1. Dicon un funcionario di corte di Etiopia a pidi pa e batisa?

“ATA awa! Kico ta stroba pa mi wordo batisa?” Esei ta e pregunta cu un funcionario di corte di Etiopia a haci den prome siglo. Un cristian cu yama Felipe a caba di mustr’e cu Hesus tawata e Mesias priminti. Profundamente  conmovi pa loke el a siña for di e Scritura, e homber Etiope a tuma accion. El a demostra cu e kier batisa!—Echonan 8:26-36.

2. Pakico bo tin cu pensa seriamente riba bautismo?

² Si bo a studia e capitulonan anterior di e buki aki cuidadosamente cu un Testigo di Yehova, kisas bo tambe ta sinti bo cla pa puntra: ‘Kico ta stroba pa ami wordo batisa?’ Entretanto ya bo a siña tocante Bijbel su promesa di bida eterno den Paradijs. (Lucas 23:43; Revelacion 21:3, 4) Bo a siña tambe tocante e berdadero condicion di e mortonan y e speransa di resureccion. (Eclesiastes 9:5; Huan 5:28, 29) Probablemente bo tin un tempo ta asocia cu Testigonan di Yehova na nan reunionnan y bo a mira pa bo mes con nan ta practica e religion berdadero. (Huan 13:35) Mas importante ainda, casi sigur bo a cuminsa desaroya un relacion personal cu Yehova Dios.

3. (a) Ki mandamento Hesus a duna su siguidonan? (b) Con ta batisa un persona pa e bira un cristian?

³ Con bo por mustra cu bo kier sirbi Dios? Hesus a bisa su siguidonan: “Bai y haci tur e nacionnan disipel di mi, y batisa nan.” (Mateo 28:19) Hesus mes a pone un ehempel door di batisa den awa. No a djis spat awa riba dje of basha un poco awa riba su cabes. (Mateo 3:16) E palabra “batisa” ta bin for di un expresion Griego cu ta nifica “dop.” Pesei bautismo cristian ta nifica ser gedop of hinca completamente bou di awa.

4. Kico bautismo den awa ta indica?

⁴ Bautismo den awa ta un rekisito pa tur hende cu kier tin un relacion cu Yehova Dios. Bautismo ta indica publicamente cu bo tin e deseo di sirbi Dios. E ta mustra cu ta un delicia pa bo pa haci e boluntad di Yehova. (Salmo 40:7, 8) Sinembargo, pa bo cualifica pa bautismo bo tin cu dal cierto pasonan.

5. (a) Cua ta e prome paso pa cualifica pa bautismo? (b) Dicon reunionnan cristian ta importante?

⁵ Bo a cuminsa dal e prome paso caba. Con? Door di adkiri conocemento di Yehova Dios y Hesucristo, podise pa medio di un estudio sistematico di Bijbel. (Huan 17:3) Pero tin mas cos pa bo siña. Cristiannan kier ta “yena cu e conocemento [exacto di Dios] su boluntad.” (Colosensenan 1:9) Un yudansa grandi den esaki ta di asisti na e reunionnan di congregacion di Testigonan di Yehova. Ta importante pa asisti na e reunionnan ei. (Hebreonan 10:24, 25) Asistencia regular na reunion lo yuda bo aumenta bo conocemento di Dios.

6. Cuanto conocemento di Bijbel bo mester tin pa bo por cualifica pa bautismo?

⁶ Claro cu bo no tin nodi sa tur cos cu tin den Bijbel pa bo por cualifica pa bautismo. E funcionario di corte di Etiopia tawatin algun conocemento, pero e tawatin mester di yudansa pa compronde cierto partinan di e Scritura. (Echonan 8:30, 31) Asina bo tambe tin hopi cos mas di siña ainda. De echo, nunca lo bo no stop di siña tocante Dios. (Eclesiastes 3:11) Pero prome cu bo por batisa, bo mester conoce y acepta por lo menos e siñansanan basico di Bijbel. (Hebreonan 5:12) E siñansanan ei ta encera e berdad tocante e condicion di e mortonan y e importancia di e nomber di Dios y di su Reino.

7. Ki efecto un estudio di Bijbel mester tin riba bo?

⁷ Pero conocemento so no ta basta, pasobra “sin fe ta imposibel pa agrada [Dios].” (Hebreonan 11:6) Bijbel ta bisa nos cu ora algun hende den e antiguo stad di Corinto a tende e mensahe cristian, nan “a kere y a wordo batisa.” (Echonan 18:8) Den un manera similar, un estudio di Bijbel mester duna bo e fe cu Bijbel ta e Palabra inspira di Dios. Tambe un estudio di Bijbel mester yuda  bo haya fe den Dios su promesanan y den e echo cu Hesus su sacrificio por salba bo.—Hosue 23:14; Echonan 4:12; 2 Timoteo 3:16, 17.

