No ontan so situasyon mo, wala ray pigaran eksperiensyad Britain ya makatulong ed sika pian agka naandiay ilalo. Naaralan mo met no antoy nagawaan mo pian aliling to et makapangibuntok kay ‘tinapay ed tapew na saray danum,’ diad ontan et natulongan mo iramay agni angawat ed katuaan.—Ecl. 11:1.

Ipanengneng mon determinado ka. Agkan balot ontutunda ed panlilingkor mod si Jehova. (Deu. 10:20) Ontan so ginawa nen Georgina. Sanen inyaralan na saray Tasi nen Jehova nen 1970, mamapasnok so asawa ton si Kyriacos. Sesebelan ton manaral, agto palooben iray Tasi ed abung da, tan ibabantak toy amin ya nanengneng ton publikasyon na saray Tasi.

Lalon asanokan si Kyriacos nen mimiaral lay Georgina. Aminsan et linmad Kingdom Hall ta labay toy midebati. Nen naimano na sakey ya sister a mas amta nen Kyriacos so mansalitay Griego nen say man-English, tinawagan toy sakey ya Griegon brother ed sananey a kongregasyon pian onlan mitongtong ed si Kyriacos. Lapud maomaong imay brother, maabig so epekto tod si Kyriacos, tan pigaran bulan to met ya niyaralay Biblia. Balet tinmunda met lanlamang.

Masulok nin taloy taon ya inanosan nen Georgina so panesebel na asawa to. Imbaga nen Kyriacos ya isian to no manpabautismo. Diad agew na pampabautismo nen Georgina, sikatoy impapuson nampikasi ed si Jehova ya agkomon taynan nen Kyriacos. Sanen sikatoy sinamar na saramay Tasin piluganan to paonlad asemblea, imbaga nen Kyriacos ya: “Una ki’ la. Ontumbok kami.” Sikatoy inmatendi ed saman a kabuasan tan anengneng toy impanpabautismo nen asawa to!

Kayari na satan, agla tanton sesebelan nen Kyriacos si Georgina, tan kalkalnan anguman. Kalabas na ngalngali 40 taon manlapud impanaral nen Georgina na Biblia, nampabautismo met so asawa to! Antoy akatulong ed si Kyriacos? Oniay inkuan to: “Pandinayewan koy Georgina ta talagan pursigido.” Oniay imbaga met nen Georgina: “Anggano sinebelan ak nen asawak, agkon balot ninonot so ontundad panlingkor ed Dios ko. Agak met tinmundan nampikasid si Jehova, kanian agak balot naandiay ilalo.”

Say sakey nin makatulong et say pangipanengneng moy Kristianon personalidad. Pinaseseg nen apostol Pedro iray Kristianon asawan bibii: “Manpasakop kayo ed kaasawaan yon dili, ta no bilang walaray ag-ontutulok ed salita, magmaliw iran matulok lapud ugali yo anggano agkayo mansalita.” (1 Ped. 3:1) Inyaplika nen Christine itan a simbawa. Anggaman ontan, linmabas ni dakel a taon antis ya atangguyor so masiken ton si John. Sanen nan-Tasi Christine masulok a 20 taon lay apalabas, si John et agmanisia ed Dios. Agto labay so mibiang ed anggan anton relihyon, balet nanenengneng ton maliket si Christine ed balon relihyon to. “Nalikas kon talagan maliket so akulaw ko,” so kuan to. “Mas binmaleg so talek kod sikato, tan satan so akatulong ed siak diad dinadalan min mairap iran situasyon.”

Agbalot pinilit nen Christine si John ya magmaliw met a Tasi. Oniay inkuan nen John: “Diad gapo ni labat et amta nen Christine ya maabig no agmi pantongtongay relihyon. Inalagar ton manbolun ak ya manaral, agto ak inapura.” No walay artikulod Say Panag-bantayan odino diad Onliing! ya amta nen Christine ya labay nen John, singa saray nipaakar ed siensia, ayayep o tantanaman, ipanengneng tod sikato insan to ibagan, “Segurado ak, nagustoan mo ’ya.”

Sanen nanretiroy John, malaem lay panaon ton nonoten iray tepet ya singa say, ‘Basta labat la kasi linmesay bilay, o walay amalsad sikatayo?’ Aminsan, walay brother ya akaistoryaan nen John ya say kuan to et, “Anto kasi no manaral kay Biblia?” “Lapud diad saman et nakokombinsi ak lan walay Dios,” so kuan nen John, “inmabuloy ak.”

