1, 2. (a) Akin ya importantin ‘manimano tayon naynay nipaakar ed panagpikasi’? (b) Anto ray maabig ya itepet tayod sarili tayo nipaakar ed pikakasi?

“SAY oras ya sankairapan so mansiansian aliing et no asingger lan onliwawa,” so inkuan na sakey ya datin mantratrabahod labi. Nayarin ontan met so ibaga na arum ya kaukolan day aliing ya sanlabi. Singa ontan so situasyon na saray Kristiano natan lapud magano lan manampot so andukdukey lan labi na mauges ya mundo nen Satanas. (Roma 13:12) Talagan mapeligro so makateglep ed espiritual! Importante sirin ya ‘maabig so panagnonot’ tayo tan unoren tayoy simbawa na Biblia ya ‘manimanon naynay nipaakar ed panagpikasi.’—1 Ped. 4:7.

² Lapud manbibilay tayo lad panaon na anggaan, maabig no itepet tayod sarili tayo: ‘Talaga kasin iikdan koy imano so panagpikasik? Kasin uusaren koy amin a paraan o klase na pikakasi tan agak ontutundad panagpikasi? Kasin niyugalik lan ipikasi so arum, odino say ipipikasik labat et saray kaukolan tan panlabayan ko? Tan panon kaimportante so pikakasi parad kilalaban ko?’

3. Anto ray pigaran klase na pikakasi?

³ Diad sulat nen apostol Pablo ed saray taga Efeso, walay binitla ton “diad amin a paraan na panagpikasi.” (Efe. 6:18) Diad saray pikakasi tayo, nayarin naynay itayon manpapatulong ed si Jehova pian niwala iray nakaukolan tayo tan nasolusyonan iray problema tayo. Maaron dedengelen iratan na “Dumerengel na pikakasi.” (Sal. 65:2, NW) Balet, kaukolan tayo met ya ikday imano so arum nin klase na pikakasi. Kaibad saratan so panangidayew, pisasalamat, tan masimoon ya pikekerew.

4. Akin ya kaukolan tayon mabetbet ya idayew si Jehova diad saray pikakasi tayo?

 ⁴ Amayamay so rason no akin ya kaukolan tayon ilaktip ed saray pikakasi tayo so panangidayew ed si Jehova. Singa bilang, napapakiwas itayon mangidayew ed sikato no naiisip tayo ray “makapanyari a gawa to” tan say “kinabalgan to.” (Basaen so Salmo 150:1-6.) Imanoen pay Salmo 150. Diad anemiran bersikulo et 13 beses ya nipaseseg so pangidayew ed si Jehova! Lapud aralem ya panangaro tod Dios, oniay inkanta na sakey nin angisulat ed Salmo: “Maminpito a dayewen ta ka ed sanagew, nisengeg ed saray matunong a pananontonan mo.” (Sal. 119:164) Talagan manepeg ya idayew si Jehova. Kanian, duga labat ya sikatoy idayew tayod saray pikakasi tayo ya ‘maminpito ed sanagew,’ labay ton ibaga et mabetbet.

5. Akin ya proteksion so naynay a pangibalikas na pisasalamat ed pikakasi?

⁵ Say sakey nin importantin klase na pikakasi et say pisasalamat. Oniay impaseseg nen Pablo ed saray Kristiano ed syudad na Filipos: “Agyo pampapagaan so antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat.” (Fil. 4:6) Sakey a proteksion so pangibalikas na impapuson pisasalamat ed si Jehova diad pikakasi tayo. Lalo la ta manbibilay itayod kaunoran iran agew ya saray totoo et “agda amtay misalamat.” (2 Tim. 3:1, 2) Satan ya ugali et sankanengneng ed mundo natan. No ag-itayo manalwar, main-inomay itayon naimpluensyaan. No naynay tayon pisalamatay Dios ed pikakasi tayo, magmaliw itayon kontento tan napaliisan tayoy magmaliw ya ‘managmeremere tan mareklamo ed kipapasen tayod bilay.’ (Jud. 16) Sakey ni, no ilaktip na saray ulo na pamilya so pisasalamat ed pikakasi ra, napaseseg day asawa tan ananak dan iyugali misalamat.

