Say patey et aliwan makapaliket ya topic. Dakel so agmalabay ya pantongtongan itan. Balet onsabin onsabi panaon ya naapektoan itayo na satan. Tan say epekto na patey et talagan ansakit.

Anggapod sikatayo so talagan makapanparaan ed ipatey na ateng, asawa, odino anak. Nayarin bigbigla itan ya nagawa odino kalkalna diad loob na andukey a panaon. Antokaman so situasyon, agnatakasan so sakit a nalikna no walay ompatey, tan talagan makapakapuy so resulta na satan.

Oniay impaliwawa nen Antonio nen inatey so ama tod aksidente: “Singa walay angitalak na abung mo insan to inyamot so tombok. Agka makaloob anggan magano labat. Say atilak labat ed sika et no antoy walad nonot mo. Saya so realidad. Anggano agmo labay ya awaten—lapud singa agmakatunongan—anggapoy nagawaan mo.”

Nen abiyuda si Dorothy diad edad ya 47, determinado ton amtaen iray ebat. Bilang managbangat ed Sunday-school, agton balot inisip ya say patey so anggaan na amin. Balet agmalinew ed sikato iray ebat. “Antoy nagawad sikatayo no ompatey tayo?” so intepet tod ministro dan Anglican. “Anggapoy makaamta,” so inyebat na ministro. “Basta manalagar tayo labat.”

Anggapo la kasi nagawaan tayo noag say “manalagar” labat? Wala kasi paraan pian naseguro tayo no kasin say patey so anggaan na amin?