“Wala Ak ed Sikayo”
“Wala Ak ed Sikayo”
“Dakel so mananap, tan ondaak so tuan kakabatan.”—DAN. 12:4, NW.
PANON MON EBATAN?
Diad panaon tayo, panon ya naaamtaan so “tuan kakabatan”?
Panon ya ‘dinmakel’ iray mangaawat ed katuaan?
Panon so ‘indaak’ na tuan kakabatan?
1, 2. (a) Panon a tutulongan nen Jesus iray papatumbok to natan, tan diad arapen? (b) Unong ed Daniel 12:4, antoy resulta na panaral a maong ed Kasulatan?
IMADYIN mo pan wala ka lad Paraiso. Kada kabangon mod kabuasan, naliknam ya akapampainawa kan maong tan labalabay mo lan gapoay kimey mod satan ya agew. Anggapo lay naliknam ya ermen odino sakit na linawa. Saray sakit a datin naliliknam et naandi la. Perpekto lay pakanengneng, pakadngel, pakaangob, pakalikna, tan pakataway mo. Mabisbiskeg ka, maliket kad trabahom, dakel iray kaarom, tan anggapo lay kapagaan mo. Panliketan mo irayan bendisyon diad uley na Panarian na Dios. Bendisyonan na aturon Ari, si Jesu-Kristo so amin ya uuleyan to tan ibangat to ra nipaakar ed si Jehova.
2 Tulongan nen Jehova iray matoor ya lingkor to diad pambangat dad arum nipaakar ed sikato. Diad loob na dakel lan siglo, say Dios tan say Anak to et walad saray matoor. Antis ya onlad tawen, impaseguro nen Jesus ed saray babangatan to ya sikatoy walad sikara. (Basaen so Mateo 28:19, 20.) Pian napabiskeg so talek tayod sayan sipan, pantongtongan tayoy sakey a propesiya ya insulat nen Daniel diad Babilonia, masulok lan 2,500 a taon so linmabas. Nipaakar ed “panaon na anggaan” a pambibilayan tayo oniay insulat nen propeta Daniel: “Dakel so mananap, tan ondaak so tuan kakabatan.” (Dan. 12:4, NW) Malinew a say Hebreon salitan “mananap” ya inusar ed sayan bersikulo et mankabaliksay panaral a maong. Ipapanengneng na propesiya a saramay manaaral a maong na Kasulatan et makaawat na bendisyon lapud naaralan day katuaan, odino suston kakabatan ed Salita na Dios. Ibabaga met na satan ya dakel so mangawat ed “tuan kakabatan.” Ontan met, ondaak itan a kakabatan tan naaralan itan na dakel a totoo. Legan tayon uusisaen so pakakagawa na satan a propesiya, naamtaan tayon si Jesus et walad saray babangatan to natan, tan sarag nen Jehova a sumpalen so amin a sipan to.
NAAMTAAN DA SO “TUAN KAKABATAN”
3. Antoy agawad “tuan kakabatan” kayari impatey na saray apostol?
3 Kayari impatey na saray apostol, linmesay apostasya ed limog na saray tuan Kristiano tan kinmayat itan a singa apoy, unong a nipropesiya. (Gawa 20:28-30; 2 Tes. 2:1-3) Diad loob na pigaran siglo, anggan saramay mangibabagan Kristiano et andian na “tuan kakabatan.” Ibabaga na saray lider na relihyon a manisia irad Kasulatan, balet say imbangat dad saray totoo et “bangabangat na saray demonyo,” ya agmangigagalang ed Dios. (1 Tim. 4:1) Maslak a totoo et agda amtay katuaan nipaakar ed Dios. Kaibad sarayan doktrina iray palson bangat a singa say Trinidad, say ag-ipatey na kamarerwa, tan say andi-anggaan a kadusa na arum a kamarerwa ed apoy.
4. Panon ya inggapon anapen na melag a grupo na saray Kristiano nen 1870’s so “tuan kakabatan”?
4 Balet nen 1870’s—manga apatiran dekada sakbay na igapoy “kaunoran iran agew”—sakey a melag a grupo na saray tuan Kristiano a taga Pennsylvania, U.S.A., so nantitipon pian maseet ya aralen so “tuan kakabatan.” (2 Tim. 3:1) Tinawag day inkasikaran Saray Estudyante na Biblia. Aliwan sikara imay tinukoy nen Jesus ya “marunong tan mautek” ya agmakaamta na tuan kakabatan. (Mat. 11:25) Mapaabeba iran totoo a mabulos a manggaway linawa na Dios. Inaral, pinantongtongan, dinalepdep dan maong iray Kasulatan, tan nampikasi ira parad panangigiya na Dios. Inkompara da met iray teksto tan inaral da ray sulsulat na arum ya manaanap ed katuaan. Kalkalnan naaralan na Saray Estudyante na Biblia iray katuaan ya ag-atalosan ed loob na dakel a siglo.