6, 7. Anto so masimoon ya pikekerew, tan anto ray sarag tayon kerewen ed si Jehova?

⁶ Say masimoon ya pikekerew et pikakasi ya kaibay emosyon. Anto ray nayarin kerewen tayod si Jehova? Sarag tayon kerewey tulong to no napapasegsegang odino walay graben sakit tayo. Diad ontan iran kipapasen, talagan kakkaukolan tayoy tulong na Dios kanian masimoon so pikekerew tayo. Balet kasin diad saratan ya situasyon tayo labat masimoon ya manpikasid si Jehova?

⁷ Pantongtongan tayoy modelon pikakasi nen Jesus, tan imanoey imbaga to nipaakar ed ngaran na Dios, say Panarian To, tan say linawa To. (Basaen so Mateo 6:9, 10.) Say mundo et napnoy kaugsan, tan agniiter na saray gobierno so anggan saray sankasimplian ya pankaukolan na totoo. Kanian duga labat ya ipikasi tayon napasanto so ngaran na Dios tan ekalen na Panarian to so uley nen Satanas diad dalin. Panaon met iya pian masimoon ya kerewen ed si Jehova a nagaway linawa to diad dalin a singa ed tawen. Itultuloy tayo sirin so manimano tan usarey amin a paraan o klase na pikakasi.

8, 9. Akin ya agtayo nepeg ya husgaan si Pedro tan saray apostol ya akaugip ed hardin na Getsemani?

⁸ Anggaman impaseseg nen apostol Pedro ed saray Kristiano ya ‘manimano iran naynay nipaakar ed panagpikasi,’ aminsan et agto agawaan itan. Sikatoy sakey ed saray disipulo ya akaugip legan ya manpipikasi Jesus diad hardin na Getsemani. Anggano imbaga la nen Jesus ed sikara ya “mantultuloy kayon manbantay tan agkayo ontutundan manpikasi,” akaugip ni ran siansia.—Basaen so Mateo 26:40-45.

⁹ Balet imbes ya husgaan tayoy Pedro tan saray arum ya apostol ta akaugip ira, mas  maabig no tandaan tayo ya diad saman ya agew et naknaksawan ira. Namparaan ira parad Paskua tan sinelebraan dad saman ya labi. Insan inletneg nen Jesus so Pangdem na Katawan, tan angiter na instruksion no panon dan gawaen so Memoryal na impatey to. (1 Cor. 11:23-25) “Kayari ran angansion na saray panangidayew, linma ra ed Palandey na saray Olibo.” Medyo arawi inakar da diad saray mainget ya dalan ed Jerusalem pian makasabi ra diman. (Mat. 26:30, 36) Nayarin palbangon lad saman. Kanian no wadman tayod hardin na Getsemani ed saman ya labi, ompan akaugip tayo met. Imbes ya pampasnokan nen Jesus iray naknaksawan ya apostol, maar-aro ton binidbir ya “magunaet so espiritu, balet maletey so laman.”

10, 11. (a) Antoy naaralan nen Pedro ed samay agawad sikato ed hardin na Getsemani? (b) Antoy naaralan mod eksperiensya nen Pedro?

¹⁰ Akaaral si Pedro ed agawad sikato diad hardin na Getsemani. Antis na saman ya agawa et oniay imbaga nen Jesus: “Diad sayan labi et taynanan yo ak ya amin.” Balet oniay inyebat nen Pedro: “Anggano taynan da kan amin, agta kan balot taynan!” Imbaga nen Jesus ya sikatoy mamitlon iburi nen Pedro. Balet ag-anisiay Pedro tan oniay inkuan to: “Anggano kaukolan ya ompatey ak a kaibam, agta kan balot iburi.” (Mat. 26:31-35) Balet ta agawa so imbaga nen Jesus ta sikatoy imburi nen Pedro. Nen amoria nen Pedro so ginawa to, sikatoy “inmaki-akis.”—Luc. 22:60-62.

