NEN Abril 2006, impaamta na saray dyaryo diad interon mundo so makapabiglan balita a walay sakey a grupo na saray iskolar ya mangipaamtad publiko na karga na balon adiskobre ya kadaanan a manuskrito ya say tema to et “Ebanghelyo nen Judas.” Unong ed saratan ya artikulo, ibabaga na saray iskolar ya umanen na manuskrito so pakatalos tayod inkatoo nen Judas, say disipulon nantraidor ed si Jesus. Unong ed sikara, si Judas et sankamaongan, sikato labat so talagan makakatalos ed si Jesus, tan inyawat toy Jesus ed saray sundalo lapud inganggan itan nen Jesus ed sikato.

Kasin napanmatalkan itan ya dokumento? No on, karga kasi na satan so dati et iyaamot iran kakabatan nipaakar ed si Judas Iscariote, Jesu-Kristo, odino saray inmunan Kristiano? Apektaan kasi na satan so pakatalos tayo ed si Jesus tan saray bangat to?

Agnin talaga amta no panon ya adiskobre so “Ebanghelyo nen Judas.” Imbes ya adiskobre, tan inggawaay dokumento na saray archaeologist, bigla labat iyan pinmaway diad lakoan na saray antique kayari na 1978. Nayarin nalmo da iyad Ehipto nen 1978 diad sakey ya pantyon ya anggapoy karga to, a nayarin walad sakey ya kuweba. Sakey iyad apatiran nanduruman manuskrito ya walad sakey a codex (klase na libro nensaman) ya nisulat ed Coptic (lenguahed Ehipto nensaman).

Lapud nilasus taon lan nipreserba ed ampetang a klimad Ehipto, nagmaliw a lupok tan mainomay lan naderal so codex nen inekal da diman. Impanengneng dan agano itan ed pigaran iskolar nen 1983; balet ta lapud agaylay bili na pangilalako dad satan, anggapoy angaliw. Lapud pigaran taon nin apaulyanan tan agnaasikaso, mas lalon aderal so manuskrito. Balet nen 2000, asaliw itan na sakey a managlakoy antique a taga Switzerland. Inter to itan ed sakey a grupo na saray eksperto, ya pupundoan na Maecenas Foundation for Ancient Art tan National Geographic Society. Ingganggan to ran apigeren da so codex a say arum a kabiangan to et talagan aderal la. Amtaen da met no pigay taon la na codex, insan da ipatalos tan ipaliwawa so karga na satan.

 Unong ed resulta na carbon-14 dating, say codex et nayarin nisulat nen komatlo odino komapat a siglo C.E. Balet, inisip na saray iskolar a sayan Coptic text na “Ebanghelyo nen Judas” et sakey labat a patalos manlapud orihinal a Griego a mas asasakbay ni inkisulat to. Kapigan tan diad anton kipapasen nisulat so orihinal ya “Ebanghelyo nen Judas”?

Say sankaunaan ya impakabitlad “Ebanghelyo nen Judas” et aromog ed saray sulat nen Irenaeus, sakey ya pari ed Lyons a nambilay diad bandad sampot na komaduan siglo C.E. Diad libron Against Heresies, oniay insulat nen Irenaeus nipaakar ed sakey ed saray grupon kokontraen toy ibabangat da: “Ibabaga ran si Judas a traidor et sikato labat so makatalos ed katuaan, sinumpal toy misteryo na panagtraidor. Lapud ginawa to, aguloy isip na amin a walad tawen tan dalin. Inimbento da irayan istorya, insan da tinawag ya Ebanghelyo nen Judas.”

Say manunan intension nen Irenaeus et napruebaan ya palso iray bangat na saray Kristianon Gnostiko, a mangibabagan walaan iray espisyal a karunongan. Dakel so grupo na saray Gnostiko, tan kada grupo et walay sarili ton interpretasyon ed no anto so “katuaan.” Inkayat da iray bangat da, kanian dinmakel iratan legan na komaduan siglo C.E.

Unong ed saray ebanghelyo na Gnostiko, ag-atalosan na saray prominentin apostol nen Jesus so mensahe to tan walay sekreton bangat to a daiset labat so akatalos. * Wala ray Gnostikon manisia a say mundon kawalaan tayo et sakey a prisoan. Kanian say “dios ya amalsa” ya abitlad Hebreon Kasulatan et abebbeba a dios, no ikomparad saray dios a papanisian da. Manisia met iran say toon walaan na espisyal a “karunongan” et natalosan to a kaukolan na too ya takasan so pisikal a laman to.

Say “Ebanghelyo nen Judas” et nibase ed sarayan papanisiaan da. Oniay nabasad gapo na satan: “Say sekreton mensahe ya imbaga nen Jesus ed si Judas Iscariote, legay waloran agew, taloran agew sakbay na panselebra na Paskua.”

