‘Gawa Yo Iya Bilang Pakanodnonotan ed Siak’
“Kayari ton akisalamat, pinisag to [so tinapay] tan inkuan to: ‘Saya so mankabaliksay laman ko a parad sikayo. Itultuloy yon gawaen iya bilang pakanodnonotan ed siak.’”—1 COR. 11:24.
1, 2. Antoy nayarin inisip na saray apostol antis iran linmad Jerusalem?
‘ANGGAPOY lurem, kanian sankanengneng so pagpag a gilig na bulan. Kalabian, seguradon anengneng met la iya na saray bantay diad Jerusalem. No naamtaan iya na Sanhedrin, iyanunsio dan tampol ya gapo la iya na bulan na Nisan. Insan bilang tanda et mamool odino mangibaki ray mensahero ya mangibalita. Seguradon labay nen Jesus lay onlad Jerusalem pian makasabi antis na Paskua.’
2 Ompan ontan so iisipen na arum ed saray kaiba nen Jesus diad Perea (biek na Jordan) legan na unor lan iyakar tod Jerusalem. (Mat. 19:1; 20:17, 29; Mar. 10:1, 32, 46) Sano naamtaan lay unonan agew na Judion bulan ya Nisan, selebraan lay Paskua kayari 13 agew—diad Nisan 14 kaselek na agew.
3. Akin a labay ya amtaen na saray Kristiano so petsa na Paskua?
3 Say Pangdem na Katawan, ya miparad petsa na Paskua, et nagawa kaselek na agew no Abril 14, 2014. Espisyal itan ya agew parad saray tuan Kristiano tan ed saray interesado. Akin? Oniay ibabaga na 1 Corinto 11:23-25: “Diad samay labi ya iyawat lay Katawan a Jesus et sikatoy angala na tinapay tan kayari ton akisalamat, pinisag to itan tan inkuan to: ‘Saya so mankabaliksay laman ko a parad sikayo. Itultuloy yon gawaen iya bilang pakanodnonotan ed siak.’ Ontan met so ginawa to ed kopa.”
4. (a) Anto ray nayarin nitepet tayo nipaakar ed Memoryal? (b) Panon ya naaamtaan so petsa na Memoryal kada taon? (Nengnengen so kahon ya “Memoryal ed 2014.”)
4 Seguradon onatendi kad saksakey ya okasyon ya ingganggan nen Jesus a tinaon ya nodnonoten na papatumbok to. Balet maabig no antis to ’tan et tepetay sarilim: ‘Anto ray iparaan ko parad Memoryal? Anto ray usaren ed satan? Anto ray uksoyan ed satan ya labi? Tan akin et makabaliksan ed siak so Memoryal tan saray emblema?’
SARAY EMBLEMA
5. Antoy impaiparaan nen Jesus parad unor lan Paskua kaiba iray apostol to?
5 Sanen ingganggan nen Jesus iray apostol to ya iparaan so kuarton usaren parad pangdem ed Paskua, agto imbagad sikaran ikdan da itan na dakel a dekorasyon. Say labay to et simpli tan malinis a kuarto, ya onsusto ira. (Basaen so Marcos 14:12-16.) Kaukolan dan iparaan so pigaran bengatla parad pangdem, kaibad satan so anggapoy lebaduran tinapay tan ambalangan alak. Kayari na pangdem ed Paskua, impaimano nen Jesus iray duaran emblema.
6. (a) Kayari na pangdem ed Paskua, antoy imbaga nen Jesus nipaakar ed tinapay? (b) Anton klase na tinapay so uusaren ed Memoryal?
6 Naimatonan itan nen apostol Mateo tan ag-abayag et insulat to: “Angala si Jesus na sakey a tinapay, tan kayari ton impabendisyonan et pinisag to, tan sanen iiter to itan ed saray disipulo, inkuan to: ‘Ala yo tan akan yo.’” (Mat. 26:26) Samay “tinapay” et anggapoy pampaalsa to, a singa samay inusar ed Paskua. (Exo. 12:8; Deu. 16:3) Gawa itan ed arina na trigo tan danum. Lapud anggapoy lebadura to, ag-itan onalsa. Agmet itan inaruman na asin odino arum ni ra. Amaga, tan masalansang itan, kanian mainomay ya pisagen. Diad panaon tayo, antis na Memoryal et nayarin manuro iray elder na manlutoy tinapay a gawad arina na trigo tan danum, insan ilutod kawalin apuranisay mantika. No anggapoy arina na trigo [wheat], nayarin usaren so arina na belas, sebada [barley], mais, odino arum nin miparan arina.
