1. Panon ya inmelet so aroan na Dios tan na Anak to?

IMBAGA na anak nen Jehova, si Jesu-Kristo: “Inarok so Ama.” (Juan 14:31) Imbaga to met ya: “Aaroen na Ama so Anak.” (Juan 5:20) Agtayo la itan pankelawan. Antis ya linmay Jesus diad dalin, minilyon ya taon ya sikato so “uloen a komikimey” na Dios. (Uli. 8:30) Legan ya saniban mankikimey si Jehova tan si Jesus, akabkabat ya maong na Anak so Ama to kanian inar-aro to. Diad tua, lapud maapit ya ulopan da, inmelet lan inmelet so aroan da.

2. (a) Antoy nepeg tayon gawaen no labay tayon aroen itayo na Dios? (b) Anto ran tepet so pantongtongan tayo?

² Inkansion nen salmistan David: “Aroen ta ka O Jehova a kasil ko.” (Sal. 18:1) Ontan so nepeg ya nalikna tayod Dios. Insipan to ya no unoren tayo, ipanengneng toy panangaro tod sikatayo. (Basaen so Deuteronomio 7:12, 13.) Balet talaga kasin naaro tayoy Dios anggano agtayo nanengneng? Antoy labay ya ibaga na pangarod si Jehova? Akin ya nepeg tayon aroen? Tan panon tayon nipanengneng so panangaro tayod sikato?

3, 4. Akin ya posiblin naaro tayoy Jehova?

³ “Say Dios et Espiritu,” kanian agtayo nanengneng. (Juan 4:24)  Balet, posible ya naaro tayoy Jehova. Diad tua, ibabaga na Biblia ya sikatoy nepeg tayon aroen. Singa bilang, imbaga nen Moises ed saray Israelita: “Aroen mo si Jehova a Dios mo ed amin a pusom tan dia ed amin a kamarerwam, tan dia ed amin a pakayarim.”​—Deu. 6:5.

⁴ Akin ya posiblin naaro tayoy Dios? On ta pinalsa to itayo ya walaan na espiritual a pankaukolan tan abilidad ya ipatnag so panangaro. No mansasagpot itayo pian napenek so espiritual a pankaukolan tayo, onelet so panangaro tayod si Jehova, tan magmaliw tayon maliket. Inkuan nen Jesus: “Maliket iramay manonot ed espiritual a pankaukolan da, ta kayarian da so panarian na katawenan.” (Mat. 5:3) Diad libro nen A. C. Morrison ya Man Does Not Stand Alone, imbaga ton makapakelaw ya nensaman anggad natan et aanapen tan panisiaan na totoo so Dios. On, mapatnag ya nisipor ed too so pankaukolan ya nakabat so Dios.

5. Panon tayon amta ya talagan naanap tayoy Dios?

⁵ Talaga kasin naanap tayoy Dios? On, lapud labay to ya nawalaan itayo na relasyon ed sikato. Impalinew itan nen apostol Pablo nen pupulongan toy sakey ya grupo diad Areopago. Ditan et sankanengneng so Parthenon​—templo ya indedika ed si Athena, say dios na saray taga Athens nensaman. Imadyin mo pan wadman ka met legan ya ipapaliwawa nen Pablo so nipaakar ed “Dios a nanggawa na mundo tan amin a bengatlan wadtan,” insan to imbaga ya Sikatoy “agmanaayam ed saray templo a ginawa na lima.” Imbaga to ni ya “manlapud sakey a too et ginawa [na Dios] so kada nasyon na totoo pian manayam diad interon dalin, tan inggeter to iray aturon panaon tan saray ketegan na panaayaman na totoo, ta pian anapen day Dios, no bilang ta mankarkarapkap iran manaanap ed sikato tan peteg a naromog da, anggaman diad tua et sikatoy ag-arawi ed balang sakey ed sikatayo.” (Gawa 17:24-27) On, naanap na too so Dios. Masulok lan pitora tan kapalduan milyon ya Tasi nen Jehova so ‘peteg ya akaromog ed sikato’​—tan talagan inar-aro da.

6. Antoy imbaga nen Jesus ya “sankaimportantian tan unonan ganggan”?

⁶ Nepeg ya manlapud puso so panangaro tayod si Jehova. Ontan so indanet nen Jesus nen walay Fariseo ya nantepet ed sikato: “Managbangat, dinan so sankaimportantian ed Ganggan?” Oniay ebat nen Jesus: “‘Arom si Jehova a Dios mo ed interon pusom tan ed interon kamarerwam tan ed interon nonot mo.’ Saya so sankaimportantian tan unonan ganggan.”​—Mat. 22:34-38.