¹¹ Diad sayan agawad sikato, naaralan nen Pedro ya agnepeg ya alablabas a manmatalek ed sarili to. Seguradon baleg so nitulong ed sikato na pikakasi. Diad tua, si Pedro ya mismo so angisulat ed simbawa ya “manimano kayon naynay nipaakar ed panagpikasi.” Kasin uunoren tayo itan ya simbawa na Biblia? Kasin ‘ag-itayo ontutundan manpipikasi’ pian ipatnag ya akadepende tayod si Jehova? (Sal. 85:8) Kaukolan tayo met ya tandaan so simbawa nen apostol Pablo: “Samay maniisip a sikatoy akaalagey et manalwar komon ya agnatumba.”—1 Cor. 10:12.

12. Akin et maabig ya alimbawa ed sikatayo si Nehemias?

¹² Say sakey nin maabig ya alimbawa ed impapuson panagpikasi et si Nehemias, ya managserbi na iinumen nen Arin Artaxerxes na Persia nen komaliman siglo B.C.E. Sikatoy pigay agew lan ‘manaayunal tan manpipikasi ed arap na Dios’ lapud kipapasen na saray Judio ed Jerusalem. (Neh. 1:4) Nen tinepet nen Artaxerxes no akin ya maer-ermen so lupa to tan no antoy  labay ton kerewen, tampol ya “akikasi [si Nehemias] ed Dios ed tawen.” (Neh. 2:2-4) Antoy resulta? Inebatan nen Jehova so pikakasi to tan inmaneobra To ray bengatla parad pakagunggonaan na totoo To. (Neh. 2:5, 6) Seguradon binmiskeg so pananisia nen Nehemias ed saman ya agawa!

13, 14. Antoy kaukolan tayon gawaen pian mansiansian mabiskeg so pananisia tayo tan nasarag tayo ray sagpot nen Satanas ya dismayaen itayo?

¹³ No agtayo ontutundan manpikasi a singa si Nehemias, mansiansian mabiskeg so pananisia tayo. Si Satanas et anggapoy panangasi to tan sasamboten toy onataki no makapuy itayo. Singa bilang, no walay graben sakit o nadi-depress itayo, nayarin naisip tayon anggapoy kana na dagdaiset ya oras tayod ministeryo. Nayarin wala rad sikatayoy nagogonigon a maong lapud nanononotan da ray agawad sikara diad apalabas. Labay nen Satanas ya isipen tayon anggapoy kana tayo. Uusaren to ray negatibon liknaan tayo pian pakapuyey pananisia tayo. Balet no ‘manimano tayon naynay nipaakar ed panagpikasi,’ mansiansian mabiskeg so pananisia tayo. On, ‘diad panamegley na baleg a samper na pananisia et naerep tayoy amin a mandarlang a pana na samay mauges.’—Efe. 6:16.

¹⁴ No ‘manimano tayon naynay nipaakar ed panagpikasi,’ ag-itayo nabiglaan tan agtayo ikompromisoy pananisia tayo no walay ag-iilaloan ya subok. Maabig no aligen tayoy alimbawa nen Nehemias tan manpikasi tayon tampol ed Dios. Nalabanan tayo labat iray tukso tan nasungdoan iray subok diad tulong nen Jehova.

15. Anto ray kaukolan tayon itepet ed sarili tayo nipaakar ed pangipikasid arum?

¹⁵ Masimoon ya impikasi nen Jesus si Pedro pian ag-onkapuy so pananisia to.  (Luc. 22:32) Inalig na matoor ya Kristiano nen inmunan siglo ya si Epafras so alimbawa nen Jesus tan masimsimoon ton impikasi iray agagid Colosas. Oniay insulat nen Pablo: “Masimoon ton ipipikasi lawas a magmaliw kayo komon a mabiskeg, tan ayadyari ya anggapoy panduaruwaan ed panangunor na linaway Dios.” (Col. 4:12, Maung a Balita) Maabig no itepet tayo iraya ed sarili tayo: ‘Kasin masimoon kon ipipikasi iray agagi ed interon mundo? Panon kabetbet kon ipipikasi iray kapananisiaan ko ya dinalan na kalamidad? Kapigan so sampot ya impapuson impangipikasik ed saramay walaan na baleg ya responsabilidad ed organisasyon nen Jehova? Kasin diad agano ni et impikasik so sakey ed kongregasyon ya walay naeeksperiensya ton kairapan?’

