Kapigan so Isabi na Panarian na Dios?
Kapigan so Isabi na Panarian na Dios?
“KATAWAN, ipawil mo so panarian ed Israel ed sayan panaon?” (Gawa 1:6) Labalabay a naamtaan na saray apostol no kapigan iletneg nen Jesus so Panarian to. Natan, kalabas na manga 2,000 a taon, siansia nin labalabay na totoo a naamtaan: Kapigan so isabi na Panarian na Dios?
Lapud say manunan impulong nen Jesus et say Panarian, nayarin ilaloan yo ya inebatan to itan a tepet. Tan talagan inebatan to itan! Aminpiga ton impaliwawa so espisipikon peryodo na panaon a tinawag ton presensia to. (Mateo 24:37) * Satan a presensia et mikonektaan a maong ed kiletneg na Panarian na Dios. Anto itan a presensia? Sansakeyen tayo pa so apatiran katuaan ya imparungtal na Biblia nipaakar ed presensia nen Kristo.
1. Andukey nin panaon so palabasen kayari ipatey nen Kristo antis ya onggapo so presensia to. Diad sakey ya ilustrasyon ya inter nen Jesus, inyaliling to so inkasikato ed too a “linma ed sakey a dalin ya arawi, pian awaten to nipaakar ed sikato so sakey a panarian.” (Lucas 19:12) Panon ya agawa itan ya ilustrasyon a mangipropropesiya ed si Jesus? Sikato so inatey tan pinaoli; insan sikatoy linma ed “dalin ya arawi,” salanti, diad tawen. Diad sananey ya ilustrasyon a mipara ed satan, impasakbay nen Jesus a say ipawil to bilang makapanyarin ari et nagawa labat “kayari andukey a panaon.”—Mateo 25:19.
Pigaran taon kayari insegep nen Jesus ed tawen, oniay insulat nen apostol Pablo: “Sikato [si Jesus], sanen insaklang to so saksakey a bagat lapu ed saray kasalanan dia ed andi-anggaan, inmirong ed nikawanan na Dios; manlapud natan angga ed arapen manaalagar angga ed saray kabusol to niyan ira a gagatinan na saray salisali to.” (Hebreos 10:12, 13) Kanian andukey nin panaon so impanalagar nen Jesus kayari insabi to ed tawen. Sayan impanalagar na Anak na Dios et anampot sanen sikatoy ginawa nen Jehova a Dios bilang Ari ed Panarian ya abayag lan insipan. Diad sayan panaon so inggapo na presensia nen Kristo. Nanengneng kasi na totoo itan a makapakelkelaw a nagawa?
2. Say presensia to et agnanengneng na literal a mata. Nonoten pa ya impaliwawa nen Jesus so tanda na presensia to. (Mateo 24:3) No say presensia to et nanengneng, nakaukolan ni kasi tanda? Isipen pa iyan ilustrasyon: Sikayo so mamaarap ed dayat. Diad dalan et wala iray nanengneng yon karatula a mangituturo ed laen yo. Balet, kasabi yo ed baybay, a sankanengneng yo la so maaw-awang a dayat, wala ni kasi nanengneng yon karatula ya akasulat so “Dayat”? Siempre anggapo la! Akin et mangiyan ni na karatula anta sankanengneng yo lan mismo itan?
Deneskribe nen Jesus so tanda na presensia to, aliwan pian napabitar to so bengatlan sankanengneng na literal a mata, noagta pian natulongan to ran makatalos ed no anto so nagawa ed tawen. Kanian, oniay inkuan nen Jesus: “Say isabi na Panariay Dios anggapoy kaiba ton tandan nanengneng na mata.” (Lucas 17:20, Maung a Balita) No ontan, panon a diad panamegley na tanda et nabidbir na totoo a ginmapo la so presensia nen Jesus?
3. Say presensia nen Jesus et napatnagan diad panamegley na saray graben problema ed dalin. Inkuan nen Jesus a say presensia to bilang Ari ed tawen et napatnagan diad dalin panamegley na saray guerra, eras, yegyeg, salot, tan kaugsan. (Mateo 24:7-12; Lucas 21:10, 11) Anto so sengegan na sarayan amin a kairapan? Ipapaliwawa na Biblia a si Satanas, say “prinsipe na sayan mundo,” et mapalaloy sanok to lapud amta to ya antiktikey lay panaon to natan ta ginmapo la so presensia nen Kristo bilang Ari. (Juan 12:31; Apocalipsis 12:9, 12) Sayan mabisbiskeg ya ebidensya na sanok nen Satanas tan say presensia nen Kristo et talagan sankaimano la ed panaon tayo. Apatnagan iyan ebidensya diad interon mundo tan diad sankagrabian a paraan nagkalalo la nen 1914, say taon a kuan na saray historyador ya anguma-uman lay kipapasen.