Maong labat ta agsinmukoy Christine! Kayari 20 taon ya pampipikasi ton awaten met komon nen masiken to so katuaan, abautismoan a siansiay John. Natan et saniba la ran masetseseg ya manlilingkor ed si Jehova. Oniay komento nen John: “Atangguyor ak lapud duaran rason. Say sakey et makaaro tan maomaong iray Tasi. Ontan met, no say asawam et Tasi nen Jehova—matoor, napanmatalkan, tan masakripisyo so kaibam ed bilay.” On, inyaplika nen Christine so 1 Pedro 3:1, tan maabig so resulta!

Panon to balet iramay inyaralay Biblia ya agnantultuloy so interes da? “Dia ed kabuasan itanem mo so binim, tan dia ed labi agmo ipiko so limam,” so kuan nen Arin Solomon, “ta agmo amta no anto so onaligwas, no saya kasi odino saman, no sikara kasi nampadpara naani a maong.” (Ecl. 11:6) No maminsan, pigaran taon ni onlabas antis ya ontubo so bini na katuaan. Anggaman ontan, onsabi lanlamang so panaon ya namoria to ’may too ya importante so iyapit ed Dios. (Sant. 4:8) Ompan sakey agew et nabalitaan mon Tasi la imay datin iyaaralan mo.

Ontan so agawad si Alice, sakey a biin taga India ya nanayam lad England. Nen 1974, sikatoy ginmapon nanaral na Biblia. Say salita to et Hindi, balet labay toy makaaral na English. Pigaran taon met ya inyaralan si Alice, tan akapiaral met ed English congregation. Amta ton nalmo to lay katuaan balet ta agto inikday importansia. Insan andi lay pinonot to et kuarta tan mahilig ya onlad party. Kanian intunda toy panaaral toy Biblia.

Kalabas na ngalngali 30 taon, si Stella, say sister ya angiyaral ed si Alice, et akaawat na sulat. Nanlapu itan ed si Alice tan oniay insulat to: “Segurado ak ya maliket ka no naamtaan mon samay datin iyaaralan moy Biblia nen 1974 et abautismoan ed sayan kakkayari labat a kombension. Baleg so nitulong mod bilay ko. Sika so angitanem na bini na katuaan ed siak, tan anggano agak ni akaparaan ed saman ya idedikay bilay kod Dios, agkon balot inabuloyan ya naandi itan ed isip tan pusok.”

Anto kasi agawa? Inistorya nen Alice ya sikatoy a-depress a maong sanen inatey so asawa to nen 1997. Kanian nampikasi ed Dios. Kayari samploran minuto, duaran Tasi ya mansasalitay Punjabi so tinmoktok ed abung to tan angitilak iray tract ya What Hope for Dead Loved Ones? Alikna nen Alice ya saya so ebat ed pikakasi to kanian nandesisyon ya kontaken lamet iray Tasi nen Jehova. Panon to ra balet ya naromog? Nibanbanan nalmo toy daan ya diary to ya wadman imay inter nen Stella ya address na Kingdom Hall na Punjabi congregation. Linma diman si Alice tan sikatoy maaron in-welcome na saray agagi. “Anggan sanen akaalis ak la, siansian sankaliknak ni so panangaron impanengneng da tan saman so tinmulong pian nalabanan koy ermen ko,” so kuan nen Alice.

Manlapu lad saman et regular lan akiaral si Alice tan intuloy toy nanaral na Biblia, tan inaral to met so salitan Punjabi. Nen 2003, sikatoy abautismoan. Oniay nabasad bandad sampot na sulat tod si Stella: “Misalsalamat ak ed impangitanem moy bini katuaan 29 taon lay apalabas tan ed maabig ya alimbawam.”

“Misalsalamat ak ed impangitanem moy bini katuaan 29 taon lay apalabas tan ed maabig ya alimbawam.”—Alice

Antoy naaralan mod sarayan eksperiensya? No say sakey ya too et matua, mapaabeba, tan naeerasan ed espiritual, pabalegen nen Jehova so bini katuaan ed puso to anggano iisipen mon singa mabayag. Tandaan imay ilustrasyon nen Jesus: “Saray bini et ontutubo tan ombabaleg, ya [ag-amta na samay nantanem] no panon a nagagawa itan. Say dalin a mismo so kalkalnan mamapawala na bunga, unona say bulong, insan say pugnel, tan diad kaunoran et say binmuyag lan dawa.” (Mar. 4:27, 28) Satan ya bini et kalkalnan ombaleg a “mismo.” Diad tua, ag-amta na kada managpulong na Panarian no panon iyan nagagawa. Kanian agka ontutundan mantanem na dakel. Diad ontan et dakel met so anien mo diad arapen.

Tandaan mo met ya importante so pikakasi. Si Georgina tan Christine et agtinmundan nampikasid si Jehova. No ‘mantultuloy kan manpikasi’ tan agnanaandiay ilalo, “kayari na saray dakel ya agew,” naromog mo lanlamang so “tinapay” ya imbuntok mod tapew na saray danum.—Roma 12:12; Ecl. 11:1.