BANBANTAYAN nen Abel iray karnero to legan iran mankakabkab ed gilig na kapalandeyan. Kabebekta, sikatoy ninmengneng ed arawi, diman ed kawalaan na mandarlang ya espada ya ag-ontutundan ontetelek tan akasanib ed dalan a mamaarap ed hardin na Eden. Diad satan a hardin so datin panaayaman na saray atateng to, balet natan et agla ra makaloob anggan saray anak da. Isipen pan mansirunget la tan maragem, kanian naguguloy buek nen Abel legan ya ontatangay ed tawen tan nononoten toy Amalsa. Kasin say aderal ya relasyon na too ed Dios et nipawil ni? Ontan so labay nen Abel ya nagawa.

Walay ibabaga nen Abel ed sika. Narerengel mo? Nayarin ibagam ya imposible itan ta sayan komaduan ilalak nen Adan et abayag lan inatey. Abayag lan nagmaliw a dabok so bangkay to, ngalngali 6,000 taon lay apalabas. Oniay ibabaga na Biblia nipaakar ed saray inaatey: “Anggapoy amta ran balot.” (Eclesiastes 9:5, 10, Maung a Balita) Sakey ni, anggapoy nabasa tayod Biblia ya sinalita nen Abel. Kanian panon a mitongtong ed sikatayo?

Oniay impaisulat na Dios ed si apostol Pablo nipaakar ed si Abel: “Diad panamegley na satan et sikatoy mansasalita ni anggano inatey la.” (Hebreos 11:4) Panon a mansasalita si Abel? Panamegley na pananisia. Sikatoy sankaunaan ya angipanengneng na satan ya balibalin kualidad. Mabisbiskeg so impanengneng ton pananisia kanian mabilay so alimbawa to a maabig ya aligen tayo. No aligen tayoy alimbawa tan pananisia nen Abel, sikatoy singa talagan mitotongtong ed sikatayo.

Balet, antoy naaralan tayod si Abel anta dagdaiset labat so nabasa tayod Biblia nipaakar ed sikato? Nengnengen tayo.

Nianak si Abel sanen aganggano nin apalsa so inmunan totoo. Kanian nen wadiad dalin si Jesus imbaga ton si Abel et nianak sanen ‘niletneg so mundo.’ (Lucas 11:50, 51) Say tutukoyen nen Jesus a mundo et saray totoo a nayarin nadondon. Mikapat si Abel a toon apalsa, balet nayarin sikatoy sankaunaan a toon anengneng na Dios a naperdonad kasalanan. * Binmaleg sirin si Abel ya anggapoy naalig ton maabig ya alimbawa.

Aganggano ni labat ya apalsay too, dakel lay problema da. Saray atateng nen Abel et balibali itsura da tan mabiskeg iran totoo. Balet ta akagawa ra na baleg a kasalanan, tan amta da itan. Dati perpekto ra, tan makapambilay komon na andi-angga. Anggad nen nanrebelde rad si Jehova tan pinaekal irad Paraison ayaman da diad hardin na Eden. Lapud inyuna day panlabayan da nen say arum—anggan say pankaukolan na ananak da—naandid sikaray inkaperpekto tan bilay ya andi-angga.—Genesis 2:15–3:24.

 Lapud pinapaway ira di Adan tan Eva ed hardin, nagmaliw ya mairap so panagbilay da. Balet nen nianak so panguloan da, nginaranan da na Cain, odino “Sakey ya Inyanak,” tan inkuan nen Eva: ‘Diad tulong na Katawan, akaanak ak na sakey a laki.’ Nayarin sankanonot nen Eva imay impropesiya nen Jehova ed hardin ya walay sakey a biin mangiyanak na bini ya maneral ed samay mauges ya anuksod si Adan tan Eva. (Genesis 3:15; 4:1, MB) Kasin inisip nen Eva a sikato imay bii a nipropesiya tan si Cain imay insipan a “bini”?

No aman so inisip to, sikatoy alingolingo. No satan so imbangat da nen Adan ed si Cain legan na ibabaleg to, seguradon naimpluensyaan dan magmaliw ya mapaatagey. Sinmabi panaon, inyanak nen Eva so komadua balet ta anggapoy nabasa tayon maabig ya imbaga ra nipaakar ed sikato. Say inngaran dad anak da et Abel, a nayarin say labay ton ibaga et “Sengaw,” odino “Anggapoy Kakanaan.” (Genesis 4:2) Kasin satan so pinili dan ngaran to ta mas abebbebay pakanengneng dad sikato nen say si Cain? Nayarin ontan, balet agtayo segurado.

Dakel so naaralan na saray atateng ed kinen Adan tan Eva. Diad salita tan kiwas yo, kasin nibabangat yo ray anak yon manlastog, magmaliw ya ambisyoso, tan makasarili? Odino ibangat yo ran aroen si Jehova a Dios tan mikaaro ed sikato? Makapaermen, ag-agawaan na inmunan atateng itan a responsabilidad da. Balet walay ilalo ed anak da.

