Tutumboken mi ibabaga na Biblia no panon ya selebraan so Pangdem na Katawan, a tatawagen met ya Last Supper, tan say Memoryal na impatey nen Jesus. (1 Corinto 11:20) Balet dakel ya papanisiaan tan gagawaen na arum ya relihyon ya panseselebra ed satan et aliwan based Biblia.

 Say gagala na Pangdem na Katawan et pian nodnonoten si Jesus, ya nipanengneng tayoy pisasalamat ed sakripisyon ginawa to parad sikatayo. (Mateo 20:28; 1 Corinto 11:24) Aliwa iyan sakey ya sakramento, odino seremonya ed relihyon ya wala ray niiter to ya singa say panangasi odino pakaperdona na saray kasalanan. a Ibabaga na Biblia ya naperdona iray kasalanan tayo, aliwan panamegley na sakey ya seremonya ed relihyon, noagta panamegley labat na pananisia ed si Jesus.​—Roma 3:25; 1 Juan 2:1, 2.

 Ingganggan nen Jesus iray disipulo to ya nodnonoten so Pangdem na Katawan, balet anggapoy imbaga to no maminpigan gawaen itan. (Lucas 22:19) Wala ray mangibabaga ya kaukolan dan gawaen itan ya binulan, say arum balet et sinimba, inagew-agew, maminpiga ed kada agew, odino anggano maminpiga kuno depende ed labay na sakey. Pero, nia ray kaukolan ya isipen.

 Inggapo nen Jesus so Pangdem na Katawan diad agew na Paskua na saray Judio, tan sikatoy inatey diad satan lanlamang ya agew. (Mateo 26:1, 2) Aliwan nibanbana itan. Inkompara na Kasulatan so bagat odino sakripisyo nen Jesus ed kordero parad Paskua. (1 Corinto 5:7, 8) Say Paskua et tinaon ya seselebraan. (Exodo 12:1-6; Levitico 23:5) Ontan met, say Memoryal na impatey nen Jesus et tinaon ya seselebraan na saray Kristiano nensaman, b tan satan ya alimbawa ya base ed Biblia et tutumboken na Saray Tasi nen Jehova.

 Naamtaan tayod samay impangigapo nen Jesus ed Pangdem na Katawan no maminpigan gawaen itan, pati say petsa tan oras na Memoryal. Inggapo to itan kaselek na agew nen Nisan 14, 33 C.E., base ed kalendaryo diad panaon na Biblia. (Mateo 26:18-20, 26) Kada taon diad sayan petsa, seselebraan mi so Memoryal, ya tutumboken mi so ginawa na saray Kristiano nensaman. c

 Tua ya diad Biernes pinmetek so Nisan 14, 33 C.E., pero kada taon, say anibersaryo na satan ya petsa et nayarin ompetek ed sananey ya agew. Pian naamtaan mi so petsa ya mipetekan ed Nisan 14 kada taon, ibabase mi itan ed kalendaryo ya inusar ed panaon nen Jesus, imbes ya say modernon kalendaryo na saray Judio. d

 Nen inggapo nen Jesus so Memoryal, angusar na tinapay ya anggapoy lebadura o pampaalsa tan ambalangan alak ya akera ed Paskua. (Mateo 26:26-28) Ontan met natan, tutumboken mi so ginawa to tan manguusar kami na tinapay ya anggapoy lebadura o arum nin ingredients tan puron ambalangan alak, aliwan grape juice odino alak ya malamis, pinatapang, odino nilaokan na arum ni.

 Wala ray relihyon ya manguusar na tinapay ya walay lebadura o pampaalsa, balet diad Biblia, say lebadura et isisimbolo toy kasalanan tan kaugsan. (Lucas 12:1; 1 Corinto 5:6-8; Galacia 5:7-9) Kanian, say nayari labat ya mangisimbolo ed anggapoy kasalanan ya laman nen Kristo et tinapay ya anggapoy lebadura tan arum nin laok. (1 Pedro 2:22) Say sakey nin gagawaen na arum ya aliwan based Biblia et say panguusar da na grape juice imbes ya alak. Gagawaen itan na arum ya relihyon lapud ibabawal day iyinum na alak, balet anggapo iya ed Biblia.​—1 Timoteo 5:23.