Kasin sayan codex imay tutukoyen nen Irenaeus ed sulat to, a diad loob na pigaran siglo et iisipen dan abalang? Si Marvin Meyer, a membro na inmunan grupo ya nan-analisa tan angipatalos ed sayan codex et angibagan say ‘antikey a deskripsion nen Irenaeus et talagan dugaruga ed manuskriton Coptic ya say tema to et Ebanghelyo nen Judas.’

Unong ed “Ebanghelyo nen Judas,” inelek-elekan nen Jesus iray disipulo to nen agda atalosan so mensahe to. Balet diad 12 ya apostol nen Jesus, si Judas labat so talagan akatalos ed labay ton ibaga. Kanian sikato labat so angibagaan nen Jesus na “saray misteryo na panarian.”

Say inmunan impangipatalos na grupo na saray iskolar ed “Ebanghelyo nen Judas” et naimpluensiaan a maong na samay deskripsion nen Irenaeus. Unong ed satan, pinaboran nen Jesus si Judas lapud sikato labat so disipulo ton makatalos ed saray misteryo tan “makaloob” ed “panarian.” Anggano saray apalikdon apostol et mananap na kasalat nen Judas, sikatoy magmaliw a “koma labintalon espiritu” ya “mas atagtagey nen say amin [ya disipulo],” lapud unong ed si Jesus, “say laman a walad siak, ibagat mo.”

Saray autor na masaliw iran libro, a singa di Bart Ehrman tan Elaine Pagels, a kabkabat met ya iskolar na inmunan Inkakristiano tan Gnosticism et angi-publish a tampol na resulta na sarili dan impan-analisa tan saray komentaryo dad  “Ebanghelyo nen Judas” a mipara ed impangipatalos na inmunan grupo. Balet agnambayag, wala ray arum ya iskolar a singa di April DeConick tan Birger Pearson a mapaga lapud inapura so impangi-publish ed manuskrito pian naala labat so atension na media. Iisipen da met ya ag-atumbok so dugan proseso na panag-analisa na saray kadaanan ya manuskrito.

Kayari na impan-analisa na balang sakey, parehon imbaga di DeConick tan Pearson ya aliway impangipatalos na saray inmunan iskolar ed saray importantin parte na codex ya aderal la. Kayari impanapiger tod manuskrito, inkuan nen DeConick a tinawag nen Jesus si Judas ya say “koma Labintalon Demonyo,” aliwan “koma labintalon espiritu.” * Direktan imbaga met nen Jesus ed si Judas ya sikatoy agmakaloob ed “panarian.” Imbes a sikatoy mas ‘atagey’ nen say arum a disipulo, inkuan nen Jesus ed si Judas: “Mas mauges ni gawaen mo nen say amin ed sikara. Lapud say laman a walad siak, ibagat mo.” Parad si DeConick, saray nansulat ed “Ebanghelyo nen Judas” et mamabalaw labat ed saray apostol. Say segurado ed impan-analisa di DeConick tan Pearson, diad manuskriton “Ebanghelyo nen Judas” et aliwan sankamaongan a too si Judas.

Panisiaan da man ya sankamaongan a too odino demonyo so Judas ya abitlad sayan ebanghelyo, anggapod saramay iskolar ya nan-analisa ed sayan manuskrito so makapangibagan susto iray karga na satan. Oniay imbaga nen Bart Ehrman: “Aliwan si Judas so nansulat ed sayan Ebanghelyo, agto anggan binitla itan. . . . Aliwa iyan sakey ya Ebanghelyo ya insulat ed mismon panaon nen Judas na sakey ya talagan makapikabat ed sikato . . . Kanian ag-itayo natulongan na sayan libro ya nawalaan na kaaruman ya impormasyon nipaakar ed tuan agawad impanbilay nen Jesus.”

Say “Ebanghelyo nen Judas” et manuskriton Gnostiko ya orihinal ya insulat ed lenguahen Griego nen komaduan siglo C.E. Siansia nin pandedebatian na saray iskolar no kasin sayan balon adiskobren “Ebanghelyo nen Judas” imay manuskriton tutukoyen nen Irenaeus. Balet say papaneknekan labat na “Ebanghelyo nen Judas” et talagan walay panaon ya saray palson Kristiano et angikayat na sarili dan bangat, a lapud satan et naapag-apag irad nanduruman sekta. Imbes ya pruebaan ton aliwa so Biblia, diad tua et papaneknekan to iray bilin na saray apostol, a singa samay imbaga nen Pablo diad Gawa 20:29, 30: “Amtak a sano anggapo ak la . . . diad limog yo et wala ray lalakin ontalindeg tan mansalita na pikewet iran bengatla pian tangguyoren iray disipulo ya ontumbok ed sikara.”