7. Anton klase na alak so inusar nen Jesus, tan anton klase na alak so nayarin usaren natan ed Memoryal?
7 Inkuan ni nen Mateo: “Angala [si Jesus] na sakey a kopa, tan kayari ton akisalamat, inter to itan ed sikara, a kuan to: ‘Inum kayon amin ed satan.’” (Mat. 26:27, 28) Say inkarga nen Jesus ed kopa et ambalangan alak. Seguradon aliwa itan a kapampespes ya tabol na ubas, ta abayag lan asumpal so panagbudbor na ubas. Anggaman anggapoy alak diad samay unonan pangdem ed Paskua diad Ehipto, agkinuestion nen Jesus so impangiserbi ed satan diad Paskua. Inusar to ni ingen itan diad Pangdem na Katawan. Kanian diad Memoryal na saray Kristiano natan et walay alak. Nepeg ya say usaren ed Memoryal et aglalaokan na brandy odino arum ni. Anggapoy inlaok ed dala nen Jesus pian magmaliw itan ya mas makana. Kanian, puron ambalangan alak labat so usaren. Nayarin usaren so ginawan alak odino sinaliw ya alak a singa say Beaujolais, Burgundy, odino Chianti.
NO ANTOY IREREPRESENTA NA SARAY EMBLEMA
8. Akin ya interesado iray Kristiano ed irerepresenta na tinapay tan alak?
8 Impalinew nen apostol Pablo ya aliwan saray apostol labat so kaukolan ya manselebra ed Pangdem na Katawan, noag pati amin a Kristiano. Insulat tod saray agagi diad Corinto: “Inawat ko ed Katawan imay inyawat ko met ed sikayo, a [say] Katawan a Jesus et . . . angala na tinapay tan kayari ton akisalamat, pinisag to itan tan inkuan to: ‘Saya so mankabaliksay laman ko a parad sikayo. Itultuloy yon gawaen iya bilang pakanodnonotan ed siak.’” (1 Cor. 11:23, 24) Kanian anggad natan, tinaon ya nonodnonoten na saray Kristiano iyan espisyal ya okasyon tan interesado rad irerepresenta na tinapay tan alak.
9. Antoy lingon papanisiaan na arum nipaakar ed tinapay ya inusar nen Jesus?
9 Iisipen na arum ya relihyoson totoo a say imbaga nen Jesus et ‘Saya so laman ko.’ Kanian panisiaan da a say tinapay et mamilagron nagmaliw ya laman to. Balet aliwan ontan so agawa. * Sankanengneng na saray matoor ya apostol so laman nen Jesus tan say anggapoy lebaduran tinapay ya kanen da. Malinew a say tutukoyen nen Jesus et simboliko, ya singa mabetbet ton gagawaen.—Juan 2:19-21; 4:13, 14; 10:7; 15:1.
10. Antoy irerepresenta na tinapay ya uusaren ed Pangdem na Katawan?
10 Say tinapay a walad arapan tan kanen na saray apostol et mankabaliksay laman nen Jesus. Walay panaon ya abaloan na saray tuan Kristiano a say tinapay et ontutukoy ed “laman na Kristo” odino kongregasyon na saray alanaan a Kristiano. Ontan so panisiaan da ta pinisag-pisag nen Jesus so tinapay, tan no ikomparad pukel to et anggapoy anggan sakey ya aputer. (Efe. 4:12; Roma 12:4, 5; 1 Cor. 10:16, 17; 12:27) Balet nen inaral dan maong, atalosan da lanlamang ya based Kasulatan et irerepresenta na tinapay so laman nen Jesus. “Nanirap si Kristo ed laman,” impasak ni ingen. Kanian, diad Pangdem na Katawan, irerepresenta na tinapay so pisikal a laman nen Jesus ya ‘angako ed saray kasalanan tayo.’—1 Ped. 2:21-24; 4:1; Juan 19:33-36; Heb. 10:5-7.
