Wala lay arengel mon angibagay “Magano lay anggaan”? Antoy naisip mo? Naisip mo kasi sakey ya deboton pastor ya walay awit ton Biblia, tan mansasalitan maksil diad arap ya ikokompas to ni lima to? Odino balbasan ya masiken ya akaalagey ed abay na karsada, akasulong na andukey, akabalkes na lubir, tan sankabembenan toy karatulan akasulat so “Asingger lay anggaan”? No ontan so naiisip na totoo, say arum et mapaga, say arum balet et agmanisia odino makalek labat.

Ibabaga na Biblia ya “onsabi so anggaan.” (Mateo 24:14) Tatawagen met itan ya “baleg ya agew na Dios” tan ‘Armagedon.’ (Apocalipsis 16:14, 16) Nandurumay ibabaga na saray relihyon ed satan tan dakel so agnapanisiaan tan makapataktakot. Balet malinew so ibabagay Biblia nipaakar ed anggaan. Ipapaamta to no anto itan tan no anto ray aliwan tuan ibabaga na arum nipaakar ed satan. Tulongan to tayo met ya naamtaan no kasin magano la itan. Tan say sankaimportantian, ibangat to tayo no panon tayon niliktar! Balet unona, linewen ti ni ray lingon iisipen na arum tan nengnengen no anton talagay labay ya ibaga na satan. Anton talaga so “anggaan” base ed Biblia?

1. BALBALEG YA POOL YA MANERAL ED DALIN.

   Ibabaga na Biblia: ‘Malet so impangiletneg na Dios ed mundo, saray pundasyon to et agbalot nagalaw.’ (Salmo 104:5, Maung a Balita) Nanengneng ed satan tan ed arum nin bersikulo ya anggan kapigan et agderalen na Dios so mundo tan agto itan abuloyan ya naderal!—Eclesiastes 1:4; Isaias 45:18.

2. BASTA LABAT ONSABI YA ANGGAPOD PLANO.

   Ibabaga na Biblia ya walay pinili na Dios ya petsa na isabi anggaan. Oniay nabasa tayo: “Nipaakar ed satan ya agew odino oras et anggapoy siopaman a makaamta, anggan saray anghel ed tawen nisay Anak, noag say Ama. Mantultuloy kayon manlikas, mansiansia kayon aliing, ta agyo amta no kapigan so aturon panaon.” (Marcos 13:32, 33) Malinew ya inyeskedyul na Dios, “say Ama,” so eksakton “aturon panaon” na isabi anggaan.

3. MANLAPUD TOTOO ODINO IKENA NA METEOR ED MUNDO.

   Panon ya onggapoy anggaan? Ibabaga na Apocalipsis 19:11: “Anengneng kon alukasan so tawen, tan nia! sakey ya amputin kabayo. Tan samay akakabayo ed satan et tatawagen a Matoor tan Matua.” Onia ni imbaga na bersikulo 19: “Tan anengneng ko so atap ya ayep tan saray arari ed dalin tan saray armada ra a nantitipon pian milaban ed samay akalugan ed kabayo tan ed armada to.” (Apocalipsis 19:11-21) Maslak ya inusar dian salita et wala labat lay isisimbolo da, balet natalosan tayo ya mangibaki so Dios na armada na saray anghel ya maneral ed saray kalaban to.

1. ANGGAAN NA MAKAPUY YA GOBIERNO NA TOO.

   Ipapaliwawa na Biblia: “Say Dios na tawen mamaalagey naani na sakey a panarian ya anggan  kapigan agnaani naderal tan say pananguley to agnaani niiter ed sananey a baley. Balet buybuyaken to naani tan upoten to naani so saraya ya amin a panarian, et sikato so mansiansia lawas.” (Daniel 2:44) Singa abitla nen niman ed koma 3 punto, deralen iray “arari ed dalin tan saray armada ra” ya “nantitipon pian milaban ed samay akalugan ed kabayo tan ed armada to.”—Apocalipsis 19:19.

2. ANGGAAN NA GUERRA, KAUGSAN, TAN AG-INKAHUSTISYA.

   “Patundaen [na Dios] so bakabakal angga ed sampot na dalin.” (Salmo 46:9) “Saray matunong a totoo—saray maptek so panagbilay da—et manayam irad sayan dalin tayo. Balet say Dios paandipaten tod dalin iray totoon mauges, tan bagoten to ray makasalanan a singa pamagot na tanaman ed dalin.” (Probirbio 2:21, 22, MB) “Nia! Gawaen kon balo so amin a bengatla.”—Apocalipsis 21:4, 5.

3. ANGGAAN NA SARAY RELIHYON YA AG-ANGIRAYEW ED DIOS TAN AG-AKATULONG ED TOTOO.

   “Katilaan so ipropropesiya na saray propeta, tan manguuley iray saserdote unong ed panlabayan da. . . . Balet antoy gawaen yo no onsabi so anggaan?” (Jeremias 5:31, NW) “Diad satan ya agew et dakel so mangikuan ed siak na, ‘Katawan, Katawan, agta nampropesiya kami diad ngaran mo, tan amapaway kami na saray demonyo diad ngaran mo, tan nanggawa kami na dakel a makapanyari iran gawa diad ngaran mo?’ Ingen ta diad satan et ipatuak ed sikara: Agta kayon balot kabat! Arawi kayo ed siak, sikayoran managgawa na kaugsan.”—Mateo 7:21-23.

4. ANGGAAN NA TOTOON KOKONSINTIEN TAN SUSUPORTAAN DA RAY NAGAGAWAD MUNDO NATAN.

   Imbaga nen Jesu-Kristo: “Natan et saya so pangukoman, a say liwawa et sinmabi ed mundo balet inaro na totoo so kabilungetan imbes a say liwawa, lapud saray gawa ra et mauges.” (Juan 3:19) Nen panaon na matoor ya si Noe, walay agawan kadederal ed interon mundo. Oniay ibabaga na Biblia: “Aderal so mundo ed saman a panaon sanen adelap itan. Balet diad panamegley na satan lanlamang a salita, say katawenan tan say dalin a wala natan et nigana ed apoy tan iyaalagar ed agew na panangukom tan kaderal na totoon agmaridios.”—2 Pedro 3:5-7.

Imanoen ya say onsabin “agew na panangukom tan kaderal” et inkomparad impaneral ed “mundo” nen panaon nen Noe. Anto so mundon aderal? Nansiansiay planeta tayo; say “aderal” et saramay “totoon agmaridios”—saray kalaban na Dios. Legan na onsabin “agew na panangukom,” saramay pilien day magmaliw ya kalaban na Dios et naderal met. Balet nisalba iray kaaro na Dios, a singa si Noe tan say pamilya to.—Mateo 24:37-42.

Isipen pa labat no panon kabalibali so dalin no ekalen la na Dios so amin ya mauges! Malinew sirin ya say ibabaga na Biblia ya anggaan et aliwan makapataktakot, noagta maong a balita. Balet seguro isipen mo: ‘Nabasa kasid Biblia no kapigan onsabi anggaan? Magano la kasi itan? Panon ak ya nisalba?’