Legan na ibabaleg di Cain tan Abel, nayarin impasal ira nen Adan ed kimey pian nasuportaan so pamilya da. Si Cain et nagmaliw ya dumaralos, si Abel balet et managpastol.

Balet wala ni ginawa nen Abel a mas importante. Diad inlabas na dakel a taon, pinabiskeg toy pananisia to, satan imay balibalin kualidad ya tinukoy nen Pablo. Isip mo pa labat, anggapoy toon maabig a naalig to. Panon sirin ya awalaan na pananisia ed si Jehova? Pantongtongan tayo so taloran bengatla a nayarin akatulong ed si Abel ya nawalaan na mabiskeg a pananisia.

Saray pinalsa nen Jehova.

Insumpa nen Jehova so dalin kanian tinmutubo iray sabisabit tan dikarika ya mamapairap ed ibaleg na saray tanem. Balet dakel nin siansiay tinmubo ya tanaman a kaukolan di Abel tan say pamilya to pian manbilay. Tan ag-insumpa iray ayayep, kaiba la ray manok tan sira; pati saray kapalandeyan, ilog, tan dayat; ontan met ed tawen, lurem, agew, bulan, tan saray bitewen. Amin ya nengnengen nen Abel et ebidensya na balbaleg a panangaro, karunongan, tan kamaongan nen Jehova a Dios, say amalsa ed amin a bengatla. (Roma 1:20) Say mabetbet a pannononot tan panangapresya tod saraya so amabiskeg na pananisia to.

Seguradon inikdan nen Abel na panaon so pannonot ed si Jehova. Imadyin mo pan sikatoy manpapastol. Say sakey a pastol et kaukolan a manakar na andukey. Igigiya to ray karnero tod kapalandeyan,  ibabaliw to rad ilog pian mananap na marikan pasen, kawalaan na saray bobon, tan marakep a lugar ya pampainawaan. Diad amin a pinalsa na Dios, say karnero so singa pakaskasi, kaukolan toy too a mangigiya tan manprotekta ed sikato. Kasin alikna met nen Abel a kaukolan toy panangigiya, proteksion, tan panangasikaso na Sakey a mas marunong tan mas makapanyari nen say siopaman a too? Seguradon imbaga to iratan ed pikakasi to, tan lapud satan et binmiskeg so pananisia to.

Saray sipan nen Jehova.

Nayarin inistorya di Adan tan Eva ed ananak da iray agawa ed hardin na Eden, no akin ya pinaekal ira diman. Kanian dakel so nayarin nodnonoten nen Abel.

Imbaga nen Jehova ya say dalin et isumpa. Sankanengneng nen Abel iray sabisabit tan dikarika ya mangipapanengneng ya tinmua iratan ya salita. Imbaga met nen Jehova ya si Eva et nairapan ya manlukon tan mananak. Nen inyanak iray agagi to, seguradon anengneng to met ya tinmua itan. Imbaga la nen Jehova a si Eva et talagan mananap na panangaro tan atension ed si Adan, tan kaukolan toy manpasakop ed masiken to. Naobserbaan itan a mismo nen Abel. Apruebaan to ya talagan napanisiaan iray salita nen Jehova. Kanian, walay mabiskeg a rason nen Abel a manilalo ed sipan na Dios nipaakar ed “ilalak” odino bini a manresolbe ed probleman ginmapo ed hardin na Eden.—Genesis 3:15-19.

Saray lingkor nen Jehova.

Anggapoy maabig a toon naalig nen Abel, balet ta aliwan too labat so matalinon pinalsa na Dios a walad dalin ed saman a panaon. Nen pinapaway si Adan tan Eva ed hardin, sinegurado nen Jehova ya sikara pati saray ananak da et agla makaloob ed satan a Paraiso. Pian bantayan so looban na hardin, angikarga si Jehova na saray kerubin odino anghel ya atagey so rangko da, tan sakey ya espada ya tuloytuloy ya ontetelek.—Genesis 3:24.

Isip mo pan nen ugaw ni Abel et tatakilingen to ray kerubin. Lapud nagmaliw iran singa too, seguradon sankanengneng ton mabisbiskeg ira. Sikatoy manbilib met ed “espada” ya ag-ontutundan onaapoy tan ontetelek. Legan ya ombabaleg si Abel, kasin anengneng ton sinmawa iramay kerubin tan inmekal ed kawalaan da? Andi. Linmabas iray agew, taon, tan dekada, saratan ya matalinon pinalsa et ag-inmalis ed kawalaan da. Kanian naamtaan nen Abel ya wala ray matunong tan matoor a lingkor nen Jehova a Dios. Diad saratan a kerubin, anengneng nen Abel so katooran tan katutulok ed si Jehova ya anggapo ed pamilya to. Seguradon apabiskeg so pananisia to lapud alimbawa na saratan ya anghel.

