Diad interon mundo, dakel ed saray totoon mangibabagan patumbok ira nen Jesu-Kristo et aktibon mibabali ed politika. Ipapaseseg na arum ed sikara iray relihyoson papanisiaan da tan saray estandarte da ed moral diad isuporta dad sakey a kandidato odino partido na politika. Insan aanamoten na saray politiko ya usaren iratan ya isyu nipaakar ed moral tan arum ni ran kaplesan ya isyu pian naalay suporta na sarayan relihyoson totoo. Aliwa lan balo ya wala ray lider na relihyon ya onkakandidato. Tan diad arum iran bansa wala ray “Kristianon” relihyon ya bibidbiren bilang national religion.

 Antoy nibagam? Duga kasin mibabali ed politika iray papatumbok nen Jesu-Kristo? Naamtaan moy ebat no nengnengen moy alimbawa nen Jesus. Imbaga to: “Angitilak ak na aligen yo, a no antoy ginawak ed sikayo et ontan met so nepeg yon gawaen.” (Juan 13:15) No nipaakar ed politika, antoy intilak nen Jesus ya pangaligan tayo?

 Andi. Ag-akibabali si Jesus ed politika na sayan mundo.

 Agnilabay nen Jesus ya nawalaay pakayari ed politika. Ag-inawat nen Jesus so pankanawnawan manuley ed saray gobierno na too nen inyopresi ed sikato nen Satanas a Diablo so “amin a panarian na mundo.” (Mateo 4:8-10) a Diad sakey nin agawa, anengneng na saray totoo ya walad si Jesus iray kualidad na maong ya lider, kanian sinali dan piliten ya onloob ed politika. Oniay ibabaga na Biblia: “Lapud atebek nen Jesus a sikatoy ngalngali da la piliten a gawaen ya ari ra, sikatoy tinmaynan lamet ya amaarap ed palandey a bukbukor to.” (Juan 6:15) Agpinmayag si Jesus ed labay na totoo. Imbes, iniwasan toy mibabali ed politika.

 Anggapoy pinanigan nen Jesus ed saray isyu ed politika. Singa bilang diad panaon nen Jesus, ampetang so ulo na saray Judio lapud buis ya kaukolan dan bayaran ed gobierno na Roma tan parad sikara et pabelat iya tan aliwan makatunongan. Nen sinali dan alaen so panig nen Jesus nipaakar ed saman ya isyu, ag-akidebate no kasin makatunongan labat so pambayar na ontan iran buis. Imbaga tod sikara: “Iter yod Cesar iray bengatlan kien na Cesar, balet dia ed Dios iray bengatlan kien na Dios.” (Marcos 12:13-17) Nansiansian neutral si Jesus ed satan ya isyu na politika, pero impanengneng to ya dapat labat ya bayaran so buis ya kekerewen na gobierno na Roma, ya mangirerepresenta ed si Cesar. Impanengneng to met ya walay limitasyon na pangunor ed sekular ya autoridad. Agnepeg ya iter ed gobierno iray bengatlan kien na Dios, kaiba lay debosyon tan panagdayew.—Mateo 4:10; 22:37, 38.

 Sinuportaan nen Jesus so sakey ya gobierno ed tawen, say Panarian na Dios. (Lucas 4:43) Agto akibabali ed politika ta amta ton say Panarian na Dios, aliwan saray gobierno na totoo, so manggawa ed linawa na Dios parad dalin. (Mateo 6:10) Amta to ya ag-usaren na Panarian na Dios iray gobierno na too, noagta salatan to itan.—Daniel 2:44.

 Andi. Saray papatumbok nen Jesus et mansiasiansian ‘agkabiangan na mundo’ a singa imbaga tod sikara. (Juan 15:19) Inalig day alimbawa to tan nansiansia ran biig ed politika na mundo. (Juan 17:16; 18:36) Imbes ya mibabali rad politika, ginawa day kimey ya ingganggan nen Jesus ed sikara, say pampulong tan pambangat nipaakar ed Panarian na Dios.—Mateo 28:18-20; Gawa 10:42.

 Say sankaimportantian ed bilay na saray Kristiano nen inmunan siglo et say pangunor ed Dios, balet amta ra ya kaukolan da met ya respetoen iray sekular ya autoridad. (Gawa 5:29; 1 Pedro 2:13, 17) Inunor da ray ganggan tan nambayar iray buis. (Roma 13:1, 7) Ag-ira akibabali ed politika, pero inawat da ray proteksion tan serbisyo ya iiter na gobierno.—Gawa 25:10, 11; Filipos 1:7.

 Malinew ya ipapanengneng na Biblia ya ag-akibabali ed politika si Jesus tan saray papatumbok to nensaman. Kanian bilang Kristiano, mansiasiansian neutral iray Tasi nen Jehova ed interon mundo. Singa saray Kristiano nen inmunan siglo, gagawaen da met so kimey ya ingganggan nen Jesus, ipupulong da so “maong a balita na Panarian.”—Mateo 24:14.