No Antoy Imbangat nen Jesus Nipaakar ed Dios

“Say peteg labat a makapikabat ed Ama et say Anak. Balet labay na Anak ya ipaamta ed arum so nipaakar ed Ama, ta pian sikatoy nakabat da met.”​—LUCAS 10:22, CONTEMPORARY ENGLISH VERSION.

DIAD abaybayag lan panaon antis nin sikatoy nagmaliw a too, say panguloan ya Anak na Dios et maapit lan akaiba nen Ama to. (Colosas 1:15) Kanian kabkabat to so panagnonot, liknaan, tan paraan nen Ama to. Sanen sayan Anak et linma diad dalin bilang say toon Jesus, labalabay ton ibangat so katuaan nipaakar ed Ama to. Dakel so naaralan tayo nipaakar ed Dios diad idengel tayo ed ibaga na Anak to.

Ngaran na Dios Say ngaran na Dios a Jehova et sankaimportantian ed si Jesus. Labay na sayan inad-aron Anak a naamtaan tan usaren na arum so ngaran nen Ama to. Diad tua, say mismon ngaran a Jesus et mankabaliksan na “Si Jehova so Kilalaban.” Diad samay labi antis na impatey nen Jesus, oniay impikasi to ed si Jehova: “Impakabat ko ed sikara so ngaran mo.” (Juan 17:26) Agpankelawan sirin no akin ya inusar toy ngaran na Dios tan impaamta to itan ed arum. On, ta no saramay onderengel ed si Jesus et agda amtay ngaran na Ama to tan say kabaliksan na satan, panon dan natalosan so katuaan nipaakar ed si Jehova? *

Say baleg a panangaro na Dios Aminsan et oniay impikasi nen Jesus ed Dios: “Ama, . . . inarom ak antis nin niletneg so mundo.” (Juan 17:24) Sanen walad tawen si Jesus, alikna toy panangaro na Dios kanian diad dalin et nipatnag to itan ya aro diad dakel tan alay-abig iran paraan.

Impanengneng nen Jesus a say panangaro na Dios et malaknab. Inkuan nen Jesus: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Say Griegon salita ya impatalos a “mundo” et agmankabaliksan a “dalin.” Say tutukoyen na saya et saray totoo, on, amin a katooan. Ontan lay panangaro na Dios ed totoo kanian inter toy pinabpabli ton Anak pian nibulos iray matoor a totoo manlapud kasalanan tan ipapatey tan nawalaan iray ilalon andi-anggaan a bilay. Agtayo nasukat so kalaknab odino kaaralem na satan a baleg a panangaroy Dios.​—Roma 8:38, 39.

Impaseguro nen Jesus iyan makapatenyeg-puson katuaan: Inad-aro nen Jehova iray managdayew to bilang indibidual. Imbangat nen Jesus a si Jehova et singa sakey a pastol, a say kada karnero to et ipapasen ton mabmabli. (Mateo 18:12-14) Inkuan nen Jesus ya anggapoy anggan sakey ya anuyaw a napelag ed dalin ya ag-amta nen Jehova. Inyarum to ni: “Anggan saray buek na ulo yo et abilang ya amin.” (Mateo 10:29-31) No naiimano nen Jehova ya anggapo’d ubong so sakey ya anuyaw, agta mas naimano tan iyansakit to so kada toon mandadayew ed sikato? No saray buek na ulo tayo et nabilang tan naiimano nen Jehova, agta mas lalo ni iray detalye na bilay tayo, a singa saray pankaukolan, pakakasubokan, tan pakakaaburidoan tayo?

 Say Ama ed Tawen Naaralan tayo ed inmunan artikulo a si Jesus so bogbogtong ya Anak na Dios. Agpankelawan sirin no akin a say mabetbet a tawag to ed si Jehova et “Ama” sano manpipikasi odino manpupulong. Diad tua, diad samay sankaunaan iran nisulat a balikas nen Jesus, ya imbaga to diad templo sanen sikatoy 12 años ni labat, tinawag to si Jehova ya “Amak.” (Lucas 2:49) Tinukoy nen Jesus si Jehova bilang “Ama yo,” “Ama mi,” tan “Amak.” (Mateo 5:16; 6:9; 7:21) Nabasa iraya ed Ebanghelyo diad ngalngali 190 a beses. Diad onian tawag nen Jesus ed si Jehova, impatnag to a saray totoon makasalanan tan agperpekto et nayarin nawalaay maapit tan malet a relasyon ed si Jehova.

Mapangasi tan mabulos a mamerdona Amta nen Jesus a nakaukolan na agperpekton totoo so baleg a panangasi nen Jehova. Diad samay ilustrasyon nen Jesus nipaakar ed managdarak ya anak, inkompara toy Jehova ed sakey a mapangasi tan manamerdonan ama a mabulos ya angawat lamet ed magbabawin anak to. (Lucas 15:11-32) Sirin, ipapaseguro na saray salita nen Jesus ya iimanoen nen Jehova so antokaman ya angumanan na makasalanan a too, a satan so magmaliw a basiyan pian kasian to. Si Jehova et mabulos a mamerdona ed magbabawin managkasalanan. Oniay imbaga nen Jesus: “Ibagak ed sikayo a nagkalalon panliketan ed tawen so sakey a nagbabawin managkasalanan nen say siamaplo tan siam a matunong ya agla nakaukolan a magbabawi.” (Lucas 15:7) Wala kasi agnapakiwas ya onapit ed sayan mapangasin Dios?

Dumerengel na pikakasi Sanen walad tawen si Jesus antis a linma’d dalin, apaneknekan ton mismo a si Jehova et ‘Dumerengel na pikakasi’ tan panliliketan Toy pikakasi na saray matoor a managdayew To. (Salmo 65:2) Kanian legan na ministeryo nen Jesus, imbangat to ray totoo no panon so manpikasi tan antoray ipikasi ra. “Agmo uulit-uliten ya ibaga iray apasakey a bengatla,” so imbilin to. Pinaseseg to iray dumerengel to ya ipikasi ra so pakagaway linawa na Dios “a singa ed tawen, ontan met diad dalin.” Sarag tayo met ya ipikasi so inagew-agew a naakan tayo, pakaperdonay kasalanan tayo, tan pakapaliis tayo’d tukso. (Mateo 6:5-13) Imbangat nen Jesus a si Jehova et singa maaron ama ya oneebat ed masimoon a pikakasi na saray lingkor to a ginawa tekep na pananisia.​—Mateo 7:7-11.

Segseguradon ginawa nen Jesus so anggaay nayarian to pian ibangat so katuaan nipaakar ed si Jehova tan saray kualidad To. Balet wala ni labay nen Jesus ya ipaamta​—say usaren nen Jehova pian nauman so kipapasen na mundo tan nasumpal so gagala To diad dalin tan ed katooan. Diad tua, sayan kabiangan na mensahe nen Jesus et say tema na impulong to.

[Paimano ed leksab]