Amin iraya et singa mauges a balita, balet ta andi. Kabaliksan na saya a say Panarian na Dios et manuuley la natan ed tawen. Tan agmanbayag et uleyan la na sayan gobierno so interon dalin. Balet, panon a naamtaan na totoo so nipaakar ed sayan Panarian pian awaten tan pampasakopan da iyan pananguley?
4. Say presensia nen Jesus et napatnagan diad panamegley na panagpulong ed interon mundo. Inkuan nen Jesus a say presensia to et mipara ed “saray agew nen Noe.” * (Mateo 24:37-39) Si Noe so aglabat managgawa na biong, noagta “managpulong [met] na katunongan.” (2 Pedro 2:5) Pinasakbayan nen Noe iray totoo a say panangukom na Dios et asingger la. Inkuan nen Jesus a legan na presensia to et ontan met so gawaen na saray patumbok to diad dalin. Oniay impropesiya to: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.”—Mateo 24:14.
Unong a naaralan tayo ed akaunan artikulo, deralen na Panarian na Dios so amin a gobierno diad dalin. Diad panamegley na panagpulong, napapasakbayan so totoo a sayan gobierno ed tawen et magano lan onkiwas. Diad ontan, amin a totoo et nawalaan na pankanawnawa a makaliktar ed magano lan kadederal tan manpasakop ira ed satan a Panarian. Kanian, nia natan so importantin tepet, Antoy gawaen mo?
Kasin say Panarian na Dios et Maong a Balita Parad Sika?
Say mensahen impulong nen Jesus et mangiiter na agnaparaan ya ilalo. Kayari impanrebelde ed Eden, a nilibon taon lay apalabas, angiletneg si Jehova a Dios na gobierno a mangipetek ed agawa. Ipawil na sayan gobierno so datin kipapasen ya intarya na Dios parad matoor a totoo. Satan et say andi-anggaan a panayam da diad paraison dalin. Agta makapaliket a naamtaan a sayan abayag lan insipan a gobierno et manuuley la natan ed tawen? Aliwa itan a komplikado tan agnatalosan ya ideya, noagta talagan tudtua!
Natan, say tinuro na Dios ya Ari so manuuley la ed pegley na saray kabusol to. (Salmo 110:2) Diad sayan mauges a mundon sinmian ed Dios, susumpalen na Mesias so pilalek na Ama to ya anapen so amin a malabay a makapikabat tan mandayew ed Dios diad “espiritu tan katuaan.” (Juan 4:24) Say ilalon pambilay na andi-anggaan diad uley na Panarian na Dios et para ed amin a poli, edad, tan kipapasen na panagbilay. (Gawa 10:34, 35) Komon ta awaten mo iyan marakdakep a pankanawnawa. Aral mo so nipaakar ed Panarian na Dios natan, pian makapambilay ka ya andi-anggaan diad matunong a pananguley na satan!—1 Juan 2:17.
[Paimano ed leksab]
^ par. 3 Diad saray Biblia a Pangasinan, say impangipatalos da ed salita a presensia et “isabi.” Balet say orihinal a Griegon salita ya angalaan ed saya et pa·rou·siʹa a mankabaliksan na “presensia,” odino “pagmaliw a presente,” “kiwawala.”
^ par. 10 Satan ya imbaga nen Jesus et ontulong pian nipetek so lingon ideya lapud aliwan susto so impangipatalos na arum a bersion na Biblia ed salitan “presensia.” Say impangipatalos na arum ed satan et “isabi” odino “ipawil,” a mankabaliksan ya antikey labat itan a panaon. Balet, imanoen ya ag-inkompara nen Jesus so presensia to ed Delap diad agew nen Noe, ya aminpinsan ya agawa, noagta diad “saray agew nen Noe,” a sankaimportantian a peryodo na panaon. Mipara ed panaon nen Noe, say presensia nen Kristo et sakey a peryodo na panaon a saray totoo so okupadon maong ed inagew-agew a kabibilay da kanian agda la im-imanoen so pasakbay.
[Saray litrato ed pahina 8, 9]
Saray mauges a balita ya inagew-agew tayon narerengel so mamapaneknek a magano lan onsabi iray maabig a bengatla
[Credit Line]
Antiaircraft gun: U.S. Army photo