Importante iyan tepet lalo lad saramay naandian na inad-aron asawa. Nayarin pirpirawat dan nakaiba lamet so asawa ra diad balon mundo. Imbaga na sakey ya biyudo: “Agmi pa labay nen asawak ya napultot so paniba mi. Talagan labalabay mi saniban mandayew bilang sanasawa ed andi-anggaan. Atan nin siansia so naliliknak.” Kasin walay makatunongan ya rason ya ilaloan tayon saramay napaoli et nayari nin mangasawa o miasawa? Say simplin ebat et, agtayo nibaga.

Diad dakel ya taon, nabasad saray publikasyon tayo ya samay imbaga nen Jesus nipaakar ed kioli tan pangasawa et posiblin ontutukoy ed kioli diad dalin, tan saramay onolid balon mundo et agla mangasawa o miasawa. * (Mat. 22:29, 30; Mar. 12:24, 25; Luc. 20:34-36) Siempre, agtayo dogmatiko ed saya, balet kasin posible ya say tutukoyen nen Jesus et say kiolid tawen? Aralen tayon maong imay imbaga to.

Siopa ray katongtong nen Jesus nen imbaga to itan? (Basaen so Lucas 20:27-33.) Saray Saduceo ya agmanisiad kioli, tan nantepet ira nipaakar ed kioli tan piasawa ed bayaw lapud labay dan subokey Jesus. * Oniay inyebat to: “Saray totoo ed sayan mundo et mangaasawa tan miaasawa ra, balet saramay nibilang a makanepegan a makagamor ed satan a mundo tan ed kioli manlapud saray inaatey et agla mangasawa odino miasawa. Diad tua et agmet la ra ompatey, lapud singa ra angheles, tan sikaray ananak na Dios diad impagmaliw dan ananak na kioli.”—Luc. 20:34-36.

Akin et imbaga na saray publikasyon tayo ya nayarin say tutukoyen nen Jesus et kioli diad dalin? Walay duaran manunan rason. Unona, nayarin say iisipen na saray Saduceo nen katongtong day Jesus et say kioli diad dalin kanian nayarin samay ebat nen Jesus et nipaakar ed kioli diad dalin. Komadua, diad sampot na ebat nen Jesus et tinukoy toy Abraham, Isaac, tan Jacob. Sarayan matoor ya lalaki et kaibad saray napaoli diad dalin.—Luc. 20:37, 38.

Balet posible met ya say tutukoyen nen Jesus et kioli diad tawen. Akin et nibaga tayon ontan? Aralen tayoy duaran kabiangay imbaga nen Jesus.

“Saramay nibilang a makanepegan a makagamor . . . ed kioli manlapud saray inaatey.” Saray matoor ya alanaan et “ipapasen [ya] makana ed panarian na Dios.” (2 Tes. 1:5, 11) Niyabawag la ran matunong lapud dondon bagat kanian agla ra ukomen bilang makasalanan. (Roma 5:1, 18; 8:1) Sikaray atawag ya “maliket tan masanto” tan makanepegan ya napaolid tawen. (Apo. 20:5, 6) Kaiba balet ed saray napaolid dalin  iray “agmatunong.” (Gawa 24:15) Nibaga kasin “makanepegan” ed kioli iray agmatunong?

“Agmet la ra ompatey.” Diad arum ya bersion na Biblia, satan et impatalos ya “agla ra nayarin ompatey,” tan “anggapo lay pakayari na ipapatey ed sikara.” No ompatey iray matoor ya alanaan, paolien irad tawen tan naikday imortal ya bilay—agmangangga tan agnaderal. (1 Cor. 15:53, 54) Anggapo lay pakayari na patey ed saramay napaoli ed tawen. *

Base ed saray apantongtongan tayo, antoy nayarin konklusyon tayo? Posiblin say tutukoyen nen Jesus ed samay imbaga to nipaakar ed pangasawa tan kioli et say kioli ed tawen. No ontan sirin, nia ray pigaran naaralan tayo nipaakar ed saramay napaolid tawen: Agla ra mangasawa o miasawa, ag-ira nayarin ompatey, tan singa la ra saray anghel. Balet wala ni ray tepet ya kaukolan ya naebatan.

Unona, akin ya say iyebat nen Jesus et nipaakar ed kioli ed tawen anta say nayarin iisipen na saray Saduceo et say kioli ed dalin? Say iyeebat nen Jesus ed saray mankakabusol ed sikato et aliwan naynay ya unong ed nononoten da. Singa bilang, oniay imbaga to nen wala ray Judion onkekerew na tanda: “Igeba yo iyan templo, tan ipaalagey ko iya ed taloy agew.” Amta nen Jesus ya say sankanonot da et say literal ya templo, “balet say labay ton ibaga et say templo na laman to.” (Juan 2:18-21) Nayarin iisipen nen Jesus ya agto kaukolan ya ebatan iraman ya aliwan sinseron Saduceo ya agmanisiad kioli tan ed saray anghel. (Uli. 23:9; Mat. 7:6; Gawa 23:8) Balet posiblin labay nen Jesus ya ibangat ed saray sinseron disipulo to so nipaakar ed kioli ed tawen ta amta ton diad arapen et atan so ilalo ra.

Komadua, akin ya diad sampot na ebat nen Jesus et tinukoy toy Abraham, Isaac, tan Jacob, ya say ilalo da et kioli ed dalin? (Basaen so Mateo 22:31, 32.) Imanoen ya antis ton tinukoy irayan lalaki, imbaga to ray salitan “no nipaakar ed kioli na saray inaatey.” Diad satan ya imbaga to, nayarin duma lay tutukoyen to. Amta nen Jesus ya panisiaan na saray Saduceo iray sulat nen Moises kanian binitla to imay imbaga na Dios ed si Moises diad mandarlang ya melag a kiew pian paneknekan ya say kioli ed dalin et talagan kabiangay gagala na Dios.—Exo. 3:1-6.

Komatlo, no saray imbaga nen Jesus et nipaakar ed kioli ed tawen, kasin labay ya ibaga na satan ya saramay napaoli ed dalin et nayarin mangasawa o miasawa? Anggapoy espisipikon ebat na Biblia ed satan ya tepet. No say talagan tutukoyen nen Jesus et say kioli ed tawen, anggapoy nanengneng tayod imbaga to no kasin saray napaolid dalin et nayarin mangasawa o miasawa diad balon mundo.

Anggaman ontan, amta tayon ibabaga na Salita na Dios ya napultot so bedber na panangasawa no say sakey ed sikara et naandid bilay. Kanian agnepeg ya nakonsiensia so sakey ya balo no mandesisyon ya mangasawa o miasawa lamet. Personal itan ya desisyon tan agtayo ra nepeg ya balawen no mananap iray nakaiba da lamet ed bilay.—Roma 7:2, 3; 1 Cor. 7:39.

On, natural labat ya dakel so tepet tayo nipaakar ed bilay diad balon mundo. Imbes ya man-espikulasyon na ebat ed saratan ya tepet, mas maong so manalagar. Balet nia so segurado: Saray matulok et magmaliw ya maliket, lapud peneken nen Jehova so amin ya pankaukolan tan pilalek da diad sankaabigan a paraan.—Sal. 145:16.