1, 2. (a) Siopa so sankaabigan ya tasi nen Jehova? (b) Antoy kabaliksan na ngaran nen Jesus, tan panon a nambilay unong ed satan?

“LAPUD saya et nianak ak, tan lapud saya et linma ak dia ed mundo, ta pian tasian ko so katuaan.” (Basaen so Juan 18:33-37.) Nen bibistaen si Jesu-Kristo, imbaga to iratan ya salita ed Romanon gobernador na Judea. Kakkayarin impabidbir nen Jesus ya sikatoy ari. Kalabas na pigaran taon, binitla nen apostol Pablo a si Jesus et makpel ya ‘nantasi ed si Poncio Pilato.’ (1 Tim. 6:13) On, no maminsan et talagan kaukolan so pakpel pian makapansiansia itayon “matoor tan tuan tasi” ed sayan mundo nen Satanas ya napnoy panagbusol!—Apo. 3:14.

² Lapud nianak ya Judio si Jesus, sipor lan tasi nen Jehova. (Isa. 43:10) Sikato so nagmaliw ya sankamaongan a tasi parad ngaran na Dios. Talagan nambilay si Jesus unong ed kabaliksan na ngaran to ya inter na Dios. Nen imbaga na anghel ed pinagka-ama nen Jesus a si Jose ya nanlukon si Maria panamegley na masanton espiritu, oniay inyarum na anghel: “Sikatoy mangiyanak na sakey a laki, tan say ingaran mo ed sikato et Jesus, ta sikatoy mangilaban ed totoo to ed saray kasalanan da.” (Mat. 1:20, 21) Mipakna iray scholar na Biblia ya say ngaran nen Jesus et nanlapud Hebreon ngaran ya Jeshua, a mankabaliksay  “Si Jehova so Mangilaban.” Dugaruga itan ta tinulongan to ray “abalang a karnero ed sankaabungan na Israel” pian magbabawi rad kasalanan da, diad ontan et abobonan ira lamet nen Jehova. (Mat. 10:6; 15:24; Luc. 19:10) Atan so rason no akin a maseseg ya nantasi si Jesus nipaakar ed Panarian na Dios. Inrekord nen Marcos: “Linma si Jesus ed Galilea, ya impupulong to so maong a balita na Dios tan inkuan to: ‘Asabi la so aturon panaon, tan asingsingger la so panarian na Dios. Magbabawi kayo, sikayoran totoo, tan manisia kayo ed maong a balita.’” (Mar. 1:14, 15) Makpel met ya kinondena nen Jesus iray Judion lider na relihyon, tan satan so sakey a rason no akin ya sikatoy impapatey da.—Mar. 11:17, 18; 15:1-15.

3. Antoy agawa ed mikatlon agew na impatey nen Jesus?

³ Walay makapakelkelaw ya agawa! Diad mikatlon agew na impatey nen Jesus, sikatoy pinaoli nen Jehova, aliwan bilang too, noagta bilang imortal ya espiritu. (1 Ped. 3:18) Pian napaneknekan nen Jesus ya sikatoy apaoli, nampanengneng ed saray disipulo to bilang too. Diad mismon agew na inkioli to, sikatoy nampanengneng ya ag-onkulang ed limaran beses.—Mat. 28:8-10; Luc. 24:13-16, 30-36; Juan 20:11-18.

4. Anton pantitipon so indaulo nen Jesus kayari inkioli to, tan anton responsabilidad so impalinew tod saray disipulo to?

⁴ Diad komaliman impanpanengneng nen Jesus, saniiba iray apostol to tan arum ni. Diad saman ya agnalinglingwanan ya agawa, singa to indauloy panagaral ed Salita na Dios. “Sigpot ton nilukasan iray nonot da pian natalosan da so kabaliksan na Kasulatan.” Kanian atalosan da ya say impamatey ed sikato na saray kakabusol na Dios tan say mamilagron inkioli to et nipropesiyad Kasulatan. Diad sampot na saman ya impanpanengneng tod sikara, malinew ton imbaga no antoy responsabilidad da. Imbaga tod sikara ya “unong ed ngaran to et nipulong ed amin a nasyon so nipaakar ed panagbabawi pian naperdona iray kasalanan”—tan onggapo itan ed Jerusalem. Inyarum to: “Sikayoy magmaliw a tasi nipaakar ed sarayan bengatla.”—Luc. 24:44-48.

