Manera bo a siña den e foyeto aki, Bijbel tin hopi principio cu lo yuda tanto abo como bo famia. Jehova kier pa boso ta feliz. E ta priminti cu si boso pone adoracion na dje na prome luga, ‘lo e duna boso tur otro cos.’ (Mateo 6:33) Di berdad e kier pa abo ta su amigo. Pesey, probecha di tur oportunidad pa fortalece bo relacion cu Dios. Esey ta e privilegio di mas grandi cu un hende por tin.—Mateo 22:37, 38.

LOKE BIJBEL TA BISA: “‘Lo mi ta un tata pa boso, y boso lo ta mi yiu hombernan y mi yiu muhernan’, Jehova ta bisa.” (2 Corintionan 6:18) Dios kier pa bo bira su bon amigo. Con bo por logra esey? Wel, bo tin cu haci oracion na dje. Pesey, Jehova ta invita bo pa “haci oracion constantemente.” (1 Tesalonicensenan 5:17) E ta ansioso pa scucha bo preocupacion- y pensamentonan di mas profundo. (Filipensenan 4:6) Ora bo haci oracion cu bo famia, nan ta mira con real Dios ta pa bo.

Ademas di papia cu Dios, bo tin cu scuch’e tambe. Pero, con bo por scuch’e? Wel, bo tin cu studia su Palabra y publicacionnan basa riba Bijbel. (Salmo 1:1, 2) Ademas, bo tin cu medita riba loke bo ta siña. (Salmo 77:11, 12) Y ta importante tambe pa bo asisti regularmente na e reunionnan cristian.—Salmo 122:1-4.

Kico mas bo tin cu haci pa fortalece bo relacion cu Jehova? Bo tin cu papia cu otro hende tocante dje. Mas bo papia di dje, mas fuerte bo relacion cu ne lo bira.—Mateo 28:19, 20.

LOKE BO POR HACI:

• Tuma tempo tur dia pa lesa Bijbel y haci oracion

• Yuda bo famia pone actividadnan spiritual prome cu recreo y diberticion

LOKE BIJBEL TA BISA: “Hala cerca Dios, y lo e hala cerca boso.” (Santiago 4:8) Bo tin cu pone un dia y ora fiho pa boso tene boso programa di adora Dios como famia. (Genesis 18:19) Pero mas ta necesario. Dios mester ta parti di bo bida diario. Yuda bo famia fortalece nan relacion cu Dios. Con? Papia cu nan tocante Dios “ora bo ta sinta den bo cas, ora bo ta cana riba caminda, ora bo ta bay drumi y ora bo ta lanta.” (Deuteronomio 6:6, 7) Bo mester tin e mesun meta cu Josue tabatin, kende a bisa: “Pa loke ta ami y mi cas, nos lo sirbi [Jehova].”—Josue 24:15.

LOKE BO POR HACI:

• Zorg pa bo tin un programa fiho di formacion spiritual, cu ta tene cuenta cu necesidad di cada miembro di bo famia