Onapit ed Dios

Sikatoy “Ag-arawi ed Sinansakey ed Sikatayo”

Gawa 17:24-27

TALAGAN melmelag labat so too no ikompara’d maaw-awang ya uniberso. Kanian, nayarin isipen mo, ‘Talaga kasin posible a saray totoo et nawalaan na maapit a relasyon ed Makapanyarin-amin a Dios?’ Magmaliw labat itan a posible no say Dios, a say ngaran to et Jehova, et labay ton onapit itayo ed sikato. Labay to kasi? Say makapaliket ya ebat ed satan so naromog ed marakdakep iran balikas nen apostol Pablo ed saray edukadon lalaki ed Atenas, a nirekord diad Gawa 17:24-27. Imanoen pa so apatiran bengatla ya imbaga nen Pablo nipaakar ed si Jehova.

Unona, imbaga nen Pablo a say Dios so “nanggawa ed mundo tan saray amin a bengatla a wala ed sikato.” (Bersikulo 24) Saray mararakep tan nanduruman pinalsa et rason pian panliketan tayoy bilay tan paneknek iratan a say Manamalsa tayo et manonot tan maaro. (Roma 1:20) Aliwan makatunongan sirin ya isipen a say onian Dios et iyarawi toy inkasikato ed inad-aro ton totoo.

Komadua, si Jehova so ‘mangiiter ed amin na bilay, linawa, tan ami-amin a bengatla.’ (Bersikulo 25) Si Jehova so Subol na bilay. (Salmo 36:9) Say dagem, danum, tan tagano et kakkaukolan ed bilay, tan amin iraya et regalo a nanlapud Manamalsa tayo. (Santiago 1:17) Kasin makatunongan so panisian sayan maiter a Dios tayo et iyarawi toy inkasikato, diad ontan et isiblet to so pankanawnawan sikatoy nakabat tayo tan onapit tayo ed sikato?

Komatlo, ‘ginawa na Dios so sakey a too a pansengegan na amin a nasyon na totoo.’ (Bersikulo 26) Si Jehova et patas tan agbalot manangidumaduma odino manlalabi. (Gawa 10:34) Akin et ontan so nibaga tayo? Pinalsa na Dios so ‘sakey a too,’ salanti, si Adan, a nanlapuan na amin a nasyon tan rasa. “Labay [na Dios] a saray amin a totoo nilaban.” (1 Timoteo 2:4) Sirin, amin tayo et walaan na pankanawnawan onapit ed sikato, antokaman so kolor na baog, rasa, odino kultura tayo.

Kaunoran, imbalikas nen Pablo so talagan makapaseseg a katuaan: Si Jehova et “ag-arawi ed sinansakey ed sikatayo.” (Bersikulo 27) Anggaman si Jehova so nidaydayew bilang Sankatagyan, sikatoy lawas mainomay ya asinggeran na saramay talagan malabay ya onapit ed sikato. Ipapaseguro ed sikatayo na Biblia a sikatoy ag-arawi, noagta, “asingger ed amin ya ontawag ed sikato.”​—Salmo 145:18.

Malinew ed saray salita nen Pablo a labay na Dios a sikatayoy onapit ed Sikato. Balet, impaliwawa nen Pablo a say ontan a maapit a relasyon ed Dios et para labat ed saramay maseet a ‘mananap’ tan aliling to et ‘mankarapas’ ed Sikato. (Bersikulo 27) Sakey a reperensya parad saray managpatalos na Biblia so angibagan “say kabaliksan na sayan duaran salita et balanglan sakey a bengatla a posiblin nagawa . . . odino pilalek a posiblin nadampot.” Singa bilang, dia ed ambilunget balet ta kabkabisadom a kuarto, nayarin kaukolan mo nin karapasen no iner so kawalaan na switch na silew odino no iner so kawalaan na puerta, ingen ta segurado kan naromog mo itan. Ontan met, no talagan labay tayon anapen so Dios tan karapasen, a singa panangibaga, seguradon walay gunggona na saray sagpot tayo. Impaseguro nen Pablo a “sikato [say Dios] so naromog” tayo.​—Bersikulo 27.

Pirawat mo ta so napaapit ed Dios? No tekep na pananisia et gapoan mo lan “anapen” tan ‘karapasen’ so Dios, a singa panangibaga, agka nadismaya. Agmairap so pananap ed si Jehova lapud sikatoy “ag-arawi ed sinansakey ed sikatayo.”