11, 12. (a) Antoy imbaga nen Jesus nipaakar ed alak? (b) Antoy irerepresenta na alak ya uusaren ed Pangdem na Katawan?
11 Makatulong itan pian natalosan tayoy imbaga nen Jesus nipaakar ed alak. Oniay nabasa tayo: “Ontan met so ginawa to ed kopa, kayari ton nangdem, ya inkuan to: ‘Sayan kopa et mankabaliksay balon sipanan a pinaletan na dalak.’” (1 Cor. 11:25) Diad dakel ya bersion, literal so impangipatalos ed saya, a singa ed Say Biblia: “Sayan kopa sikato so Balon Sipan ed dalak.” (Kien mi so aka-italiko.) Kasin say literal a kopa so akipaknaan nen Jesus na balon sipanan? Andi. Say “kopa” et ontutukoy ed karga na satan—say alak. Antoy imbaga nen Jesus ya kabaliksan odino irerepresenta na alak? Say niibung a dala to.
12 Diad Ebanghelyo nen Marcos, oniay nabasan imbaga nen Jesus: “Saya so mankabaliksay ‘dalak nipaakar ed sipanan,’ a nepeg ya iyibung nisengeg ed dakel a totoo.” (Mar. 14:24) On, “nepeg ya iyibung [so dala nen Jesus] nisengeg ed dakel a totoo parad kaperdona na saray kasalanan.” (Mat. 26:28) Kanian, matukoy ya irerepresenta na ambalangan alak so literal ya dala nen Jesus. Say dala to so mangitarya na dondon pian “naperdona iray impakalingo tayo.”—Basaen so Efeso 1:7.
Ininum na saray apostol so alak ya mangirerepresentad dala nen Jesus nipaakar ed sipanan (Nengnengen iray parapo 11, 12)
PANNODNONOT ED IMPATEY NA KRISTO
13. Deskribien no panon ya nonodnonoten so tinaon ya Memoryal na impatey nen Kristo?
13 No first time moy onatendid Memoryal ya seselebraan na Saray Tasi nen Jehova, antoy iilaloan mo? Seguradon nagawa itan a pantitipon diad simpli, malinis, tan komportablen lugar. Nayarin wala ray simplin aka-vase ya rosas, tan aliwan sobray dekorasyon ya singa walay party. Malinew tan magalang ya ipaliwawa na sakey ya kualipikadon elder no antoy ibabaga na Biblia nipaakar ed satan ya okasyon. Ipaimano to ya inatey so Kristo bilang dondon pian manbilay itayo. (Basaen so Roma 5:8-10.) Ipaliwawa to met so ibabaga na Biblia ya duaran ilalo na saray Kristiano.
14. Legan na paliwawa ed Memoryal, anton duaran ilalo so ipaimano?
14 Say sakey ya ilalo et say panuley ed tawen kaibay Kristo. Daiset labat so makaawat ed sayan ilalo, kaibad saya iray matoor ya apostol. (Luc. 12:32; 22:19, 20; Apo. 14:1) Samay sakey nin ilalo et parad maslak a Kristiano ya matoor a manlilingkor ed Dios. Walay ilalo ran manbilay ya andi-angga diad paraison dalin. Diad satan, nagawa lay linawa na Dios ed dalin a singa ed tawen, ya abayag lan ipipikasi na saray Kristiano. (Mat. 6:10) Tan ipapanengneng na Kasulatan so makapalikliket ya bilay a niwalad sikara ed andi-angga.—Isa. 11:6-9; 35:5, 6; 65:21-23.
15, 16. Diad Memoryal, antoy gagawaen ed tinapay?
15 Kayarin nipaliwawa na espiker so duaran ilalo, ibaga ton oras la pian aligen imay ginawa nen Jesus diad Pangdem na Katawan. Singa asalambit la, walay duaran embleman usaren, say anggapoy lebaduran tinapay tan ambalangan alak. Nayarin akalira iraya diad lamisaan ya asingger ed espiker. Basaen na espiker so salaysay na Biblia nipaakar ed imbaga tan ginawa nen Jesus sanen inggapo to iyan selebrasyon. Singa bilang, oniay nabasa ed salaysay nen Mateo: “Angala si Jesus na sakey a tinapay, tan kayari ton impabendisyonan et pinisag to, tan sanen iiter to itan ed saray disipulo, inkuan to: ‘Ala yo tan akan yo. Saya so mankabaliksay laman ko.’” (Mat. 26:26) Pinisag-pisag nen Jesus so anggapoy lebaduran tinapay pian nipasa to itan ed saray apostol to diad biek tan biek. No Abril 14, nanengneng moy anggapoy lebaduran tinapay ya apisag-pisag la tan akakargad pigaran plato.