7. Antoy labay ya ibaga na pangarod Dios ed (a) ‘interon puso’ tayo? (b) ‘interon kamarerwa’ tayo? (c) “interon nonot” tayo?

⁷ Antoy labay ya ibaga nen Jesus nen imbaga ton nepeg tayon aroen so Dios ed ‘interon puso,’ ‘interon kamarerwa,’ tan “interon nonot” tayo? Say labay ya ibaga na ‘interon puso’ et saray emosyon, pilalek, tan liknaan tayo. Say ‘interon kamarerwa’ et ontutukoy ed no siopa tayo bilang too tan kaibad satan so amin ya gagawaen tayod bilay. Tan say “interon nonot” et say paraan na panag-isip tayo tan no anto ray iisipen tayo. Kanian idadanet sirin nen Jesus ya nepeg tayon aroen si Jehova ed ami-amin ya inkatoo tayo tan amin ya walad sikatayo.

8. No talagan inaro tayoy Dios, anto ray gawaen tayo?

⁸ No inaro tayoy Dios ed interon puso, kamarerwa, tan nonot tayo, makuli tayon aralen so Salita to, mabulos tayon gawaey pagagawa to, tan maseseg tayon ipulong so maong a balita na Panarian. (Mat. 24:14; Roma 12:1, 2) No gawaen tayo iratan, lalo tayon onapit ed sikato. (Sant. 4:8) Siempre, agtayo nilistan amin so rason no akin ya nepeg tayon aroen so Dios. Balet aralen tayo pa so pigarad saratan.

9. Akin ya inarom si Jehova bilang say Amalsa tan Manangitarya tayo?

⁹ Si Jehova so Amalsa tan Manangitarya  tayo. “Diad panamegley to et walay bilay tayo tan onggagalaw itayo,” so kuan nen Pablo. (Gawa 17:28) Inter nen Jehova so marakdakep ya planetan dalin pian panayaman tayo. (Sal. 115:16) Sikatoy mangitatarya met na naakan tan arum nin kaukolan tayo pian nasustuni so bilay. Kanian nibaga nen Pablo ed saray taga Listra ya mandadayew ed idolo ya say “mabilay a Dios . . . et agto inabuloyan ya anggapoy mamaneknek a sikatoy nanggawa na maong, a mangiiter ed sikayo na uran manlapud tawen tan mabunga iran panaon, tan mamepenek a maong ed kapusoan yo diad panamegley na naakan tan maabig a panliliket.” (Gawa 14:15-17) Agta baleg itan a rason ya aroen tayoy Makapadinayew ya Amalsa tan maaron Manangitarya tayo?​—Ecl. 12:1.

10. Antoy nepeg ya nalikna tayo lapud nanggawa so Dios na paraan pian naandi so kasalanan tan ipapatey?

¹⁰ Nanggawa so Dios na paraan pian naandi so kasalanan tan ipapatey ya atawir tayod si Adan. (Roma 5:12) Ibabaga na Biblia: “Ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:8) Seguradon manleppuad puso tayo so panangarod si Jehova lapud nanggaway paraan pian naperdona iray kasalanan tayo no magbabawi itayo tan no ipanengneng tayoy pananisia ed dondon bagat nen Jesus.​—Juan 3:16.

11, 12. Diad anto ran paraan ya inikdan itayo nen Jehova na ilalo?

¹¹ Iikdan itayo nen Jehova na ‘ilalo ya lapud satan et napapano itayo na gayaga tan deen.’ (Roma 15:13) Lapud ilalo ya iiter na Dios, nasusungdoan tayo ray subok ed pananisia. Saray alanaan ya ‘matoor anggad patey et naikdan na korona na bilay.’ (Apo. 2:10) Saray matoor ya diad dalin so ilalo da et makaawat na andi-anggaan ya bendisyon ed insipan ya Paraiso. (Luc. 23:43) Antoy nalilikna tayod satan ya marakep ya ilalo? Agta napapano itayo na gayaga tan deen, tan panangaro ed Dios ya angiter na “amin a maong a regalo tan amin ya ayadyarin langkap”?​—Sant. 1:17.

¹² Inter na Dios so ilalon kioli. (Gawa 24:15) Natural labat ya maermen tayo no walay inar-aro tayon naandid bilay, balet lapud ilalon kioli, ‘ag-itayo maneermen a singa ed paneermen na arum ya andian na ilalo.’ (1 Tes. 4:13) Lapud panangaro nen Dios ya Jehova, labalabay ton paolien iray inaatey, lalo lad saray matoor ya singa si Job. (Job 14:15) Imadyin mo pa labat so maliket ya pannenengneng lamet na sankakaaro tan sankakapamilya no abeten tayo la ray apaoli. Talagan napnapno so puso tayo na panangarod Ama tayod tawen ya angiter ed makapakelaw ya ilalon kioli!