5, 6. (a) Akin et imbaga nen Jesus ya: “Mantasi kayo nipaakar ed siak”? (b) Anton balon kabiangan na gagala nen Jehova so kaukolan ya ipaamta na saray disipulo nen Jesus?

⁵ Kanian kayari 40 agew, diad samay sampot ya impanpanengneng nen Jesus, seguradon atalosan la na saray apostol no antoy kabaliksan na sayan simpli balet mapuersan ganggan: “Mantasi kayo nipaakar ed siak diad Jerusalem tan ed interon Judea tan Samaria tan diad sankaarawian a pasen na dalin.” (Gawa 1:8) Akin et imbaga nen Jesus ya: “Mantasi kayo nipaakar ed siak,” aliwan ed si Jehova? Israelita iray disipulo kanian tasi la ra nen Jehova. Balet magmaliw met la ran tasi nen Jesus. Antoy labay ya ibaga na satan?

⁶ Kaukolan ya ipaamta na saray disipulo nen Jesus so balon kabiangan na gagala nen Jehova—ya mas makapadinayew nen samay impangibulos tod saray Israelita ed impakaaripen dad Ehipto tan diad Babilonia. Lapud impatey tan inkioli nen Jesu-Kristo, nagmaliw ya posible so kibulos ed mas graben panangaripen, say panangaripen na kasalanan tan patey. Nen Pentecostes 33 C.E., impaamta na saray alanaan ya disipulo nen Jesus ed totoo so “makapadinayew iran gawa na Dios,” tan dakel so kinmiwas. Kanian manlapud nikawanan ya lima na Ama to diad tawen, anengneng nen Jesus ya nagmaliw a mas makabaliksan so ngaran to lapud nilibo so  nagbabawi tan anisia ya sikato so inusar nen Jehova pian nilaban ira.—Gawa 2:5, 11, 37-41.

7. Antoy papaneknekan na saray agawa nen Pentecostes 33 C.E.?

⁷ Saramay agawad Pentecostes nen 33 C.E. et paneknek ya maar-aron inawat nen Jehova so balor na perpekton bagat nen Jesus pian sakbongan so kasalanan. (Heb. 9:11, 12, 24) Impaliwawa nen Jesus ya sikatoy “linma dia ya agpanlingkoran, noagta manlingkor tan iter toy kamarerwa to a panondon ed amayamay.” (Mat. 20:28) Say “amayamay” ya minabang ed dondon nen Jesus et aliwa labat ya saray magbabawin Judio. Imbes, linawa na Dios ya “nilaban so amin a klase na totoo” lapud say dondon so “mangekal ed kasalanan na mundo!”—1 Tim. 2:4-6; Juan 1:29.

8. Panon kalaknab so impantasi na saray disipulo nen Jesus, tan panon dan agawaan itan?

⁸ Kasin walay pakpel na saray disipulo nen Jesus nensaman ya mantasi nipaakar ed sikato? On, balet aliwan diad sarilin biskeg da. Sikaray pinakiwas tan pinabiskeg na makapanyarin masanton espiritu nen Jehova ya mantultuloy a mantasi. (Basaen so Gawa 5:30-32.) Kalabas na manga 27 taon manlapu nen Pentecostes 33 C.E., nibagan say ‘katuaan na maong a balita’ et akasabi lad saray Judio tan Gentil “ed amin a pinalsa diad silong na tawen.”—Col. 1:5, 23.