 Say tinapay ya anggapoy lebadura tan say ambalangan alak ya iseserbi ed Memoryal et emblema, odino simbolo, na laman tan dala nen Kristo. Ag-iratan milagron magmamaliw a laman tan dala odino onlaok ed laman tan dala, a singa papanisiaan na arum. Nengnengen so ibabaga na Biblia ed saya.

•   No ingganggan nen Jesus iray disipulo to ya inumen day dala to, singa to ibabaga ed sikara ya kontraen day ganggan na Dios ya agmangan na dala. (Genesis 9:4; Gawa 15:28, 29) Balet imposible ya ibaga nen Jesus ya ag-unoren so ganggan na Dios nipaakar ed inkasagrado na dala.​—Juan 8:​28, 29.

•   No literal ya ininum na saray apostol so dala nen Jesus, agto komon imbaga ya say dala to et “nepeg ya iyibung,” ya mangipanengneng ya say gawaen ton sakripisyo et nagawa ni labat.​—Mateo 26:28.

•   Say sakripisyo nen Jesus et agawan “pinsanan.” (Hebreo 9:25, 26) Balet no say tinapay tan alak et nagmaliw ya laman tan dala to nen Pangdem na Katawan, saramay mibibiang et uuliten da itan ya sakripisyo.

•   Inkuan nen Jesus: “Itultuloy yon gawaen iya bilang pannodnonot ed siak,” aliwan “bilang sakripisyo ed siak.”—1 Corinto 11:24.

 Saray manisia ed transubstantiation, ya nagmaliw ya tinapay tan alak so laman tan dala nen Jesus, et ibabase da iyan doktrina ed translation na arum ya bersikulo ed Biblia. Singa bilang, oniay nabasa ed dakel ya bersion na Biblia ed samay imbaga nen Jesus nipaakar ed alak: “Sikato yay dalak.” (Mateo 26:28, Say Biblia) Balet nayari met itan ya ipatalos ya: “Mankabaliksan itan na dalak,” odino “Mangirerepresenta itan na dalak,” odino “Mangisisimbolo itan na dalak.” e Angusar dia si Jesus na panangikompara, a singa lanang ton gagawaen no manbabangat.​—Mateo 13:34, 35.

 No seselebraan na Saray Tasi nen Jehova so Pangdem na Katawan, dagdaiset labat ed sikami so mamangan na tinapay tan oniinum na alak. Akin ey?

 Nen nipaagus so dala nen Jesus, niwala so “balon sipanan” ya sinmalat ed sipanan nen Jehova a Dios tan saray totoo na Israel nensaman. (Hebreo 8:10-13) Saramay kaiba ed balon sipanan so mangan tan oninum na saray emblema ed Memoryal. Aliwan amin ya Kristiano et kaibad satan, noagta “saramay tinawag” labat na Dios. (Hebreo 9:15; Lucas 22:20) Nakaiba ira nen Kristo a manuley ed tawen, tan ibabaga na Biblia ya 144,000 a totoo labat so makaawat ed satan a pribilehyo.​—Lucas 22:28-30; Apocalipsis 5:9, 10; 14:1, 3.

 Anggaman “melag a pulok” labat so tinawag a manuley a kaiba nen Kristo, dakel ed sikami so walaay ilalo ya nakaiba ed “baleg ya ulop” ya makaawat na bilay ya andi-anggaan diad dalin. (Lucas 12:32; Apocalipsis 7:9, 10) Tua ya agmamangan tan oniinum na emblema iramay say ilalo ra et diad dalin, pero misasalamat met ira ed sakripisyo nen Jesus ya ginawa to parad totoo.—1 Juan 2:2.