Onapit ed Dios

Ukom a Lawas Ton Gagawaen no Antoy Duga

Genesis 18:22-32

HUSTISYA. Inka-makatunongan. Agpanaglabi. Agta labalabay moy onia ran alay-abig a kualidad? Nisipor ed sikatayoran totoo so liknaan a labay tayoy natrato ed makatunongan a paraan. Makapaermen balet ta amayamay natan so nagagawan ag-inkahustisya. Balet, walay sakey ya Ukom a makanepegan ed panagmatalek tayo​—si Jehova a Dios. Lawas ton gagawaen no antoy duga, unong ya ipapabitar na impantongtong da nen Abraham, a nirekord ed Genesis 18:22-32. *

Sanen impaamta nen Jehova ed kinen Abraham so desisyon ton imbestigaan so Sodoma tan Gomorra, nampagaan nen Abraham iramay matunong a totoon wadtan, kaiba lay kaanakan ton si Lot. Oniay mikakasin intepet nen Abraham ed kinen Jehova: “Tunawen mo ta so saray bagel a pati saray matunong? Et panon ey no wala so limamplo a matunong ed loob na syudad, deralen mo ta ni so saman a pasen ya agmo palabasen a nisengeg ed saray limamplo a wadman?” (Bersikulo 23, 24) Inkuan na Dios ya agto deralen iraman a syudad no walay anggan 50 labat a matunong a wadman. Insan, aminlima nin akitawalan si Abraham ed kinen Jehova, ya anggad samay 50 et nagmaliw labat lan samplora. Balet diad amin na satan, inkuan na Dios ya agto deralen iraman a syudad no walay onman karakel a matunong ditan.

Mirarasonan kasi Abraham ed Dios? Andin balot! Ta no ontan, mapaatagey sirin si Abraham. Balet diad panagsalita to et sankapatnagan so respeto tan kapaabebaan. Tinawag toy inkasikato a “dabok tan dapol” lambengat. (Bersikulo 27, 30-32) Sakey ni, sankapatnagan ed samay intepet nen Abraham a sikatoy mataletalek a makatunongan si Jehova, ya ag To ilanor a deralen iray matunong ed saray marelmeng. Inkuan to: “Agta gawaen na Ukom na amin a dalin so maalas [odino, duga]?”​—Bersikulo 25.

Duga kasi si Abraham ed saramay imbaga to? Parehon on tan andi. Sikatoy alingo diad impanisip ton walay ag-onkulang ed samploran matunong a too diad Sodoma tan Gomorra. Balet, petepeteg a sikatoy duga diad impangibaga ton agbalot “pipapatey [na Dios] so saray matunong ed saray bagel.” Diad saginonor, sanen dineral na Dios iratan a syudad, akaliktar so matunong a toon si Lot tan say duaran mamarikit to diad tulong na saray anghel.​—2 Pedro 2:7-9.

Anto so ibabangat na sayan salaysay ed sikatayo nipaakar ed si Jehova? Sanen impaamta nen Jehova ed kinen Abraham so gagala Ton inspeksionen iraman a syudad, singa to inimbitaan si Abraham a mangibaga na nalilikna to. Insan sikatoy maan-anos a dinmengel legan ya ibabalikas na kaaro ton si Abraham so kapapagaan to. (Isaias 41:8) Bali-bali iyan alimbawa a mangibabangat ed sikatayon si Jehova et mapaabeban Dios, ya agto memelmelagen noagta rerespetoen to’ray totoon lingkor to! Malinlinew sirin a walaan itayo na amin a rason pian sigpot a manmatalek ed si Jehova, say Ukom a lawas ton gagawaen no antoy duga.

[Paimano ed leksab]

[Litrato ed pahina 24]

Akitawalan si Abraham ed si Jehova nipaakar ed Sodoma tan Gomorra