8. Kico lo motiva bo pa comparti cu otro hende loke bo a siña?

⁸ Segun cu fe ta crece den bo curason, lo bo ripara cu ta dificil pa tene loke bo a siña pa bo so. (Yeremias 20:9) Lo bo sinti un motivacion fuerte pa papia cu otro hende tocante Dios y su proposito.—2 Corintionan 4:13.

9, 10. (a) Cu ken lo bo por cuminsa comparti berdadnan biblico? (b) Kico bo mester haci si bo kier participa den e predicacion organisa di Testigonan di Yehova?

⁹ Kisas bo por cuminsa comparti berdadnan biblico cu otro hende door di papia cu tacto tocante e berdadnan ei cu bo famia-, amigo-, biciña- y coleganan. Cu tempo, lo bo kier participa den e predicacion organisa di Testigonan di Yehova. Ora ta asina leu, papia libremente cu e Testigo cu ta siña bo loke Bijbel ta bisa. Si ta parce cu bo ta cualifica pa predica publicamente, lo haci areglo pa abo cu esun cu ta siña bo reuni hunto cu dos anciano di congregacion.

¹⁰ Esaki lo duna bo chens di sera conoci mas mihor cu algun di e ancianonan cristian cu ta pastorea e tou di Dios. (Echonan 20:28; 1 Pedro 5:2, 3) Si e ancianonan aki nota cu bo ta compronde y ta kere e siñansanan basico di Bijbel, cu bo ta biba na harmonia cu e principionan di Dios y cu realmente bo kier ta un Testigo di Yehova, nan lo laga bo sa cu bo ta cualifica pa participa den e predicacion publico como un publicado no batisa di e bon nobo.

11. Ki cambionan algun hende lo tin cu haci prome cu nan ta cualifica pa participa den e predicacion publico?

¹¹ Di otro banda, kisas lo bo tin cu haci algun cambio den bo manera di biba y den bo custumbernan pa bo por cualifica pa participa den e predicacion publico. Esaki  kisas ta encera cu bo tin cu stop cu algun practica cu bo a tene scondi pa otro hende. Pues anto, prome cu bo pidi pa bira un publicado no batisa, bo mester ta liber di picanan serio, manera inmoralidad sexual, buracheria y uzo di droga.—1 Corintionan 6:9, 10; Galationan 5:19-21.

12. Dicon ta necesario pa repenti?

¹² Tin mas paso cu bo mester dal prome cu bo ta cualifica pa bautismo. Apostel Pedro a bisa: “Repenti . . . y comberti, pa boso picanan wordo kita.” (Echonan 3:19) Repenti ta nifica sinti duele sinsero pa algo cu bo a haci. Ta mas cu claro cu repentimento ta apropiado si un persona a hiba un bida inmoral, pero e ta necesario tambe asta si un hende a hiba un bida relativamente limpi moralmente. Dicon? Pasobra tur hende ta pecado y tin mester di Dios su pordon. (Romanonan 3:23; 5:12) Prome cu bo a cuminsa studia Bijbel, bo no tawata sa kico ta Dios su boluntad. Pues anto, ta con bo por a biba na pleno harmonia cu su boluntad? Pesei repentimento ta necesario.

13. Kico kiermen comberti?

¹³ Despues cu un persona repenti, e mester comberti, es decir, bira bek. Bo tin cu haci mas cu djis sinti duele di bo estilo anterior di bida, bo tin cu rechas’e y ser firmemente determina pa di awor en adelante haci loke ta corecto. Repenti y comberti ta pasonan cu bo mester dal prome cu bo batisa.

14. Cua paso importante bo tin cu dal prome cu bo batisa?

¹⁴ Tin un otro paso importante cu bo mester dal prome cu bo batisa. Bo tin cu dedica bo mes na Yehova Dios.

15, 16. Kico dedica bo mes na Dios ta nifica, y kico ta motiva un persona pa haci esaki?

¹⁵ Ora bo dedica bo mes na Yehova Dios den un oracion  sinsero, bo ta priminti di dun’e debocion exclusivo pa semper. Pero dicon un persona lo kier haci esei? Wel, supone cu un homber ta cuminsa enamora un mucha mohe. Mas e homber siña conoc’e y mira e cualidadnan excelente cu e tin, mas atrai e ta sintie na e mucha mohe. Cu tempo, ta natural cu lo e pidie pa casa cu ne. Ta berdad cu door di casa e homber lo tin cu bai carga mas responsabilidad. Pero amor lo motiv’e pa dal e paso importante ei.

¹⁶ Ora bo siña conoce y stima Yehova, bo ta sinti bo motiva pa sirbie sin reserva of sin pone ningun limite den bo adoracion na dje. Ken cu kier sigui Dios su Yiu, Hesucristo, tin cu “nenga su mes.” (Marco 8:34) Nos ta nenga nos mes door di haci sigur cu nos deseonan y metanan personal no ta stroba nos di rindi obediencia completo na Dios. Pues anto, prome cu bo por batisa, e hacimento di Yehova Dios su boluntad mester ta bo proposito principal den bida.—1 Pedro 4:2.

