No Panon Mon Natalosan so Biblia

1. Patulongan ed Samay Autor

“Dati, manbabasa ak na Biblia antis ak a naugip,” so inkuan nen Ninfa a taga Italya. “Ta amtak a Salita itan na Dios, tan anggano agak naliliketan ed pambabasak, labay kon naamtaan no antoy insulat na Dios ditan. Labay ko komon a basaen itan ya amin. Diad gapo, nanainomayan ak ni. Balet kasabik ed saramay partin mairap ko lan talosan, intundak la.”

AGAWA la kasi ed sika itan? Ontay nagagawa ed dakel. Ingen singa nibaga la, labay nen Jehova, say autor na Biblia, a natalosan moy Salita to. Panon mo balet a natalosan itan? Say unonan gawaen mo et patulongan ka’d samay autor na satan.

Saray apostol nen Jesus et impasen ya “andi-aral tan kabanyakan” ta ag-ira akapanaral ed saray relihyoson eskuelaan na Judio. (Gawa 4:13) Anggaman ontan, pinaseguroan ira nen Jesus a sarag dan talosan so Salitay Dios. Panon? Oniay inkuan to: “Say managligliwa, salanti say espiritu santo, a sikato so ibaki dia na Ama ed ngaran ko, ibangat to ed sikayo so amin a bengabengatla.” (Juan 14:26) Inusar na Dios so masanton espiritu to, odino say aktibon puersa to, pian palsaen so dalin tan amin a mabilay a wadtan. (Genesis 1:2) Inusar to met itan pian puyanan so 40 lalaki a mangisulat na kanonotan to ed Biblia.  (2 Pedro 1:20, 21) Satan met lanlamang ya espiritu so ontulong ed saramay labay dan talosan so Biblia.

Panon kan makaawat na masanton espiritu na Dios? Nepeg mon kerewen itan tekep na pananisia. Diad tua, ompan kaukolan mon tuloytuloy a kerewen itan. “Kerew kayo, et naikdan kayo,” so kuan nen Jesus. “No . . . amta yo so mangiter na saray maong a panangaro ed saray anak yo, agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:9, 13) Labalabay nen Jehova ya ikdan na masanton espiritu iramay masimoon ya onkekerew ed satan. Sayan aktibon puersa so ontulong ed sikan natalosan iray impuyan a salita ya insulat ed Biblia, pigan libon taon la so apalabas. Ikdan ka met na espirituy Dios na nakaukolan mon dunong pian niyaplikam ed bilay mo iray mapuersan mensahe na Biblia.​—Hebreos 4:12; Santiago 1:5, 6.

Sirin, kapagno manbasa kay Biblia, manpikasi ka ed Dios, kerew ka’d sikato na masanton espiritu pian natulongan kan natalosan so Salita to.