Si Sister Desicar et sakey ya single mom tan labay toy man-regular pioneer pian mas dakel so nagawaan tod ministeryo. Anggano mairap so bilay diad Venezuela, desidido nin siansian ya manpayunir. Malikeliket nen agawaan to itan. Balet ginmapoy COVID-19 pandemic.

 Nen kagapoy COVID-19 pandemic, nairapan si Desicar ya man-adjust ed balon paraan na panagpulong, singa say pan-letter writing. Ontan met, lapud mabli so Internet diad lugar da, aga makapanpulong panamegley na videoconference. “Naeermenan ak,” so kuan to. “Bigbigla ya agak la makapanpulong ya singa dati. Pakaliknak, kulang so nagagawaan ko bilang regular pioneer.”

 Nen Enero 2021, inaprobaan na branch office na Saray Tasi nen Jehova diad Venezuela so sakey ya special preaching campaign. Walay limaran weekend legan na Enero. Diad saraman ya agew, walay ginawan uksoyan ya i-broadcast so pigaran publikon paliwawa ya base ed Biblia diad manga 60 ya istasyon na radyo tan 7 ya channel ed TV. Pinaseseg iray agagi ya imbitaan da ray malabay ya ondengel tan manbantay. Angiter met so branch na saray tepet tan teksto tungkol ed kada paliwawa ya nayarin usaren na agagi diad pan-letter writing tan telephone witnessing da. Pinaseseg met ira na branch ya usaren so text message diad ministeryo​—sakey ya balon paraan na panagpulong na saray agagi diad Venezuela.

 Excited si Desicar ya misuportaan ed kampanya. Anggano agto nin balot asali so angusar na text message diad panagpulong, desidido ya salien itan. Pero kailangan toy tulong. “Agak marunong ed gadyet,” so inamin nen Desicar. Nen nampabangat ed anak to, sikatoy akaaral ya tampol. Kanian ready la si Desicar ed kampanya.

Dakdakel so in-text nen Desicar ya kakaaro to pian imbitaan iran ondengel ed inrekord ya paliwawa. Agto inilaloan so resulta. Amayamay so inimbitaan ton dinmengel ed saray paliwawa tan dakel so tepet da. Wala ray ag-akadngel ed programa, pero tinetepetan day Desicar tungkol ed saray paliwawa. “Walay notes ko tan in-share kod sikara iray naaralan ko ed saray paliwawa,” so imbaga nen Desicar. “Dati, anggad 5 labat so irereport kon return visit kada bulan, pero kayari na kampanya, 112 ya RV so inreport ko!” a

 Inimbitaan met nen Desicar so aliwan Tasi ya atsi to​—ya kaabay da labat na abung—​pian ondengel ed saray paliwawa diad radyo. “Abigla ak ta pinmayag si atsik,” so kuan nen Desicar. “Kada Simba na alas-otso na kabuasan, oonla ak ed apartment to, tan sabay kamin ondengel. Dakdakel so tepet to legan tan kayari na programa.” Inmatendi met so atsi nen Desicar diad Memoryal na impatey nen Jesus panamegley na videoconferencing, tan pinayagan toy Desicar ya mikonek ed Internet to diad panagpulong.

 “Misatsalamat ak ed si Aman Jehova,” so kuan nen Desicar. “Misatsalamat ak met ed saray elder diad kongregasyon mi ta ag-ira sinmawan pasesegen ak. Tinulongan da ak ya napapawil so liket ko ed ministeryo.” (Jeremias 15:16) Anggad natan et payunir ni si Sister Desicar, tan tuloytuloy to nin uusaren so text messaging pian ibangat so katuaan ed saray interesado.