Antis ya sinmegep si Jesu-Kristo ed tawen nen 33 C.E., impromisa to ya ompawil. Inkompara toy sarili to ed sakey ya gagalangen a too ya linmad arawin pasen, insan kayari abayag ya panaon et pinmawil ya walaan lay pakayarin manuley bilang ari. Say rason na ipawil nen Jesus et pian mangitaryay maong ya gobierno parad totoo.—Basaen so Lucas 19:11, 12.

Kasin ompawil so Kristo bilang too? Apaoli si Jesus bilang agnanengneng ya espiritun persona. (1 Pedro 3:18) Insan, linmad tawen tan yinmurong ed nikawanan na Dios. (Salmo 110:1) Sinmabi panaon, sikatoy inmarap ed si Jehova, say “inkadaan na saray ag-agew,” ya angiter ed si Jesus na pakayari ya manuley ed saray totoo. Kanian ompawil si Jesus, aliwan bilang too, noagta bilang agnanengneng ya espiritun Ari.—Basaen so Daniel 7:13, 14.

Sano onsabi si Jesus ya agnanengneng kaiba iray anghel to, ukomen toy totoo. Deralen to ray mauges ya totoo, balet ikdan toy andi-anggaan ya bilay iramay mangawat ed sikato bilang Ari.—Basaen so Mateo 25:31-33, 46.

Diad panuley nen Jesus bilang Ari, magmaliw ya paraiso so dalin. Paolien to ray inaatey pian maliket iran manbilay ed Paraiso diad dalin.—Basaen so Lucas 23:42, 43.