitak, akaawat ak na maabig iran simbawa manlapud nanduruman membro na Mananguley ya Ulop. Singa bilang, aminsan et imbagak ya napapagaan ak no panon kon nasumpal so sakey a kimey ed deadline to. Inmimis si Brother Knorr insan to imbaga: “Agka mapaga. Mantrabaho ka labat!” Manlapu lad saman kada no manbubuntonan so trabaho, imbes ya man-panic, mantrabaho ak labat lan mantrabaho anggad nasumpal met lanlamang, tan mabetbet et diad dugan oras.

Antis na impatey nen Jesus, imbaga tod saray disipulo to: ‘Agyo ak nakaiban naynay.’ (Mat. 26:11) Bilang arum ya karnero, amta tayo met ya agtayo nakaiban naynay ed dalin iray alanaan ya agagi nen Kristo. Kanian parad siak et agaylan pribilehyo so masulok ya 70 taon ya impiulop kod dakel ya alanaan​—maliket ak ya ompepeket ed kawes na sakey a Judio.

[Paimano ed leksab]

[Blurb ed pahina 21]

Inmimis si Brother Knorr insan to imbaga: “Agka mapaga. Mantrabaho ka labat!”

[Saray litrato ed pahina 19]

(Kawigi) Si nanay tan tatay ko

(Kawanan) Diad sular na Gilead nen 1948, akasulong ed siak so coat ya inter nen Nanay

[Litrato ed pahina 20]

Ipapatalos koy paliwawa nen Brother Lloyd Barry ed dedikasyon na sanga diad France, 1997

[Saray litrato ed pahina 21]

(Kawigi) Diad kasal mi nen Esther

(Kawanan) Saniba kamin manpupulong