“Nen ugaw ak ni, inagew-agew ak ya sasakitan nen kuyak tan aliwliway panagsalita tod siak. Insan nen wala lay asawak, ontan met so gagawaen ed siak na katulangan kon bii. Pareho ira na katulangan kon laki, ginawa da ak ya aripen. Kanian lanang ko lan naiisip so manbikkel.”​—Madhu, a India.

 “Dakdakel so bibiin naaabuso ed interon mundo,” so kinompirma na World Health Organization. Base ed tantiya ra, ngalngali sakey ed kada taloran bibii so asali day abiktima na pisikal odino seksual ya panag-abuso.

 No agawa la itan ed sika, ompan anggan iner so laen mo et lanang ka lan natatakot ya ompan walay ansakit so pansalita tod sika, odino walay mansakit o man-molestya ed sika. Lapud panag-abuso tan aliwliwan panagtrato ed saray bibii, ompan say antam et amin lan totoo et iisipen dan ‘Ag-importante iray bibii.’ Balet talaga kasin importante ed Dios iray bibii?

 Teksto: “Pinalsa to ran laki tan bii.”​—Genesis 1:27.

 Say labay ton ibaga: Pinalsa na Dios iray lalaki tan bibii. Parad sikato, parehas iran dapat ya respetoen. Ontan met, iilaloan to ya say asawan laki et ‘aroen toy asawa to a singa ed dilin laman to’ tan agto salien ya kontrolen, kanian agto dapat pansalitaan na ansakit odino abusoen. (Efeso 5:33; Colosas 3:19) Malinew sirin ya importante ed Dios ya naasikaso iray bibii.

 “Nen ugaw ak ni, minolestya ak na kakanayon ko. Nen 17 ko la, tinaktakot ak na amok ya sisantien to ak kuno no agak mi-sex ed sikato. Nen matatken ak la, abebbebay pakanengneng ed siak na asawak, saray atateng ko, tan saray kakaabay mi. Balet akabat koy Jehova, b say Amalsa. Walay respeto to ed saray bibii. Atan so akakombinse ed siak ya inaro to ak tan importante ak ed sikato.”​—Maria, Argentina.

 Teksto: “Walay kaaro a mas mansiansia ed abay mo nen say sakey ya agi.”​—Proverbio 18:24.

 Say labay ton ibaga: Suportaan ka na sakey ya tuan kaaro. No posible, ibagam so naliliknam ed kaarom ya pantitiwalaan mo.

 “Diad loob na 20 taon, anggapon balot so angibagaan ko ya amolestya ak. Lapud satan, agak maliket, mapagpaga ak, tan a-depress ak. Balet sinmabi panaon ya imbagak so agawad siak ed sakey ya kaaron iyaansakit to ak, kanian akainawa ak ya maong.”​—Elif, Türkiye.

 Teksto: “Ipaawit yod [Dios] so amin a kapagaan yo, lapud iyaansakit to kayo.”​—1 Pedro 5:7.

 Say labay ton ibaga: No manpikasi ka, talagan dengelen ka na Dios. (Salmo 55:22; 65:2) Iyaansakit to ka, kanian sarag to kan tulongan pian natalosan mo ya talagan importante kad sikato.

 “Manlapu nen akabat koy Jehova, kalkalna lan onaabig iray araldalem ya sugat ed pusok. Natan, sarag ko lay manpikasi ed Dios tan ibabagak ed sikato so amin ya naliliknak. Si Jehova et singa kaaro ya talagan natatalosan toy naliliknak.”​—Ana, Belize.

 Teksto: “Iter [nen Jehova so] hustisya ed samay ulilad ama tan ed saramay napapairap, pian anggapo lay siopaman a too diad dalin a manaktakot ed sikara.”​—Salmo 10:​17, 18.

 Say labay ton ibaga: Asingger lan patundaen na Dios so amin ya ag-inkahustisya, kaiba lay maruksan panagtrato tan panag-abuso ed saray bibii.

 “Nen naamtaan ko ya asingger lan patundaen nen Jehova so aliwliwan panagtrato ed saray bibii kaiba la ray ugugaw, singa itan tambal ya pinakalma to ak. Mareen lay isip ko.”​—Roberta, Mexico.

 Pian naamtaan mo no anton pag-asa so iiter na Biblia, no akin ya napantiwalaan moy ibabaga na Biblia, tan panon ya ontutulong iray Tasi nen Jehova panamegley na Biblia, man-request kay ombisita ed sika.

 I-download so format na sayan artikulo ya nayarin i-print.