Espisyal a Publikon Paliwawa

Siopay Kualipikadon Manuley ed Katooan?

Siopan manuley so sarag ton

• solusyonan iray problema ed ekonomya, a nigarantiya toy dakel a naakan tan marakep ya ayaman parad amin?

• amperen iray kalamidad, pian agla naeksperiensya na totoo so makaderal iran epekto na tsunami, bagyo tan yegyegyeg?

• ekalen so amin a sakit, ya ipawil to ni ingen ed kaksilan iray maedad la?

• paandien so guerra, pian saray uuleyan to et manbilay a mareen tan andi-paga?

• ipawil so perpekton kipapasen na dalin, a gawaen to iyan sakey a paraiso?

Saksakey labat so Manuley a makapangiter na oniaran bendisyon. Siopa iyan Manuley? Naebatan itan a tepet diad publikon paliwawa a say tema to et “Siopay Kualipikadon Manuley ed Katooan?” Sayan diskurso a base ed Biblia et nagawa diad masulok a 230 a bansa, no Abril 6, 2008, agew na Simba, diad Kingdom Hall na saray Tasi nen Jehova. Ipaamta na saray Tasi diad lugar yo so eksakton oras tan no iner itan nagawa. Maliket mi kan imbitaan ya onatendi ed sayan paliwawa.