9. Singa nipasakbay, antoy agawad orihinal ya Kristianon kongregasyon?

⁹ Makapaermen balet ta say orihinal ya Kristianon kongregasyon et kalkalnan arutakan. (Gawa 20:29, 30; 2 Ped. 2:2, 3; Jud. 3, 4) Singa impasakbay nen Jesus, mangiloob si Satanas na apostasya ya onkayat tan manutak ed tuan Inkakristiano anggad isabi na “sampot a panaon na sayan sistema na mundo.” (Mat. 13:37-43) Insan itrono nen Jehova si Jesus bilang Ari ya manuley ed mundo. Agawa itan nen Oktubre 1914, tan ginmapod satan so “kaunoran iran agew” na mauges ya mundo nen Satanas.—2 Tim. 3:1.

10. (a) Anton importantin petsa so impulong na alanaan iran Kristiano? (b) Antoy agawa nen Oktubre 1914, tan anto ray ebidensya ya agawa itan?

¹⁰ Pigaran dekada antis na Oktubre 1914, ipupulong la na saray alanaan a  Kristiano ya importante itan a petsa. Imbase da itan ed propesiya nen Daniel nipaakar ed baleg a kiew ya binatang tan onsimit lamet kayari “pitoran panaon.” (Dan. 4:16) Satan ya panaon et tinukoy nen Jesus ya “aturon panaon na saray nasyon” diad samay propesiya to nipaakar ed kiwawala to tan “kasampotan na sistema na mundo.” Manlapu nen 1914, mapatpatnag ya Ari lay Jesus. (Mat. 24:3, 7, 14; Luc. 21:24) Kanian manlapud saman a taon, kaiba lad “makapadinayew iran gawa na Dios” so impangitrono tod si Jesus bilang Ari.

11, 12. (a) Antoy ginawa na balon Ari kayari guerra nen 1919? (b) Antoy mapatnag ya agawa manlapu nen 1935? (Nengnengen so litratod gapo na artikulo.)

¹¹ Bilang balon Ari na dalin, inggapo nen Jesu-Kristo ya ibulos iray alanaan ya papatumbok to ed panangaripen na “Makapanyarin Babilonia.” (Apo. 18:2, 4) Kayari guerra nen 1919, nilukas so pankanawnawa pian nipulong ed interon mundo so ginawa na Dios pian ilaban so totoo, tan say maong a balita nipaakar ed inkiletneg na Panarian. Sinambot na saray alanaan a Kristiano iyan pankanawnawa pian mantasi, tan lapud satan et nilibo nin alanaan so atipon pian magmaliw ya kaiban mananawir na Kristo.

¹² Manlapu nen 1935, malinew ya inggapo la na Kristo ya tiponey minilyon ya ‘arum a karnero,’ ya manugyop ed internasyonal ya “baleg ya ulop.” Diad panangidaulo na saray alanaan a Kristiano, aaligen met na baleg ya ulop so makpel ya alimbawa nen Jesus tan iyaabawag dan utang da ed Dios tan Kristo so kilalaban da. No itultuloy day mantasi tan mangipanengneng na pananisia ed dondon bagat na Kristo, makaliktar irad “baleg ya irap” ya maneral ed mundo nen Satanas.—Juan 10:16; Apo. 7:9, 10, 14.

13. Bilang Tasi nen Jehova, antoy determinado tayon gawaen, tan panon tayon nagawaan itan?

¹³ Komon ta lanang tayon pablien so pribilehyo tayo bilang Tasi ed “makapadinayew iran gawa” ya ginawa nen Jehova a Dios tan saray sipan tod arapen. Tua, aliwan naynay ya mainomay so mantasi. Dakel ed saray agagi tayo so walad saray teritoryan ag-interesado iray totoo, babalawen da ra, odino arap-arapan da ran papasegsegangen. Balet sarag tayon aligey ginawa nen apostol Pablo tan saray kaiba to. Inkuan nen Pablo: “Akapampakpel kamin maong diad tulong na Dios tayo pian nipulong mi ed sikayo so maong a balita nipaakar ed Dios diad pinasyan impansagpot mi.” (1 Tes. 2:2) Kanian, agtayo komon onsusuko. Determinado tayon tooren so dedikasyon tayo anggad kaderal na mundo nen Satanas. (Isa. 6:11) Agtayo  itan nagawaan ed sarilin biskeg tayo, balet singa saray inmuunan Kristiano, ipikasi tayod si Jehova ya diad panamegley na espiritu to et ikdan to tayoy “pakayari a mas mabiskeg nen say pakayari na too.”—Basaen so 2 Corinto 4:1, 7; Luc. 11:13.