5. Antoy gagala na saray serye na tract ya tatawagen ya The Old Theology?
5 Anggano malikeliket iray Estudyante na Biblia ed saray naaaralan da, agda itan impasirayew tan impasikat, ni say inala day galang diad pangipapaamtay balon bengatla. (1 Cor. 8:1) Imbes, angi-publish iray serye na tract a tatawagen ya The Old Theology. Say gagala ra et tulongan iray managbasan naamtaan iray katuaan a walad Biblia. Say inmunan serye na tract et tinmulong ed saray totoo ya naaralan so Biblia pian nipulisay da ray “amin a palson tradisyon na totoo” tan awaten so bangat nen Jesus tan saray apostol.—The Old Theology, No. 1, Abril 1889, p. 32.
6, 7. (a) Anto ran katuaan so atalosan tayo manlapu la nen 1870’s? (b) Anto ran katuaan a naaralan mo so naap-apresyam?
6 Talagan dakel ya importantin katuaan so naamtaan manlapu lad inggapo na saman a melag a grupo, masulok a 100 taon lay apalabas! * Malinew irayan katuaan tan agla kaukolan a pandebatian na saray teologo. Nanaaralan tayo ray katuaan a mamaaligwas ed bilay tayo, mamaliket, tan mangiter ed sikatayo na ilalo ed arapen. Ontutulong iratan ed sikatayon nakabat si Jehova—say personalidad tan gagala to. Ipapalinew met na saraya so papel nen Jesus, no akin ya sikatoy nambilay tan inatey, tan no anto lay gagawaen to natan. Sarayan mablin katuaan so mangipapaamta no akin ya inabuloyan na Dios so kaugsan, akin ya ompatey tayo, panon tayon manpikasi, tan no panon tayon magmaliw a peteg a maliket.
7 Natatalosan tayo la natan so kabaliksan na saray propesiyan nansiansian ‘ag-amta’ ed loob na nilibon taon balet ta nagagawa la natan diad sayan panaon na anggaan. (Dan. 12:9) Dakel ed sarayan propesiya et walad saray Ebanghelyo tan ed libro na Apocalipsis. Tinulongan itayo met nen Jehova a natalosan iray ebento ya agtayo anengneng—say inkitrono nen Jesus, say guerra ed tawen, tan say inkibantak nen Satanas ed dalin. (Apo. 12:7-12) Impaamta met ed sikatayo na Dios so kabaliksan na saray nanenengneng tayon nagagawa—saray guerra, yegyeg, salot, eras, ontan met ed saray totoon andiay takot ed Dios ya pakapatnagan a manbibilay tayo lad “nikadkaduma tan mair-irap a panaon.”—2 Tim. 3:1-5; Luc. 21:10, 11.
8. Siopay nirayew ed saray bengatlan nanenengneng tan narerengel tayo?
8 Kanian, onabobon tayod samay imbaga nen Jesus ed saray babangatan ton: “Maliket iray kamataan a makakanengneng ed saray nanenengneng yo. Ta ibagak ed sikayo, Nampirawatan a nanengneng na dakel a propeta tan arari iray nanenengneng yo balet ta agda iratan anengneng, tan nampirawatan dan narengel iray narerengel yo balet ta agda iratan nadngel.” (Luc. 10:23, 24) Nirayew si Jehova a Dios lapud inikdan to itayo na pankanawnawan nanengneng tan narengel iratan a bengatla. Tan misalsalamat tayo ta uusaren toy “mananulong,” say masanton espiritu to pian sigpot tayon natalosay “amin a katuaan”! (Basaen so Juan 16:7, 13.) Komon ta pabpablien tayo iyan “tuan kakabatan” tan ipulong iya ed arum!