16 Magenap ya plato so usaren pian maples iratan a nibunog ed amin ya onatendi. Ag-iya gawaen a singano walay espisyal a ritual. Walay antikey ya pikakasi, tan kayari to et mauksoy ya ipasa iratan, depende ed no antoy praktikal ed lugar. Ompan pigpigara (odino nayarin anggapo) so mangan na tinapay, a singa agawad maslak a kongregasyon nen 2013 ya Memoryal.
17. Diad Memoryal, panon ya tutumboken so imbaga nen Jesus nipaakar ed alak?
17 Kayari na satan, isublay na espiker ya basaen so nipaakar ed alak: “Angala [si Jesus] na sakey a kopa, tan kayari ton akisalamat, inter to itan ed sikara, a kuan to: ‘Inum kayon amin ed satan, ta saya so mankabaliksay “dalak nipaakar ed sipanan,” a nepeg ya iyibung nisengeg ed dakel a totoo parad kaperdona na saray kasalanan.’” (Mat. 26:27, 28) Bilang pangalig ed satan, walay sakey lamet ya pikakasi, insan ipasa iray “kopa” na ambalangan alak ed amin ya onatendi.
18. Anggano pigpigara odino anggapoy mangan tan oninum ed saray emblema, akin et importante nin siansia so iyatendi?
18 Saray nakaiba labat nen Jesus a manuley ed tawen so mangan na tinapay tan oninum na alak. Kanian, maslak ed saray onatendi et ipasa da labat iratan ed kaabay da. (Basaen so Lucas 22:28-30; 2 Tim. 4:18) Anggano kaslakan ed saray Kristiano et agmangan tan oninum na emblema, importante nin siansia ya onatendi ira. Lapud ipapanengneng na satan ya papablien day bagat nen Jesus. Legan na Memoryal, nanodnonotan day amin a bendisyon ed sikara na dondon bagat nen Jesus. Walay ilalo ran magmaliw a kabiangan na “baleg ya ulop” a makaliktar ed “baleg ya irap.” “Inurasan [na sarayan manlilingkor ed Dios] iray kawes da tan pinaputi da iratan ed dala na Kordero.”—Apo. 7:9, 14-17.
19. Antoy gawaen mo pian makapanparaan parad Pangdem na Katawan tan nagunggonaan ed satan?
19 Sikatayo ran Tasi nen Jehova ed interon mundo et manparaan parad sayan espisyal ya pantitipon. Pigaran simba antis na Memoryal, gawaen tayoy anggaay nayarian tayon imbitaan so dakel a totoo. Tan pigaran agew antis na Memoryal, basaen tayo iray salaysay ed Biblia nipaakar ed ginawa nen Jesus tan no anto ray agawa antis na Pangdem na Katawan nen 33 C.E. Kaukolan tayon apigeren so eskedyul tayo pian seguradon makaatendi itayo. Maabig no makasabi itayo antis na panlukas a kanta tan pikakasi pian na-welcome iray bisita tan nakompleto tayoy programa. Amin tayo, balanglan membro na kongregasyon o bisita, et nagunggonaan no tumboken tayod Biblia tayo iray babasaen tan ipapaliwawan teksto. Nagkalalo ed amin, say iyatendi ed Memoryal so pakapatnagan na aralem ya apresasyon tayod bagat nen Jesus tan katutulok tayod sayan ganggan to: “Itultuloy yon gawaen iya bilang pakanodnonotan ed siak.”—1 Cor. 11:24.
^ par. 9 Oniay imbaga na German ya iskolar a si Heinrich Meyer: “Lapud sankanengneng dan ag-abawasan so laman nen Jesus (mabilay nin siansia), tan agtinmedter so dala To, anggapod saray kaiba to [saray apostol] so nanisip ya . . . kakanen tan iinumen day mismon laman tan dala na Katawan, simpli so imbaga nen Jesus [kanian] seguradon agto labay ya lingoy natalosan da.”