14, 15. (a) Antoy panmoria na arum ya totoo ed saray Kristiano nen inmunan siglo C.E., tan antoy imbaga nen apostol Pedro ed sikara? (b) Antoy nepeg ya reaksion tayo no napasegsegang itayo lapud Tasi itayo nen Jehova?

¹⁴ Diad panaon tayo, minilyon so mangibabagan Kristiano ira, “balet diad saray gawa ra et . . . agda bibidbiren [so Dios], lapud sikaray makapadimla tan agmatulok tan agmanepeg ed antokaman a maabig a gawa.” (Tito 1:16) Tandaan tayon nen inmunan siglo et dakel so nambusol ed saray tuan Kristiano. Atan so rason no akin ya oniay insulat nen apostol Pedro: “No papabandayen kayo nisengeg ed ngaran nen Kristo, maliket kayo, ta walad sikayo so . . . espiritu na Dios.”—1 Ped. 4:14.

¹⁵ Kasin onaplika iratan ya pinuyanan a salita ed Saray Tasi nen Jehova natan? On, lapud tatasian tayo so panaari nen Jesus. Kanian no busolen da tayo lapud atawag itayod ngaran nen Jehova, ‘papabandayen da tayo met nisengeg ed ngaran nen Jesu-Kristo,’ ta oniay imbaga to: “Linma ak dia ed ngaran nen Amak, balet agyo ak inawat.” (Juan 5:43) Kanian no nasalim so napasegsegang lapud pampupulong mo, manpakpel ka. Paneknek itan ya aabobonan ka na Dios tan ‘walad sika so espiritu to.’

16, 17. (a) Antoy naeeksperiensya na saray lingkor nen Jehova ed interon mundo? (b) Antoy determinadom ya gawaen?

¹⁶ Anggaman ontan, tandaan met ya diad dakel a lugar ed interon mundo et amayamay ni mangaawat ed katuaan. Anggan diad saray teritoryan mabetbet ya napupulongan, wala ni ran siansiay naroromog tayon ondengel ed balibalin mensahe na kilalaban. Komon ta maseet tayon pawilen iray interesado tan no posible et iyaralan tayo ray Biblia. Tulongan tayo ran onaligwas anggad idedika day bilay da tan manpabautismo ra. Seguradon parehoy naliliknam ed si Sarie ya tagad South Africa, ya masulok lan 60 taon ya maseseg a Tasi. Inkuan to: “Misalsalamat ak ya maong ta diad panamegley na dondon bagat nen Jesus, walay maabig ya relasyon kod si Jehova, say Soberano na Uniberso, tan maliket ak ta nipapaamtak so maglorian ngaran to.” Dakel so atulongan da nen asawa ton si Martinus ya magmaliw a lingkor nen Jehova, kaiba lay taloran ananak da. Inyarum nen Sarie: “Anggapo lay arum a kimey ya makapangiter na liket, tan diad panamegley na masanton espiritu, iikdan itayon amin nen Jehova na biskeg ya kaukolan tayo pian nitultuloy tayo iyan kimey ya makapangisalbay bilay.”

¹⁷ Balanglan bautismado itayo lan Kristiano odino andi ni, dakel so rason tayon misalamat ed pribilehyon magmaliw a kabiangay sankamundoan ya kongregasyon na Saray Tasi nen Jehova. Kanian itultuloy tayoy sigpot a mantasi legan tayon panggugunaetay mansiansian malinis ed sayan marutak ya mundo nen Satanas. No gawaen tayo itan, napagalangan tayoy maar-aron Ama tid tawen, ya pribilehyo tayoy natawag ed ngaran to.