“DAKEL” SO ANGAWAT ED “TUAN KAKABATAN”
9. Antoy inyanunsio na Abril 1881 ya isyu na sayan magasin?
9 Nen Abril 1881, ngalngali duay taon kayarin in-publish so sankaunaan ya isyu na Watch Tower, inyanunsio na sayan magasin so pankaukolan parad 1,000 a managpulong. Onia so nabasad satan ya artikulo: ‘Saramay makayarin mangigana na kapaldua odino dakel nin panaon parad kimey na Katawan, isusuheri min: Onla kayod saray syudad, melag man o baleg, depende ed nasarag yo, bilang Colporteur odino Ebanghelisador ya anapen ed inerman a lugar iray maseseg a Kristiano, a dakel ed sikara et walaan na seseg parad Dios, balet ta aliwan unong ed kakabatan; bangatan yo ra nipaakar ed kaabigan na Ama Tayo, tan ed karakpan na salita To.’
10. Antoy inkiwas na saray totoo sanen abasa day anunsio parad saray sigpot-panaon a managpulong?
10 Ipapatnag na satan ya anunsio a bibidbiren na Saray Estudyante na Biblia a say manunan kimey na saray tuan Kristiano et say pangipulong na maong a balita. Positibon inyimbita na Saray Estudyante na Biblia so pakawalaan na 1,000 sigpot-panaon a managpulong, anggaman diad saman a panaon et nilasus ni labat so onaatendi ed saray miting da. Balet sanen abasa na dakel a totoo so tract odino magasin, amoria dan nalmo day katuaan, tan labay dan tulongan so arum. Singa bilang, nen 1882, kayarin abasa na sakey a lakin taga London, England so sakey ya isyu na Watch Tower tan bokletan in-publish na Saray Estudyante na Biblia, oniay insulat to: “Ipangasi yo pan bangatan ak no panon tan no anto so ipulong pian makatulong ak ed kimey na Dios a labay ton nasumpal.”
11, 12. (a) Antoy piparaan tayo ed saray colporteur? (b) Panon ya akapangiletneg iray colporteur na saray “klase,” odino kongregasyon?
11 Nen 1885, wala lay manga 300 ya colporteur. Say gagala na sarayan sigpot-panaon a ministro et mipara ed sikatayo natan—say pangibangat ed saray totoon magmaliw a papatumbok nen Jesu-Kristo. Balet ta mandumaan so paraan tayo. Say gagawaen tayo natan et iyaaralan na Biblia so kada indibidual. Insan tayo imbitaan ya onatendi ed kongregasyon. Balet nensaman, say gagawaen na saray colporteur et iyoopresi da ray libro, insan da iimbitaan iray interesado a milad sikara pian aralen so Kasulatan bilang grupo. Diad onian paraan et akatugyop iray colporteur na saray balon kongregasyon a tinawag dan “klase.”
12 Alimbawa, nen 1907, sakey a grupo na saray colporteur so linmad sakey a syudad pian anapen iramay walaan la na kopya na Millennial Dawn (tatawagen met ya Studies in the Scriptures). Oniay inreport na Watch Tower: “Sarayan [interesado] et nantitipon ed abung na sakey ed saray kaiba ra pian manmiting. Diad interon agew na Simba, sakey a colporteur so nampaliwawa nipaakar ed teman Divine Plan of the Ages. Tan impaseseg tod saramay inmatendi a diad ontumbok a simba et nawalaan na regular a miting.” Nen 1911, nauman so paraan na panagbangat da. Imbaki iray 58 ya ombiabiahen ministro pian manpaliwawa ed nanduruman parte na United States tan Canada. Insulat day ngaran tan address na saray interesadon inmatendid saray paliwawa, tan imbangat da ran onla ed saray miting diad pribadon abung pian makapangiletneg na saray balon “klase.” Nen 1914, wala lay 1,200 a kongregasyon na Saray Estudyante na Biblia ed interon mundo.
13. Antoy pandinayewan mo ed kipupulong na “tuan kakabatan” diad panaon tayo?
13 Natan et wala lay manga 109,400 a kongregasyon ed interon mundo, tan walay 895,800 ya agagin manlilingkor bilang payunir. Ngalngali waloran milyon a totoo la natan so angawat na “tuan kakabatan,” tan iyaaplika da itan ed bilay da. (Basaen so Isaias 60:22.) * Makapadinayew iya ta impasakbay nen Jesus ed saray papatumbok to ya ‘magmaliw iran puntirya na panagbusol na amin a totoo’ nisengeg ed ngaran to. Inyarum to nin sikaray napasegsegang, nipriso, tan napapatey ni ingen. (Luc. 21:12-17) Anggaman ed isusumpa nen Satanas, saray demonyo to, tan na saray totoo, panliliketan na saray lingkor nen Jehova so iyaaligwas na kimey dan manggawa na babangatan. Manpupulong la ra natan ed “interon dalin,” manlapud saray ampetang anggad ambetel a pasen, diad saray kapalandeyan, desierto, syudad, tan diad saray lugar a dagdaiset so totoon manaayam. (Mat. 24:14) Agbalot iya nagawaan no anggapoy tulong na Dios.
