Maliket a Bilay​—Natan tan ed Andi-angga

NATAN ni labat et nayari lan magmaliw a maliket so bilay mo. Panon? Diad panumbok ed saray makabat a prinsipyo na Salitay Dios, say Biblia. Imanoen pay pigara ed saraya.

PRINSIPYO NA BIBLIA: “Anggapo so bengatla a magmaong nipaakar ed too nen say pangan to tan iyinum to, tan panggawa to ed kamarerwa to a manliket a maong ed kimey to,” so insulat nen Arin Solomon.​—ECLESIASTES 2:24.

Pinalsa itayo pian panliketan iray maabig a kimey. Anggan diad mair-irap iran kipapasen, siansia nin naliketan ka natan no makuli tan matua kad trabaho.

PRINSIPYO NA BIBLIA: “Mas makapaliket so mangiter nen say mangawat.”​—GAWA 20:35.

Naimano na dakel ya say itulong ed arum, singa say pangiter ed panaon tan biskeg pian suportaan iray naproproblema, et talagan makapalikliket tan makapnek. Insulat nen Solomon: “Agmo isisiblet so panggawa na kamaongan ed amin a mankaukolan, sano walay pakayarim a gawaen itan.”​—Proverbio 3:27, NW.

Alaen ti pan alimbawa si Ralph. Sanen nanretiro, ginapoan toy nan-full-time ed ministeryo bilang Kristiano kaibay asawa to. Dakel ya oras so uusaren da kada bulan pian  ibangat ed arum so Biblia. Oniay imbaga nen Ralph: “Kada onsesempet kamid labi, nalilikna mi kesaw aliwa labat a lapud ontatatken kami la noag lapud iyuupot mi biskeg mi diad serbisyo ed Ama tayon walad tawen. Balet, ag-sayang so kesaw mi!” Sayan sanasawa et malikeliket lapud iyuuna rad bilay da so panangiter.

PRINSIPYO NA BIBLIA: “Saray kakaaro ipanengneng da lawas so panangaro ra. Antoy kana na sanaagi no ag-ira mantatambayan ed gonigon?”​—PROVERBIO 17:17, MAUNG A BALITA.

Mas nasarag tayo ray problema no walaray ondengel tan ontulong ed sikatayo. Insulat na philosopher a si Francis Bacon a parad saray anggapoy kaaro ra, “say mundo et singa desierto.” No walaray tuan kakaaro tayo tan maong itayon mikaaro, mas naanosan tayo ray problema. Say bilay et magmaliw a maliket tan makapnek.

PRINSIPYO NA BIBLIA: “Maliket iramay manonot ed espiritual a pankaukolan da.”​—MATEO 5:3.

Imbaga nen Jesus no antoy kaukolan mon gawaen pian naawat mo ray sipan na Dios​—nepeg mon bidbiren tan peneken so “espiritual a pankaukolan” mo. Aliwan singa saray ayayep, nisipor a kaukolan na too ya amtaen no antoy kabaliksan tan gagala na bilay. Si Jehova a Dios labat so makapangiter ed satan a pankaukolan, tan uusaren toy Salita to, say Biblia. Singa naaralan tayod inmunan artikulo, ipapaamta na Biblia so gagala na Dios parad dalin. Ibabaga na satan no akin et wadia itayo, akin et dakel so maniirap, tan antoy iilaloan na Dios ed sikatayo. Pian marakep tan makapnek so bilay tayo, kaukolan tayon talosan irayan katuaan ed Biblia. Maliket iramay mansasagpot ya manaral na Biblia tan mangiyaaplika ed nanaaralan da. Akin ey? Lapud lalo iran napapaapit ed Manamalsa tayo, say “maliket a Dios,” a si Jehova.​—1 Timoteo 1:11.

PRINSIPYO NA BIBLIA: “Nonot yoy Manamalsa yo . . . kasakbayan ya onsabi ray magonigon ya agew tan ikuan yo, ‘Agak la manliliket ed sayan bilay.’”​—ECLESIASTES 12:1, MB.

Simbawa iya nen Arin Solomon ed saray kalangweran ya no maminsan et agda iisipen iray trahedya ed bilay. Balet, para met ed sikatayon amin iya. Iyunam ed bilay mo so Manamalsam. Diad ontan et dugay gagala na bilay mo. Paliisan mo imay ibabaga na arum ya: “Mangan tan oninum tayo sirin, ta nabuas et ompatey tayo.” (1 Corinto  15:32) No iyunam so Dios, ‘maong so pansumpalan mo.’​—Eclesiastes 8:12, MB.

Apaneknekan nen Wendi ya tua itan. Sanen ugaw ni, sikato tan say agi to so nanaral na Spanish pian makakar irad Dominican Republic ta dakel diman so kaukolan a pulongan na maong a balita na Biblia. “Dakel so insakripisyo mi pian makapanlingkor ed lugar ya amayamay so kaukolan ya pulongan, balet ta malikeliket kami. Agko isalat iman ya anem bulan ed anggan anto! Lapud saray bendisyon ya naawat mi, baliwala iray sakripisyo mi.”

Walay Kana na Bilay no Matoor Kad Dios

No marakep so relasyon mod si Jehova, talagan walay kana na bilay mo. Akin et nibaga tayo itan? Ta aglabat sinugsogan nen Satanas si Adan tan Eva a manrebelde ed pananguley na Dios, noagta impasagilig to met ya anggapoy manmatoor ed Dios sano nasusubok. (Job 1:9-11; 2:4) Walay nagawaan mo pian paneknekan a matila si Satanas! Anto ey? Mansiansia kan matoor ed Dios, unor mo ray prinsipyo to, tan ipanengneng mon bibidbiren moy kanepegan nen Jehova a mangibaga no anto so maong tan mauges parad sikatayo.​—Apocalipsis 4:11.

Tua, kaukolan tayon anosan iray irap pian mansiansian matunong. Magmaliw kasin maer-ermen so bilay tayo lapud saratan ya irap? Kunwari et walay maruksan kalaban a mamapauges ed sakey a kaaro odino kapamilya tayo. No diad pangidepensa tayo ed reputasyon to et pairapen itayo na kalaban, labay to kasin ibaga ya anggapo lay kana na bilay tayo? Siempre andi! Seguradon baliwalad sikatayo so panirap basta nalinisay ngaran to. Mipadparad satan so pansiansian matoor ed Dios. No manmatoor tayo anggan diad mairap iran situasyon, napaliket tayoy puso na Dios.​—Uliran 27:11.

Makanan Bilay ed Andi-angga

Pankulian mo sirin ya aralen so amin a nipaakar ed Dios tan say gagala to. Imbagan mismo nen Jesu-Kristo: “Saya so mankabaliksan na bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.” (Juan 17:3) Sano sumpalen la na Dios so gagala to parad dalin, panliketan na totoo so abayag lan getma to parad sikara​—“bilay ya andi-anggaan” diad paraison dalin. Diad satan et talagan maliket tan makapnek lay bilay.​—Salmo 145:16.

Panon tayon nakabat so Dios tan si Jesus? Panamegley na pinuyanan a Salita na Dios, say Biblia. No labay moy patulongan, mansulat ka labat ed saray nan-publish ed sayan magasin. Mangibaki ira na ontulong ed sika a naaral no anton talagay ibabangat na Biblia.