Diad pannononot ton lanang ed amin ya naamtaan to nipaakar ed si Jehova panamegley na saray pinalsa, sipan to, tan alimbawa na saray lingkor to, binmiskeg lan binmiskeg so pananisia nen Abel. Talagan dakel so naaralan tayod alimbawa to. Saya so mangipasegurod saray kalangweran ya sarag day nawalaan na tuan pananisia ed Dios, antokaman so gagawaen na kapamilya da. Lapud saray makapakelaw a palsa, say Biblia, ontan met ed dakel a maabig ya alimbawa na pananisia, walaan itayo na dakel a rason ya pabiskegey pananisia tayo.

Legan ya ombibiskeg so pananisia nen Abel ed si Jehova, labay ton naamtaan no panon ton nipatnag itan diad kiwas. Balet, antoy niiter na sakey a too ed Amalsa na uniberso? Agkaukolan na Dios so regalo odino tulong na too. Asabi panaon, atalosan nen Abel so importantin katuaan: Say iilaloan labat nen Jehova ed saray lingkor to et iter day sankaabigan dad sikato a walaay dugan motibo.

Kanian angitarya si Abel na karnero ya ibagat to. Pinili to ray sankaabigan, saray panguloan, tan saray balibalin parte na ayep pian ibagat. Labay met nen Cain a sikatoy bendisyonan tan paboran na Dios, angitarya met na saray bunga na tanem to pian ibagat. Balet say motibo to et aliwan singa ed si Abel. Apatnagan itan nen impresenta da la ray bagat da.

 Nayarin parehon angusar na altar tan apoy si Cain tan Abel diad impanbagat da, ompan sankanengneng ira na saray kerubin ya diad saman a panaon et sikara labat so mangirerepresenta ed si Jehova diad dalin. Oniay nabasa tayon reaksion nen Jehova: “Si Jehova pinabli to si Abel tan say iyaapay to.” (Genesis 4:4) Ag-ibabaga na Biblia no panon ya impatnag na Dios so panamabli to. Balet akin ya pinaboran toy Abel?

Kasin lapud samay imbagat to? Angibagat si Abel na mabilay a pinalsa, ya inyibung toy dala ya mangirerepresenta ed bilay na satan. Amta kasi nen Abel ya magmaliw ya importante so ontan a klase na bagat? Kayari na dakel a siglo, inusar na Dios so sakey a maabig ya kordero pian irepresenta so bagat na perpekton anak to, “say Kordero na Dios,” ya niyibung so dala ton anggapoy kasalanan. (Juan 1:29; Exodo 12:5-7) Balet, nayarin agla amta nen Abel so pangusar nen Jehova ed saratan ya bagat diad isabi panaon.

Saya so segurado tayo: Imbagat nen Abel so sankaabigan a walad sikato. Say pinaboran nen Jehova et aliwan say imbagat to labat noagta sikaton mismo. Sikatoy apakiwas a manbagat lapud panangaro tan tuan pananisia tod si Jehova.

Aliwan ontan balet ed si Cain. Si Jehova et “anggapo so panamabli to ed Cain tan say iyaapay to.” (Genesis 4:5) Aliwan samay bagat to so problema, ta sinmabi panaon et inyabuloy met na Ganggan so pangibagat na saray bunga na tanem. (Levitico 6:14, 15) Ibabaga na Biblia a “mauges iray mismon gawa” nen Cain. (1 Juan 3:12) Singa ed dakel a totoo natan, say amta nen Cain et magenap la so pangipanengneng na kunkunwarin debosyon ed Dios. Napatnagan ed saray kiwas to so kakulangay pananisia tan panangaro tod si Jehova.

Nen naamtaan nen Cain ya sikatoy agpinaboran nen Jehova, kasin nanpursigi ya aligey Abel? Andi. Binusol to ni ingey agi to. Abasa nen Jehova so walad puso nen Cain tan maanos ton sinimbawa. Pinasakbayan toy Cain ya ompan makagawa na baleg a kasalanan, tan imbaga ton sikatoy nayarin “nitandoro” odino napaboran no manguman.—Genesis 4:6, 7.

Agdinengel nen Cain so simbawa na Dios. Imbes, intagar toy agi tod kaumaan tan diman to pinatey. (Genesis 4:8) Kanian si Abel so sankaunaan ya biktima na panagbusol lapud pananisia, odino sankaunaan ya martir. Sikatoy inatey, balet ta say alimbawa to et mabilay ni anggad panaon tayo.

Singa onaakis ed si Jehova so dala nen Abel parad panangibales odino hustisya. Kanian sinegurado na Dios a niwalay hustisya, dinusa toy Cain lapud ginawa ton krimen. (Genesis 4:9-12) Balet say mas importante, say insulat nipaakar ed pananisia nen Abel et mansasalita ed sikatayo natan. Say impanbilay to et nayarin manga 100 taon labat—diad saman a panaon et antiktikey iman, balet ta makana so impangusar nen Abel ed bilay to. Inatey ya amta ton sikatoy aaroen tan papaboran na Ama tod tawen, si Jehova. (Hebreos 11:4) Segurado tayon sikatoy walad memorya nen Jehova, ya ombilay lamet ed Paraiso diad dalin. (Juan 5:28, 29) Kasin nanengneng to ka diman? Nayari no ondengel kad ibabaga nen Abel tan aligen so mabiskeg a pananisia to.