17. Dicon algun hende ta basila pa haci un dedicacion na Dios?

¹⁷ Tin hende ta basila pa haci un dedicacion na Yehova pasobra nan tin un poco miedo di dal un paso asina serio. Nan tin miedo cu nan mester rindi cuenta na Dios como un cristian dedica. Como cu nan ta teme cu nan lo por faya y desapunta Yehova, nan ta pensa cu ta mihor nan no haci un dedicacion na dje.

18. Kico por motiva bo pa haci un dedicacion na Yehova?

¹⁸ Segun cu bo ta haya mas amor pa Yehova, lo bo sinti bo motiva pa haci un dedicacion na dje y haci bo best pa cumpli cu ne. (Eclesiastes 5:4) Despues di a haci un dedicacion, sigur lo bo kier “cana na un manera digno di Señor, pa agrad’e den tur sentido.” (Colosensenan 1:10) Debi na bo amor pa Dios, lo bo no pensa cu  ta mucho dificil pa haci su boluntad. Sin duda lo bo ta di acuerdo cu apostel Huan, kende a skirbi: “Esaki ta e amor di Dios, cu nos ta warda su mandamentonan; y su mandamentonan no ta pisa.”—1 Huan 5:3.

19. Dicon bo no tin nodi tin miedo di haci un dedicacion na Dios?

¹⁹ Bo no mester ta perfecto pa haci un dedicacion na Dios. Yehova conoce nos limitacionnan y nunca e no ta spera di nos mas di loke nos por haci. (Salmo 103:14) E kier pa bo tin exito y lo e sostene bo y yuda bo. (Isaias 41:10) Bo por ta sigur cu si bo confia den Yehova cu henter bo curason, lo e “dirigi bo bereanan” y haci bo caminda stret.—Proverbionan 3:5, 6.

20. Dicon dedicacion na Yehova no por keda un asunto priva?

²⁰ Un cos cu por yuda bo haci un dedicacion personal na Yehova den oracion ta di pensa riba e cosnan cu nos a caba di considera. Ademas, tur hende cu realmente ta stima Dios tin cu haci “declaracion publico pa salbacion.” (Romanonan 10:10, NW) Con bo ta haci esei?

21, 22. Con bo por haci “declaracion publico” di bo fe?

 ²¹ Laga e coordinado di e cuerpo di anciano di bo congregacion sa cu bo kier batisa. Lo e haci areglo pa algun anciano repasa cu bo varios pregunta cu ta abarca siñansanan basico di Bijbel. Si e ancianonan aki ta di acuerdo cu bo ta cualifica, nan lo bisa bo cu bo por batisa na e proximo oportunidad cu lo tin pa haci esei. * Na ocasionnan asina por lo general tin un discurso cu ta repasa e nificacion di bautismo. Na final di e discurso e orado ta invita tur e candidatonan pa bautismo pa contesta dos pregunta simpel como un manera pa nan haci verbalmente un “declaracion publico” di nan fe.

²² Ta e bautismo mes ta loke ta identifica bo publicamente como un persona cu a haci un dedicacion na Dios y cu awor ta un Testigo di Yehova. Candidatonan pa bautismo ta ser hinca completamente bou di awa pa mustra publicamente cu nan a haci un dedicacion na Yehova.

23. Kico ta nifica ser batisa “den nomber di e Tata y di e Yiu y di e spirito santo”?

²³ Hesus a bisa cu su disipelnan lo a ser batisa “den nomber di e Tata y di e Yiu y di e spirito santo.” (Mateo 28:19) Esaki ta nifica cu un candidato pa bautismo ta reconoce e autoridad di Yehova Dios y di Hesucristo. (Salmo 83:18; Mateo 28:18) Tambe e ta reconoce e funcion y actividad di Dios su spirito santo of forsa activo.—Galationan 5:22, 23; 2 Pedro 1:21.

24, 25. (a) Kico bautismo ta simbolisa? (b) Ki pregunta mester di contesta?

²⁴ Sinembargo, bautismo no ta djis un acto di bai bou  di awa. E ta un simbolo di algo masha importante. Bai bou di awa ta nifica cu bo a pone un fin na bo manera di biba anterior. Bin ariba bek for di bou di awa ta indica cu awor bo bida ta cuminsa di nobo pa haci e boluntad di Dios. Corda tambe cu bo a haci un dedicacion na Yehova Dios, no na un obra, na un causa, na hende ni na un organisacion. Bo dedicacion y bautismo ta e comienso di un amistad masha pega cu Dios, un relacion intimo cu ne.—Salmo 25:14.

²⁵ Bautismo no ta garantisa salbacion. Apostel Pablo a skirbi: “Traha riba boso salbacion cu temor y temblamento.” (Filipensenan 2:12) Bautismo ta djis un comienso. E pregunta ta, Con bo por keda den e amor di Dios? Nos ultimo capitulo lo duna e contesta.