Nen Mayo 24, 2022 walay agawan makapataktakot ya trahedya diad melag a baley na Uvalde, Texas, U.S.A. Imbaga na The New York Times ya “19 ya ugugaw tan duaran maestra so inatey lapud pinapaltog ira . . . diad Robb Elementary School.”

 Makapaermen ta mabetbet lan nagagawa iray onian makapasinagem ya trahedya. Inreport na USA Today ya diad United States ni labat et “249 lay agawan panagpaltog ed eskuelaan nen imbeneg ya taon—sankarakelan la itan manlapu la nen 1970.”

 Akin et nagagawa irayan ansaki-sakit ya trahedya? Panon tayon arapen iray ontan ya mauge-uges ya kagagawa? Wala ni kasi ilalo ya naekal so inkaruksa? Walay ebat na Biblia.

•   Idedeskribe na Biblia so panaon ya pambibilayan tayo bilang “kaunoran iran agew” ya saray totoo et “anggapoy panangaro ra” tan “masesebeg ira,” kanian brutal ira tan bayolenti iray gagawaen da. Saray ontan ya totoo et “magmaliw a lalon mauges.” (2 Timoteo 3:1-5, 13) Pian naaruman ni antam, basaen so artikulon “Inihula Ba ng Bibliya na Magiging Ganito ang Ugali ng mga Tao sa Ngayon?”

 Dakel so maniisip, ‘Akin et agpipigilan na Dios iray makapasinagem ya trahedya ya singa say panagpaltog ed eskuelaan?’ Pian naamtaan so ebat na Biblia, basaen so artikulon “Nagagawa Iray Mauges a Bengatla ed Maong a Totoo—Akin?”

•   “Amin ya insulat nensaman et insulat pian nibangat itayo, pian . . . diad ligliwa a manlalapud Kasulatan et nawalaan itayo na ilalo.”—Roma 15:4.

 Natulongan ka na saray prinsipyo na Biblia ya arapen iray kaugsan ed sayan mundo. Parad kaaruman ya impormasyon, nengnengen so magasin ya Awake! ya say title to et “Will Violence Ever End?”

 Wala ray suhestion pian natulongan na atateng iray ananak da no wala ray makapataktakot ya balita, diad artikulon “Ang Masasamang Balita at ang Iyong mga Anak.”

•   “Iliktar to ra ed panagpairap tan karuksaan.”—Salmo 72:14.

•   “Pitpiten da ray espada ra pian gawaen a tarem na lukoy tan saray gayang da et gawaen dan palot. Anggapo lay nasyon a mangitagey na espada sumpad sananey a nasyon, agmet la ra manaral a miguerra.”—Miqueas 4:3.

 Sarag na Dios ya gawaen so agnagawaan na too. Deralen na Panarian tod tawen so amin ya armas tan ekalen toy amin ya inkaruksa. Pian naaruman ni antam ed no antoy gawaen na Panarian na Dios, basaen so artikulon “‘Inerman a Pasen et Walay Kareenan’ Diad Uley na Panarian na Dios.”