16. Kasin walay nitulong na pangipikasi tayod arum? Ipaliwawa.

¹⁶ Seguradon makatulong ed saray agagi so pangipikasi tayod sikara. (Basaen so 2 Corinto 1:11.) Anggaman ag-akadepende so ikiwas nen Jehova ed karakel na lingkor ton manpipikasi ya paulit-ulit, iimanoen toy panangiyansakit dad balang sakey legan ton eebatay pikakasi ra. Kanian nepeg tayon seryosoen so pribilehyo tan responsabilidad tayon ipikasi so arum. Singa si Epafras, kaukolan tayon ipanengneng so impapuson panangaro tan panangiyansakit ed saray agagi diad masimoon a pangipikasid sikara. No gawaen tayo itan, magmaliw itayon mas maliket lapud “mas makapaliket so mangiter nen say mangawat.”—Gawa 20:35.

17, 18. Antoy nitulong ed sikatayo na ‘panimanon naynay nipaakar ed panagpikasi’?

¹⁷ Antis ya imbaga nen Pablo ya “magano lan mansampot so labi; asingsingger la so agew,” oniay insulat to: “Amta yo so panaon, a saya la so oras pian onliing kayo, ta natan et mas asingger lay kilalaban tayo nen say sanen nagmaliw itayon mananisia.” (Roma 13:11, 12) Asingger lay insipan na Dios ya balon mundo, tan say kilalaban tayo et mas asingger la nen say iilaloan tayo. Agtayon balot onuugip ed espiritual, tan agtayo aabuloyan so mundo ya samsamen toy panaon tayo parad personal a pampikasid si Jehova. Imbes, ‘manimano tayon naynay nipaakar ed panagpikasi.’ Makatulong itan pian sikatayoy magmaliw ya ‘masanto ed saray ugali tayo tan nagawaan tayo ray bengatlan nipaakar ed maridios a debosyon’ legan tayon aalagaren so agew nen Jehova. (2 Ped. 3:11, 12) Nanengneng ed kabibilay tayo no kasin mansiasiansia itayon aliing ed espiritual tan talagan panisiaan tayo ya asingsingger lay anggaan na sayan mauges a mundo. Komon ta ‘mantultuloy itayon manpikasi.’ (1 Tes. 5:17) Aligen tayo met si Jesus diad pangipanaon na pampikasin bukor. No ag-itayo manaapura ed saray personal ya pikakasi tayod si Jehova, mas onapit tayod sikato. (Sant. 4:7, 8) Alay abig ya bendisyon itan!

¹⁸ Oniay ibabaga na Biblia: “Sanen nambilay si Kristo bilang too, sikatoy masimoon a nampikasi tan kinmerew tekep na pannangnangis tan saray lua diad Dios a makapangiliktar ed sikato ed ipapatey, tan naebatan iray pikakasi to lapud tatakotan to so Dios.” (Heb. 5:7) Masimoon ya nampikasi si Jesus tan nansiansian matoor ed Dios anggad sampot na bilay to diad dalin. Bilang resulta, inliktar nen Jehova so inad-aro ton Anak manlapud patey tan inikdan toy imortal ya bilay ed tawen. Sarag tayo met so manmatoor ed Ama tayon walad tawen antokaman so tukso tan subok ya onsabid sikatayo. On, nagamoran tayoy premyon andi-anggaan ya bilay, no ‘manimano tayon naynay nipaakar ed panagpikasi.’