13. Anto ray paneknek ya talagan iyaansakit itayo na Dios?

¹³ Talagan iyaansakit itayo nen Jehova. (Basaen so Salmo 34:6, 18, 19; 1 Pedro 5:6, 7.) Lapud amta tayo ya say maaron Dios et wadtan a lanang ya ontulong ed saray matoor ed sikato, nalilikna tayon protektado itayo ed pulok to. (Sal. 79:13) Tan isipen pa ni ray gawaen nen Jehova panamegley na Panarian to. Panganggaen la na pinili ton Ari ya si Jesu-Kristo so kaugsan tan paniirap diad dalin, tan kayari to et bendisyonan to so matulok ya totoo na agmanganggan kareenan tan maaligwas a bilay. (Sal. 72:7, 12-14, 16) Agta lapud sarayan sipan et napapakiwas itayon aroen so Dios ed interon puso, kamarerwa, biskeg, tan nonot tayo?​—Luc. 10:27.

14. Anto so agnaparaan ya pribilehyon inter na Dios ed sikatayo?

¹⁴ Inikdan itayo nen Jehova na agnaparaan ya pribilehyo ya manlingkor bilang Tasi to. (Isa. 43:10-12) Inar-aro tayo so Dios lapud inikdan to tayoy pankanawnawan suportaan so soberanya to tan ipasabi so tuan ilalo ed saray totoo. Mataletalek tayon ipupulong so maong a balita. Akin? On ta say mensahe tayo et base ed Salita na tuan Dios, tan amta tayon totooren toy amin a sipan to. (Basaen so Josue 21:45; 23:14.) On, no ilista tayoy amin ya bendisyon ya iiter nen Jehova tan saray  rason pian sikatoy aroen tayo, seguradon agmangangga itan. Balet say tepet, panon tayon nipanengneng so panangaro tayod sikato?

15. Panon ya ontulong so panaral tan pangiyaplika ed Salita na Dios?

¹⁵ Maseet ya aralen tan iyaplikay Salita to. No ontan so gawaen tayo, ipapanengneng tayon inaro tayoy Jehova tan talagan labay tayon say Salita to so mangiter na ‘liwawa ed basbas tayo.’ (Sal. 119:105) No walay dadalanen tayon problema, naliligliwa tayo ed onia ran maaron panamaseguro: ‘Say sakey a puso a maralit tan mansisibkel et agmo balawen, O Dios.’ ‘Say panangasim, O Jehova, so mangeegna ed siak. Diad karakel na nononoten ko, saray ligliwam so mamapaliket ed kamarerwak.’ (Sal. 51:17; 94:18, 19) Kakasian nen Jehova iray totoon maniirap, tan ontan met so nalilikna nen Jesus. (Isa. 49:13; Mat. 15:32) Legan tayon aaralen so Biblia, mas nanengneng tayoy panangaro nen Jehova ed sikatayo kanian lalon onelet so panangaro tayod sikato.

16. Akin ya oneelet so panangaro tayod Dios no naynay tayon manpipikasi?

¹⁶ Naynay ya manpikasi. Panamegley na pikakasi et lalo itayon onapit ed Dios ta amta tayon ‘dedengelen to ray pikakasi tayo.’ (Sal. 65:2) No nalikna tayon eebatan nen Jehova iray pikakasi tayo, onaralem so panangaro tayod sikato. Singa bilang, ompan alikas tayon agto aabuloyan a nipaarap tayod tukso ya agtayo nitepel. (1 Cor. 10:13) Diad panaon ya mapagpaga itayo tan masimoon tayon onkerew na tulong ed si Jehova, nayarin nalikna tayoy agnaparaan ya “deen na Dios.” (Fil. 4:6, 7) No maminsan, diad isip tayo labat so pampikasi tayo​—singa si Nehemias—​balet nalikna tayon eebatan itan nen Jehova. (Neh. 2:1-6) Legan tayon ‘mantutultuloy ed pikakasi’ tan nanenengneng tayoy ebat nen Jehova ed saray kerew tayo, onelet so panangaro tayod sikato tan lalon ombiskeg so talek tayon tulongan to itayo ed onsabi ni ran subok.​—Roma 12:12.