“ONDAAK” SO “TUAN KAKABATAN”
14. Panon a dinmaak so “tuan kakabatan” panamegley na saray publikasyon tayo?
14 Say “tuan kakabatan” et dinmaak lapud dakel so mangipupulong na maong a balita. Dinmaak met itan panamegley na saray publikasyon, singa saray libro tan magasin. Nen Hulyo 1879, in-publish na Saray Estudyante na Biblia so sankaunaan ya isyu na sayan magasin a walaan na titulon Zion’s Watch Tower and Herald of Christ’s Presence. Satan ya isyu et inimprinta na sakey a kompanya, tan walaan na 6,000 a kopya diad lenguahen English. Si Charles Taze Russell ya manedad na 27 años so apilin magmaliw ya editor, kaibay limaran matatken ed espiritual ya Estudyante na Biblia bilang regular a managsulat ed saray artikulo na magasin. Say The Watchtower et nipa-publish la natan diad 195 a lenguahe. Sayan magasin so sankalaknaban a nibubunog ed interon mundo, a walaan na 42,182,000 a kopya kada isyu. Say komadua et say Awake! a walaan na 41,042,000 a kopya ed 84 a lenguahe. Kaaruman ni, manga 100 milyon a libro tan Biblia so niiimprinta kada taon.
15. Panon ya gagastosan so panangimprinta na saray publikasyon tayo?
15 Sayan malaknab a kimey et susuportaan panamegley na boluntaryon donasyon. (Basaen so Mateo 10:8.) Pandinayewan iyan maong na saramay walad printing business lapud amta ran mabli iray makina, papel, tinta, tan arum ni ran materyales. Oniay imbaga na sakey a brother a mangaasikaso ed panagsaliw na saray kagawaan na saray printery na Bethel: “Mandinayew iray negosyanten ombibisitad imprintaan tayo lapud ta anggan boluntaryon donasyon labat et makakasaliw tayo na saray modernon kagawaan. Mandinayew met ira ta saray mantratrabaho ed Bethel et maliket tan wala nid kalangweran.”
NAPANOY KAKABATAN NA DIOS SO DALIN
16. Antoy gagala na pangipapaamta ed “tuan kakabatan”?
16 Say indaak na “tuan kakabatan” et walaan na maabig a gagala. Say linawa na Dios et “nilaban so amin a klase na totoo tan nawalaan ira na suston pikakabat ed katuaan.” (1 Tim. 2:3, 4) Labay nen Jehova a naamtaan na totoo so katuaan pian duga so pandayew dad sikato tan naawat day bendisyon to. Diad pangipapaamta ed “tuan kakabatan” titiponen nen Jehova so amin a matoor a nakekeraan a membro na alanaan a Kristiano. Titiponen met nen Jehova ‘manlapud amin a nasyon tan tribu tan rasa tan lenguahe’ so “baleg ya ulop” a walaan na ilalon manbilay ya andi-angga diad dalin.—Apo. 7:9.
17. Antoy papaneknekan na indakel na saray tuan managdayew?
17 Say indakel na tuan managdayew diad loob na 130 taon et paneknek a si Jehova tan say tinuro ton Ari, si Jesu-Kristo et walad saray lingkor to a mangigigiya, manproprotekta, mangoorganisa, tan manbabangat ed sikara. Paneknekan met na indakel da a nagawad arapen iray sipan nen Jehova. “Say dalin napano naani ed pikakabat ed Jehova, singa saray danum sakbongan da so dayat.” (Isa. 11:9) Talagan panliketan lad satan na totoo iray dakel a bendisyon!
[Saray paimano ed leksab]
^ par. 6 Mas dakel ni naaralan tayo no manbantay tayo na DVD ya Jehovah’s Witnesses—Faith in Action, Part 1: Out of Darkness tan Jehovah’s Witnesses—Faith in Action, Part 2: Let the Light Shine.
^ par. 13 Nengnengen so libron Isaiah’s Prophecy—Light for All Mankind II, pahina 320.
[Tepetepet Parad Panagaral]
[Litrato ed pahina 6]
Saray Estudyante na Biblia et mapaabeban totoo a mabulos a manggaway linawa na Dios
[Litrato ed pahina 7]
Papablien nen Jehova so sagpot mod pangipapaamtad “tuan kakabatan”