17. No inaro tayoy Dios, antoy nepeg ya panmoria tayod iyatendid saray pantitipon?

¹⁷ Iyugali so regular ya iyatendid saray aral, asemblea, tan kombension. (Heb. 10:24, 25) Nensaman, wala ray pantitipon na saray  Israelita pian ondengel tan makaaral ira nipaakar ed si Jehova, diad ontan et nawalaan iray takot ed sikato tan naunor day Ganggan to. (Deu. 31:12) No talagan inaro tayoy Dios, aliwan makapabelat so pangunor ed saray ganggan to. (Basaen so 1 Juan 5:3.) Kanian agtayon balot aabuloyan ya walay makasbel ed iyatendi tayod saray pantitipon, ya lapud satan et nabalang so inmunan panangaro tayod si Jehova.​—Apo. 2:4.

18. Lapud aro ed Dios, antoy gawaen tayo nipaakar ed maong a balita?

¹⁸ Maseseg ya ipulong so “katuaan na maong a balita.” (Gal. 2:5) Say panangaro ed Dios so mamakiwas ed sikatayon ipaamta ed arum so Mesianikon Panarian na inar-aro ton Anak, ya miguerra “nisengeg ed katuaan” diad Armagedon. (Sal. 45:4; Apo. 16:14, 16) Makapaliket so pibiang ed kimey ya panaggaway babangatan, ya lapud satan et natutulongan tayo ray totoon naamtaan so aro na Dios tan say insipan ton balon mundo!​—Mat. 28:19, 20.

19. Akin ya nepeg tayon apresyaen iray elder ed kongregasyon?

¹⁹ Ipanengneng so apresasyon ed saray elder ed kongregasyon. (Gawa 20:28) Sankanonot ya lanang nen Jehova so pankaabigan tayo, kanian inter to ray elder ed kongregasyon. Saray elder et “singa sakey a salimbeng no panaoy maragem, tan sakey a pasen ya amotan no walay bagyo. Magmaliw iran singa kulos a managagus ed sakey ya amagamagan pasen, tan sakey a sirom ed petek na balbaleg a bato ed kinmelang a dalin.” (Isa. 32:1, 2, Maung a Balita) Talagan misalsalamat itayo no walay pasen ya naamotan tayo no walay maksil ya dagem o bagyo! Tan makainawa tayo no walay nasiroman tayo no mansasnit so petang na agew! Nanengneng ed sayan panangikompara ya saray elder et lapuan na espiritual ya tulong tan panamaseseg ya kakkaukolan tayo. No unoren tayo iray mangidadaulo, ipapanengneng tayon aapresyaen ti rayan “langkap a lalaki” tan papaneknekan tayon inaro tayoy Jehova tan say Kristo, say Ulo na kongregasyon.​—Efe. 4:8; 5:23; Heb. 13:17.

20. No inarom so Dios, panon mon iyaplika so Santiago 1:22-25?

²⁰ No inarom si Jehova, ‘magmaliw kan mananumpal na salita, tan aliwan dumerengel labat.’ (Basaen so Santiago 1:22-25.) No say sakey et “mananumpal na salita” tan walay pananisia to, panggunaetan toy mibiang ed panagpulong tan mankomento ed saray aral. Lapud inarom so Dios, unoren moy “ayadyarin ganggan” to, ya kaibad satan so amin ya labay ton gawaen mo.​—Sal. 19:7-11.

21. Antoy nayarin pangikomparaan ed saray impapuson pikakasim?

²¹ Say panangarom ed Dios ya Jehova so mamakiwas ed sikan manpikasin lanang ed sikato. Diad Israel nensaman, inagew-agew ya mamopool na insenso iray saserdote. Inkompara nen Arin David iray pikakasi tayo ed insenso nen inkansion to: “Pasabien mo so pikakasik ed arap mo [Jehova] a singa insenso; tan say panangitagey ko ed limalimak a singa say bagat ed ngarem.” (Sal. 141:2; Exo. 30:7, 8) Komon ta saray mapaabeban pikakasim, saray masimoon ya pikekerew mo, tan saray impapuson balikas na panangidayew tan pisasalamat mo ed Dios et singa ambalbalingit ya insenso ya mangisisimbolo ed pikakasin aabobonan nen Jehova.​—Apo. 5:8.

22. Antoy aralen ed onsublay ya artikulo?

²² Imbaga nen Jesus ya nepeg tayon aroen so Dios tan kapara tayon too. (Mat. 22:37-39) Pian naaro tayoy kapara tayon too, makatulong so panangarod si Jehova tan saray prinsipyo to. Aralen tayoy labay ya ibaga na satan diad onsublay ya artikulo.